1, 2. Gini apai aboro asota na ni du paha rogo Bambata Pai, na tipagine du ani ti ni na nyemu ka inopai tipaha?

YA MO mo aberẽnga kurii agu azanga giatise du paha rogo Ziazia Kekeapai yo? Ani wisigingo pai tipa tonatona akapita nga ga Bambata Pai. Kaina imi Abere (Bam. P. 4:3-8); Rameke imi kumba tipa hõga ko (Bam. P. 4:23); ga Abarayama ababanda akandoro (Abarama) na ga Roto yo napaa dagbatiyo (Bam. P. 13:5-7); Agara nabisirapa Sara (Sarai), na rago ki gberẽ ti Sara na Abarayama (Bam. P. 16:3-6); Yisamaere atumba beko kuti aboro na aboro ki tumba beyo kutiko.—Bam. P. 16:12.

² Tipagine Ziazia Kekeapai afura ti ni tipa ngbatunga agu akpakarapai re? Ndupai sa nga si naundo kpakpa aboro i wiriki ndu gupai si aida i banda zereda ti ni. Na si nayugo gu gene a rengbe ani ka manga gipai re ngbaha. Ani nagbia undo ti geda ani agu apangbanga nga ga Ziazia Kekeapai du tipa ndikidi aboro naasota na ndikidi akpakarapai. Ani nawirikapai ti surungba gayo manga ome na rogo gi gene re ani ki rengbe ka manga wakina yo tipa gu kura apai ani agbiatirani na ni. Nirengo, agi apai re dunduko naundo rani ani ini ka mangapai kuti ngbatunga gupai re na ki ne gu si aidanga ani mangihe ya.—Rom. 15:4.

3. Gini apai gi kekeapai re nika sakapai tipaha?

 ³ Gi kekeapai re nika wisigopai tipa wai rengbe ga Yekova amoyambu ka nyasariipa azanga giatise na wai rengbe yo kadu na diabese rogo mangaha. Kurigure, si nika fura fuyo tipa agu arugute nga ga Ziazia Kekeapai rengbe ka undo yo i mangipai kuti akpakarapai na ki banda wene pagume dagbayo na gayo amurakporo gbiati Yekova Mbori.

4. Gini bipai gbataka rogo zegino dunduko, na sangbanaha nga gine?

⁴ Satana nga mburu agu akpata gbiati azanga giatise na kura dagba aboro. Edene yo, ko aya aboro ni basasa rengbe arengba ka diaberã tipa tiyo tipa gupai du ni wenehe gbiati gu du ni gbegberẽhe zanga Mbori. (Bam. P. 3:1-5) Ani nabi surungba gupai re abi areme. Zegino ima hi be agu aboro du na gu sino tiyo nga, ka boro penga gupai funi si aida ni mangihe ya, nga gu naye na rukö, kiisopatise, gbiati asogote. Gu boro nambupa ti ni fu gu ngbatunga bipai re, gure nga ni idi kuti ga Satana bipai nga ruhe aru boro mangi gupai ngba tiní ka si vura du vurũ nga si ima rengba ka imisa kura aboro. Gu ngbatunga nga ga gbangbati re naye na akpata. Si ni wenepai ani tingidi gupai nga, ga “boro zinga nazingisa kpata, gu boro fu tini sa zinga nakusa pa dungu samungu.”—Snz. 29:22.

5. Wai du Yesu ayugupai fu aboro tipa i ini wai ka nyasariipa azanga giatise?

⁵ Ono tipa Yesu tigako, ko ayugupai fu aboro i gbata zereda, ka si vura du nga pa mangaha rengbe arengba ka gbarasapa gupai i akpinyemuhe. Rogo ga Yesu tungusapai naadu rii bagangara yo, ko afu wene rugute tipa wai ka nyasariipa azanga giatise watadu agu apai rengbe ka ye na akpakarapai. Ni kpiapai, ko azungodi gako abawiriki i du ni bayee aboro, ni aboro zereda, na i mbu agu apai rengbe ka sayo i zingi, ka nyasariipa akpakarapai ni ipo, na i kpinyemu avurayo.—Mt. 5:5, 9, 22, 25, 44.

6, 7. (a) Tipagine duhe ti ni ni nyanyakipa pai ka nyasariipa azanga giatise ni ipo? (b) Gini asanahe si aida ga Yekova aboro sana tiyo na ni?

⁶ Ka si du nga ani aidanga kadu na pazereda dagbarani na kura aboro te, sunge dunga ti gu ome ani amangaha tipa ka mangasunge fu Mbori, ka kpara fuko, ka ndu sa adunguratise, ka tungusapai, gbiati gu kura apai ani amangaha tipa gaani irisombori te. (Mk. 11:25) Ka si dunga ani na nyemu ka mbupai fu kura aboro tipa gayo aingahe te, ani arengbanga kadu ni abakurea Mbori te.—Oni gedi Ruka 11:4; AEfeso 4:32.

⁷ Si naida aKristano ni basasa berẽ wenengai tipa mbupai fu akurayo na kidu na pazereda nayo. Ya mo mo naambupai fu akuaro aidipase kina boro ngbaduroyo? Ya mo mo nidu na ngbarago tipa ka koda tiro nayo? Yekova naida gupai nga gako amoyambu nimbupai ambu fu aboro. Ka si du nga sangbakpotoroyo nape gupai foro nga si naida mo mangi ariapai rogo gi bangiriba re, mo kpari fu Yekova na ki gbata gako undo tipa ka mangaha! Gu Barani du ngbangbaturũ yo nika degatuko adega kuti gu ngbatunga kparakpee nga ga umbasitise re.—1 Yo. 5:14, 15.

8, 9. Ginipai si aida ani mangihe ka boro mangi rani na gbegberẽpai?

⁸ Wa duhe nga aboro dunduko nga kpakpa aboro, boro ima rengba ka fura foro gbegberẽ watadu ka manga ro na gupai du ni gbegberẽhe awere watadu kumbatayo. Gipai re ba nehe ti ni te. (Batu. 7:20; Mt. 18:7) Wai du rengbe mo ka mangapai kuti gipai re? Ani bingo gupai namangi ho gipai re amangi ni: Ti regbo sungo sa nga ga aDezire Yekova, kura wirina sa ni dee afu sene fu awirina ue ni akumba rogo gu gene gu kura ko sa abihe nga si angbanga te. Ho agu awirina re adu ni nisayo, gu ko rago agbere tiko atona ka  bisirapa gu wirina re tipa gupai ri apehe. Ono tie, gu kura ko atingidi ko na gupai nga ri ima mangasunge fu Yekova niruru ri rogo kpakaraapai tipa agarã 40; ko na kido nga ri naaberãnga gbegberẽpai te. Tingbafuo ko berẽkurii gipai re tipa bete regbo, ko aya, “Rengo du pe mo re.” Ni sangbanaha, gipai re aandunga kumbatayo berewe te.

⁹ Ginipai gipai re ayugoho? Kina ro rengbe ka sia gu gene rengbe mo ka mangapai ngbaha kuti gu gbegberẽpai i namangi ro na ni. Boro nyemuse na oka rukutu tiandika aoka. (Oni gedi Asanza 10:12; 1 Petero 4:8.) Yekova nabihe nga “ngba ha angba” tipa ani “mbu pa tiandika.” (Snz. 19:11; Batu. 7:9) Gu bambata sanahe si aida mo sana tiro na ni ho boro namangi ro ni na pai nga, ‘Ya mo mi rengbe ka mbupa gupai re? Ya mo si naida mi sa gupai re ni bakerepai nzunzu?’

10. (a) Wai du kura wirina sa amangipai mbata kuti gu gbegberẽpai aboro aapehe tipa ri? (b) Gini arugute nga ga Ziazia Kekeapai naundo ri ri banda pazereda?

¹⁰ Si ima kpakarapai ka bi gu gbegberẽpai boro namangi rani na ni gbua taata. Ani bingo gupai naadu tipa gu nazakigene ani ayamba rimori nga Lucy. Aboro afura gbegberẽ tipa gari sunge tungusapai gbiati gu regbo ri adiaha gene tungusapai yo. Lucy agbata undo be agu awirina ni aKristano naima nyaka rogo toro yo. Ri aya: “Agu arugute i afuhe fere rogo Ziazia Kekeapai aima undo re mi du na ruru bipai tipa gu bipai nga ga kura aboro na mi moi berãre fuo gu boro nyakipa ni gbe nga Yekova.” Lucy aima gbia undo ti geda Matayo 6:1-4. (Oni gedihe.) Gu papara Ziazia Kekeapai re atingidi ri na gupai nga si naida pa sa ngbarago ti Yekova du ni gari sasa. Ri aya: “Ka kura aboro vura fura gbegberẽ tipa gupai mi amangaha, mi nadu na ngbarago, mbiko mi ima inoho nga mi namanga bakere asadatise tipa ka sa ngbarago ti Yekova.” Fuo Lucy dati gi digisopai re, ri asia ka zanga berãkurii gu gbegberẽ apai aboro aapehe tipa ri.

11, 12. (a) Wai du si aida Kristano mangipai ka nibihe nga ‘pai dagba ni na wirinani’? (b) Ginipai ani awirikaha ti gu gene Abarayama amangipai ngbaha sa kpakaraapai? (Oni bi gu sura du ti tonatonaha.)

¹¹ “Ani nakota dunduko rogo dungu apai.” (Yak. 3:2) Ka mo bihe nga wirina aima kota be gupai mo amangihe watadu gumbaha, ginipai ka mo mangihe? Yesu aya: “Ka mo agama ga gamahe bamotumo yo, mo ki tingidi he si ngia pai dagba roni na wirinamo, mo ki he ga gamahe barangba bamotumo yo, ki guari, mo ki mbakadi pai dagba roni na wirinamo mbata, mo nikaye ka gama ga gamahe.” (Mt. 5:23, 24) Ringbisihe kuti gi ga Yesu arugute re, mo fura na wirinamo. Mo bi gupai si aida mo mangihe. Anga si tipa ka bira ni te ono ka ida gamo ingahe na tipa ka ye na zereda. Padu ani na zereda dagbarani na awirinarani nyakipaha kisusi kura apai dunduko.

¹² Gu pangbanga nga ga Ziazia Kekeapai du tipa Abarayama na Roto nga gu kpiapai nayugopa wai gu ga Mbori amoyambu re anyasiriipa kpakarapai rogo pazereda. Agi akumba ue re dunduko naadu na zogozogo anya beyo, na si nawira wa gayo ababanda anya aima paya dagbatiyo riipa ba riga anya. Wa Abarayama adu na nyemu ka nyasariipa gu kpakarapai re, ko ambugene fu Roto ko mangi siapai mbata tipa gu ba rengbe gayo aborokporo ka raka rogoho. (Bam. P. 13:1, 2, 5-9) Nangba gu wene kpiapai re! Abarayama agbata zereda, angianga gupai ko aakpinyemuhe ya. Ya mo gure nga apai aima gberã fuko mbiko gu wene sino ko ayuguhe re? Wagusa te. Nibasa fuo gupai namangi dagbatiyo na Roto re, Yekova akido Abarayama tipa bakere maku. (Bam. P. 13:14-17) Mbori arengbanga ka mbu gako amoyambu i rungo nyeanye  kindi mbiko mangayo pai ringbisihe kuti gako arugute gbiati nyasa yo riipa azanga giatise rogo nyemuse yo te. ^[1]

13. Wai du bangerekuriisunge sa amangipai kuti gu gbegberẽ afugo i apehe fuko, na ginipai rengbe ani ka wirikaha ti gako kpiapai?

¹³ Ani bingo gu kpiapai du ti gi gaani regbo re. Ho gu vovo bangerekuriisunge nga ga bakere dunguratise ko ayambu kura wirina ni rogo terefuni tipa ka sanako singia ko rengbe ka undo sunge, gu wirina re akaraga kina gbegberẽ afugo fuko na ki kisi gako terefuni. Ko aima kpipai kuti gu wirina naangerakurii sunge ho mbata. Gu vovo bangerekurii sunge re aazinganga nibasa te, ono ko aabingo gupai re a na taatapaha te. Fuo susa saa sa kusa, ko ayambuhe berewe, na ki pe gupai fu gu wirina re nga i ata gbianga tiyo na ko mbata te, na ki sanako tipa i gbiatiyo ka nyasariipa gupai re. Fuo poso sa kusa, agi awirina ue re agbiatiyo Bambu Kindo yo. Fuo i mangi kparakpee, i afura tipa saa sa, na ti gu regbo re, gu wirina re ape gupai fuko dunduko naamanga. Fuo gu vovo bangerekuriisunge re degetuko wenengai fuko, ko agedipai fuko rogo Ziazia Kekeapai, na i ue ki nyasiriipa gayo zanga giatise rogo pazereda. Fuo gupai re ngbutuko, agu awirina re amangisunge sa na ko ki tambua bangerekuriisunge tipa wai ko mangipai nako ngba wene gene.

14, 15. (a) Gini regbo si aida ani mangi agu rugute du rogo Matayo 18:15-17? (b) Gini agene mbakadapai dagbase biata Yesu afura tipaha, na si naida gaani sasa du nga gine rogo mangaha?

¹⁴ Si naida kina agu aboro du pai dagbatiyo nga aKristano nyasiriipa gayo azanga giatise dagbatiyo. Ono tie, Yesu ape gupai nga gu kura apai kinaho niima rengba ka sa gupai nga dungurati rimi ku rogoho. (Oni gedi Matayo 18:15-17.) Ginipai rengbe ka manga ka si du nga gu boro i namangi ni na gbegberẽpai aidanga ka degatuni fu wirinani, fu  adezire, na fu dungurati te? Si naida i bi ni “wa Gendiria na barogo marã ngbeti.” Areme, ani rengbe ka ya i kusi ni kusayo rogo dungurati. Pa nyaka gipai re nayugo gupai nga gu ‘ingapai’ re aadunga nga kungbo zanga giatise te. Kuba gure, si angia (1) gu ingapai ka kina agu aboro re arengbe arengba ka nyasariipa ha ono si kingia (2) gu ingapai a niima rẽ tipa i kusi boro kusayo rogo dungurati tipaha ka si du nga i anyasanga riipaha te. Ngbatunga gu ingapai re rengbe ka koda biriki watadu ka koda gbarasa wene rimo boro vurube gumbarimo yo. Agu agene mbakadapai dagbase biata Yesu afura tipaha re namangasunge sa kinaho agi apai re amanga ni. Gu gbegberẽ mangapai re akodanga gu ngbatunga ingapai duwa bäri, kodaba kumba na kumba watadu dee na dee, samungu kuti ndikidi pambori, irisokpiahe, watadu gu kura kere aingapai nga gu naida agu abaakumba nga ga dungurati bipai tipaha te.

¹⁵ Gupai Yesu afu gu rugute re ti ni adu tipa ka undo wirina rogo nyemuse yo. (Mt. 18:12-14) Ni bambatapai, gupai si aida aboro mangihe nga ka asada ka mbakada gupai re zanga rimiso kura aboro ku rogoho. Si rengbe kadu ni wenehe tipa ka wisigopai dudunguro na gu boro mangi ingapai re bara dunguhe. Ka si akusanga rurupai ya, mo fura na gu boro ingipai kuti ro re ku bangiri gu kura adezire inipai tipa gupai re watadu gu kura aboro rengbe ka ngera ku rogoyo tipa ka ino singia gbegberẽpai ho mangi. Kangia i undo roni oni ki nyasiriipa gupai re, gure nga “mo gbe wirinamo fuo ro.” Si naida boro ndu na pai fu abaakumba sa kina gu ka si du nga ni ima asada bara dunguhe ka undo gu boro re ka gene adunga ya.

16. Ginihe nayugo na ni nga mangapai kuti ga Yesu arugute ni bawenehe na ni pa nyemuse?

¹⁶ Ngenga agu apai rengbe ka sa gupai nga awirina mangi agu agene mbakadapai dagbase biata du rogo Matayo 18:15-17 re dũ te. Si ima ngba ka inoho wo, mbiko gu boro ingipai ni naruga tiní na pa gani ingahe na ki mangi ariapai mbata fu si da ti gu bangiriba nga i kusi ni kusayo rogo dungurati mbiko zanga saberã. Dedede, gu boro ingipai nabi gani ingahe na ki asadi ka mbakadaha. Gu boro ni naingipai kutini re rengbe ka bihe nga ndupai ho berewe tipa ni du na pai kutini te na ki rengbe ka mbupai funi. Ka si vurangia kina gini pai du, afugo Yesu nayugo gupai nga si aidanga dungurati guagu nibasa ka rimiso tihe ku rogo gu kpakarapai du dagba aboro te. Abaakumba rengbe ka rimiso tiyo sa ku rogoho kina gu ka si du nga agu adiandue ue re ima manga na ka si du nga nyanyaki ndupai kinaho nayugo gupai nzunzu mangi.

17. Gini amaku ani ka gbiaha ho ani “gbáta zereda” ni dagbarani na akuarani?

¹⁷ Wa ani kaa raka rogo gi zegino re, aboro nika duadu na zangarengba na i nikaa inga ainga kuti rani ti aregbo dũ. Rẽhe arẽ tie ka bi gupai gu bawiriki nangia Yakoba akehe ki ya: “Ka boro akota nga rogo fugoni ya, ni du ni ziazia boro, rengbe na ruga kpotoni dunduko a.” (Yak. 3:2) Tipa ka mbakada gaani azanga giatise, ani duwa ka ani “gbáta zereda, ki dusia ha.” (Tam. 34:14) Ka ani ngia aboro zereda, ani nika du na wene pagume dagbarani na akuarani aidipase na kidu na kodatise rogo dungurati. (Tam. 133:1-3) Kurigure, ani nika du na wene pagume na Yekova nga gu “Mbori nga ga zereda ko.” (Rom. 15:33) Agu aboro nagbia agu amaku re nga agu aboro nambakadapai dagbatiyo rogo nyemuse yo.