Testigos xtuny Jehová guirá ór racaʼ galrrasuidy ni sieed de Dios. Scuel reʼ ni rasacgoluʼ noʼni par buñ ni riodieʼ né rony xchiin Gobierno xtuny Dios né par gonyibu láani galán (2 Timoteo 4:5).

Scuel par ni Raxal Néz. Órni toib herman ni raxal néz ni rony setent ór ma bisaʼ toib íz, ór cú ma labúu tzeebu scuel ni racla xhoop govitz né ndeʼ racni Lagary ro radop testigos xtuny Jehová ni noʼ gahx. Scuel reʼ racni par gacnéni layibu guibigaxyibu Jehová, par gonyibu xchiinyibu más galán né par diti guisianyibu gonyibu xchiin Jehová.

Scuel par ni Raniʼ Xtiitz Dios. Scuel reʼ raclani chop beʼo né noʼni par guisuidyni herman ni raxal néz ni ma nap xidzú íz ló dxiinreʼ, né noʼ puext guisian ro rabés par tzee stoib lagary ronoʼ buñ ni ná guisuidy de Jehová. Layibu náyibu xomod ná texto reʼ, «¡Reʼ noʼya bixel ná!». Layibu ronyibu xomod buny Jesús ni gosaa goniʼ xtiitz Dios (Isaías 6:8; Juan 7:29). Órni rieeyibu stoib lagary par cuésyibu raduidyni diitz que rioʼ ór ratzaʼyibu mod nabanyibu. Portín costumbre ni nap buñ lagarycu gadzé mod nacni. Non guiaʼbu galnalaʼ o galnachich, láaca guiaʼbu guábu galrro ni diti nanbu roobu. Láaca sigory raquiin guisuidybu diitz ni raniʼ buñ lagarycu. Scuel reʼ racné a hermano né hermana ni diti ma noʼ tzeʼel né herman ni ma noʼ tzeʼel ni nap 23 a 65 íz, par gacyibu buñ ni natzaay xcalrrien né par gonyibu dxiin galán lagary ro tzeeyibu né modreʼ Jehová né xcudx saquiin layibu más.

Escuela Bíblica de Galaad de la Watchtower. Ló diitz hebreo, Galaad rarexani «Testigo». Dada 1943 más de xhoon mil misioneros goyoʼ ni bixel layibu par guisuidyibu ni ná Dios lagary ni noʼ más sit ló Gudxlio né Jehová gocnégulu layibu (Hechos 13:47). Órni misioneros bidxin gudx Perú diti goyoʼ ni toib congregación gudxcú, nigoreʼ ma noʼ más de tipmil congregación lagarycu. Órni bidxinyibu gudx Japón ni chii Testigos ma noʼ lagarycu. Par ló naareʼ ma noʼ más de chopgayoʼ mil Testigos. Ló gáay beʼo ni racla scuel reʼ nanoy rasuidyibu la Biblia. Herman ni raxal néz ni rony 130 ór o misioneros, herman ni noʼ Betel o ni nac superintendentes de circuito rac galrraiby layibu tzeeyibu scuel reʼ né rasuidyibu nanoy par gacnéyibu né gony animaryibu dxiin ni cayac ló guidopynac Gudxlio.

• ¿Xigony rioʼ Scuel par ni Raxal Néz?

• ¿Chú layibu riee Scuel par ni Raniʼ Xtiitz Dios?