Guirá buñ labúu rasac mod rasac stoib buñ. Doctor Rick Hanson, ni nantzay ximod gac remeidy xpensary buñ, raniʼbu que wal rasacno ni rasac stoib buñ portín «ralnéno láani».

BUNYSI PENSARY: ¿Xigony lóono rasacno modreʼ né nimal yaca? La Biblia rabexa que Dios bisaʼ lóono mod nacbu (Génesis 1:26). Ndeʼ raduidy diitz que labúu gacno xomod láabu, né guislooyno tipnés cualidades sacró. Por ngú órni toib buñ rasac mod rasac stoib buñ, caslooybu que ronladxbu buñ xomod Jehová ni Bisaʼ lóono (Proverbios 14:31).

Dios rasac mod rasacno né diti rasacbu sacró órni cadudyno ló galrrioʼob. Órni israelitas goyoʼyibu xan xomandary buñ egipcios, né dzú gosaayibu ló yoovich por cuarent íz, la Biblia raniʼ mod gosac Dios: «Ló tiemp ni godudyibu ló galrrioʼob láaca bioʼobni láabu» (Isaías 63:9). Cuási cuidad, Dios diti nosi gonbu que xcudxbu cadudy ló galrrioʼob láaca gosacbu galrrioʼob mod gosac buñ israelitas. Láacabu goniʼbu: «Rimbutzaay galrrioʼob ni cadudyto ló» (Éxodo 3:7). Dios ná: «Ni ragan lóoto caganbu bisalóya» (Zacarías 2:8). Scú láani, órni buñ ronynaa lóono nacni suusi cayonynayibu Dios.

Ná rasacno que diti noʼ pu raquiinno o que diti labúu guicaʼno xcalrronladx Dios, la Biblia raiby lóono: «Dios más xiroʼbu que xcalnabanyno né rimbubu guirá cós» (1 Juan 3:19, 20). Dios rimbutzaay lóono más que lóocano. Nanbu guirá ni rasaclono, ni ronyno pensary né ni rasacno, né rioʼbu xalagaryno.

 La Biblia raiby lóono:

• «Looy sacarudxlo, né Jehová sacapy; looy sanablo galrracné né láabu saniʼbu, ¡Reʼ noʼya!» (ISAÍAS 58:9).

• «Portín naʼ nantzaya pensary ni napa par lóoto, ngú ná Jehová, xpensari nacni par guiguaʼto goxt diti par gonyni mal lóoto, par tzoʼ ni guicaʼto ló dzú ni sietra né par gapto esperanza. Né lóoto sacarudxto naʼ né sieedto né saninéto naʼ, né naʼ sacadiaga lóoto» (JEREMÍAS 29:11, 12).

• «Goloʼ nís ni rareʼ bisalóya lainy odre xtunylo. ¿Xí diti caani ló xilibralo la?» (SALMO 56:8).

¿Labúu guicalóno galnagan por ni nanno que Dios rien lóono la? Guibiʼno ni gosaclóo María.

«Nigolú bidopy xcalnabani ni bibiʼya xiinna de 18 íz ximod bunybu xtem cualóbu cáncer por chop íz né goitybu. Xigony nabany buñ ló galrrioʼob né rasaclóo ni gosacloya. Naʼ nigolú bidzuitz né Jehová portín diti gocnébu naʼ.

»Gosaca que Jehová diti binladx naʼ. Xhoop íz después goodxi ni rasaca a ximiga ni noʼ lainy congregación, nigolú buñtzay nacbu né ronladxbu naʼ. Después ni bicadiagbu naʼ por xiroʼ ór, bisetlabu toib texto ni bidxin lainy xcalnabani: 1 Juan 3:19, 20, ro ná que Dios más xiroʼbu que xcalnabanyno né rimbubu guirá cós. Né después golexabu que Jehová rientzaay lóono órni noʼno ló galrrioʼob.

»Ná scú, diti bisian bidzutzi né Jehová. Ór cú biila Salmo 94:19, ni ná: Órni godudy midid goyoʼya ló galrrasaʼ, looy gocnélo naʼ né bisialdólo xcalnabani. Ngú ni merpa goniiny naʼ guicadiaga. Bidxin dzú goodxi Jehová galrrioʼob ni nag lainy xcalnabani né confianz que sacadiagbu né siembu naʼ. Ngú buny que nasaca sacró».

¡Balaati racné lóono ganno que Dios rien né rasac mod rasacno! Per, ¿xigony nogoluʼ galrrioʼob? ¿Cayony castigar Dios lóono por toib galkié ni bunyno la? ¿Sadxin dzú sanitlóbu galrrioʼob la? Guirá galrranabdiitz reʼ sacapyno láani ló árticulos ni sieed.