Don gin ki Margaret * cwinygi bedo yom adada ka nyargi kacel ki jo me gange gubino ka limogi. Pi camgi me agikki, Margaret ma obedo ngat ma okwano lok kom tedo, otedo macaroni ki cheese, dek ma likwayogi aryo-ni gimaro adada.

Ma dano weng gubedo piny, Margaret okelo dek ci oketo i wi meja. I kare ma oyabo wi atabo, wiye ocung adada pien oneno ni onongo tye pig dek cheese malyet keken! Wi Margaret owilo ki medo iye kom dek kikome, ma en aye macaroni! *

Wan ducu watimo bal, kadi watye ki ngec nyo pe, wadongo nyo watino. Romo bedo lok ma waloko labongo tam iye, watimo gin mo maber ento i cawa marac, nyo wiwa owil i kom gin mo. Pingo dano timo gin ma pe atir i kine mogo? Gin ango ma watwero timone ka watimo gin mo ma pe atir? Tika watwero wene ki iye? Bedo ki neno matir i kom bal bikonyowa me gamo lapeny magi.

Ka watimo gin mo maber, cwinywa bedo yom me jolo pwoc ma dano giminiwa pi gin meno maber ma watimo-ni. Ci dong pingo pe myero bene waye balwa ka watimo gin mo ma pe tye atir, kadi bed ni pe watimo akaka nyo jo mukene pe guneno? Wek watim meno, mito mwolo.

Ka wabedo ki tam mukato kare woko i komwa kenwa, ci watwero temme me cayo bal ma watimo, me weyone i wi jo mukene, nyo me kwerone ni pe watimo gin mo marac. Tim ma kit meno pol kare kelo adwogi marac. Meno pe cobo peko mo keken, dok kitwero weyo bal i wi ngat ma pe otimo. Kadi bed ni watwero wene ki i bal ma watimo i kare-ni, ento wiwa myero opo ni “ngat acel acel i kinwa bidok i lok ma i kome pire kene bot Lubanga.”​—Jo Roma 14:12.

Lubanga tye ki neno matir ka odok i kom bal. I buk me Jabuli, ginyuto ni Lubanga “lakica dok maro dano”, dok ni “en pe bibedo ka jukowa kun juyowa kare ducu, kinigane bene pe ri nakanaka.” En ngeyo gorowa dok niang ni dano gitye ki roc, “en po ni wan apwa mamwa.”​—Jabuli 103:8, 9, 14.

Medo i kom meno, macalo wego ma lakica, Lubanga mito ni wan lutinone wanen bal kit ma en neno kwede. (Jabuli 130:3) Lokke miniwa tam ki tira mapol ma twero konyowa ka watimo bal nyo ka jo mukene gutimo bal.

Pol kare ka bal mo otimme, inongo ni ngat moni bedo ka koko i kom jo mukene nyo gengo ngeye pi lokke nyo ticce. Ka lokki ocwero cwiny ngat moni, pingo pe ikwa kica bot ngat ma icwero cwinye-ni wek lokke ogik kenyo. Tika dong itimo gin mo marac ci okelo adwogi marac i kom ngat mukene nyo bene i komi kekeni? Ma ka weko ni cwinyi obed ka cwer, pingo pe itute matek  me yubone? Ka iketo gingi nyo igengo ngeyi ci man biweko tele medde ameda dok weko bal doko dit. Ma ka meno, wek otel iti, opwonyi, dok itim gin ma mitte.

Ka goro pa ngat moni onen ka maleng, pol kare yot tutwal ki wan me cako cimo wang. Ber adada ka walubo tira ma Yecu Kricito omiyo ni: “Kit gin ducu ma wumito ni dano gutim botwu, wun bene wutim botgi kit meno.” (Matayo 7:12) Ka itimo bal, kadi matidine, labongo akalakala imito ni jo mukene guteri i yo maber nyo gutim kica pi balli. Pingo pe itute matek me bedo ki cwiny me kica i kom jo mukene?​—Jo Epeco 4:32.

Dikconari mo acel owaco ni, bal bino macalo adwogi me “ngolo kop alenga, bedo ki ngec manok, nyo cer cing.” Myero wange ni i kine mogo wan ducu watimo nyo wanyuto kit magi. Kadi bed kit meno, bal twero dok piny ka wakwanyo kare me neno cik mogo ma igi lac ki i Ginacoya.

Acel i kingi tye nonge i Carolok 18:13, ma kwanne ni: “Myero kong iwiny lok ma nongo peya igamo lok mo; ka pe, ci inyuto mingngi dok inyayo yet i komi.” Ada, ka kong iciko iti me winyo lokke maber ci dok itamo kit ma myero idok kwede iye, man bikonyi me gwokke ki i jako lok nyo bene daa. Adwogi maber ma wanongo ka waciko itwa en aye, konyowa me gwokke ki i ngolo kop alenga​—ki dok me gwokke ki i timo bal.

Cik mukene ma iye lac waco ni: “Ka ce twerre ki tung botwu, myero wubed ki kuc ki dano ducu.” (Jo Roma 12:18) Tute ki tekki ducu me dongo cwiny me kuc ki note. Ka itye ka tic ki jo mukene, nyut cwiny me kica ki woro dok bene i pwogi kun i cuko cwinygi. Ka dano gikwo kit man, timo kica nyo jalone yot ka ngat mo oloko nyo otimo gin mo marac, ki dok bal mogo madito bene kitwero cayone nyo wekone woko.

Tute me bedo ki neno mupore i kom goro pa jo mukene. Ma ka gengo ngeyi pi ticci nyo lokki, pingo pe itute me dongo kit mabeco. Tika i kare mogo mitte ni idi cwinyi, ibed ki cwiny me kica, nyo ki cwiny me jukke ken? Mwolo, kuc ki mar kono? (Jo Galatia 5:22, 23) Ma pire tek loyo itwero pwonye ki iye wek inge gin ma itwero timone ka gin ma kit meno otimme. Labongo gengo ngeyi, pe iwek cwercwiny oum wangi. Bedo ki cwiny me kica ki jalo jami kelo adwogi maber.

Bedo ki neno matir bikonyowa me lweny ki gorowa. Man weko wa bedo ki kuc i cwinywa dok bene wa ki jo mukene. Ka gin ma otimme-ni otelo itwa, man weko wabedo ki wic makwiri. Dok cwinywa pe bedo ma otur tutwal bene pe wa bedo ki neno marac i komwa kekenwa. Ngeyo ni jo mukene bene gitye ka lweny ki gorogi bikonyowa me bedo ki neno matir i komgi. Ma dong pire tek loyo wabibedo ki kare me lubo lanen me mar pa Lubanga me timo kica bot dano.​—Jo Kolocai 3:13.

Goro pa Margaret ma wa loko iye i acakki-ni, tika obalo limu pa jo me gange? Pe matwal. Margaret ki jo me gange gunyero mere anyera ci gucamo dek ki yomcwiny​—labongo macaroni! I nge mwaki mapol, likwayine aryo-ni gutito ki yomcwiny bot litinogi gin ma yam otimme, dok wigi po i kom jami mabeco ma dadagi otimo. Meno onongo obedo ka wil wic!