La 37:1-40
David la.
א [Alef]
37 O mi mi nɛ ko fu* ngɛ yiwutsotsɛmɛ a he je,Nɛ o hɛ hu nɛ ko kɔ̃ yayami peeli a nɔ.
2 E be kɛe kulaa nɛ a ma gbli kaa nga,Nɛ a ma ngla kaa bɔ nɛ nga mumu nglaa a.
ב [Bet]
3 Ngɔɔ o hɛ kɛ fɔ Yehowa nɔ nɛ o pee nɔ́ kpakpa;Moo hi zugba a nɔ nɛ o ye anɔkuale.
4 O bua nɛ jɔ wawɛɛ ngɛ Yehowa mi,*Nɛ e ma ha mo níhi nɛ o tsui suɔ.
ג [Gimel]
5 Tuu o blɔ ɔ kɛ wo Yehowa dɛ;*Ngɔɔ o hɛ kɛ fɔ e nɔ, nɛ e ma tsu níhi a he ní ha mo.
6 E ma ha nɛ o dami ɔ ma kpɛ kaa mɔtu pu la,Nɛ o dami sane yemi ɔ hu ma kpɛ kaa pu nɛ ngɛ tsoe piani katakata.
ד [Dalet]
7 Pee dii ngɛ Yehowa hɛ mi,Nɛ́ o hyɛ lɛ blɔ wawɛɛ.*
Ke nɔ ko to ga yaya nɛ e nyɛ tsu he ní ɔ,Ko ha nɛ lɔ ɔ nɛ wo o mi mi la.
ה [He]
8 Ha abofu se nɛ po, nɛ́ o ngmɛɛ mi mi fumi he;O mi mi nɛ ko fu nɛ o ba pee yayami.*
9 Ejakaa a ma kpata yayami peeli a hɛ mi,Se nihi nɛ ngɔɔ a hɛ kɛ fɔɔ Yehowa nɔ ɔ, a nine maa su zugba a nɔ.
ו [Waw]
10 E piɛ bɔɔ pɛ nɛ yiwutsotsɛmɛ* be si hie hu;O maa hyɛ a hi he ɔmɛ,Se o be mɛ nae.
11 Se nihi nɛ a he jɔ ɔ, a nine maa su zugba a nɔ,Nɛ a bua maa jɔ wawɛɛ ejakaa a ma ná tue mi jɔmi nitsɛnitsɛ.
ז [Zayin]
12 Yiwutsotsɛ soɔ dalɔ yi nɔ;E kpeɔ e lungu nya kɛ woɔ lɛ.
13 Se Yehowa maa muɔ lɛ,Ejakaa e le kaa e be maa ba.
ח [Het]
14 Yiwutsotsɛmɛ hiaa a klaate ɔmɛ, nɛ a dɔɔ a kɛ̃ɛ̃ ɔmɛKonɛ a kɛ ha nɛ nihi nɛ a waa mɛ yi mi kɛ ohiatsɛmɛ nɛ a nɔ si,Nɛ́ a gbe nihi nɛ a blɔ da a.
15 Se a klaate ɔmɛ maa gbɔ mɛ nitsɛmɛ a tsui mi;A kɛ̃ɛ̃ ɔmɛ maa ku.
ט [Tet]
16 Nɔ́ ko bɔbɔyoo nɛ dalɔ ngɛ ɔHi pe ní babauu nɛ yiwutsotsɛmɛ ngɛ.
17 Ejakaa yiwutsotsɛmɛ a he wami maa ta,Se Yehowa maa ye bua dali.
י [Yod]
18 Yehowa le nɔ́ nɛ nɔ nɛ piami ko be e he ɔ ngɛ mi gblee,*Nɛ a weto ní maa hi si kɛ maa ya neneene.
19 A hɛ mi be si puee ngɛ haomi be mi;Hwɔ be mi ɔ, a ma ná ní babauu ma ye.
כ [Kaf]
20 Se yiwutsotsɛmɛ a hɛ mi ma kpata;Yehowa he nyɛli maa laa kaa bɔ nɛ nga mumu nglaa a;A maa laa kaa lasuku.
ל [Lamed]
21 Yiwutsotsɛ paa nɔ́, nɛ e wui,Se dalɔ mi mi jɔ,* nɛ e haa nɔ nɔ́.
22 Nihi nɛ Mawu jɔɔ mɛ ɔ, a nine maa su zugba a nɔ,Se nihi nɛ e gbiɛ mɛ ɔ, a hɛ mi ma kpata.
מ [Mem]
23 Ke Yehowa bua jɔ nɔ ko blɔ he ɔE kudɔɔ jamɛatsɛ ɔ nane hiami.*
24 E ma nyɛ maa nɔ si, se e be lejɛ ɔ tlɔe,Ejakaa Yehowa maa pɛtɛ e nine he kɛ wo e nɔ.*
נ [Nun]
25 Kɛ je ye nihe mi kɛ ba si ye bwɔmi si nɛ ɔ,I nɛ kaa Mawu kua dalɔ ko gblee,Nɛ e bimɛ hu, i nɛ kaa a ngɛ niye ní* bae.
26 Be fɛɛ be ɔ, e paa nɔ́ ha nɔ faa,Nɛ Mawu maa jɔɔ e bimɛ.
ס [Samek]
27 Je o he kɛ je nɔ́ yayami he, nɛ́ o pee nɔ́ kpakpa,Nɛ o maa hi si kɛ maa ya neneene.
28 Ejakaa Yehowa suɔ dami sane yemi,Nɛ e be nihi nɛ a yeɔ lɛ anɔkuale ɔ kuae.
ע [Ayin]
E maa bu a he be fɛɛ be;Se yiwutsotsɛmɛ a sisi bimɛ lɛɛ, a hɛ mi ma kpata.
29 Dali a nine maa su zugba a nɔ,Nɛ a maa hi nɔ kɛ ya neneene.
פ [Pe]
30 Dalɔ nya tuɔ juɛmi munyu,*Nɛ e lilɛ tuɔ dami sane yemi he munyu.
31 E Mawu ɔ mlaa a ngɛ e tsui mi;Ke e ngɛ nyɛɛe ɔ, e be sanee.
צ [Tsade]
32 Yiwutsotsɛ hwɔɔ dalɔ,Nɛ e hlaa kaa e maa gbe lɛ.
33 Se Yehowa be e he ngmɛɛe kɛ wo jamɛatsɛ ɔ dɛ mi,Nɛ ke e kojo lɛ hu ɔ, e be lɛ fɔ bue.
ק [Kof]
34 Ngɔɔ o hɛ kɛ fɔ Yehowa nɔ nɛ o nyɛɛ e blɔ ɔ nɔ,Nɛ e ma wo o nɔ konɛ o nine nɛ su zugba a nɔ.
Ke a kpata yiwutsotsɛmɛ a hɛ mi ɔ, o maa na.
ר [Resh]
35 I na nɔmlɔ yayami ɔ nɛ ji yiwutsotsɛ ɔ,Nɛ́ e ngɛ si hae kaa tso nɛ bɔ kusuu ngɛ zugba nɛ e puɛ ngɛ nɔ ɔ nɔ.
36 Se si kake too ɔ, e laa nɛ a nɛ lɛ hu;I ya nɔ nɛ i hla lɛ, se i nɛ lɛ.
ש [Sin]
37 Moo to nɔ nɛ piami ko be e he* ɔ he hɛ,Nɛ́ o hɛngmɛ nɛ hi dalɔ he,Ejakaa jamɛatsɛ ɔ ma ná tue mi jɔmi hwɔɔ se.
38 Se a ma kpata nihi tsuo nɛ a tɔ̃ɔ mlaa nɔ ɔ a hɛ mi;A ma kpata yiwutsotsɛmɛ a hɛ mi.
ת [Taw]
39 Dali a yi wami hemi jeɔ Yehowa ngɔ;Lɛ ji a wesa he ngɛ haomi be mi.
40 Yehowa maa ye bua mɛ nɛ e ma kpɔ̃ mɛ.
E ma kpɔ̃ mɛ ngɛ yiwutsotsɛmɛ a dɛ mi, nɛ e ma he a yi wami,Ejakaa a sa we ngɛ e ngɔ.
Sisi Ningmahi
^ Aloo “O mi mi ko wo la.”
^ Aloo “Mo nya ngɛ Yehowa mi.”
^ Ngɛ Hebri gbi mi ɔ, “Kpɛne o blɔ ɔ kɛ fɔ Yehowa nɔ.”
^ Aloo “Nɛ́ o to o tsui si kɛ mlɛ lɛ.”
^ Baiblo komɛ de ke “O mi mi nɛ ko wo la, ejakaa awi yemi pɛ lɛ jeɔ mi kɛ baa.”
^ Aloo “yayami peeli.”
^ Ngɛ Hebri gbi mi ɔ, “le nɔ nɛ piami ko be e he ɔ ligbi ɔmɛ.”
^ Aloo “naa nɔ mɔbɔ.”
^ Aloo “E haa nɛ ke jamɛatsɛ ɔ hia e nane ɔ, e maa si saminya.”
^ Aloo “Yehowa kɛ e nine yeɔ bua lɛ.”
^ Aloo “abolo.”
^ Aloo “Dalɔ tuɔ juɛmi munyu ngɛ e nya he.”
^ Aloo “nɔ nɛ hɛɛ e we anɔkuale yemi mi.”