Biblia feipicünui ñi chumngeal pu che ca chem ñi rupayal mapu meu. Tüfa quelluaiñmu ñi quimal taiñ mülen ti afaelchi antü ca taiñ ngüneduamal ñi püllelepan “ñi afal mapu meu müleyechi dungu” (Mateo 24:3; Daniel 8:19; 2 Timoteo 3:1).

 Biblia feipicünui fentren dungu ñi quiñentrür femtripayal afaelchi antü mu (Lucas 21:7). Tüfa ta quiñeque:

 Müleai aucan com mapu mu. Jesús feipi: “Quiñe troquiñche hueichayafi cangelu troquiñche, ca quiñe gobierno hueichayafi cangelu gobierno” (Mateo 24:7). Ca Apocalipsis 6:4 mu, ti aucan adentulei quiñe püracahuellulechi che “ñi müntuñmayafiel ti tüngün mapu meu”.

 Müleai ta ngüñün. Jesús feipi ñi müleal fentren filla (Mateo 24:7). Biblia feipi cangelu püracahuellulechi che adentulei ñi müleal fentren ngüñün com mapu püle (Apocalipsis 6:5, 6).

 Müleai ta fütraque nüyün. Jesús feipi ñi rupayal “fütraque nüyün” com mapu mu (Mateo 24:7; Lucas 21:11). Tüfachi fütraque nüyün trürlayai ta caquelu, doi fentren che cutrancahuai ca layai.

 Müleai ta fentren cutran. Jesús feipicünui ñi müleal “fill huesaque cutran” (Lucas 21:11).

 Müleai fentren huesaque dungu. Rumel mülequei huesaque dungu, huelu Jesús feipicünui tati afaelchi antü mu doi amuleai ti huesaque dungu (Mateo 24:12).

 Pu che rume huesalcayafi chi mapu. Apocalipsis 11:18 feipicünui pu che ñi huesalcayafiel ti mapu. Feipilei ñi mülenoal quehuatun dungu ca corrupcion müten, doi mai huesalcayafiel epe fill mongen mülelu mapu meu.

 Pu che amulerpuai tañi huesa chumngen. Biblia ca feipilei ñi chumlerpual tati pu che mapu meu, “allcütulayafingün tañi fütaqueche, quim mañumlayai, quisucünuafi engün tañi chafche [...], pilayai ñi cümelcautual caquelu che engün, dallucafengeaingün, quim ngünenieulayai engün, rume illcufengeaingün, piuqueyelayafi ti cümeque dungu engün. Huesalcayafi quisu tañi pu hueni engün, inayai quisu tañi pin engün, rume mallmangeaingün” (2 Timoteo 3:1-4). Re huesaque chumngen nieai ta che, tuteulayaingün, feimu Biblia feipi “müleai cüdaungechi dungu ca cuñihun-ngeai ta mongen”.

 Quiñeucülehuelayai pu familia. Biblia feipicünui fentren pu che “piuqueyelayafi engün” quisu tañi pu familia. Ca tañi pu pichiqueche ca huechequeche “allcütulayafingün tañi fütaqueche” (2 Timoteo 3:2, 3).

 Pu che piuqueyehuelayafi ta Chau Dios. Jesús feipicünui: “Epe com che niehuetulayai piuqueyehun” (Mateo 24:12). ¿Chem pin am tüfa? Jesús cüpa feipi epe com pu che poyehuelayafi ta Chau Dios. Biblia ca feipi ti afaelchi antü mu, tüfachi pu che “doyümnieafingün tañi cüme rupaleal müten, huelu doyümlayafingün ta Chau Ngünechen” (2 Timoteo 3:4).

 Femfaluuquei ñi püramyeafiel ta Chau Dios. Biblia feipicünui pu che ñi femfaluhual ñi poyeafiel ta Dios, huelu cüme quimfali tañi feingenon (2 Timoteo 3:5).

 Biblia ñi feipicünuelchi profecia doi cüme adümfalngerpuai. Ti Biblia feipi tati afaelchi antü, fentren pu che doi cüme quimürpuai Biblia ñi feipilen. Por ejemplo, feipicünui ñi cüme quimfalngeal ti profecia tüfachi antü meu (Daniel 12:4).

 Biblia ñi cümeque dungu quimelngeai com mapu meu. Jesús feipi: “Tati cümeque dungu Chau Dios ñi ngünenietual ta mapu amuldungungeai huall mapu püle” (Mateo 24:14).

 Pu che ayülayafi Ngünechen ñi dungu ca ayentuafi. Jesús feipi pu che ngüneduamlayai ñi fülcülepan afaelchi antü (Mateo 24:37-39). Feica müten no, ca feipi pu che ayentuafi Biblia ñi feipin ca feyentulayafi (2 Pedro 3:3, 4).

 Com ñi feipicünuel Biblia femtripayai. Jesús feipi com tüfachi profecia ñi quiñentrür femtripayal afaelchi antü meu. Quiñeque profecia müten no, com rüfcünu femtripayai (Mateo 24:33).

 Feingei. Com tüfachi dungu rupamequelu mapu mu ca Biblia ñi feipicünuel, pengeli ti afaelchi antü coni 1914 tripantu mu. Tüfachi tripantu coni ti Primera Guerra Mundial. Pefinge cüpalechi video ca ngüneduamnge chem ñi rupamequen mapu meu quimfali taiñ mülen afaelchi antü meu:

 Feichi 1914 tripantu mu, Dios tañi Gobierno coni ñi ngünenieal huenu mu. Quiñe hunen dungu ñi femün, huemünacümpafi Huecüfü ca tañi huesaque püllü mapu meu. Fei elungei ñi femal fill huesaque dungu huelu mapu meu müten (Apocalipsis 12:7-12). Com ti huesaque dungu ñi femqueel pu che quimfali Huecüfü ñi adnieteu. Feimu pichilehuechi antü mu ‘mülei cüdaungechi dungu ca cuñihun-ngei ta mongen’ (2 Timoteo 3:1).

 Fentren pu che cutrancaumequei feula taiñ mülen cüdaungechi antü meu. Fill raquiduamcülei ñi amulen pu che ñi huesa mongen. Quiñeque che llicaquei cütu ñi hueluconque apümcahual.

 Caquelu che tunte fill raquiduamcülefui rume, huelu niei maneluhun cüpalechi antü meu. ¿Chumngelu? Rüf feyentulei pürüm Chau Dios ñi Gobierno cümelcacünutuafi com tüfachi huesaque dungu (Daniel 2:44; Apocalipsis 21:3, 4). Ñochi duam mu, üngümniei Dios ñi feipicünungeelchi dungu, yafüluucülei Jesús ñi feipin mu: “Tuchi nehuentulele puule ñi afal ti müleyechi dungu mapu meu, fei engün montuai” (Mateo 24:13; Miqueas 7:7).