1. ¿Kuna jan walinakansa jaqenakajj uñjasipjje?

JEHOVÁ DIOSAJJ janiw chuymankipstasin tʼaqhesiñas munkänti. Jan ukasti Paraison jan usuntasa sum jakasipjjañaswa munäna. Ukampis jichhürunakanjja, “Diosan lurat oraqejj wal tʼaqhesiski, kunjämtejj mä wawachasir warmejj warariski ukhama” (Rom. 8:22). Juchajj jaqenakar jan walinakan uñjasiyatapatjja, ¿kunjamsa Diosajj jikjjataspacha? ¿Kamsasmasa? Walja chuymankipstat jaqenakaw ukham jikjjatasipjjatapat yanap munapjje, ukampis ukhaw jaytanukut uñjasipjje (Sal. 39:5; 2 Tim. 3:3).

2. ¿Kunatsa cristianonakajj chuymankipstat jilat kullakanakan utjatapat wal yuspärapjje?

² Jehová Diosar yupaychirinakajja, tamanakasan chuymankipstat jilat kullakanak utjatapat wal kusistanjja. Jupanakan experienciapajj yanaptʼistuwa ukat iyawsäwinakapas walirak chʼamañchtʼistu. Jiwasanakat waljaniw uka jilat kullakanakan familiaranakapäpjjtanjja. Ukampis familiaranakasäpasa janisa, jupanakan sum jikjjatasipjjañapat taqeniw llakistanjja (Gál. 6:10; 1 Ped. 1:22). Ukhamajj Jehová Diosajj kunsa chuymankipstat jilat kullakanakat amuyi uk yatjjatañaw yanaptʼistani. Ukat kunsa familiaranakapasa ukat tamankirinakas lurapjjañapa ukwa yatjjataskarakiñäni.

3, 4. 1) ¿Kunsa Salmo 71 qellqerejj Jehová Diosar mayisïna? 2) ¿Kunsa tamankir chuymankipstat jilat kullakanakajj Diosar mayisipjjaspa?

³ Salmo 71:9 qellqatajj akham siwa: “Janikiy chʼama qarit toqer jiskʼachistati, chʼamajjajj tukusiskiwa, janikiy jaytanukustati” sasa. Amuyatajja uka arunak David chachaw qellqpachäna. Jupajj waynitutpachaw Diosar servïna, ukat Jehová Diosajj wali aski luräwinakwa churäna (1 Sam. 17:33-37, 50; 1 Rey. 2:1-3, 10). Ukhamäkchïna ukasa, Jehová Diosajj jupar wali askit uñjaskakiñapataki, ukat bendiciskakiñapatak mayiñajj wali askïtapwa amuyäna (Salmo 71:17, 18 liytʼañataki).

⁴ Davitjam walja jilat kullakanakaw tamanakasan utji. ‘Chʼama tukuña urunakansay’ chuymankipstatanakajj jikjjatasipkchejja, kunjjay Jehová Diosar yupaychañan lurirjamäpjjchi ukwa lurapjje (Ecl. 12:1-7). Jupanakat waljaniw kunanaktï nayrajj lurirjamäpkäna uk jan lurirjamäjjapjjeti, sañäni: Diosan Arup yatiyir janiw sarirjamäjjapjjeti. Ukampis Davitjamaw Jehová Diosarojj bendicitäskakiñataki ukat Jupamp sum uñjatäskakiñatak ruwtʼasipjjaspa, Jupajj mayisitanakap istʼaniwa ukat janiw pächasipjjañapäkiti. Ukham lurasajj kuntï Davitajj Diosan amuytʼayatäsin mayiskäna ukwa lurasipki.

5. ¿Kunja askitsa Jehová Diosajj Jupat jan jitheqtir chuymankipstat jilat kullakanakarojj uñji?

⁵ Kunjamtï Bibliajj qhan siskejja, Jehová Diosajj Jupat jan jitheqtir chuymankipstat jilat kullakanakarojj wali askitwa uñji, ukat Jupar servirinakajj jupanakar jachʼar aptapjjaspa ukwa munaraki (Sal. 22:24-26; Pro. 16:31; 20:29). Levítico 19:32 qellqatajj akham siwa: “Jilïri jaqenak nayraqatansti saytʼasisina jupanakarojj mä suma ajjsartʼaña uñachtʼayarakim. Tatitu Diosamaru ajjsartatamsa uñachtʼayarakim. Nayätwa Tatitojja” sasa. Cheqas uka arunak qellqaskäna ukhajj chuymankipstat jilat kullakanakar jachʼar aptañajj wali wakiskirïnwa, jichhürunakansa ukhamäskakiwa. Ukhamajj ¿khitinakas jupanakar uñjapjjañapa? Ukat ¿khitinakas kunanakatï jupanakar churañajj wakiski uk churapjjañaparaki?

6. Awk taykanakar uñjañ toqetjja, ¿kunsa Jesusajj qhanstayäna?

⁶ Diosan Arupajj akham sistuwa: “Awkimaru, taykamaru jachʼañcham” sasa (Éxo. 20:12; Efe. 6:2). Kunapachatï fariseonakasa ukat ley yatichirinakas awk taykanakapar jan yanaptʼañ munapkäna ukhaw uka arunakajj kunja wakiskiris uk Jesusajj qhanstayäna (Mar. 7:5, 10-13). Uka toqet Jesusajj wali yateqaskayarakiwa. Amuytʼañataki, lawar chʼakkatat niya jiwañampïkäna ukhajja, Juan munat arkiriparuw taykapar uñjañapatak mayïna, amuyatajja taykapajj viudäjjänwa (Juan 19:26, 27).

7. 1) ¿Kuna aski yatichäwsa apóstol Pablojj awk taykanakar uñjañ toqet yatichäna? 2) ¿Kuna toqetsa Pablojj parlarakïna?

⁷ Diosar yupaychirinakajj familiaparuw sum uñjapjjañapa sasinwa Jehová Diosan amuytʼayatäsin apóstol Pablojj qellqäna (1 Timoteo 5:4, 8, 16 liytʼañataki). Kuna toqet parlkasas uk qellqäna uk uñjañäni. Khitinakas taman qollqe toqet yanaptʼa katoqapjjaspa ukwa Pablojj qhanañchaskäna. Nayraqatjja, chuymankipstat viuda warminakarojj wawanakapa, allchhinakapa ukat Diosar yupaychir mayni familiaranakapan uñjapjjañapaw waktʼi sasaw sum qhanstayäna. Ukhamatwa qollqe toqet yanaptʼañajj tamatak jan llakïkaniti sasa. Ukhamarakiw jichhürunakan cristianonakajj familiaranakapar kunantï yanaptʼañajj wakiski ukanakamp ‘yanaptʼapjje’.

8. ¿Kunatsa chuymankipstat awk taykarojj kunjamsa uñjasiñapa uk Bibliajj jan sumpun qhanañchki?

⁸ Awk taykanakajj kuntï munapki ukwa wawanakapajj churapjjañapa. Pablojj Diosar yupaychir familianakatsa parlkchïnjja, mä  cristianojj Diosar jan yupaychir awkiparus taykaparus ukhamarakiw yanaptʼañapa. Kunjamsa awk taykanakapar uñjapjje ukajj mayj mayjäspawa. Akanakanwa mayjäspa: yanap munatapana, kunjamäpkitï ukana ukat jañchi toqen kunjamtï jikjjatasipki ukana. Chuymankipstat yaqhep jilat kullakanakajj walja wawanïpjjewa ukat yaqhepasti mä wawanikiraki. Yaqhepajj gobiernon yanaptʼap katoqapjje ukat yaqhepasti janirakiw yanap katoqapkiti. Ukat yanap munapki ukas mayj mayjäspawa. Ukhamajj chuymankipstat familiaranakapar sum uñjañatak chʼamachasipki ukanakar jiskʼachañajj janiw walïkaspati. Jehová Diosan qellqataparjama kuns amtapjjchi ukjja Jupajj bendicispawa ukat ukham phoqasiñapatakiw yanaptʼaspa, ukhamwa Moisés tiempot aksarojj luri (Núm. 11:23).

9-11. 1) ¿Kuna jan walinakarus yaqhep jilat kullakanakajj saykatapjjaspa? (20 janankir foto uñjjattʼam.) 2) ¿Kunatsa Diosatak sapürunjam irnaqtʼapki ukanakajj kunantï irnaqtʼasipki uk jankʼak jan jaytañ amtapjjañapäki? Mä uñachtʼäwimp qhanañchtʼam.

⁹ Kunapachatï awk taykanakajj jayan jakapki ukhajja, wawanakatakejj yanaptʼañajj chʼamakïspawa. Chuymankipstat awk taykanakan tinkutapata, usuchjasitapata jan ukajj yaqha ukham jan walinakan jikjjatasipjjatapat inas jankʼak uñjir sarañajj wakischispa. Ukat inas jupanakar mä qawqha urunaka jan ukajj walja urunak uñjañajj wakischispa. *

¹⁰ Jaya cheqanakan Jehová Diosatak sapür irnaqtʼapki uka jilat kullakanakatakejj inas suma amtar puripjjañapajj chʼamakïchispa. Betelitanakasa, misioneronakasa ukat tamanak tumptʼirinakas kunantï irnaqtʼapki uk wali askitwa uñjapjje, kunattejj ukajj Jehová Diosan bendicionapawa. Ukampis awk taykanakap usuntapki ukhajj inas akham nayraqat amuyapjjchispa: “Kunantï jichhajj irnaqktan uk jaytjjañasawa ukat utar kuttʼasin awk taykasar uñjañasawa” sasa. Ukampis janïr uk lurkasajja, wali wakiskirïspawa Jehová Diosar mayisiñajja ukat awk taykar uñjañajj wakisipuniti janicha ukwa sum amuytʼasipjjañapa. Janiw khitis Diosan bendicionap jankʼak jaytanukuñ amtañapäkiti, kunattejj janiw uk lurañajj wakiskapunispati. Usuntatapajj inas jan walja tiempökchiniti ukat inas yaqhep jilat kullakanakajj yanaptʼañ munapjjarakchispa (Pro. 21:5).

¹¹ Utapat jayan Jehová Diosar servir pä jila sullkat amuytʼañäni. Maynïrejj Sudamérica toqenwa misionerjam irnaqtʼaskäna, maynïristi Brooklyn (Nueva York) cheqan Jehová Diosan Qhanañchirinakapar Oraqpachan pʼeqtʼasipki ukanwa irnaqtʼarakïna. Kunapachatï awk taykapajj yanap munkäna ukhajja, Japón markaruw awk taykapar uñjir sarapjjäna, ukhamat kunsa lurapjjani uk amuytʼañataki. Sudamérica cheqan jakkäna uka chacha warmejja, kunantï irnaqtʼasipkäna uk jaytasin utapar kuttʼañwa amtapjjäna. Ukat jupanakarojja, awk taykapan tamapankir irpir chuymaninakar sarayki uka jilataw telefonot jawsäna. Irpir chuymaninakajj jupanakkamaw uka toqet parlakiptʼapjjatayna ukat misioneronakjam irnaqtʼasipkakiñapwa munapjjäna. Jupanakajja, uka chacha warmejj kuntï lurapkäna uk wali askitwa uñjapjjäna ukat kunanjjay awk taykapar yanaptʼirjamäpchi ukan yanaptʼañwa munapjjarakïna. ¡Familpachaw ukham yanaptʼañ munapjjatapat yuspärapjjäna!

12. Kunjamsa chuymankipstat awk taykanakapar uñjapjjani ukjja, ¿kunatsa cristiano familianakajj amuytʼasipjjañapa?

¹² Kunjjay mä familiajj chuymankipstat awk taykapar uñjañatak lurapjjchini, taqeniw Diosan sutip wali askit uñjatäñap munapjjani. Jesusajj jakkäna uka tiemponkir religionanak pʼeqtʼirinakjam janipun tukupjjañäniti (Mat. 15:3-6). Kuntï amtktan ukajj Jehová Diosaru ukat tamar jachʼañchañapwa muntanjja (2 Cor. 6:3).

13, 14. Tamanakajj chuymankipstat jilat kullakanakat llakisipjjañapjja, ¿kunjamsa Bibliajj qhanañchi?

¹³ Diosatak sapür irnaqtʼapki ukanakarojj janiw kunjamtï parltʼaniwayktan ukhampun taqenejj yanaptʼapkaspati. Ukampis Diosat jan jitheqtir chuymankipstat jilat kullakanakarojj tamanakajj yanaptʼapjjañapawa, ukwa nayrïr patak maranakan kunatï paskäna ukajj uñachtʼayi. Jerusalén markankir tamanjj “janiw kuna pistʼayasirinakas utjkänti” sasaw Bibliajj qhanañchi. Taqenis qollqe toqet walikïpkaspa ukham janiw sañ munkiti. Yaqhepanakajj pobrenakäpjjänwa, ukampis “sapaqat maynirurakiw lakintapjjäna jan utjatanakaparjama” (Hech. 4:34, 35). Ukampis qhepat mä jan waltʼäwiw utjäna. Yaqhep viudanakajj “janiw sapürus suma yäqatäkiti, manqʼa lakiñ horasanakanjja” sasaw yatiyasïna. Ukhamajj apostolonakajj yatjjattʼat chachanakaruw uttʼayapjjäna, jupanakaw taqe viudanakar mä kikpaki churasiñapatak yanaptʼapjjäna (Hech. 6:1-5). ‘Manqʼa churañajj’ mä qawqha tiempotakikïnwa. Khitinakatï Pentecostés 33 maran cristianor tukupkäna ukat Jerusalén markan iyawsäwip chʼamañchtʼasiñatak qheparapkäna ukanakar yanaptʼañ amtampiw ukajj lurasïna. Ukhamasti pisinkirinakarojj tamajj yanaptʼaspawa, ukwa apostolonakan amtapjjatapajj uñachtʼayi.

¹⁴ Kunjamtï saniwayktanjja, mä cristian viuda warmejj kunjaman jikjjatasipansa tamajj yanaptʼaspa ukwa Pablojj Timoteor säna (1 Tim. 5:3-16). Ukhamarakiw Biblia qellqer Santiagojja, wajchanakarusa, viudanakarusa, jan walinakan jikjjatasirinakarusa yanaptʼañasaw sasin säna (Sant. 1:27; 2:15-17). Apóstol Juanajj akham sasaw qhanañchäna: “Maynitejj qamirïchi ukat, jilapan pistʼayasitapa yatisina jan jupat khuyaptʼayaskchejja, ¿kunjämarak Diosan munasiñapajj chuymapan utjaspasti?” sasa (1 Juan 3:17). Niyakejjay sapa mayni cristianonakarojj pisinkapki ukanakar yanaptʼañajj waktʼchejja, tamjamajj yanaptʼapjjañaparakiwa.

15. ¿Chuymankipstat jilat kullakanakar yanaptʼañatakejj kun amuyañasas wakisi?

¹⁵ Qollqe toqet yanaptʼanaka, chuymankipstatanakar pachpa utapan uñjapjjañapatak yanaptʼanaka ukat yaqha ukham yanaptʼanakaw jilïrinakatakejj yaqhep markanakan utji (Rom. 13:6). Yaqha markanakan janiw uka yanaptʼanakajj utjkarakiti. Ukhamajj chuymankipstat jilat kullakanakar kunjam toqenakatsa familiaranakasa ukat tamankirinakas yanaptʼapjjani ukajj janiw mä kikpäkaniti, kunattejj janiw taqenejj mä kikpa jakäwinïpkiti. Waljaniw Jehová Diosar yupaychiri wawanakat awk taykanakapat jayan jakapjje, ukaw kuna toqenakattï  yanaptʼañajj wakiski uk lurañatak jarktʼaspa. Ukhamächi ukhajja, awk taykapan tamapankir irpir chuymaninakapampiw wawanakajj parltʼapjjañapa, ukhamat taqenis kunjamansa jikjjatasipjje uk yatipjjañapataki. Inas irpir chuymaninakajj chuymankipstatanakar kuna yanapanakatï markan utjki ukanak katoqapjjañapataki yanaptʼapjjchispa. Ukat inas facturanakan sobrenak jan jistʼarapjjatapa, jan ukajj kuna qollanaktï umapjjañapäki uk jan umapjjatapa ukat yaqha ukhamanak uñjasin wawanakapar yatiyapjjarakchispa. Irpir chuymaninakampi ukat wawanakampi suma parltʼasipjjatapajja, jukʼamp jan walinakar jan puriñatakiw yanaptʼaspa ukat jan walinak askichañatakis yanaptʼarakispawa. Awk taykaparu maynin yanaptʼaskatap yatisasa ukat kun utjipans jankʼak awisir utjatap yatisas janiw llakisipkaniti.

16. Chuymankipstat jilat kullakanakar yanaptʼañatakejja, ¿kunsa yaqhep cristian jilat kullakanakajj lurapjje?

¹⁶ Yaqhep jilat kullakanakajja, chuymankipstat jilat kullakanakasar kunantï yanapa munapki ukan yanaptʼañatakejj tiempopa ukat chʼamap apstʼasiñwa amtapjje, uksti jupanakar munasipjjatapatwa lurapjje. Jupanakajj tamankir chuymankipstatanakar yanaptʼañatwa llakisipjje. Yaqhepajj tamankir mayni jilat kullakanakampiw kunjamsa yanaptʼapjjani uk amtapjje ukat maykipaw uñjapjje. ¡Jupanakajj ukham yanaptʼasir chuymanïpjjewa! Cheqas ukajja, janiw awk taykanakapat wawanakapajj armasjjapjjañapawa sañ munkiti, jan ukasti kuntï lurirjamäpki ukan yanaptʼasipkakiñapawa.

17, 18. ¿Kunatsa kusisit chuymanïñajj chuymankipstat jilat kullakanakatakisa ukat uñjirinakatakis wali wakiskirejja?

¹⁷ Chuymankipstat jilat kullakanakasa ukat khitinakatï jupanakar uñjapki ukanakas suma experiencianak jikjjatapjjañapatakiw chʼamachasipjjañapa. Kusisit chuymanïñaw wal yanaptʼani. Awisajj chuymankipstañajj aynachtʼayiwa ukat llakisiyarakiwa. Ukhamajj inas jumajj chuymankipstatanakar jachʼar aptañataki ukat chʼamañchtʼañatak chʼamachaschisma. Diosat jan jitheqtir chuymankipstat jilat kullakanakasajj jachʼañchtʼatäpjjañapaw wakisi. Jehová Diosajj kunsa Jupar yupaychañatakejj chuymankipstatanakajj lurawayapjje uk janiw armaskiti, ukat jiwasas janirakiw armasktanti (Malaquías 3:16 ukat Hebreos 6:10 liytʼañataki).

¹⁸ Kusisit chuymanïñajj kuna jan waltʼäwinakatï sapürus utjki ukanakar saykatañatakiw yanaptʼaspa (Ecl. 3:1, 4). Walja chuymankipstat jilat kullakanakajja, munañanakaparjam jan sinti sarnaqayañatakiw chʼamachasipjje. Kunjam chuymanïpjjesa ukarjamaw uñjirisa ukat tumptʼiris sarapjjarakini, uk jupanakajj sumwa yatipjje. Chuymankipstat jilat kullakanakar tumptʼir sarapki ukanakar akham sasin arsur istʼapuntanwa: “Nayajj jupar chʼamañchtʼiriw sarta, ukampis jupakiw nayar chʼamañchtʼaniwayjjetu” sasa (Pro. 15:13; 17:22).

19. ¿Kunas wayn tawaqonakarusa ukat chuymankipstat jilat kullakanakarus jan waltʼäwinakar saykatañatak yanaptʼani?

¹⁹ Tʼaqhesiñanakasa ukat kunarutï juchajj aptʼawaykistu ukanakajj jan amtatäjjani uka urun puriniñap wal suytanjja. Janïr uka uru purinkipanjja, Diosar yupaychirinakajj kuntï jutïrin katoqkañäni ukaruw chuyma uchañasa. Kuntï Jehová Diosajj arsuwayki ukar confiyañaw jan wali tiemponakan aynachtʼat uñjasktan jan ukajj tʼaqhesiñanakan uñjasktan ukhajj yanaptʼistu. Ukar confiyatasatwa ‘jan mayjtʼasktanti: jañchinakasas sapüru aynachar sarjjchi ukasa, ajayunakasajj sapürutjamarakiw machaqar tukuski’ (2 Cor. 4:16-18; Heb. 6:18, 19). Kuntï Diosajj arsuwayki ukar confiykasajja, ¿kunas chuymankipstatanakar uñjkasin jan aynachtʼañatak yanaptʼistani? Uka toqet mä qawqha yanaptʼanakwa jutïr yatichäwin yatjjataskañäni.