Diosar jakʼachasipjjam

‘Nayajj janipuniw jumat armaskäti’

¿CHEQAPUNIT Jehová Diosajj arkirinakapar munasi? Ukhamächi ukhajja, ¿Qhawchʼapachas munasiñapajja? Ukjja Diosan Arunakap toqekiw yatjjatsna. Jehová Diosajj Biblia toqnamaw kunjam Diosasa uk qhanañchi. Amuytʼañatakejj kamsis Isaías 49:15 qellqatajj uk jichhajj uñjañäni.

Qhawqsa Jehová Diosajj yupaychirinakapar munäsi uk amuytʼañatakejja chuymar purtʼkir mä uñachtʼäwimpiw Isaías libronjj qhanañchi. Akham jistʼasaw qallti: ‘¿Mä taykajj ñuñuskir wawapat jan sinttʼasis armasispati?’ sasa. Uka jisktʼarjamajj taqeniw kamisarak mä taykast ñuñuskir wawapat armasinisti, jupajay antisas manqʼayañapächisa uywañapachisa sasaw waljanejj sapjjaspa. Ukampis Jehová Diosan jisktʼapajja yaqhanakampitwa amuytʼayarakistu.

¿Kunatsa mä taykajj jiskʼa wawapar ñuñtʼayi ukat kunatï wakiski ukanaks churi? ¿Jan jachañapatakikit ukham lurpacha? Janiwa. Kunattejj mä ‘taykajj ñuñuskir wawapatjja sinttʼasipuniwa’. Ukat sinttʼasiña siski uka hebreo arut jaqokipatajja, “khuyapayasiña” sañ munaraki (Éxodo 33:19; Isaías 54:10). Maysa toqetjja jichhak nasit mä jiskʼa wawar wali munasiñamp uñjaña sañ munaraki. Kunjamtï mä taykajj jiskʼa wawapar wal munartʼasis uywasejja ukhama.

Cheqansa, janiw taqpach taykanakajj ñuñuskir wawapat sintʼasipkapuniti. ‘uka taykanakas wawanakapat armasipjjaspawa’ sasaw Jehová Diosajj qhanañchi. Kunatejj jichha tiemponakanjja janiw munasiñajj utjjeti (2 Timoteo 3:1-5). “Mä taykajj ñuñuskir wawaparuw apanukutäyna, ukat muwjasaw usuchjatayna” sasajj sapa kutiw istʼtanjja. Ukat Biblia toqet yatjjattʼat mä jaqejja Isaías 49:15, qellqatat parlkasinjja akham sasaw qhanañchi: “Taykanakajj pantjasiripjjewa, ukat jan walinak uñjasajja, munasiñapajj chhaqjjewa. Inamayaw maynejj wali munasiriskaspasa, panjasikipunispawa” sasa.

Ukampis “Nayajj janipuniw [jumat] armaskäti” sasaw Jehová Diosajj qhanañchistu. Kuntï Isaías 49:15 qellqatarjamajj Jehová Diosajj jisktʼkäna ukajj kamsañs muni ukjja jichhaw jukʼamp sum amuytanjja. Pantjjasir mä taykajja jiskʼa wawapat armasispawa, ukampis Jehová Diosajj taqe chuyma servirinakaparojj munasipuniniwa janipuniw armaskaniti. Ukatwa Bibliat yatjjattʼat uka jaqejj Isaías 49:15 qellqatatjj akham sispachäna: “Taqpach Antiguo Testamentotjja uka qellqatanwa Diosan munasiñapajj jukʼamp qhan qhanañchasi” sasa.

Jehová Diosajj wali ‘khuyapayasiritap’ yatiñajj wali chʼamachkiripuniwa (Lucas 1:78). Ukat Jupa pachparakiw akham sistu: “Janiw kunapachas jaytkämati ni armtʼaskämasa” sasa (Hebreos 13:5). Kunjamsa Jehová Diosar jukʼamp jakʼachasisma uka toqet ¿janit yatjjatañajj wakiskaspa?