Linda: Kamisaraki Lucía, pasïr semanajj walikpun Jesusan jiwäwip amtañataki jutawaytajja. * ¿Kunjamakïnsa?

Lucía: Wali sumänwa, ukhamarus uka arstʼäw janiw sumpach amuykti. Navidadan Jesusan nasitap amtañasaw ukat Semana Santan jiwatat jaktatap amtañasawa sasaw jaqenakajj sapjje, ukampis Jesusan jiwäwip amtañatjja janiw istʼirïkti.

Linda: Jïsa ukhamapunïskiwa, taqe cheqanwa ukanak amtapjje. Ukampisa, Jehová Diosan Qhanañchirinakapajj Jesusan jiwäwip sapa mara amtañajj wali wakiskiriwa sasaw amuyapjjta. Kunatsa ukham amuyapjjta uk qhanañchañ munirisma, ¿tiemponïsmati?

Lucía: Jïsa, mä rat tiemponïsktwa.

Linda: Walikiwa. Nayraqatjja Jesús pachpaw amtapjjätawa sasin ewjjtʼawayäna, ukatwa nanakajj amtapjjapuntjja. Jesusajj janïr jiwayatäkän uka arumajj kunas pasäna uk amtañäni. Jesusampi apostolonakapampi manqʼapkäna uk ¿amtasktati?

Lucía: Jïsa amtasktwa. Ukajj Santa Cenajjayä.

Linda: Ukhampunïskiwa, uka arumajja Jesusajj akham sasaw arkirinakaparojj ewjjtʼänjja, ukatakejj Lucas 22:19 liytʼañäni, ¿liytʼasmati?

Lucía: Ya akham siwa: “Ukatsti, tʼantʼa irtasin Diosar yuspagari; pachjasinsti jupanakaruw churi, ukat saraki: Akajj janchejjawa, ukasti jumanak layku katuyatäniwa. Akjja nayat amtasisin lurapjjam”.

Linda: Yuspära. Amuytati, Jesusajj “akjja nayat amtasisin lurapjjam” sasaw sänjja. Janïr uka arunak arskasajja, kunsa amtapjjañapa uk sum qhanañchäna. Jupajj cuerpojja jan ukajj jakäwejj jumanak layku loqtä sasaw säna. Ukat Mateo 20:28 qellqatan uka pachparakwa qhanañchi, uk liytʼarakiñäni akham siwa: “Jaqen Yoqapajj janiw serviyasiñatak jutkiti jan ukasti serviriw juti, ukhamarak jakañap churiri walja jaqenakar qhespiyañataki” sasa. Mä arunjja, Jehová Diosan Qhanañchirinakapajj Jesusan jaqenak layku jiwatapa amtañatakiw tantachasipjjta. Ukat jiwasanakatï istʼasirïñänejja qhespitaw uñjasiraksna.

Lucía: Jesusajj jiwasanak laykuw jiwawayi sasin parlir istʼapunirïtwa. Ukampis kunjamsa jiwatapajj qhespiyistu uk janiw sum amuykti.

Linda: Ukhamäpachawa. Qhespiyäwita, jan  ukajj Jesusan loqtasïwipat yatjjatañajj chʼamakiwa. Ukhamarus uka yatichäwinak Biblian yatjjatañajj wali sumawa. ¿Uka toqet yatjjatañ munasmati?

Lucía: Jïsa, tiemponïsktwa yatjjatsnawa.

Linda: Walikiwa. Nayajja jichhakiw uka toqet liytʼaskayäta amuytʼañamatakejj qhana arunakampi qhanañchtʼañatakiw chʼamachasï.

Lucía: Walikiwa.

Linda: Nayraqatjja, kunas Edén jardinan Adanampi Evampir pasatayna uk yatjjatañasawa. Ukatakejj Romanos 6:23 qellqata liytʼañäni, ¿mayamp liytʼasmati?

Lucía: Ya, “juchan wajjtʼasiñapasti jiwañawa, ukampis Diosan wajjtʼäwipajj wiñay jakañawa Cristo Jesús Tatitusana”.

Linda: Yuspära. Aka textot yatjjatañäni. Nayraqatajj “juchan wajjtʼasiñapasti [jan ukajj pagopasti] jiwañawa” sasaw qhanañchi. Ukhamajj qalltan uka ley Diosaw jaqenakar churäna. Ukhamasti qalltan janiw khitis juchanïkänti. Diosajj Adanarus Evarusa jan juchan luräna, ukat wawanakapajj jan juchanirakiwa nasipjjañapäna. Ukhamarus janiw khitis jiwañapäkänti, Adanasa Evasa wawanakapasa wiñayatakiw kusisita jakasipjjaspäna. Ukampis ¿kunas pasäna uk amttati?

Lucía: Jïsa, Adanasa Evasa Diosajj janiw manqʼapjjätati siskän uka qoqatwa manqʼapjjäna.

Linda: Waliki, ukhamatwa juchar purtʼasipjjäna ukat Diosarus jan istʼapkänti. Ukatjja pantjasiri ukat jucharar jaqeruw tukupjjäna. Ukham lurapjjatapajj jupanakarusa wawanakaparus jan waltʼäwinakaruw purtʼasiyäna.

Lucía: ¿Kunatsa jiwasanakajj Adanampin Evampin juchachasipjjatapat tʼaqhesiraktanjja?

Linda: Uk sum amuytʼañatakejja, wejjrjat adoberat parltʼañäni ¿adobe lurir uñjirïtati?

Lucía: Jïs uñjirïtwa.

Linda: Uka wejjrjat adoberompi lurat adobenakajj kunjamänisa janit adobenakajj wejjrokamakïkani.

Lucía: Ukajj ukhampunïskiwa.

Linda: Ukhamarakiwa, kunapachatï Diosar jan istʼapkäna ukhajja Adanasa Evasa juch qatoqapjjäna. Niyakejjay janïr wawanïkasin juchar purtʼasipchïnjja taqe wawanakapaw pantjasiri ukat jucharara nasiwaytanjja. Bibliarjamajja juchajj janiw kuna jan walinaktï jaqenakajj lurapki ukanakakïkiti, jan ukasti kuntï Adanan wawanakapjamajj katoqtan ukarakiwa. Ukatwa jiwasanakajj janis Adanan ukat Evan kutkatasitapat juchanïkstanjja, wawanakapjamajj taqeniw juchar katuyatätanjja. Kunjamtï Romanos 6:23 qellqatan liytʼaniwayktanjja “juchan wajjtʼasiñapasti [jan ukajj pagopasti] jiwañawa”.

Lucía: Ukajj janiw walïkiti, ¿kunatsa Adanan ukat Evan juchanakapata jiwasanakajj wiñayatak tʼaqhesiñasa?

Linda: Cheqas, ukajj janiw walikiti. Ukampis Diosajj cheqapar uñjiriwa, ukatwa Adanas Evasa juchar purtʼasipjjatapat jiwapjjañapaw sasin arsüna. Ukhamarusa wawanakaparojj janiw ukhamak jaytkänti jan ukasti mä suytʼäw churäna. Ukatwa Jesusajj jiwasanak layku jiwañapäna. Mayampi Romanos 6:23 liytʼañäni “juchan wajjtʼasiñapasti jiwañawa, ukampis Diosan wajjtʼäwipajj wiñay jakañawa Cristo Jesús Tatitusana”. Ukhamajj Jesusan jiwäwipaw juchampit jiwañampit qhespiyistu. *

Linda: Jichhajj kuna yaqha yatichäwis aka texton utji uk jumampi yatjjatañ munirista.

Lucía: ¿Kunarakisti?

Linda: Uñjjattʼaskakiñäni, akan akham siwa: “Diosan wajjtʼäwipajj wiñay jakañawa Cristo Jesús Tatitusana” sasa. Jesusaw jiwasanak layku tʼaqhesiyata ukat jiwayata uñjasinjja, ¿kunatsa “Jesusan wajjtʼäwipajj wiñay jakañawa” sasin jan siskpacha? *

Lucía: Mmm... janiw yatkti.

Linda: Edén jardinan Diosar kutkatasajja, Adanasa Evasa Luririp contraw juchachasipjjäna. Ukham lurapjjatapajj Diosar wal chuym ustʼaypachäna. Ukampis Jehová Diosajj jankʼakiw uk askichäna. Ukatakejj alajjpachat mä angelaw aka Oraqer jutañapäna ukat jan juchan jaqjamaw jakañapäna, ukatjja jaqenak laykurakiw jakäwip loqtasiñapäna. * Ukhamajj qhespiyäwejj Diosan jachʼa regalopawa. Maysa toqetjja Diosan uka regalopajj kunsa uñachtʼayarakistu. ¿Kunjamakis wali munat wawaparu jiwayapkäna ukhajj Diosajj jikjjataspachäna? Uk amuyasmati.

Lucía: Janiwa.

Linda: Anatañanak uñjta, jumajj ¿wawanïtati?

Lucía: Jïsa, pä wawanïtwa. Mä yoqallampi mä imillampi.

Linda: Niyakejjay wawanïstajja, Jehová Diosajj Jesusaru jiwayapkäna ukhajj ¿kunjamakis jikjjataspachäna uk amuyasmati? Jesusar katuntapkäna, jupat burlasipkäna, nuwjapkäna ukhasa ¿kunjamakis Diosajj jikjjataspachäna? Jichhajj wawapar tʼaqhesir uñjkäna ukat mä lawar chʼakkatas jiwayapkäna ukhajj kunjakis chuym ustʼayaskäna, ¿uk amuyasmati?

Lucía: Janipuniw uka toqet lupʼirïkti.

Linda: Diosajj kunjamas jikjjatasïna uk janiw sumpach amuyksnati. Ukampis kunatsa Jehová Diosajj wawapar ukhamak tʼaqhesir jaytäna uk Bibliaw qhanañchi. Juan 3:16 qellqat ¿liytʼasmati?

Lucía: Ya, akham siwa: “Diosajj akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki”.

Linda: Yuspära. Qalltan uñstki uka arunakat amuytʼañäni. Ukan akham siwa: ‘Diosajj akapachar wal munatap layku’ sasa. Ukhamajj munasiñatwa Diosajj munat wawapar aka Oraqer khitanïna ukhamat jiwasanak layku jiwañapataki. Ukat sipansa jachʼa munasiñajj janiw utjkaspati. Ukwa Jehová Diosan Qhanañchirinakapajj sapa mara amtapjjta, kunapachatï Jesusan jiwäwip amtiri sarapta ukkhajja. ¿Jichhajj amuyjjtati?

Lucía: Jïsa. Yuspära ukham qhanañchtʼatamatsa, tiempomatsa.