PABLON urunakapanjja, janiw pasajeronak apiri barconakajj utjkänti. Ukhamasti, “¿nayajj sarañ munkta ukarojj carganak apiri barconakat kawkïris sarpachäni, pasajeronaks appachäniti?” sasaw viajiñ munirinakajj jisktʼasipjjañapäna (Hech. 21:2, 3). Barcojj janis kawkjarutï sarañ munkäna ukar sarkchïnjja, viajirejj uka barcor sarjjatasaw viajispäna. Ukat barcojj saytʼkäna uka puertonakanwa yaqha barcor sarjjatasajj kawkjarutï sarañ munkäna ukar purispäna (Hech. 27:1-6).

Maran mä qhawqha phajjsinakakiw maynejj barcot viajispäna, barconakajj kuna horasas mistupjjani ukas janiw yatiskänti. Marineronakajja, jan wali tiempo utjipansa, kunayman creencianïpjjatap laykus janiw horasapar viajipjjerïkänti. Sañäni, cuervo sat jamachʼin barco patjjan wararitap istʼasasa, qotar jalantir mä barcon jiltʼanakap qota lakan uñjasas janiw viajipjjerïkänti. Niyakejjay barconakajj thayan yanaptʼapampi sarapjjerïchïnjja, sarañ munapkäna uka toqer thaytʼkäna ukhakiw marineronakajj viajipjjerïna. Ukhamasti, viajiñ munirejj mä barco jikjjatkäna ukhajja, qʼepinakas aptʼataw puertor sarañapäna, ukat barcojj kuna horasas mistuni uk yatiyasiñapwa suyañaparakïna.

Nayra tiemponakat yatjjatiri Lionel Casson sat chachajj akham siwa: “Kuna barcotsa sarapjjani uk sapa muellen jan thaqañatakejja, walja yanaptʼaw Roma markan utjäna. Puertojja, Tíber sat jawirajj lamar qotar purkäna uka cheqankänwa. Uka jakʼankir Ostia sat markan plazapansti, viajir barconakan walja oficinanakapaw utjarakïna. Sañäni, Narbona puertonkir barconakan oficinapa [uka markajj jichha tiempon Francia markankiwa], Cartago puertonkir barconakan oficinapa [uka markajj jichha tiempon Túnez markankiwa], [...] ukat yaqha oficinanakampiw utjäna. Viajirejja, purkäna uka markan utjir oficinanakar sarasakiw jisktʼasiñapäna”.

Barcot viajiñajj jukʼamp ratukïkchïnsa, jan waltʼäwinakaw awisajj utjarakïna. Apóstol Pablojj misionerot viajisajj kimsa kutiw qotar jalantäna (2 Cor. 11:25).