NIYAW arumthapiski, Rebecajj jachʼa qollunak taypnam uñatattʼasisaw saraski. Walja semananak sarasajja, camello patjjar qonjjatat sarañsa niy yatinoqtjjarakiwa. Harán markap jaytasajj walja kilometronak sarjjaraki. Inas familiapamp jan mayampsa jikisjjchiniti. Niyaw kawkharutï puriñapäki ukar jakʼachaski. Kunjamakis jakasini uka toqetsa walrak lupʼpacha.

Jupanakajj Canaán mark niyaw pasasipki, jichhajj Néguev sat waña oraqnam sarasipki (Génesis 24:62). Uka oraqenakajj inas jan yapuchañjamäkchiti, ukampis uywanakatakejj wali khusänwa. Rebecajj uka cheq sarkasajj uwijanak uñjpachäna. Abrahaman serviripajj uka cheqanak sum uñtʼäna, kunanakatï paskäna uksa jankʼakiw Abrahamar yatiyañ munarakpacha. Rebecasti kunjamakis uka jan uñtʼat oraqen jakani, ukwa lupʼiskarakpacha. Isaac waynajj ¿kunjam jaqëpachasa? ¡Janiw uñtʼasipkiti! Rebecar uñjasajj ¿kunjamakis jikjjataspachäni? ¿Isaac waynajj Rebecan chuymapar purtʼaniti?

Jichhürunakanjja, awk taykanakajj wawanakapataki chacha jan ukajj warmi thaqhañapajj janiw askit uñjatäjjeti, ukampis yaqhep markanakanjja ukham lurañajj utjaskakiwa. Jakasktan uka markan costumbrenakapajj kunjamarakichiya, ukampis kawkharutï Rebecajj sarkäna ukajj jan uñtʼat markänwa. Jupajj wali iyawsäwini jan ajjsariri warmïnwa. Jupatjja jukʼampinakwa yateqassna, ukanakajj jichhürunakan janiw uñjasjjeti.

Rebecan jakäwipajj akatjamatwa mayjtʼäna. Jupajj Mesopotamia markankir Harán cheqanwa jan ukajj uka jakʼanwa jakäna. Harán cheqan jakir jaqenakajja, Sin sat diosaruwa, mä arunjja phajjsiruw yupaychapjjäna, ukampis Rebecan familiapajj Jehová Diosaruw yupaychäna (Génesis 24:50).

Rebecajj suma uñnaqtʼani tawaqönwa. Janiw ukakïkänti, wali qʼapha tawaqorakïnwa, janirakiw khiti chachas jupar llamktʼkänti. Familiapajj qamirikchïnsa ukat walja servirinïkchïnsa, janiw jayrakänti, juparojj wal irnaqtʼañwa yatichapjjäna. Rebecajj uka tiempon jakir warminakjamarakiw utan kuna lurañanakatï utjkäna ukanak lurirïna. Sañäni, jaypʼu toqerojja, kallachipjjar uma wakulla aptʼasitaw familiapatak phuchʼur um aptir sarirïna (Génesis 24:11, 15, 16).

Mä kutejja, wakullapar uma phoqtʼjjäna uka qhepatjja mä jilïr chachaw ukhar purïna, ukatsti wali suma arunakampiw akham säna: “Rogtʼassmawa, wakullamat mä jukʼa umay umtʼayita” sasa. Uka chachan wali jayat jutatap amuyasajja, Rebecajj jankʼakiw wakullap apaqasisin um churäna. Ukatjja, 10 camellonakamp kuna jutatap amuyasajja, uywanakajj umapjjerïkäna uka cheq chʼusakïtap uñjasajj akham sarakïnwa: “Camellonakamatakis umjja apstʼanirakïwa, ukhamat qawqtejj munapki ukkha umtʼapjjañapataki” sasa (Génesis 24:17-19).

Ak amuytʼañäni, camellonakarojj sistʼasiñapkamaw um churäna. Umat awtjat mä camellojja, 95 litronakwa umantaspa. Ukhamajj taqpach camellonakar sistʼayañkamajja, walja horanakaw Rebecajj irnaqaspäna. Ukampis amuyatajja, camellonakajj janiw umat sinti pharjatäpkänti. * Rebecajj  camellonakar janïr um churkasajja, qawqsa umapjje uk janiw yatkänti, ukampis jaya markat jutir jaqer sum katoqtʼañ munasajj taqe chuymaw ukanak luräna. Jankʼakiw uywa umañawjaru wakullapat umjja warsüna, ukat walja kutirakiw phuchʼutjja um waysüna. Ukañkamasti servirejj amukiw uñchʼukiskäna (Génesis 24:20, 21).

Rebecatjja, waljanakwa yateqassna. Jichhürunakanjja, jaqenakajj janiw jaqe masipat llakisjjapjjeti, kunjamtï Bibliajj siskejja, jaqenakajj jupan askipak thaqhapjje janiw mayninakat khuyaptʼayasipkiti (2 Timoteo 3:1-5). Cristianonakajj janiw uka jaqenakjamañ munktanti, jan ukasti Rebecat yateqasiñasawa. Jupajj mä jan uñtʼat jaqerojj taqe chuymaw yanaptʼäna.

Rebecajj kunjamsa uka jaqejj uñchʼukiskäna uk amuypachänwa. Ukampis uka jaqejj janiw jan wali amtampi uñchʼukkänti, jan ukasti kunjamsa irnaqtʼäna ukanak uñjasaw muspharäna ukat kusisirakïna. Rebecajj tukuyjjäna ukhajja, uka jilïr chachajj joyanakwa churäna, ukat akham jisktʼarakïna: “Avistʼita, ¿khitin phuchapätasa? ¿Utjarakispacha awkiman utapanjja jaqenakajjampi, nayampi aka aruma samartʼasiñatakejja?” sasa. Khitin familiapatsa juti uk yatiyäna ukhajja, jukʼampiw jupajj kusisïna. Rebecajj jankʼakiw akham sarakïna: “Utajjanjja utjiw mä cheqajj juman qorpachasiñatakejja, ukhamarak camellonakamatakis pastojj waljarakiwa” sasa. Niyakejjay uka jilïr chachampejj waljan sarapjjchïnjja, Rebecan ukham satapajj wali sumapunïnwa. Ukatsti jankʼakiw Rebecajj taqe kunanakatï paskäna ukanak mamapar yatiyir tʼijüna (Génesis 24:22-28, 32).

Rebecajj utapanwa katoqtʼasirïñ yateqpachäna. Jichhürunakanjja, ukham lurañajj chhaqtaskiwa, ukhamajj Rebecatwa yateqasiñasa. Jehová Diosar iyawsatasajj mayninakar katoqtʼañatakiw chʼamañchañapa. Jupajj taqeniruw khuyaptʼayistu, servirinakapajj Jupjamäpjjaspa ukwa munaraki. Pobrenakat khuyaptʼayastan ukhajja, Jehová Diosajj wal kusisi (Mateo 5:44-46; 1 Pedro 4:9).

Phuchʼur purkäna uka jilïr jaqejj ¿khitïnsa? Jupajj Abrahaman serviripänwa, Abrahamasti  Rebecan achachilapan jilapänwa. Ukatwa, Rebecan Betuel tatapajj wali sum katoqpachäna. Jupajj inas Eliezer satächïna. * Jupajja, kuntï parlañapakäna uk janïr arskasajj janiw manqʼañsa munkänti (Génesis 24:31-33). Ukhamajja, Abrahaman serviripajj kunarutï uywiripajj khitankäna uk lurañatakejj kunjamsa Jehová Diosajj bendicïna ukjja, taqe chuymaw yatiypachäna.

Eliezer chachajj kunatsa visitir saräna ukanak yatiyiri, ukhamarak Betuel ukat Labán yoqapas kunjamsa istʼasipki uk amuytʼañäni. Eliezerajja, kunjamsa Diosajj Canaán oraqen Abrahamar bendicïna, ukat jupampi Sara warmipampejj Isaac sutini mä yoqall wawanïpjjewa, jupaw taqpach herencia katoqani sasaw yatiypachäna. Abrahamasti Eliezerar akham sänwa: ‘Harán markar saram, familiajan markaparu, ukat mä warmi Isaac yoqajatak thaqhanirapita’ sasa (Génesis 24:34-38).

Janiw Isaac wawajatakejj mä cananea warmi thaqharapitätati sasaw Abrahamajj Eliezer chachar mä juramento lurayäna. ¿Kunatsa? Cananeonakajj janiw Diosar respetapkänti ni yupaychapkänsa. Jan walinak lurapjjatapatjja, tʼunjataw uñjasiñapäna uksa Abrahamajj yatirakïnwa. Ukatwa yoqapan jan uka markampi kunansa chikachasiñap munkänti. Maysa toqetjja, kunjamsa Jehová Diosajj arsutanakap Isaac wawap toqejj phoqañapäna uksa yatirakïnwa (Génesis 15:16; 17:19; 24:2-4).

Uma apsuñ phuchʼur purkäna ukhajja, ‘kawkïr tawaqotï uma apsur jutasin nayar um wajjtʼkitani ukat camellonakarus um churkarakini, ukäniw Isaac servirimatak ajllkta uka warmejja’ sasaw Jehová Diosar mayisïna. Ukanaksa Eliezer chachajj qorpachirinakapar yatiyarakïnwa (Génesis 24:12-14). ¿Khitis taqe ukanak luräna? Rebecaw ukanak luräna. Eliezerajj familiapar yatiykäna ukhajja, inas Rebecajj istʼaskchïna, ukhamajj kunjamakis jikjjatasïna uk amuysnawa.

Eliezer chachan arunakapajja, Betuel ukat Labán chachanakan chuymaparuw purtʼäna, ukatwa akham sapjjäna: “Taqe akanakasti Tatitutwa juti” sasa. Uka tiempon costumbrenakarjamaw Rebecajj Isaac waynampi jaqechasispawa sasin sapjjäna (Génesis 24:50-54). Ukampis janit Rebecajj jupa pachpa ¿kunsa amtkaspäna?

Uka toqetjja, Eliezer chachajj mä seman nayraw uywiripar akham jisktʼäna: “Tata, ¿jan uka warmejj nayampi chika jutañ munkan ukkhasti?” sasa. Abrahamajj akham sänwa: “Juramento luratamatjja libre[w] uñjasjjäta” sasa (Génesis 24:39, 41). Betuel chachan utapanjja, Rebecajj kunsa uka toqet amuyäna ukajj wali askit uñjatarakïnwa. ¿Kunjamatsa uk yattanjja? Eliezerajj wali kusisitäsinjja, qhepürpachaw Rebecampi Canaán oraqer kuttʼañ mayïna. Ukampis Rebecan familiapajj 10 urunaka, jan ukajj jukʼamp urunak qheparañap munapjjäna. Qhepatjja, akham sapjjänwa: “Ukhamajj tawaqor jisktʼañäni, kamschinïya jupajja” sasa (Génesis 24:57).

Kuna amtarus Rebecajj purini ukajj jakäwipwa mayjtʼayani. Ukhamajj ¿kamspachänisa? Awk taykanakaparojj uka jan uñtʼat markar jan khitapjjestati ¿sispachäniti? Jan ukajj Diosan munañapawa sasach wali askit ¿uñjpachäni? Kuntï arskäna ukaw kunsa amuyäna uk qhanañchistu, jupasti akham sänwa: ‘Jïsa nayajj saräwa’ sasa (Génesis 24:58).

¡Ukajj wali yateqaskayapuniwa! Jichhürunakan janis jaqechasiñajj ukhamäjjchejja, Rebecan sarnaqäwipat walja askinakwa yateqsna. Jupatakejja, askip thaqhañat sipansa Jehová Diosan munañap lurañaw nayrankäna. Bibliajja, kunjamsa mä suma chacha jan ukajj warmi jikjjatsna, ukat kunjamsa mä suma chachäsna jan ukajj warmïsna uka toqenakatwa sum ewjjtʼistu (2 Corintios 6:14, 15; Efesios 5:28-33). Ukhamajj Rebecat yateqasisin kunatï Diosatak sumäki ukanak lurañatak chʼamachasipjjañäni.

Betuel chachan familiapajj Rebecar bendicipjjarakïnwa. Ukatsti wawatpach uñjkäna uka  Débora warmimpiru ukat yaqha sirvientanakampiruw Rebecampi chika Eliezerampi ukat chachanakapampi sarapjjañapatak khitapjjäna (Génesis 24:59-61; 35:8). Harán markjja, jankʼakiw jaytawayjjapjjäna. Sarapjjañapäkäna ukar puriñkamajj niya 800 kilometronakänwa, ukhamajj mä kimsa semananakaw sarapjjpachäna. Ukar viajiñajj wali chʼamäpachänwa, Rebecajj camellonak sum uñtʼäna, ukampis inas jan camell patjjar sarañ yatkchïnti. Kunjamtï Bibliajj qhanañchkejja, Rebecan familiapajj uwijanak awatirïpjjänwa, janiw camellonakampi sarir alakipanakapkänti (Génesis 29:10). Khitinakatï mä camellor nayrïr kut sarjjatapki ukanakajja, wal quejasiñ yatipjje.

Ukhamäkchïnsa, kunjamas jakasini ukat Isaac waynasa, familiapas kunjamäpjjpachasa, ukanakatwa Rebecajj lupʼpachäna. Jichhajj kunjamsa Eliezer chachajj Rebecampi arum toqer nina jakʼar qontʼasita parlasipki uk amuytʼañäni. Eliezerajj kunsa Diosajj Abrahamar arsüna, kunjamsa wawanakap toqejj walja markanakajj bendicitäni ukanak parlpachäna. Diosajj kuntï siskäna ukanak chachapäkani uka toqe ukat jupa toqe phoqasiñap yatisajja, Rebecajj wal kusispachäna (Génesis 22:15-18).

Qalltan parlaniwayktan uka horasajj niyaw purisinki. Néguev sat cheqaruw mantasipki ukat niyarakiw arumtʼañampïski. Ukhamaruw Rebecajj mä chachar uka pampnam jutaskir uñji, uka chachajj amuyatajj lupʼiskänwa. Rebecajj jankʼakiw “camellot sara[qäna]” sasaw Bibliajj qhanañchi, ukhamajj inas janïr jiptʼkipan saraqjjchïna. Ukatjja, akham sasaw jilïr jaqer jisktʼäna: “¿Khitis uka jaqejj pampanjam jiwas toqer jutki ukajja?” sasa. Isaacätap yatisajja, Rebecajj pʼeqep mä velompiw chʼoqtʼasïna (Génesis 24:62-65). ¿Kunatsa ukham lurpachäna? Chachapäkani ukar respeto uñachtʼayañatakiw ukham lurpachäna. Jichha tiemponjja janiw ukham lurjjapjjeti. Ukampis Rebecat taqeniw yateqassna, jupjam altʼat chuymanïñajj wali askipuniwa.

Isaac chachajj niya 40 maranëjjänwa, Sara mamapan jiwatapat mä kimsa maranakas pasjjchïnjja, llakitäskakïnwa. Isaacajj wali munasiri ukat sinttʼasir chachapachänwa. Jupatakejj wali irnaqtʼiri, katoqtʼasiri ukat altʼat chuymani warmimpi jaqechasiñajj mä bendicionänwa. ¿Kunjamakis jakasipjjani? Bibliajj uka toqet akham siwa: “Isaacasti walpun Rebecarojj munasïna” sasa (Génesis 24:67; 26:8).

Niya 4.000 maranakas pasjjchejja, Rebecan sarnaqäwipajj wali askikïskiwa. Jupajj jan ajjsartʼiri, wali irnaqtʼiri, katoqtʼasiri, altʼat chuymani ukhamänwa, ukatwa sarnaqäwip wali askit uñjtanjja. Rebecan sarnaqäwipajj waynanakarusa, jilïrinakarusa, chachanakarusa, warminakarusa, jaqechatanakarusa ukat sapäsipki ukanakarus walja askinakwa yatichaspa. Ukhamajj taqeniw Rebecan iyawsäwipat yateqassna.