Pasïr yatichäwinjja, kuna señalattï Jesusajj parlkäna ukwa yatjjatawaytanjja. Uka señalaw Diosan Reinopajj alajjpachan uttʼayatäjjatapsa Reyipajj Jesucristötapsa amuyayistu.

Jesusajj alajjpachan apnaqañ qalltjjäna ukhajja, Supayampiru demonionakampiruw alajjpachat aka oraqer jaqoqanïna sasaw Bibliajj qhanañchi. Ukhamajj Supayampi demonionakampejj aka oraqenakwa munañanïpjje, ukatwa 1914 marat aksarojj jukʼamp jan waltʼäwinakajj aka oraqen jiljjattawayi (Apocalipsis 12:7, 9).

Akapachajj sapürutjam jukʼamp jan walirus saraskchejja, Diosan Reinopan Reyïki uka Jesusajj walja askinakwa jaqenak laykojj lurawayi. Jesusan arsutaparjamajja, aka oraqpachan Bibliat yatichasiskatap laykojj walja millón jaqenakaw Biblian wiñay yatichäwinakap yateqawayapjje ukat ukarjamaw sarnaqasipkaraki (Isaías 2:2-4). Jupanakajja jan trabajoruk chuym uchaña, familjam sum jakasiña, kunatï jupanakan utjki ukanakampejj kusisitak jakasiñwa yateqawayapjje. Bibliaw jupanakarojj ukham sum jakasipjjañapatakejj yanaptʼi, Diosan Reinopampi apnaqatäpkani ukanakajj kunjam jaqëpjjañapsa Diosajj muni ukatakis wakichtʼaraki.

Jesusajj alajjpachan niyas apnaqjjchejja, aka oraqenjja jaqenakaw apnaqaskaki. Ukampis Diosajj Jesusar akham sänwa: ‘Enemigonakam taypin apnaqam’ sasa (Salmo 110:2, TNM). Jesusajj niyaw taqe enemigonakaparojj tukj-jjani, Diosar taqe chuyma istʼañ munirinakarojj kunanakatï tʼaqesiyki taqe ukanaksa tukj-jjarakiniwa.

Uka tiemponjja, Diosan Reinopajj akanakwa lurani:

• Falso religionanakaruw tukjani. Uka religionanakajja, “prostituta” warmïkaspas ukhamäpjjewa sasaw Bibliajj qhanañchi. Ukhamajja Diosat kʼarinak yatichiri, tʼaqesiyiri falso religionanakajj janiw utj-jjaniti. Tʼunjata uñjasipkani ukhajja, walja jaqenakaw wal musparapjjani (Apocalipsis 17:15, 16).

• Taqe gobiernonakaruw tukjani. Diosan Reinopaw akapachankir taqe gobiernonakarojj tukjani (Apocalipsis 19:15, 17, 18).

• Jan wali jaqenakaruw tukjani. Diosar jan istʼañ munapki ukat jan walinak lurasipkaki uka jaqenakarojj ¿kunas pasani? Jupanakajj “aka oraqetjja apanukuta tukjatäpjjaniwa” (Proverbios 2:22).

• Supayampiru demonionakampiruw tukjani. Supayasa demonionakas janiw ‘markanakarojj engañjañ’ puedjjapjjaniti (Apocalipsis 20:3, 10).

¿Diosan Reinopamp apnaqatäñ suyasipki ukanakarojj kunas pasani?

Jesucristojja, alajjpachatpach apnaqanisaw kuntï yaqha gobiernonakajj jan lurañ puedipki ukanakat sipansa jukʼamp sumanak lurani. Juparojj 144.000 reyinakaw apnaqañ yanaptʼapjjarakini, jupanakajj jaqenak taypit ajllitäpjjewa (Apocalipsis 5:9, 10; 14:1, 3). Jesucristorakiw Diosan munañap aka oraqen phoqasiñapatakejj encargasini. ¿Kunsa Diosan Reinopajj jaqenak layku lurani?

• Usunaksa jiwañsa chhaqtayjjaniwa. ‘Janiw khitis sisjjaniti: “Usutätwa” sasajja’, janirakiw “jiwañajj jukʼamp utj-jjaniti” (Isaías 33:24; Apocalipsis 21:4).

• Cheqpach sumankaña jan ajjsaras jakasiñwa utjayani. ‘Taqe wawanakamatakisti jachʼa aski sumankañaw utjani’, “ukapachasti taqenis jan ajjsarasaw jakasipjjani, sapa maynirakiw samartʼasirakini uva, ukhamarak higo alin chʼiwipana” (Isaías 54:13; Miqueas 4:4).

• Kusiskañ trabajo churani. “Ajllitanakajjasti kuntejj amparapampi lurasipki ukwa manqʼasipjjani. Janiw inamaya irnaqapkaniti” (Isaías 65:22, 23).

• Aka oraqjja sumaptayaniwa. “Wasarajj kusispan, waña oraqes ukhamaraki, kusisiñampi phoqtʼaspan, panqararakpan” (Isaías 35:1).

• Wiñay jakasiñatakejj kuntï jaqenakajj lurapjjañapäki ukwa yatichani. “Khitinakatï wiñay jakañ katoqapkani ukanakajja juma sapa cheqpach Diosar uñtʼasipkakiñapawa jumajj khitankta uka Jesucristorus ukhamarakiw uñtʼasipkakiñapa” (Juan 17:3).

Diosajj taqe uka bendicionanak katoqañamwa muni (Isaías 48:18). Ukatakejj kunsa lurasma uka toqetjja, akjjar jutki uka yatichäwinwa qhanañchasiskani.