ХРОНИКИ ХӘСТӘЛИК ВӘ ӘЛИЛЛИК ИНСАНЫН ҺӘЈАТЫНА БӨЈҮК ЗӘРБӘ ВУРА БИЛӘР. Вахты илә ҝүмраһ вә сағлам олан Улф адлы бир киши ифлиҹ оландан сонра кечирдији һиссләри бөлүшүр: «Чох сарсылмышдым. Нә ҝүҹүм, нә тагәтим, нә дә өзүмә инамым галмышды... Бүтүн һәјатым мәһв олмушду».

Улфун һадисәси бир даһа сүбут едир ки, сағламлығымыза там нәзарәт етмәк бизим әлимиздә дејил. Бунунла белә, хәстәлик рискини азалтмаг үчүн мүәјјән тәдбирләр ҝөрә биләрик. Бәс сәһһәтимиз артыг писләшибсә, онда неҹә? Бу, о демәкдирми ки, биз даһа хошбәхт ола билмәрик? Инди ҝөрәҹәјик ки, бу, гәтијјән белә дејил. Лакин илк өнҹә ҝәлин сағламлығымызы горумаға көмәк едән бәзи мәсләһәтләри нәзәрдән кечирәк.

ҺӘР ШЕЈДӘ ҺӘДД БИЛИН (1 Тимутијә 3:2, 11). Һәддиндән артыг јејиб-ичмәјә вәрдиш етмәк һәм сағламлығымыза, һәм дә ҹибимизә зијандыр. «Шәраб дүшкүнләринә, әт һәрисләринә гошулма. Чүнки әјјаш вә гарынгулу јохсуллуға дүшәр» (Мәсәлләр 23:20, 21).

ҸИСМИНИЗИ МУРДАРЛАМАЈЫН. «Ҝәлин ҹисми вә руһу мурдарлајан һәр шејдән өзүмүзү тәмизләјәк» (2 Коринфлиләрә 7:1). Сигарет чәкән, наркотик вә спиртли ичкидән суи-истифадә едән инсанлар өз бәдәнләрини зәһәрләјир. Мәсәлән, АБШ-ын Хәстәликләрә Нәзарәт вә Профилактика Мәркәзинин вердији мәлумата ҝөрә, сигарет чәкмәк «хәстәлијә, әлиллијә вә демәк олар ки, бүтүн органларымызын зәдәләнмәсинә сәбәб олур».

ҺӘЈАТЫНЫЗА ВӘ БӘДӘНИНИЗӘ ДӘЈӘРЛИ ҺӘДИЈЈӘ КИМИ ЈАНАШЫН. «Биз [Аллаһын] сајәсиндә јашајырыг, һәрәкәт едирик вә мөвҹудуг» (Һәвариләрин ишләри 17:28). Буну дәрк етмәк бизи ишләдијимиз јердә, сүкан архасында вә сечдијимиз әјләнҹәләрдә һәјатымызы тәһлүкәјә атмагдан чәкиндирәҹәк. Ани бир һәзздән өтрү өмүр боју шикәст галмаға дәјмәз!

МӘНФИ ЕМОСИЈАЛАРЫ ҸИЛОВЛАЈЫН. Бејин бүтүн организмлә әлагәлидир. Она ҝөрә дә һәдсиз нараһатчылыг, ҝүҹлү гәзәб, пахыллыг вә диҝәр зәрәрли емосијалардан узаг дурмаға чалышын. Мүгәддәс Китабда дејилир: «Гәзәби бурах, һиддәтдән чәкин» (Зәбур  37:8). Орада һәмчинин јазылыб: «Һеч вахт сабаһкы ҝүн үчүн нараһат олмајын, чүнки сабаһкы ҝүн өзү илә јени гајғылар ҝәтирәҹәк» (Мәтта 6:34).

НИКБИН ДҮШҮНҮН. Мүгәддәс Китабда нөвбәти сөзләр јазылыб: «Сакит үрәк ҹаны сағлам едәр» (Мәсәлләр 14:30). «Шад үрәк ҹана мәлһәмдир» (Мәсәлләр 17:22). Елм дә бу сөзләри тәсдиг едир. Дерек Кокс адлы бир һәким дејир: «Хошбәхт инсанларын хәстәлијә тутулма еһтималы бәдбәхт инсанларынкындан гат-гат ашағыдыр».

ДӨЗҮМЛҮ ОЛУН. Даһа өнҹә һаггында данышдығымыз Улф кими бәзән чәтинлијә дөзмәкдән башга чарәмиз олмур. Амма дөзмәкдән дөзмәјә дә фәрг вар. Мәсәлән, бәзиләри һәдсиз мәјуслуға гапылараг вәзијјәтләрини даһа да ағырлашдырыр. Мәсәлләр 24:10 ајәсиндә јазылыб: «Дар ҝүндә руһдан дүшсән, ҝүҹүн түкәнәр».

Диҝәрләри исә әввәл-әввәл мәјус олсалар да, бир мүддәт сонра өзләрини әлә ала билиб. Онлар вәзијјәтләринә ујғунлашыб, дөзмәк үчүн мүхтәлиф үсуллар тапыблар. Улф да белә етди. О, чохлу дуа етмәјин вә Мүгәддәс Китабдакы руһландырыҹы ајәләрин үзәриндә дүшүнмәјин сајәсиндә «әнҝәлләри јох, имканлары ҝөрмәји» өјрәнди. Бундан әлавә, башы бәлалар чәкән бир чохлары кими о да башгаларына гаршы даһа шәфгәтли вә мәрһәмәтли олмағы өјрәнди вә бу һиссләр ону Мүгәддәс Китабдакы тәсәлли хәбәрини башгалары илә бөлүшмәјә тәшвиг етди.

Сәһһәтиндә ҹидди проблемләр олан диҝәр бир шәхсин, Стивин нүмунәсиндә бахаг. 15 јашы оланда о, бәдбәхт һадисә нәтиҹәсиндә бојундан ашағы ифлиҹ олур. 18 јашына чатанда голларынын һәрәкәтини бәрпа етдирә билир. Университетә гәбул оландан сонра түфејли һәјат сүрүб, наркотик вә спиртли ичкијә гуршаныр. Стив ҝәләҹәјә бүтүн үмиди итирмишди, та ки Мүгәддәс Китабы өјрәнмәјә башлајана гәдәр. Кәламын сајәсиндә о, һәјатда мәна тапыр вә пис вәрдишләрини тәрҝидә билир. О дејир: «Узун илләр дахилимдә олан бошлуг һиссиндән әсәр-әламәт галмајыб... Артыг һәјатым әмин-аманлыг, хошбәхтлик вә гәлб раһатлығы илә долудур».

Стив вә Улфун сөзләри Зәбур 19:7, 8 ајәләриндә јазыланлары хатырладыр: «Јеһованын * гануну камилдир, ҹана гүввәт верир... Јеһованын бујруглары доғрудур, үрәји севиндирир, Јеһованын әмри сафдыр, ҝөзләрә нур верир».