Yésaya 19:1-25
19 Mbagi kogse inyu Égiptô+ ini:
nuna-ki! Yéhôva a bédi i ngii ond i i nke ngwéé, a yé i lo i Égiptô.
Bisat bi Égiptô bi ga sehla i bisu gwé,+yak miñem mi bôt ba Égiptô mi ga nyimbi.
2 “M’a kéñha bon ba Égiptô bo ni bo,ba ga jo bo ni bo,hiki mut a jôhak maasañ ni mut wé libôk,tison i jôhak tison, ane i jôhak ane.
3 Mahoñol ma bôt ba Égiptô ma ga yubda,m’a yubdaha yak bipék gwap.+
Ba ga ke i bat bisat gwap mahôla,bôt bap ba makañ, bôt ba nkwel ni bawoga, ni bôt ba mis ma-na.+
4 M’a sem bôt ba Égiptô i moo ma béba ñane,kiñe i gwé ñem mbe yon y’a ane bo,”+ hala nyen bañga Nwet le Yéhôva nu mintôñ mi gwét a mpot.
5 Malép ma tuye m’a sa,yak balom b’a sa, ba num yaga.+
6 Balom ba ga numb bôô njiñ;diléléba di lom Nil nu Égiptô di ga sa, di num ki.
Makai ni bilagal* bi ga yuyi.+
7 Bikai bi bi yé i ngwañ lom Nil, i homa lom Nil a nsul tuye,yak nwom nwominsôna ba bi sal ipañ lom Nil,+ mi ga yuyi.+
Mbebi y’a kena gwobisôna, bi ga ba ha bé.
8 Balop tjobi ba ga ee,i bôt bobasôna ba nleñ minlop i lom Nil ba ga bégél,nsoñgi u bôt ba nleñ mbunja yap ikété malép u ga sôs.
9 I bôt ba mpehel loñge bôñgô*+ni i bôt ba ngwélél puba sut inyu bañ mabadô* ba ga wo nyuu.
10 Babañ mabadô ba Égiptô ba ga tjiba;bôt ba bôlô bobasôna ba ga siida.*
11 Baane ba Zôan+ ba yé bijôñ.
Bati Faraô maéba ba ba nlôôha bana pék ba nti nye maéba+ mabe.
Lelaa ni nla kal Faraô le:
“Me nlôl i mbôda i bôt ba pék,me yé mbôda i bikiñe bi kôba”?
12 Hee bôt boñ ba pék ba yé?+
Ba kalak we i jam Yéhôva nu mintôñ mi gwét a nkit le a mboñ Égiptô ibale ba nyi jo.
13 Baane ba Zôan ba mboñ bijôñ;baane ba Nof*+ ba njôñôp;baane ba matén ma Égiptô ba nlugha nye.
14 Yéhôva a nyumus nye;+yak bo ba nlugha Égiptô ikété mam momasôna a mboñ,a yila kiki mut nu a nhiôô maok, a lo, ndi a sendi i ngii bilôô gwé.
15 Égiptô a ga la bé boñ jam jo ki jo,to ño, to nwel, to bipom, to bikai* bi ga la bé boñ jam jo ki jo.
16 I kel i, bôt ba Égiptô ba ga boñ kiki bôda: ba ga sehla, ba kon woñi inyule Yéhôva nu mintôñ mi gwét a mpa woo inyu jôs bo.+
17 Loñ Yuda i mba i nkônha bôt ba Égiptô woñi. Ba mbôdôl sehla ibale mut a nsima ndik Yuda, inyule Yéhôva nu mintôñ mi gwét a nkit le a nkogse bo.+
18 I kel i, bitison bitan bi loñ Égiptô bi ga pot hop u Kanaan,+ bi kumuk soñ le bi ga téñbe i gwélél Yéhôva nu mintôñ mi gwét. Tison yada mu y’a séblana le Tison i tjiba.
19 I kel i, juu li bisesema inyu Yéhôva li ga ba i ñemkété u loñ Égiptô, yak jél inyu Yéhôva li ga ba i nwaa wé u nkoñ.
20 Hala a ga ba yimbne ni mbôgi i loñ Égiptô inyu Yéhôva nu mintôñ mi gwét; inyule bôt ba ga lôndôl Yéhôva inyule ba yé i tét bo, ndi a ga ômle bo ntohol, bañga ntohol yaga, nu a ga tohol bo.
21 Yéhôva a ga boñ le bôt ba Égiptô ba yi nye, yak bôt ba Égiptô ba ga yi Yéhôva i kel i, ba ga sémél Yéhôva bisesema ni makébla, ba bôn nye mam, ba yônôs mo.
22 Yéhôva a ga bép Égiptô,+ a bébék, a mélhak ki makon mé; bôt ba ga témb yak Yéhôva, a ga emble masoohe map, a mélés ki makon map.
23 I kel i, nloñ nkeñi+ w’a nyodi i Égiptô, u kenek i Asiria. Ha nyen bôt ba Asiria ba ga ke i Égiptô, yak bôt ba Égiptô ba ga ke i Asiria; Égiptô bo Asiria ba ga gwélél Nyambe lôñ yada.
24 I kel i, Israel a ga ba nu yônôs aa lôñni Égiptô bo Asiria;+ a ga ba jam li bisai hana ’isi,
25 inyule Yéhôva nu mintôñ mi gwét a mal sayap bo, a kalak le: “Bisai bi ba ni litén jem Égiptô, ni nson u moo mem le Asiria, yak ni ngababum yem le Israel.”+
Ndoñi
^ Ntén kai u u ño i malép.
^ I bôñgô ini yon ba nsébél ni hop Pulasi le lin.
^ Tole “i bôt ba mbañ bipuba bi mabadô.”
^ Tole “liyot li ga gwel bo.”
^ Tole “Memfis.”
^ I nla ki ba, “to lisee, to loloo.”