1. (a) Anong paglaom an itinao sato ni Jehova? (b) Ano an buot sabihon kan ‘maglaom ki Jehova’? (Hilingon an “Paliwanag Dapit sa Tataramon.”)

 NAGTAO si Jehova nin magayunon na paglaom sa gabos na namumuot sa saiya. Dai na mahahaloy hahalion niya an hilang, pagmundo, asin kagadanan. (Kap. 21:3, 4) Tatabangan niya an “mga mahuyo” na naglalaom sa saiya na gibuhon na paraiso an daga. (Sal. 37:9-11) Asin papangyarihon niya na magin posible na lambang saro sato magkaigwa nin dayupot asin personal na relasyon sa saiya, na mas magayon pa ngani kisa sa relasyon niyato sa saiya ngunyan. Magayunon nanggad na paglaom iyan! Pero ano an basehan ta para magtubod na mangyayari an mga panuga nin Diyos? Pirming inuutob ni Jehova an saiyang mga panuga. Kaya may marahay na dahilan kita para ‘maglaom ki Jehova.’ * (Sal. 27:14) Maipapahiling ta ini paagi sa mapasensiya asin may kaugmahan na paghalat na lubos na utubon kan satuyang Diyos an saiyang katuyuhan.—Isa. 55:10, 11.

2. Ano an nagibo na ni Jehova?

² Napatunayan na ni Jehova na inuutob niya an saiyang mga panuga. Pag-isipan an sarong pambihirang halimbawa. Sa libro nin Kapahayagan, nanuga si Jehova na sa satong panahon, titipunon niya an mga tawo hali sa gabos na nasyon asin tribo saka lengguwahe, asin pagsasararuon niya sinda sa dalisay na pagsamba. Ngunyan, an espesyal na grupong iyan nin mga tawo midbid bilang an “dakulang kadaklan.” (Kap. 7:9, 10) Dawa kompuwesto iyan nin mga lalaki, mga babayi, asin mga aki na magkakaiba an lahi, lengguwahe, asin kamugtakan sa buhay, an grupong iyan minabilog nin sarong matuninong asin nagkakasararong magturugang sa bilog na kinaban. (Sal. 133:1; Juan 10:16) An mga kabilang sa dakulang  kadaklan, mga maigot man na parahulit. Pirmi sindang andam na sabihon sa siisay man na madangog an saindang paglaom manungod sa sarong mas magayon na kinaban. (Mat. 28:19, 20; Kap. 14:6, 7; 22:17) Kun kabilang ka sa dakulang kadaklan, daing duda na mahalagang marhay sa saimo an paglaom manungod sa mas marahay na mga bagay na maabot.

3. Ano an katuyuhan ni Satanas?

³ Gusto kan Diyablo na halion saimo an saimong paglaom. An katuyuhan niya iyo na patubudon ka na si Jehova dai nagmamakulog sa saimo asin na dai Niya uutubon an saiyang mga panuga. Kun magin mapanggana si Satanas na halion sa sato an satong paglaom, pangluluyahan kita nin buot, asin tibaad magpundo pa ngani kita sa paglilingkod ki Jehova. Arog kan mahihiling ta, pinagmaigutan kan Diyablo na halion ki Job an saiyang paglaom asin na papunduhon siya sa paglilingkod ki Jehova.

4. Ano an pag-uulayan ta sa artikulong ini? (Job 1:9-12)

⁴ Sa artikulong ini, sisiyasaton ta an mga taktika na ginamit ni Satanas sa paghihinguwa niya na rauton an integridad ni Job. (Basahon an Job 1:9-12.) Pag-uulayan ta man kun ano an manunudan ta sa halimbawa ni Job asin kun taano ta kaipuhan ta na girumdumon na namumutan kita nin Diyos asin na uutubon Niya an Saiyang mga panuga.

5-6. Ano an nangyari ki Job sa laog sana nin halipot na panahon?

⁵ May marahay na buhay si Job. Igwa siya nin dayupot na relasyon ki Jehova. Igwa siya nin dakula saka maugmang pamilya, asin mayamanon siya. (Job 1:1-5) Pero sa laog sana nin sarong aldaw, haros nawara ki Job an gabos. Inot, nawara an saiyang mga pagsadiri. (Job 1:13-17) Dangan, nagadan an gabos na padaba niyang aki. Isip-isipa na sana an trahedyang idto. Pag an mga magurang magadanan nin aki, grabe an saindang kamunduan. Kaya imahinara an pagkabigla, kamunduan, saka an grabeng kulog na namatian ni Job asin kan saiyang agom kan maaraman ninda na an sampulo nindang aki nagkagaradan gabos. Bako nanggad makangangalas na ginisi ni Job an saiyang bado dahil sa kamunduan asin suminubsob sa daga!—Job 1:18-20.

⁶ Sunod na pinunteriya ni Satanas iyo an hawak ni Job, asin hinalian niya siya kan saiyang dignidad. (Job 2:6-8; 7:5) Dati, iginagalang na marhay si Job sa saindang lugar. Nagrarani sa saiya an mga tawo para maghagad nin tabang. (Job 31:18) Ngunyan, rinarayuan na ninda siya. Isinikwal siya kan saiyang mga tugang, mga dayupot na kairiba, asin maski na kan saiyang mga suruguon sa harong!—Job 19:13, 14, 16.

7. (a) Ano an inisip ni Job na dahilan kan saiyang pagsakit, pero ano an dai niya ginibo? (b) Paano puwedeng mapaatubang an sarong Kristiyano sa pagbalo na kapareho kan nahihiling ta sa ritrato?

⁷ Gusto ni Satanas na patubudon si Job na nagsasakit siya dahil naiwara niya an pag-uyon ni Jehova. Halimbawa, ginamit ni Satanas an makusog na duros tanganing rumpagon an harong kun sain magkairibanan na nagkakarakan an gabos na sampulong aki ni Job. (Job 1:18, 19) Nagpabagsak man siya nin kalayo hali sa langit na guminadan bako lang sa mga aripumpon ni Job kundi pati man sa mga suruguon na nag-aataman kan mga iyan. (Job 1:16) Huling an duros asin kalayo nag-abot sa pambihira nanggad na paagi, naisip ni Job na siguradong an Diyos na Jehova an Gikanan kaiyan. Kaya bilang resulta, inisip ni Job na may nagibo siyang nakapamundo ki Jehova. Dawa arog kaiyan, dai nagibo ni Job na sumpaon an saiyang Ama sa langit. Inako ni Job na sa naglihis na mga taon dakul siyang naakong marahay na mga bagay hali ki Jehova. Kaya inisip niya na kun maugma niyang inako an marahay na mga bagay, dapat na andam man niyang akuon an maraot na mga bagay. Kaya sinabi niya: “Padagos lugod na pag-umawon an pangaran ni Jehova.” (Job 1:20, 21; 2:10) Sagkod  sa puntong iyan, nagibo ni Job na makayanan an matinding problema sa pinansiyal, emosyonal, asin pisikal. Pero dai pa tapos si Satanas sa saiya.

8. Anong taktika an sunod na ginamit ni Satanas ki Job?

⁸ May saro pang taktika na ginamit si Satanas ki Job; ginamit niya an tulong bakong tunay na mga amigo ni Job para ipamati sa saiya na mayo siyang halaga. Sinabi kan mga lalaking ini na kaya nagsasakit si Job dahil sa mga nagibo niyang sala. (Job 22:5-9) Hininguwa man ninda na kumbinsiron siya na dawa bako siyang paragibo nin karatan, mayong halaga an ano man na mga paghihinguwa niya para mapaugma an Diyos. (Job 4:18; 22:2, 3; 25:4) Hininguwa ninda na patubudon si Job na dai siya namumutan nin Diyos, na dai Niya siya aatamanon, asin na mayong halaga an paglilingkod niya sa Saiya. Huli sa saindang mga tataramon, puwedeng namati ni Job na mayo nang paglaom an saiyang sitwasyon.

9. Ano an nakatabang ki Job na magin makusog an buot asin magpakakusog?

⁹ Imahinara an eksena. Mantang nakalapiga si Job sa abo, padagos an saiyang pagsakit. (Job 2:8) An saiyang mga kairiba padagos man na rinaraot an saiyang pagkatawo sa paghihinguwang rauton an saiyang reputasyon. An mga pagbalo saiya siring sa mga gapong magabaton, mantang an saiyang kamunduan huli sa pagkagadan kan saiyang mga aki padagos na nagpapasakit sa saiyang puso. Kan primero, mayo sanang girong si Job. (Job 2:13–3:1) Kun iniisip kan mga kairiba ni Job na an saiyang dai paggirong senyales na tatalikdan niya an saiyang Kaglalang, napapasala nanggad sinda. Mantang kaulay ninda siya, posibleng hiniling niya nin diretso an saiyang bakong tunay na mga amigo, asin sinabi niya sainda: “Sagkod na magadan ako, papagdanayon ko an sakuyang integridad!” (Job 27:5) Ano an nakatabang ki Job na magin makusog an buot asin magpakakusog sa ibong kan gabos niyang pagsakit? Dawa kan siya nasa pinakamasakit na kamugtakan, dai lamang siya nawaran nin paglaom na tatapuson kan saiyang mamumuton na Diyos an saiyang pagsakit. Aram niya na dawa pa  magadan siya, bubuhayon siya liwat ni Jehova.—Job 14:13-15.

10. Ano an itinutukdo sa sato kan pagkasaysay manungod ki Job?

¹⁰ An pagkasaysay manungod ki Job nagtutukdo sa sato na dai kita mapupuwersa ni Satanas na bayaan si Jehova asin na aram ni Jehova an lambang sitwasyon. Makakatabang man sato an inagihan ni Job na mas masabutan kun ano an kalabot na mga isyu. Pag-ulayan ta an nagkapira sa espesipikong mga leksiyon na manunudan ta manungod ki Job.

11. Kun padagos kitang magtitiwala ki Jehova, sa ano kita makakasigurado? (Santiago 4:7)

¹¹ Pinatunayan ni Job na kun padagos kitang magtitiwala ki Jehova, matatagalan ta an ano man na pagbalo asin mapangganang malalabanan si Satanas. Asin ano an magigin resulta? Sinisigurado sa sato kan Kasuratan na an Diyablo madulag sa sato.—Basahon an Santiago 4:7.

12. Paano napakusog si Job kan paglaom na pagkabuhay liwat?

¹² Kaipuhan tang mangapot sa paglaom na pagkabuhay liwat. Arog kan sinambit sa sinundan na artikulo, parating ginagamit ni Satanas an pagkatakot sa kagadanan sa paghihinguwa niya na rauton an satong integridad. Sa sitwasyon ni Job, hiningako ni Satanas na gigibuhon ni Job an gabos, na ikokompromiso pa ngani an saiyang integridad, para iligtas an saiyang buhay. Sala si Satanas. Dawa sa pinakamasakit na kamugtakan ni Job, kaidtong garo baga magagadan na siya, dai siya nakipagkompromiso. Nakatabang sa saiya an saiyang pagtitiwala sa karahayan ni Jehova asin an saiyang makusog na paglaom na itatanos ni Jehova an mga bagay-bagay. Nagtutubod si Job na kun dai man itanos ni Jehova an mga bagay-bagay mantang buhay pa siya, bubuhayon Niya siya liwat sa maabot na panahon. Para ki Job, totoong-totoo an pagkabuhay liwat. Kun an paglaom na iyan totoo sa sato, dawa pa mapaatubang kita sa kagadanan dai kaiyan mararaot an satuyang integridad.

13. Taano ta kaipuhan tang tawan nin atensiyon an mga taktikang ginamit ni Satanas ki Job?

¹³ Dapat na magtao kita nin maingat na atensiyon sa mga taktika ki Job huling ginagamit man ni Satanas an kaparehong mga pamamaagi sa sato ngunyan. Mangnuha an akusasyon ni Satanas: “Itatao nin tawo [bako lang si Job] an gabos na yaon sa saiya para sa saiyang buhay.” (Job 2:4, 5) Garo man sana hinihingako ni Satanas na dai ta man talaga namumutan an Diyos na Jehova asin na babayaan ta Siya kun iyan an magliligtas kan satong buhay. Hinihingako man ni Satanas na dai man talaga kita namumutan nin Diyos asin na dai Niya man talaga nahihiling an mga paghihinguwa ta para mapaugma Siya. Huli sa patiinot na mga patanid, kita na naglalaom ki Jehova dai maloloko kan mga taktika ni Satanas.

14. Ano an puwedeng maaraman ta sa satong sadiri paagi sa mga pagbalo? Iilustrar.

¹⁴ Dapat na mansayon ta an mga pagbalo bilang oportunidad na mamidbid an satong sadiri. An mga pagbalo na inagihan ni Job nakatabang saiya na maaraman an nagkapirang mga kaluyahan niya asin na maitanos an mga iyan. Halimbawa, naaraman niya na kaipuhan niyang magin mas mapakumbaba. (Job 42:3) Kita man, dakul man kitang maaaraman manungod sa satong sadiri pag nag-aagi kita nin pagbalo. An brother na si Nikolay, * na iprineso dawa grabe an problema sa salud, nagsabi: “An presuhan garo sarong X-ray, ipinapahiling kaiyan an panglaog na mga kuwalidad nin sarong Kristiyano.” Pag maaraman na niyato an satong mga kaluyahan, hihinguwahon tang maitanos an mga iyan.

15. Kiisay kita dapat magdangog, asin taano?

¹⁵ Kaipuhan tang magdangog ki Jehova, bako sa satong mga kaiwal. Nagdangog na marhay si Job kan kaulayon siya ni Jehova. Sa mga simbag  nin Diyos ki Job, garo man sana sinabi niya: ‘Nahiling mo an sakong kapangyarihan sa paglalang? Aram ko an mga nangyayari sa saimo. Sa hiling mo dai taka kayang atamanon?’ Nagsimbag si Job nin may kapakumbabaan asin nagpahiling nin hararom na pagpapahalaga sa karahayan ni Jehova. Sinabi niya: “Nadangog kan mga talinga ko an manungod saimo, pero ngunyan nahihiling taka kan sakong mga mata.” (Job 42:5) Kan sabihon ni Job an mga tataramon na iyan, posibleng nakalapiga pa man giraray siya sa abo, an saiyang hawak pano nin mga lugad, asin nagmumundo pa man giraray siya sa pagkagadan kan saiyang mga aki. Dawa arog kaiyan, inasigurar ni Jehova si Job kan Saiyang pagkamuot asin kan Saiyang pag-uyon.—Job 42:7, 8.

16. Sigun sa Isaias 49:15, 16, ano an dapat tang tandaan pag napapaatubang kita sa mga pagbalo?

¹⁶ Sa ngunyan man, tibaad insultuhon kita kan mga tawo asin tratuhon na garo baga mayo kitang halaga. Tibaad purbaran ninda na rauton an satuyang reputasyon bilang mga indibidwal o bilang sarong organisasyon asin ‘putik na magtaram laban sa sato nin gabos na klase nin maraot na bagay.’ (Mat. 5:11) Sa pagkasaysay manungod ki Job, nanudan ta na nagtitiwala si Jehova na magdadanay kitang maimbod sa saiya pag napapaatubang kita sa mga pagbalo. Namumutan kita ni Jehova asin dai niya nuarin man babayaan an mga naglalaom sa saiya. (Basahon an Isaias 49:15, 16.) Dai nanggad kita magtaong atensiyon sa ano man na ginigibong pagpakaraot kan mga kaiwal nin Diyos! An brother na si James na taga Turkey, na an pamilya napaatubang sa grabeng mga pagbalo, nagsabi: “Narealisar mi na an pagdangog sa mga kaputikan manungod sa mga lingkod nin Diyos makakapaluya sa buot mi. Kaya nagpokus kami  sa satong paglaom sa Kahadian asin nagdanay kaming aktibo sa paglilingkod ki Jehova. Bilang resulta, napagdanay mi an samong kaugmahan.” Arog ni Job, nagdadangog kita ki Jehova! An mga kaputikan kan satong mga kaiwal dai makakahali kan satong paglaom.

17. Ano an manunudan mo sa halimbawa kan maimbod na mga lalaki asin mga babayi na sinambit sa Hebreo kapitulo 11?

¹⁷ Si Job, saro sana sa mga lingkod ni Jehova na nagdanay na makusog an buot asin nagpakakusog sa panahon nin grabeng mga pagbalo. Sa saiyang surat sa mga Hebreo, sinambit ni apostol Pablo an dakul na iba pa, asin inapod sinda na ‘dakulang panganuron nin mga saksi.’ (Heb. 12:1) Gabos sinda nag-agi nin grabeng mga pagbalo; pero, nagkaigwa sinda nin marahayon na rekord nin kaimbudan ki Jehova. (Heb. 11:36-40) Sayang lang daw an saindang pakatagal asin pagpapagal? Bako nanggad! Dawa ngani dai ninda nahiling an kautuban kan gabos na mga panuga nin Diyos kan sinda nabubuhay pa, padagos sindang naglaom ki Jehova. Asin huling sigurado sinda na igwa sinda kan pag-uyon ni Jehova, may kumpiyansa sinda na mahihiling ninda an kautuban kan saiyang mga panuga. (Heb. 11:4, 5) An saindang halimbawa makakapakusog kan satong determinasyon na padagos na maglaom ki Jehova.

18. Ano an determinado mong gibuhon? (Hebreo 11:6)

¹⁸ Nabubuhay kita ngunyan sa sarong kinaban na an kamugtakan lalo pang nagigin maraot. (2 Tim. 3:13) Dai pa tapos si Satanas sa ginigibo niyang pagbalo sa mga lingkod nin Diyos. Sa ibong kan mga kadipisilan na maabot pa, lugod na magin determinado kita na magpagal para ki Jehova, na may kumpiyansa na “an satuyang paglaom ibinugtak ta sa sarong buhay na Diyos.” (1 Tim. 4:10) Tandaan, an mga bendisyon na itinao nin Diyos ki Job nagpapatunay “na si Jehova mamumuton na marhay asin mahihirakon.” (Sant. 5:11) Lugod na magdanay man kitang maimbod ki Jehova, na nagtitiwala na babalusan niya an “mga udok na naghahanap sa saiya.”—Basahon an Hebreo 11:6.