SI Reneé, sarong sister na mga 35 anyos, nagdakula sa sarong pamilya nin maiigot na Saksi sa Australia. “Dakul na beses na kaming nagpaburubalyo para tumabang sa mga lugar na nangangaipong marhay nin mga parahulit kan Kahadian,” an sabi niya. “Ginibo ninda Papa saka Mama na nakakaugma saka interesante an mga bagay-bagay! Kan duwa na an aki ko, gusto kong maeksperyensiyahan man ninda an arog kaidtong buhay.”

 Arog man kaiyan an espirituwal na pasuhan kan agom ni Reneé na si Shane, sarong brother na mayo pang 40 anyos. Sinabi niya: “Pagkamundag kan ikaduwa ming aki, nabasa mi sa An Torrengbantayan an dapit sa sarong pamilyang Saksi na naglayag gamit an saindang yate patimog-sulnupan nin Pasipiko para maghulit sa mga isla nin Tonga. * Napahiro kami kan artikulong iyan na magsurat sa sangang opisina kan Mga Saksi ni Jehova sa Australia asin New Zealand para maghapot kun sain na lugar an mas nangangaipo nin mga parahulit. * Bilang simbag, inimbitaran kaming magbalyo sa Tonga—an mismong lugar na nabasa mi!”

Pakalihis nin mga sarong taon, huli sa sunod-sunod na rayot, napiritan si Shane, Reneé, saka an mga aki nindang si Jacob saka Skye na maghali sa Tonga asin magbalik sa Australia. Pero dai nawara sa isip ninda an pasuhan na pahiwason an saindang ministeryo. Kan 2011, nagbalyo sinda sa Norfolk Island, sarong sadit na isla sa Pasipiko na mga 1,500 kilometros sa sirangan nin Australia. Ano an resulta kan pagbalyo ninda? An 14 anyos na ngunyan na si Jacob nagsabi: “Dai sana kami inataman ni Jehova, kundi ginibo man niyang nakakaugma an ministeryo mi!”

Arog ni Shane, Reneé, asin kan saindang mga aki, dakul na iba pang pamilyang Saksi an gikan sa buot na iprinesentar an saindang sadiri para magin mga “need greater” o mga boluntaryo sa lugar na dakula an pangangaipo. Ano an nakadagka sa sainda na magbalyo?

Si Burnett asin Simone, mag-agom na parehong mga 35 anyos, asin an saindang mga aki na si Eston saka Caleb, na ngunyan 12 asin 9 anyos na, nagbalyo sa Burketown, sarong harayuon na banwaan sa Queensland, Australia. Sinabi ni Burnett: “Sa kada tulo o apat na taon, sarong beses sana nahuhulitan kan mga Saksi an lugar na ini. Dakul na tawo an interesado sa maugmang bareta. Gusto ming regular sindang matukduan sa Bibliya.”

Naglingkod si Mark asin Karen, na mga labi pa sanang 50 anyos ngunyan, sa nagkapirang kongregasyon na harani sa Sydney, Australia. Pero, nagbalyo sinda kaiba an saindang tulong aki na si Jessica, Jim, asin Jack sa Nhulunbuy, sarong harayong komunidad nin mga minero sa Northern Territory. Sinabi ni Mark: “Namumutan ko an mga tawo, kaya gusto kong magduman kun sain dakul an gibuhon sa kongregasyon asin sa ministeryo.” Nagduduwa-duwa kaidto si Karen na magbalyo. “Pero pagkatapos akong pakusugon ni Mark asin kan iba pa,” an sabi niya, “nagtugot akong purbaran iyan. Asin sa ngunyan, ugmahon akong ginibo ko idto!”

Kan 2011, si Benjamin asin Carolyn saka an duwa nindang aking babayi na nasa kindergarten, na si Jade asin Bria, nagbalyo haling Queensland, Australia pabalik sa Timor-Leste, sarong sadit na nasyon na nasa Isla nin Timor na kataid kan iba pang mga isla nin Indonesia. “Dati kaming espesyal payunir ni Carolyn sa Timor-Leste,” an sabi ni Ben. “Magayunon maghulit duman, saka matinabang na marhay an mga tugang. Namundo talaga kami kan maghali kami duman. Pero determinado kaming bumalik. Kan magkaaki kami, dai kami tulos nakabalik, pero dai nagbago an plano mi.” Sinabi man ni Carolyn: “Gusto ming makaiba-iba kan mga aki mi an mga misyonero, Bethelite, saka espesyal payunir asin magkaigwa sinda nin maugmang eksperyensiya sa paglilingkod ki Jehova.”

Sinabi kaidto ni Jesus sa mga parasunod niya: ‘Kun igwa sa saindong buot magtugdok nin tore, bakong minatukaw nguna siya dangan kukuwentahon an magagastos, tanganing maaraman kun igwa siya kan tamang halaga na ikakapahaman kaiyan?’ (Luc. 14:28, An Marahay na Bareta Biblia) Kaagid kaiyan, kun pinag-iisipan nin sarong pamilya na magbalyo sa ibang lugar, kaipuhan na marhay an marahay na pagpaplano. Ano an mga kaipuhan na ikonsiderar?

ESPIRITUWAL: Sinabi ni Ben: “Gusto ming maglingkod sa iba asin dai magin pagabat sa sainda. Kaya bago kami nagbalyo, sinigurado ming makusog an espirituwalidad mi. Dinagdagan mi man an pakikikabtang sa ministeryo asin sa iba pang aktibidad kan kongregasyon.”

Si Jacob, na nasambitan sa inutan, nagsabi: “Bago kami nagbalyo sa Norfolk Island, dakul kaming binasang istorya nin buhay sa An Torrengbantayan asin Awake! manungod sa mga pamilyang naglingkod sa lugar na dakula an pangangaipo. Pinag-ulayan mi an mga kadipisilan na naeksperyensiyahan ninda asin kun  paano sinda tinabangan ni Jehova.” An 11 anyos niyang tugang na babayi na si Skye, nagsabi man: “Dakul na beses akong namibi—ako sana o kaiba si Mama saka Papa!”

EMOSYONAL: Sinabi ni Reneé: “Nakaistar kami sa lugar na gustong-gusto ko, harani sa mga kapamilya mi saka mga amigo, pasil sana kuta kun duman na sana kami. Pero imbes na pagparaisipon an mga babayaan ko, an inisip ko iyo an magigin pakinabang sa pamilya mi kan pagbalyo mi.”

KULTURA: Dakul na pamilya an nag-research para iandam an sadiri ninda sa bagong kapalibutan. Si Mark nagsabi: “Dakulon kaming binasa mapadapit sa Nhulunbuy. Pinadarahan kami kan mga tugang duman nin mga diyaryo sa banwaan ninda, kaya naaraman mi an dapit sa mga tawo duman asin sa kultura ninda.”

Si Shane, na nagbalyo sa Norfolk Island, nagsabi man: “Urog sa gabos, nagpokus ako sa pagpahiling nin Kristiyanong mga kuwalidad. Aram ko na pag sinsero ako, mahuyo, onesto, saka mahigos, kaya kong makibagay dawa sain man na lugar sa kinaban.”

Idinuon kan mga nagboluntaryo sa mga lugar na dakula an pangangaipo an kahalagahan kan pagigin madaling makibagay asin positibo kun napapaatubang sa dai linalauman na mga kadipisilan. Pag-isipan an nagkapirang halimbawa:

Sinabi ni Reneé: “Nanudan kong sumunod sa kun paano ginigibo sa lain-lain na paagi an mga bagay-bagay. Halimbawa, pag maalon an dagat sa Norfolk Island, dai puwedeng magduong an mga barkong nagdadara nin mga suplay, kaya nagigin kadikit an mga paninda saka nagtataas an presyo. Kaya nanudan kong magin mapamaagi pag nagluluto.” Idinagdag man kan mister niyang si Shane: “Nagtitipid man kami para dai kami lumampas sa badyet mi kada semana.”

Ibang kadipisilan man an sinabi kan aki nindang si Jacob: “Pipito sana an tugang sa binalyuhan ming kongregasyon—gabos mga adulto. Kaya mayo akong makaamigong kaedad ko! Pero kan makapartner ko na sinda sa paghuhulit, nagin mga amigo ko na sinda.”

Arog man kaiyan an nagin kamugtakan ni Jim, na ngunyan 21 anyos na. An sabi niya: “Labing 725 kilometros an distansiya kan pinakaharaning kataid na kongregasyon kan Nhulunbuy, kaya pirmi ming inaaprobetsaran an mga asembleya saka kumbensiyon. Amay kaming nag-aabot asin ikinakaugma an pakikiasosyar sa mga tugang. Para sa samo, an mga okasyon na ini an pinakamaugmang mga pangyayari kada taon!”

An Bibliya nagsasabi: “An bendisyon ni Jehova iyo an nagpapayaman sa saro.” (Tal. 10:22, NW) Sa bilog na kinaban, dakul na “need greater” an naeksperyensiyahan mismo an pagigin totoo kan ipinasabong na tataramon na iyan.

Sinabi ni Mark: “An pinakadakulang bendisyon kan pagbalyo mi iyo an nagin epekto kaiyan sa mga aki mi. Lubos na nagtitiwala an duwa kong matuang aki na aatamanon ni Jehova an mga iniinot an intereses kan Kahadian. Dai mo mababakal an pagtitiwalang iyan.”

Sinabi ni Shane: “Mas naparaning marhay ako sa agom ko saka sa mga aki mi. Ugmahon ako pag nadadangog ko sindang nag-iistorya kan mga ginibo ni Jehova para sa sainda.” Uyon diyan an aki niyang si Jacob, na nagsabi: “Talagang nagin maugma ako. Maray sanang nagdigdi kami!”