1. Dawa ngani si Jehova an Kahuruhalangkawi, ano an ginibo niya tanganing mautob an saiyang katuyuhan?

SI Jehova an Kahuruhalangkawi, an Kaglalang kan gabos na bagay, asin an Saro na daing limitasyon an kadunungan saka kapangyarihan. Nasabutan iyan ni Job. Ini an sinabi niya pagkatapos siyang haputon ni Jehova mapadapit sa Saiyang mga linalang: “Aram ko na an gabos kaya mo, asin mayong kaisipan na imposible saimo.” (Job 42:2, An Banal na Biblia) Kayang-kaya ni Jehova na gibuhon an ano man na gustuhon niya na mayo an tabang nin siisay man. Pero puon pa sa kapinunan, huli sa saiyang pagkamuot, inagda niya an iba na magin kaibanan niya sa gibuhon tanganing mautob an saiyang katuyuhan.

2. Sa anong mahalagang gibuhon inagda ni Jehova si Jesus?

² An inot na linalang nin Diyos iyo an saiyang bugtong na espiritung Aki. Dangan, ginamit ni Jehova an saiyang Aki para lalangon an gabos na iba pang bagay. (Juan 1:1-3, 18) Si apostol Pablo nagsurat mapadapit  ki Jesus: “Paagi sa saiya an gabos na iba pang bagay linalang sa kalangitan asin sa daga, an mga bagay na nahihiling asin an mga bagay na dai nahihiling, baga man mga trono o mga pamamahala o mga gobyerno o mga awtoridad. An gabos na iba pang bagay linalang paagi sa saiya asin para sa saiya.” (Col. 1:15-17, NW) Kaya, tinawan ni Jehova nin onra an saiyang Aki bako sanang paagi sa pagtao kan importanteng gibuhon na ini kundi paagi sa pagpaaram man sa iba kan nagin papel kaini sa paglalang.

3. Ano an ipinagibo ni Jehova ki Adan, asin taano?

³ Inaagda man ni Jehova an mga tawo na magin kaibanan niya sa gibuhon. Halimbawa, tinugutan niya si Adan na iyo an magpangaran sa mga hayop. (Gen. 2:19, 20) Siguradong ugmahon si Adan mantang ginigibo iyan! Maingat niyang pinag-aadalan an itsura asin hiro-hiro kan mga hayop, dangan maisip siya nin angay na pangaran para sa sainda. Si Jehova an naglalang sa mga hayop, kaya puwede kutanang siya na sana an nagpangaran sa sainda. Pero, huli sa pagkamuot niya ki Adan, tinugutan niya ini na iyo an magpangaran. Tinawan man nin Diyos si Adan nin asignasyon na gibuhon na paraiso an bilog na daga. (Gen. 1:27, 28) Pero makamumundo, pinili ni Adan na dai na magin kaibanan nin Diyos sa gibuhon, na nagresulta nin grabeng kasakitan sa saiya asin sa gabos niyang gikan.—Gen. 3:17-19, 23.

4. Paano an iba naggibong kaiba ni Jehova para mautob an saiyang kabutan?

⁴ Pag-abot nin panahon, inagda nin Diyos an iba pa na makikabtang sa pag-utob kan saiyang katuyuhan. Si Noe an nagtugdok kan arka para makaligtas siya asin an saiyang pamilya sa panahon kan Baha. Si Moises an nagligtas sa nasyon nin Israel paluwas sa Ehipto. Si Josue an nagdara sa nasyon na iyan sa Dagang Panuga. Si Solomon an nagtugdok kan templo sa Jerusalem. Si Maria an nagin ina ni Jesus. An mga maimbod na tawong ini, asin an dakul na iba pa, naggibong kaiba ni Jehova para mautob an saiyang kabutan.

5. Gabos kita puwedeng makikabtang sa anong gibuhon, asin kaipuhan daw talaga na iiba kita ni Jehova sa gibuhon na ini? (Hilingon an ritrato sa kapinunan kan artikulo.)

⁵ Sa ngunyan, inaagda kita ni Jehova na lubos na suportaran an Mesiyanikong Kahadian. Igwa nin dakul na klase nin sagradong paglilingkod. Baga man bako gabos na Kristiyano puwedeng mag-ako kan nagkapira sa mga iyan, gabos kita puwedeng makikabtang sa gibuhon na paghuhulit kan maugmang bareta kan Kahadian. Siyempre, kaya kutana ni Jehova na gibuhon ini na siya sana. Puwede siyang magtaram hali sa langit tanganing makipag-ulay sa mga tawo. Sinabi ni Jesus na kaya pa nganing pakurahawon ni Jehova an mga gapo para sabihon sa iba an mapadapit sa Hadi kan Saiyang Kahadian. (Luc. 19:37-40) Pero, tinugutan kita ni Jehova na magin saiyang “mga kapwa trabahador.” (1 Cor. 3:9, NW) Si apostol Pablo nagsurat: “Bilang mga kaibanan niya sa gibuhon, sinasadol man niyamo kamo na dai pagsayangon an inako nindong daing kapantay na kabuutan nin Diyos.” (2 Cor. 6:1, NW) Dakulaon na onra nanggad na magin kaibanan nin Diyos sa gibuhon. Pag-ulayan niyato an nagkapirang dahilan kun taano ta nagtatao ini sa sato nin dakulang kaugmahan.

6. Ano an sinabi kan bugtong na Aki nin Diyos dapit sa namatian niya sa paggibong kaiba kan saiyang Ama?

⁶ An paggibong kaiba nin Diyos pirmi nang nagpapaugma sa saiyang mga lingkod, puon pa kaidto. An bugtong na espiritung Aki nin Diyos, na irinepresentar bilang personipikasyon nin kadunungan, nagsabi: “Ginibo ako ni Jehova bilang kapinunan kan saiyang gibo . . . Kataid niya ako kaidto bilang ekspertong trabahador. Sa sako siya nangurugnang nauugma aroaldaw; naggagaya-gaya ako sa atubangan niya sa gabos na panahon.” (Tal. 8:22, 30, NW) Naugmang marhay si Jesus sa paggibo kaiba kan saiyang Ama huling dakul siyang mga bagay na nahaman asin aram niyang namumutan siya ni Jehova. Pero, kumusta man kita?

7. Taano ta nagpapaugma sa sato an paghuhulit?

 ⁷ Sinabi ni Jesus na parehong may kaugmahan sa pagtao asin sa pag-ako. (Gui. 20:35) Naugma kita kan akuon ta an katotoohan, asin nauugma man kita pag ipinapaabot ta iyan sa iba. Sa paghuhulit ta sa iba kan katotoohan, nahihiling niyato kun paano talagang nagigin maugma an mga gutom sa espirituwal huling nasasabutan na ninda an mga itinutukdo kan Bibliya asin nagkakaigwa na sinda nin haraning relasyon sa Diyos. Nauugma kita pag nahihiling niyato sindang nagbabago, bako sana sa saindang pag-iisip kundi pati man sa saindang paagi nin pamumuhay. Nasasabutan ta kun taano ta mahalagang marhay an pakikikabtang sa paghuhulit kan maugmang bareta. Nagtatao iyan nin oportunidad sa mga nagigin katuod nin Diyos na magkamit nin buhay na daing katapusan. (2 Cor. 5:20) May mas nakakaugma pa daw na gibuhon kisa sa pagtabang sa mga tawo na pilion an dalan pasiring sa buhay na daing katapusan?

8. Ano an sinabi nin duwang brother dapit sa kaugmahan na namatian ninda sa paggibong kaiba ni Jehova?

⁸ Apuwera sa kaugmahan na namamatian niyato pag inaako kan mga tawo an mensaheng ihinuhulit ta, nauugma man kitang marhay huling aram niyato na napapaugma ta si Jehova asin pinapahalagahan niya an satong mga paghihinguwa na paglingkudan siya. (Basahon an 1 Corinto 15:58.) Si Marco, na taga Italia, nagsabi: “Dai mapapantayan an kaugmahan ko huling aram kong ginigibo ko an pinakamakakaya ko, bako para sa tawo na sa dai mahahaloy malilingawan an mga ginibo ko, kundi para ki Jehova.” Si Franco, na naglilingkod man sa Italia, nagsabi: “Paagi sa saiyang Tataramon asin sa itinatao niyang espirituwal na mga probisyon, aroaldaw na ipinapagirumdom sa sato ni Jehova na namumutan niya kita saka mahalaga an gabos tang ginigibo para sa saiya, dawa ngani para sa sato garo baga daing halaga an mga paghihinguwa ta. Ini an dahilan kaya nauugma ako na magin kaibanan nin Diyos sa gibuhon saka huli kaiyan nagin makahulugan an buhay ko.”

9. Anong relasyon igwa si Jehova saka si Jesus, asin taano?

⁹ Kun kaibanan ta sa gibuhon an mga namumutan niyato, nagigin harani kita sa sainda asin naaaraman ta an saindang personalidad saka mga kuwalidad. Naaaraman niyato bako sana an mga pasuhan ninda kundi pati man an ginigibo nindang mga paghihinguwa para maabot iyan. Tibaad nakaibanan ni Jehova si Jesus sa gibuhon sa laog nin binilyon na taon. Nagin makusog na marhay an pagkamuot ninda sa lambang saro kaya mayo nin ano man na makakaraot sa saindang relasyon. Sinabi ni Jesus kun gurano kadayupot an relasyon ninda sa lambang saro: “Ako asin an Ama saro sana.” (Juan 10:30) Pambihira nanggad an pagkakasaro ninda asin pirmi sindang magkaibanan sa gibuhon na may lubos na pagkakauyon!

10. Taano ta mas mapaparani kita sa Diyos asin sa iba kun naghuhulit kita?

¹⁰ Ipinamibi ni Jesus ki Jehova na protektaran an saiyang mga disipulo. Taano? An sabi niya sa pamibi: “Tanganing magkasararo sinda siring na kita saro.” (Juan 17:11, An Marahay na Bareta Biblia) Mantang namumuhay kita uyon sa mga pamantayan nin Diyos asin nakikikabtang kita sa paghuhulit, mas nasasabutan niyato an saiyang magagayon  na kuwalidad. Nanunudan niyato kun taano ta sarong kadunungan na magtiwala sa saiya asin magsunod sa saiyang paggiya. Asin kun marani kita sa Diyos, siya marani man sa sato. (Basahon an Santiago 4:8.) Napaparani man kita sa satong mga kapagtubod huling naeeksperyensiyahan ta an parehong mga problema saka mga kaugmahan asin huling pareho an satong mga pasuhan. Iyo, iriba kitang naghuhulit, nag-uugma, asin nagtitios. Si Octavia, na taga Britania, nagsabi: “Huli sa pagigin kaibanan ni Jehova sa gibuhon, mas napaparani ako sa iba huling an pakikiamigo ko sa sainda basado na ngunyan sa pagkakaigwa mi nin parehong pasuhan asin paggiya.” Arog man daw kaiyan an namamatian mo? Mas napaparani ka man daw sa iba pag nahihiling mo an mga paghihinguwa nindang paugmahon si Jehova?

11. Taano ta mas magigin haraning marhay kita ki Jehova asin sa satong mga tugang sa bagong kinaban?

¹¹ Tibaad makusog na sa ngunyan an pagkamuot niyato sa Diyos asin sa satong mga tugang, pero mas makusog pa iyan sa matanos na bagong kinaban. Isip-isipa an mga gibuhon na naghahalat sa sato sa maabot na panahon! Maugmang sasabaton an mga binuhay liwat asin tutukduan sinda dapit ki Jehova. Kaipuhan na linigon asin gibuhon na paraiso an daga. Bakong pasil an mga gibuhon na ini, pero magigin maugma nanggad an mga tawo mantang magkairibanan sa gibuhon asin luway-luway na nagigin perpekto sa irarom kan Mesiyanikong Kahadian! Mas magigin haraning marhay sinda sa lambang saro asin sa saindang Diyos, na siyertong ‘mapanigo sa mawot nin lambang bagay na may buhay.’—Sal. 145:16, NW.

12. Paano nagigin proteksiyon sa sato an paghuhulit?

¹² Kaipuhan tang protektaran an satong espirituwalidad. Huling bako kitang perpekto asin nabubuhay kita sa kinaban na kontrolado ni Satanas na Diyablo, madali kitang naiimpluwensiyahan kan salang kaisipan asin paggawi kan kinaban. An espiritu kan kinaban puwedeng iagid sa sulog nin salog na dinadara kita sa direksiyon na habo niyatong dumanan. Para dai ikaanod parayo, dapat kitang bilog na kusog na lumangoy pasabat sa sulog. Kaagid kaiyan, dapat kitang maghinguwang marhay tanganing dai ikaanod parayo kan espiritu kan kinaban ni Satanas. Kun naghuhulit kita, nakakapokus kita bako sa mga bagay na makakapaluya sa satong pagtubod kundi sa mga bagay na mahalaga asin kapaki-pakinabang sa satong espirituwalidad. (Fil. 4:8) Napapakusog kan paghuhulit an satong pagtubod huling ipinapagirumdom kaiyan sa sato an mga panuga nin Diyos asin an saiyang mamumuton na mga pamantayan. Natatabangan man kita kaiyan na papagdanayon na kumpleto an satong espirituwal na pangalasag.—Basahon an Efeso 6:14-17.

13. Ano an sinabi nin sarong Saksi sa Australia mapadapit sa paghuhulit?

¹³ Proteksiyon man sa sato kun pirmi kitang sibot sa paghuhulit asin sa iba pang espirituwal na mga aktibidad huling malilingawan tang magparahadit dapit satong sadiring mga problema. Si Joel, na taga Australia, nagsabi: “Nakatabang sa sako an paghuhulit na magin realistiko. Ipinapagirumdom kaiyan sa sako an mga problema na inaatubang nin mga tawo saka an mga nagin pakinabang ko sa pag-aplikar ko sa sakong buhay kan mga prinsipyo sa Bibliya. Natabangan ako kan paghuhulit na magdanay na mapakumbaba; nagtao iyan sa sako nin oportunidad na manarig ki Jehova asin sa mga tugang.”

14. Ano an ebidensiya na yaon sa sato an banal na espiritu nin Diyos?

¹⁴ Napapakusog man kan paghuhulit an satong pagtitiwala na yaon sa sato an banal na espiritu nin Diyos. Pag-isipan ini: Ipamugtak na an trabaho mo iyo na magdistribwir nin masustansiyang tinapay sa mga tawo sa saindong komunidad. Pero mayo kang suweldo, kundi sadiri mo pa an gastos sa pagdistribwir kaiyan. Bako sana iyan, an kadaklan sa mga tawo habo kan tinapay asin naaanggot pa ngani an iba sa pagdara mo kaiyan sa sainda. Gurano  kahaloy ka daw matagal sa trabahong iyan? Sa dai mahahaloy, pangluluyahan ka na nin buot asin tibaad magpundo ka na sa trabahong iyan. Pero, dawa sadiri ta an gastos, inuulog-ulog kita, asin naaanggot sa sato an mga tawo, dakul pa man giraray sa sato an maigot na naghuhulit sa paglihis nin mga taon. Bako daw na ebidensiya iyan na tinatabangan kita kan banal na espiritu nin Diyos?

15. Paano konektado an paghuhulit kan maugmang bareta sa katuyuhan nin Diyos para sa katawuhan?

¹⁵ Paano konektado an paghuhulit kan maugmang bareta sa mamumuton na katuyuhan ni Jehova para sa katawuhan? Katuyuhan ni Jehova na mabuhay an mga tawo sa daga sagkod lamang, asin dai nabago an katuyuhan na iyan dawa ngani nagkasala si Adan. (Isa. 55:11) Naggibo siya nin paagi para iligtas an katawuhan sa kasalan asin kagadanan. Nagin kaibanan nin Diyos an saiyang Aki sa pag-utob kan katuyuhan na iyan. Nagdigdi si Jesus sa daga asin iinatang an saiyang buhay bilang pantubos para sa katawuhan. Pero, tanganing makinabang sa atang na iyan, kaipuhan kan mga tawo na magin makinuyog sa Diyos. Kaya itinukdo ni Jesus sa sainda kun ano an mga kahagadan nin Diyos, asin pinagbutan niya an saiyang mga disipulo na magtukdo man kaiyan sa iba. Kun naghuhulit kita asin tinatabangan an iba na magin katuod nin Diyos, direkta kitang nakikikabtang sa saiyang mamumuton na areglo na iligtas an katawuhan sa kasalan asin kagadanan.

16. Paano konektado an satong paghuhulit sa pinakaimportanteng mga tugon nin Diyos?

¹⁶ An pagtabang sa iba na manumpungan an dalan pasiring sa buhay na daing katapusan nagpapahiling kan pagkamuot niyato sa satong kapwa asin ki Jehova, “na an kabutan iyo na an gabos na klase nin tawo makaligtas asin makaabot sa tamang kaaraman dapit sa katotoohan.” (1 Tim. 2:4, NW) Kan haputon si Jesus kun ano an pinakaimportanteng tugon na itinao nin Diyos sa nasyon nin Israel, siya nagsimbag: “‘Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.’ Iyo ini an pinakaimportante asin inot na tugon. An ikaduwa, na kaagid kaiyan, iyo ini: ‘Kamutan mo an saimong kapwa nin siring sa saimong sadiri.’” (Mat. 22:37-39, NW) Paagi sa pakikikabtang sa paghuhulit, ipinapahiling niyato an satong pagkuyog sa mga tugon na ini.—Basahon an Guibo 10:42.

17. Ano an masasabi mo dapit sa satong pribilehiyong maghulit kan maugmang bareta?

¹⁷ Dakulaon nanggad na bendisyon ini sa sato! Tinawan kita ni Jehova nin sarong gibuhon na nagtatao sa sato nin kaugmahan, mas nagpaparani sa sato sa saiya asin sa iba, asin nagigin proteksiyon sa satong espirituwalidad. Nagtatao man iyan sa sato nin oportunidad na ipahiling an satong pagkamuot sa Diyos asin sa kapwa. Iba-iba an kamugtakan kan minilyon na mga lingkod nin Diyos sa bilog na daga, pero sinda man hoben pa o may edad na, mayaman o pobre, makusog o maluya, ginigibo ninda an saindang pinakamakakaya para ipakipag-ulay sa iba an saindang pagtubod. Posibleng marhay na mauyon ka sa sinabi ni Chantel, na taga Pransia: “An pinakamakapangyarihan na Persona sa uniberso, an Kaglalang kan gabos na bagay, an maugmang Diyos, nagsasabi sa sako: ‘Sige! Magtaram ka! Magtaram ka para sa sako, magtaram ka gikan sa puso mo. Itatao ko sa saimo an sakong kusog, an sakong Tataramon—an Bibliya, suporta kan mga anghel, mga kairiba sa daga, pagsasanay, asin tamang mga instruksiyon sa tamang panahon.’ Dakulaon nanggad na pribilehiyo na gibuhon an hinahagad sa sato ni Jehova asin magin kaibanan niya sa gibuhon!”