Namundag ako sa Montreal, an pinadakulang siyudad sa probinsiya nin Quebec sa Canada. Apat kaming magturugang asin pinadakula kami kan mapagpadangat ming mga magurang sa magayon na komunidad sa Rosemont. Maugma asin tuninong an buhay mi.

 Kan aki pa ako, interesado na ako sa Bibliya. Nagigirumduman ko kan 12 anyos ako, binasa ko sa Bagong Tipan an dapit sa buhay ni Jesus asin nagustuhan ko talaga iyan. Napahanga ako sa pagkamuot asin pagmalasakit niya sa iba asin gusto kong arugon siya. Pero, luway-luway na nawara an kagustuhan kong ini mantang nagdadakula ako asin kan magpuon akong makiiba-iba sa maraot na mga tawo.

 Paratugtog nin saxophone si tatay, asin bako lang an instrumento niya an ipinamana niya sako kundi pati an hilig sa musika na iyo an nagin pokus kan buhay ko. Gustuhon ko an musika kaya nakanuod man akong magtugtog nin gitara. Pag-abot nin panahon, nagbilog ako ni banda kaiba kan mga amigo ko asin nagtugtog kami nin musikang rock sa nagkapirang show. Pirang bistadong produser sa industriya nin musika an nakarisa sako asin inalukan ninda ako; sarong kontrata sa midbid na recording company an pinirmahan ko. Nagin sikat an mga kanta ko asin pirmi iyan na pinapatugtog sa mga radyo sa Quebec.

 Garo nakamtan ko na an gabos na pinapangarap ko. Hoben ako asin sikat, saka nakakaganar ako nin dakulang kuwarta sa trabahong gustong-gusto ko. Pag aga, nasa gym ako, nagpapainterbiyu, nagpipirma nin mga autograph, saka naggi-guest sa mga show sa TV. Pag banggi, nagtutugtog kami saka nagduduman sa mga parti. Kan medyo hoben pa ako, nagpuon akong mag-inom nin arak para makayanan an stress huli sa dakul na tagahanga, tapos pag-abot nin panahon, droga naman an pinurbaran ko. Iresponsable man ako saka imoral.

 May mga naaara sako ta nahihiling ninda na garo maugmahon ako. Pero an totoo, pagmati ko garo may kulang saka mamunduon ako, lalo na pag solo na sana ako. Nade-depress ako saka napupurisaw. Tapos kan panahon na grabe an kasikatan ko, duwa sa mga produser ko an nagadan huli sa AIDS. Nabigla ako! Maski gustuhon ko an musika, dai ko gusto an klase nin pamumuhay sa industriyang iyan.

 Sa ibong kan magayon na mga nangyayari sa buhay ko, aram kong may sala sa kinaban. Taano ta kadakul nin nangyayaring inhustisya? Naisip ko kun taano ta dai iyan sinusolusyunan nin Diyos. An totoo, pirmi akong namimibi sa Diyos para maaraman an simbag. Kan mayo akong tour kaidto, nagpuon giraray akong magbasa nin Bibliya. Dawa ngani dai ko man nasasabutan an kadaklan sa binabasa ko, aram ko na madali na an katapusan kan kinaban.

 Sa pagbasa ko nin Bibliya, naaraman ko na sa sarong pagkakataon nag-ayuno si Jesus nin 40 aldaw sa disyerto. (Mateo 4:1, 2) Naisip ko na pag ginibo ko man iyan tibaad magpahiling sako an Diyos, kaya plinano ko kun nuarin ko iyan pupunan. Duwang semana bago ako mag-ayuno, may duwang Saksi ni Jehova na nagtuktok sa pinto, asin pinadagos ko sinda na garo baga inaasahan kong maabot sinda. Pighiling ko sa mata an saro sa sainda, na an ngaran Jacques, tapos hinapot ko siya, “Paano ta maaaraman na nabubuhay na kita sa huring mga aldaw kan kinaban na ini?” Bilang simbag, binuksan niya an Bibliya saka binasa an 2 Timoteo 3:1-5. Tapos dakulon pa akong pighapot asin napahanga ako sa malinaw asin nakakakontentong simbag ninda na basado sa Kasuratan. Pagkatapos nin pirang pagbisita, narealisar kong dai ko na kaipuhan mag-ayuno.

 Nagpuon akong regular na makipag-adal nin Bibliya sa mga Saksi. Paghaloy-haloy, pinaputulan ko an halaba kong buhok saka nagpuon na mag-atender sa mga pagtiripon sa Kingdom Hall. Mabuot akong inako kan mga tugang sa mga pagtiripon. Dahil diyan, mas nakumbinsir ako na nahanap ko na an katotoohan.

 Siyempre, tanganing maiaplikar ko an mga nanunudan ko sa Bibliya, kaipuhan kong gumibo nin dakulang mga pagbabago. Saro diyan, kaipuhan kong ipundo an pagdodroga saka an imoral na pamumuhay. Kaipuhan ko man baguhon an pagigin makasadiri ko asin magin mas mapagmalasakit sa iba. Bilang nagsosolong magurang, dapat kong manudan na itao an emosyonal saka espirituwal na pangangaipo kan duwa kong aki. Kaya binayaan ko an karera ko sa musika asin nagtrabaho sa sarong pabrika na hababa an suweldo.

 Bakong madali na gibuhon an mga pagbabagong ini. Hinihinguwa kong ipundo an pagdodroga, pero kun minsan nadadaog pa man giraray ako kaiyan tapos minabalik giraray ako sa dati. (Roma 7:19, 21-24) Nasasakitan man akong ipundo an sakong imoral na pamumuhay. Saro pa, nakakapagal an bago kong trabaho, saka nakakadisganar an kakadikit kong suweldo. An tulong bulan kong suweldo ngunyan katumbas sana nin duwang oras sa trabaho ko dati bilang musikero.

 Huli sa pamimibi, nakayanan ko an masakit na mga pagbabagong ini. Nanudan ko man na mahalagang marhay an regular na pagbasa nin Bibliya. May nagkapirang teksto sa Bibliya na talagang nakapakusog sa sako. Saro diyan an 2 Corinto 7:1, na nagsasadol sa mga Kristiyano na “linigon [an saindang] mga sadiri sa gabos na bagay na nakakaramog sa laman asin espiritu.” An saro pang teksto na nag-asigurar sako na kaya ko talagang ipundo an sakong bisyo iyo an Filipos 4:13, na nagsasabi: “Kaya kong atubangon an gabos na bagay paagi sa saiya na nagtatao sa sako nin kusog.” Dinangog kan Diyos na Jehova an sakong mga pamibi asin tinabangan niya akong masabutan asin maiaplikar an katotoohan sa Bibliya. Napahiro ako kaini na idusay an sakong buhay sa saiya. (1 Pedro 4:1, 2) Nabawtismuhan ako bilang sarong Saksi ni Jehova kan 1997.

 Kun dai ako nagbago, tibaad ngunyan gadan na ako. Imbes, maugmahon ngunyan an buhay ko! Bendisyon sako an mapagpadaba kong agom na si Elvie. Maugma kaming naglilingkod bilang bilog na panahon na ministro saka nagtutukdo sa iba dapit sa Bibliya. Nagtatao iyan sa sako nin kaugmahan asin pagkakontento. Nagpapasalamat talaga ako ki Jehova ta tinabangan niya ako na magin harani sa saiya.—Juan 6:44.