Kuti Nacita Shani Abafyashi Bandi nga Balefwaya Ukulekana?
Ifyo wingacita
Bebe ifilekusamika. Eba abafyashi bobe ukuti uli no bulanda sana kabili tawishibe ne fya kucita. Nalimo kuti balondolola ifilecitika, ne co kuti calenga wisakamikwa sana.
Abafyashi bobe nga bafilwa ukulanda ifingakwafwa, kuti waebako cibusa uwingakwafwa.—Amapinda 17:17.
Ne cacindamisha, kuti wapepa no kulanda na Wiso wa ku muulu ‘uumfwa amapepo.’ (Amalumbo 65:2) Mwebe fyonse ifili mu mutima obe, ‘pantu asakamana iwe.’—1 Petro 5:7.
Ifyo taulingile ukucita
Filya fine ciba pa kupola nga wakontoka ukuboko, e fyo ciba na pa kuleka ukumfwa ubukali abafyashi bobe nga balekana—cilakalipa, lelo mu kupita kwa nshita ubukali bulapwa
Wifulilwa abafyashi bobe. Daniel uo abafyashi bakwe balekeene ninshi ali ne myaka 7 atile: “Abafyashi bandi balefwaya fye ukucita ifingabawamina, tabaletontonkanya pali fwe bana ne fyo twali no kumfwa nga balekana.”
Cali no kuba shani kuli Daniel atwalilila ukufulilwa abafyashi bakwe?—Icasuko: Belenga Amapinda 29:22.
Mulandu nshi cingawamina nga ca kuti Daniel aeleela abafyashi bakwe pa fyo bamukalifye?—Icasuko: Belenga Abena Efese 4:31, 32.
Wilacita ifingakuletela amafya. Denny alondolwele ati, “Ilyo abafyashi bandi balekeene, nshalesansamuka, nali fye uwa bulanda. Nalilekele ukubika sana amano ku sukulu ne co calengele mpone amashindano mwaka umo. Pa numa ... natampile ukucita fye ifya kusekesha abantu mu kalasi kabili nali no lubuli sana.”
Uleti cinshi Denny alefwaya ilyo alecita ifya kusekesha mu kalasi no kulalwa na banankwe?
Bushe amashiwi yaba pa Abena Galatia 6:7 kuti ya-afwa shani Denny ukuleka ukucita ifingamuletela amafya?
Icintu nga catukalipa, tacifuma bwangu ku mutima. Ilyo ifintu fikaba bwino mu kupita kwa nshita, ukaleka ukumfwa ububi.
