ABACAICE BEPUSHA UKUTI
Kuti Nacita Shani Umunandi nga Ankalifya?
Ifyo ufwile ukwishiba
Takwaba ifibusa ifishikwata amafya. Apo tatwapwililika cibusa obe nangu fye umuntu uo umona ukuti munobe sana kuti acita nelyo alanda fimo ifingakukalifya. Ca cine ukuti na iwe wine tawapwililika. Bushe kuti waibukisha ilyo walandile nelyo ilyo wacitile fimo ifyalengele umunobe akalipa?—Yakobo 3:2.
Intaneti kuti yalenga cayanguka ukukalifiwa. Ku ca kumwenako, David uuli ne myaka 15 atile: “Nga uli pa Intaneti e lyo wamona ifikope fya banobe abali ku mutebeto, kuti walayipusha auti cinshi bashanjitileko? Kuti walamona kwati abanobe nabakwalukila kabili kuti waba no bulanda.”
Kuti wasambilila ifya kupwisha ubwafya
Ifyo wingacita
Uleiceeceeta. Baibolo itila: “Wilakalipa bwangu, pantu ubukali bwaba mu fifuba fya bawelewele.”—Lukala Milandu 7:9.
“Limo kuti wasanga ukuti ifyalengele ufulwe te fya kufulilwapo no kufulilwa.”—E fyalandile Alyssa.
Ico ufwile ukutontonkanyapo: Bushe ulakuntukilwa bwangu? Bushe kuti wasambilila ukusuulako ku filubo fya bantu?—Lukala Milandu 7:21, 22.
Uletontonkanya pa busuma bwaba mu kwelela. Baibolo itila, caliba bwino “ukusuulako fye ku filubo.”—Amapinda 19:11.
“Nangu uli ne ca kuilishanya, cisuma sana ukwelela, e kutila ukuleka ukweba umuntu ukuti alikulufyenye no kulafwaya ukuti lyonse alelomba ubweleelo. Nga wamwelela taulingile no kulalandapo”—E fyalandile Mallory.
Ico ufwile ukutontonkanyapo: Bushe ifyacitike fyalibipile sana? Bushe kuti wamwelela pa kuti mupange umutende?—Abena Kolose 3:13.
Ukulalanda lyonse pa mulandu onse uo umunobe acita caba kwati kulaisula iciibi libili libili no kuleka umwela uwatalala uleingila mu muputule umukabile bwino
Uletontonkanya na pa bantu bambi. Baibolo itila: “Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Abena Filipi 2:4.
“Nga ca kuti mwalitemwana kabili mulacindikana mukalapwisha bwangu amafya pantu ninshi bonse mulabombesha ukuba ifibusa. Mwalibombesha ukuba ifibusa kabili te kuti mufwaye bucibusa bwenu bupwe.”—E fyalandile Nicole.
Ico ufwile ukutontonkanyapo: Bushe kuti wamonamo ifisuma mu fyo umuntu umbi alelanda?—Abena Filipi 2:3.
Icishinka ca kuti: Nga waishiba ifya kucita nga bambi bakukalifya e fyo ukulacita na lintu wakula. Bushe te kuti ciwame wasambilila libela ifya kucita nga bakukalifya?
Nalimo Kuti Mwatemwako ne fi
LOLENI!
Finshi Filenga Umuntu Aba Cibusa Musuma?
Abantu abengi balishiba ukuti calicindama ukukwata ifibusa ifisuma. Finshi mufwile ukucita pa kuba cibusa musuma? Cino cipande cilelanda pa fintu 4 ifyo Baibolo yalandapo ifingamwafwa.
AMASUKO KU MEPUSHO YA MU BAIBOLO
Finshi Baibolo Yalanda pa Fibusa?
Cibusa musuma alacita ifilenga cibusa wakwe abelako ne mibele isuma. Mulesala bwino ifibusa!
