PALAMENI KULI LESA

Bushe Cine Cine Yehova Alamusakamana?

Umwanakashi umo uushacetekele ukutila Yehova kuti amubikako amano atile: “Ndesha sana ukukanayumfwa uwa cabe cabe pantu ubu e bwafya nakwata ubulenga ukuti ndefilwa ukupalama kuli Lesa.” Bushe na imwe e fyo mumfwa? Nga ca kuti e fyo mumfwa, nalimo mulatontonkanyapo ukuti, ‘Bushe cine cine Yehova alasakamana umuntu onse uumupepa?’ Ee, Yehova alatusakamana. Ifyo Yesu alandile filanga ukuti ca cine Yehova alasakamana umuntu onse.—Belengeni Yohane 6:44.

Finshi Yesu, uwaishiba bwino ifyo Yehova aba e lyo ne fyo afwaya, alandile pali Wishi? (Luka 10:22) Atile: “Takuli uwingesa kuli ine kano Tata uwantumine, amukula.” Kanshi teti tube abasambi ba kwa Kristu nelyo ukulapepa Shifwe wa ku muulu, Yehova, ukwabula ukuti atukule. (2 Abena Tesalonika 2:13) Nga twaishiba umwalola aya amashiwi Yesu alandile, e lyo twingashininkisha ukuti ca cine Lesa alasakamana umuntu onse.

Bushe amashiwi ya kuti Yehova alatukula yalola mwi? Ishiwi lya ciGriki ilipilibula ukuti ‘ukukula,’ lilabomfiwa na lintu abantu balelanda pa kutinta amasumbu ye sabi. (Yohane 21:6, 11) Bushe Yehova alatupatikisha ukuti tulemubombela? Awe iyo! Yehova alitupeela ubuntungwa bwa kusala ukucita ifyo tulefwaya, kanshi tatupatikisha ukuti tulemumfwila. (Amalango 30:19, 20) Yehova alafwaya mu mitima ya bantu bonse pa kuti amone abafwaya ukumubombela. (1 Imilandu 28:9) Nga asanga umuntu uulefwaya ukumubombela alatemwa sana. Finshi Yehova acita?

Cikuuku cikuuku Yehova alakula umuntu ‘uwaba no mutima uusuma.’ (Imilimo 13:48) Alakula umuntu ukupitila mu mbila nsuma e lyo na mu mupashi wa mushilo. Nga amona umuntu uukwete umutima uulefwaisha ukusambilila icine ca mu Baibolo, Yehova alabomfya umupashi wa mushilo ukumwafwa ukumfwikisha ifyo alesambilila e lyo no kulaficita. (1 Abena Korinti 2:11, 12) Nga ca kuti Lesa tatukulile, te kuti tube abasambi ba kwa Yesu kabili te kuti tubombele Yehova no mutima wesu onse.

Finshi amashiwi Yesu alandile pali Yohane 6:44 yatusambilisha pali Yehova Lesa? Yatusambilisha ukuti Yehova alakula abantu pantu alamona ifisuma mu mitima yabo kabili alabasakamana. Ukwishiba ukuti Yehova alatusakamana, kwalisansamwishe umwanakashi uo tulandilepo pa kubala. Atile: “Ukubombela Yehova e cintu icacindamisha ku muntu. Yehova pa kuti ansale ukuba umubomfi wakwe, ninshi alimona ukuti nalicindama.” Inga imwe? Bushe ukwishiba ukuti Yehova alasakamana bonse abamubombela, kulalenga mwalafwaisha ukupalama kuli ena?

Amalembo ya kubelenga mu May

Luka 22–Yohane 16