?Baebol i Talem Wanem Long Fasin Blong Livim Kakae?
Ansa we Baebol i givim
Long taem blong bifo, God i agri long fasin blong livim kakae taem man i mekem wetem stret tingting. Be sipos man i mekem from wan risen we i no stret, God bambae i no glad long hem. Tede, Baebol i no fosem o blokem ol man long fasin ya blong livim kakae.
?From wanem sam man long taem bifo oli livim kakae?
Taem oli askem God blong i halpem olgeta. Ol man we oli wokbaot i go long Jerusalem oli livim kakae blong soemaot se oli rili nidim God blong i halpem olgeta. (Esra 8:21-23) Samtaem Pol mo Banabas i livim kakae taem tufala i putumap ol elda long kongregesen.—Ol Wok 14:23.
Taem oli stap tingbaot samting we God i wantem. Afta we Jisas i baptaes, hem i livim kakae blong 40 dei, hemia blong i rere blong mekem samting we God i wantem.—Luk 4:1, 2.
Taem oli soemaot se oli tanem tingting blong olgeta from ol sin we oli bin mekem. God i talem long profet Joel blong i talem long ol man Isrel se: “Yufala i mas kambak long mi long olgeta tingting blong yufala. Yufala i mas tanem tingting blong yufala from ol sin blong yufala, mo yufala i mas lego kakae blong yufala, mo yufala i mas harem nogud, yufala i krae.”—Joel 2:12-15.
Taem i gat Dei Blong Stretem Sin. Wan long ol Loa we God i givim long neson blong Isrel, hemia se evri yia oli mas livim kakae long Dei Blong Stretem Sin. a (Levitikas 16:29-31) Samting ya i halpem ol man Isrel blong oli tingbaot se oli sinman nomo mo oli nidim God blong i fogivim olgeta.
?Wanem sam rong tingting we i pusum man blong i livim kakae?
Blong mekem ol narafala oli luk olgeta. Jisas i talem se fasin blong livim kakae i bisnes blong God mo man we i livim kakae, i no wetem ol narafala.—Matiu 6:16-18.
Blong pruvum se oli ol stret man. Fasin blong livim kakae i no mekem wan man i kam hae moa long saed blong spirit.—Luk 18:9-14.
Blong pemaot sin we oli stap gohed blong mekem. (Aesea 58:3, 4) God i agri nomo long fasin blong livim kakae we i joen wetem fasin obei mo taem man i tanem tingting blong hem fulwan from sin we hem mekem.
Blong soemaot se oli stap mekem wosip. (Aesea 58:5-7) God i no glad long man we i fosem hem wan blong lavem God, be lav ya i no kamaot long hat blong hem.
?Ol Kristin oli mas livim kakae?
Nogat. God i askem ol man Isrel blong oli livim kakae long Dei Blong Stretem Sin, be hem i tekemaot loa ya afta we Jisas i ded blong pemaot sin blong ol man we oli tanem tingting blong olgeta. (Hibrus 9:24-26; 1 Pita 3:18) Tede ol Kristin oli no moa stap aninit long Loa blong Moses, olsem loa blong Dei Blong Stretem Sin. (Rom 10:4; Kolosi 2:13, 14) Taswe, wanwan Kristin i save jus sipos hem i wantem livim kakae o nogat.—Rom 14:1-4.
Ol Kristin oli luksave se fasin blong livim kakae i no impoten samting long wosip blong olgeta. Baebol i neva talem se man we i livim kakae bambae i fanem trufala glad. Defren olgeta, glad nao i makemaot trufala Kristin wosip, mo hemia i soemaot fasin blong Jehova, “God ya we i hapi.”—1 Timoti 1:11; Prija 3:12, 13; Galesia 5:22.
Rong tingting we Baebol i tokbaot long saed blong livim kakae
Rong tingting: Aposol Pol i talem se ol Kristin we oli mared oli mas livim kakae.—1 Korin 7:5, King James Version.
Tingting we i tru: Ol olfala hanraet blong Baebol oli no tokbaot eni samting long 1 Korin 7:5. b long saed blong livim kakae. Be ol man we oli raetem ol kopi blong Baebol, olgeta nao oli ademap wan refrens long saed blong livim kakae, mo i no long vas ya nomo be oli ademap tu long vas blong Matiu 17:21; Mak 9:29; mo Ol Wok 10:30. Tede, bighaf blong ol Baebol oli karemaot ol giaman refrens ya long saed blong livim kakae.
Rong tingting: Ol Kristin oli mas livim kakae blong tingbaot taem ya we Jisas i no kakae blong 40 dei taem hem i stap long draeples afta we hem i baptaes.
Tingting we i tru: Jisas i neva talem se yumi mas livim kakae from samting ya, mo i nogat wan vas long Baebol we i talem se ol fas Kristin oli bin mekem wan samting olsem. c
Rong tingting: Ol Kristin oli mas livim kakae taem oli mekem lafet blong tingbaot ded blong Jisas.
Tingting we i tru: Jisas i no talem long ol disaepol blong hem se oli mas livim kakae taem oli mekem lafet blong tingbaot ded blong hem. (Luk 22:14-18) Jisas i talem se ol disaepol bambae oli livim kakae long taem we hem i ded, be tok ya i no wan oda, hem i jes talem wan samting we i save hapen. (Matiu 9:15) Baebol i talem se ol Kristin we oli hanggri oli save kakae long haos fastaem, bifo we oli mekem lafet blong Tingbaot ded blong Jisas.—1 Korin 11:33, 34.
a God i talem long ol man Isrel se: “Yufala evriwan i mas mekem bodi blong yufala i harem nogud,” o “mekem sol blong yufala i harem nogud,” long Dei Blong Stretem Sin. (Levitikas 16:29, 31; King James Version) Ol tok we oli yusum long ples ya i blong tokbaot fasin ya blong livim kakae. (Aesea 58:3) Be, Contemporary English Version i tanem tok ya se: “Yufala i mas livim kakae blong soem se yufala i sore from ol sin blong yufala.”
b Yu luk buk ya A Textual Commentary on the Greek New Testament, we Bruce M. Metzger i raetem, Third Edition, pej 554.
c Folem histri blong livim kakae blong 40-dei, buk ya New Catholic Encyclopedia i talem se: “Long ol fas tri handred yia bifo, ol man oli we oli livim kakae blong rere from lafet blong Ista, oli no mekem blong bitim wan wik, oli mekem wan o tu dei nomo. . . . Fasin blong livim kakae blong 40 dei, i kamaot fastaem long rul o canon blong Kaonsel Blong Nicaea (325), be i gat sam man blong hae save we oli no agri long rul ya.”—Second Edition, Volium 8, pej 468.
Maet Yu Laekem Hemia Tu
ANSA WE BAEBOL I GIVIM
?God Bambae i Fogivim Mi?
Luk ol samting we Baebol i talem se yumi mas mekem blong God i save fogivim yumi.
MIFALA
Askem Wan i Visitim Yu
Tokbaot wan kwestin long Baebol, o lanem moa long saed blong ol Witnes blong Jehova.