Baebol i talem se God i wantem givim “wan fiuja mo wan hop.” a (Jeremaea 29:11) Yes, wan risen from wanem God i givim Baebol long yumi, hemia blong “yumi save gat hop from we Ol Tok Blong Baebol . . . oli mekem se yumi save stanap strong.” (Rom 15:4) Bambae yumi tokbaot olsem wanem ol waes advaes blong Baebol oli save givhan long yumi blong gat stret tingting, taem yumi stap dil wetem ol problem we yumi fesem evri dei. Hemia from we ol promes blong Baebol oli givim wan gudfala hop blong fiuja.

Long pej ya

•  ?Olsem wanem Baebol i givim hop long yumi?

•  ?Baebol i givim wanem hop long ol man?

•  Ol vas blong Baebol long saed blong hop

 I gat ol gudfala advaes long Baebol we yumi save folem blong mekem laef blong yumi i kam gud moa. Yes, Baebol i save givhan long yumi blong yumi gat hop. Traem luk sam eksampol.

•   Luk long Baebol blong kasem ol gudfala advaes. Ol Sam 119:105 i talem se: “Tok blong yu hem i laet blong leg blong mi, mo hem i laet we i saenem rod blong mi.” Wan laet we i saen strong i save mekem tu samting. I mekem se yumi save luk samting we i stap stret long fored blong yumi, mo samting we i stap longwe. Long sem fasin, ol waes advaes blong Baebol oli save halpem yumi blong dil wetem ol problem we yumi stap fesem naoia, mo i givhan long yumi tu blong gat stret tingting long ol samting we yumi save fesem long ol dei we i kam. Ol tijing blong Baebol oli save givim paoa mo mekem ‘hat blong yumi i glad.’ (Ol Sam 19:7, 8) Mo long semtaem, ol tok blong Baebol we oli olsem laet, oli soemaot gudfala plan blong God long saed blong fiuja blong ol man mo wol ya. Gudfala hop ya i save mekem yumi glad mo harem gud oltaem.

•   Letem ol narafala oli halpem yu. Taem yumi fesem wan situesen we i luk olsem se i no save kam gud, maet yumi no moa wantem joen wetem ol famle mo fren blong yumi. Be Baebol i talem se i no waes blong mekem olsem, from we hemia i save lidim yumi blong mekem wan rong desisen mo mekem samting we i no stret. (Ol Proveb 18:1) Ol fren mo famle oli save givhan long yumi blong gat stret tingting oltaem. Mo tu, maet oli save talem sam tingting blong halpem yumi blong dil wetem problem we yumi fesem. (Ol Proveb 11:14) Wan narafala samting tu se maet oli save kamfotem yumi mo mekem yumi harem gud bakegen, nao yumi gat paoa blong stanap strong kasem we ol samting oli kam gud moa.—Ol Proveb 12:25.

•   Prea long God. Baebol i talem se: “Yu sakem ol hevi baden blong yu long Jehova, mo hem bambae i sapotem yu. Bambae hem i neva letem wan stret man i foldaon.” b (Ol Sam 55:22) Baebol i tokbaot Jehova se hem i “God ya we i stap givim hop.” (Rom 15:13) Taswe yu save tokbaot “ol wari” blong yu long prea, mo trastem se God i kea long yu. (1 Pita 5:7) Baebol i talem se: “Hem bambae i mekem yufala i strong, mo i givim paoa long yufala, i mekem yufala i stanap strong we i no gat wan samting i save muvum yufala.”—1 Pita 5:10.

•   Ol trabol we yu fesem oli save mekem se hop blong yu i kam strong moa. Baebol i promes se: “Man we i stap lesin long [God], bambae hem i stap gud oltaem, mo nating se trabol i kasem hem, be hem i no save fraet.” (Ol Proveb 1:33) Taem hariken i spolem haos blong wan woman Ostrelia we nem blong hem Margaret, hem i lusum klosap evri samting. Long taem ya hem i sud wari bitim mak, be nogat, hem i lanem wan impoten lesen, hem i luksave se olting blong yumi oli save lus enitaem nomo. From samting ya, hem i traehad blong putum tingting blong hem long ol samting we oli moa impoten, hemia ol famle mo ol fren, frensip wetem God, mo hop ya we Baebol i tokbaot.—Ol Sam 37:34; Jemes 4:8.

 Baebol i promes se fiuja blong ol man mo wol ya bambae i nambawan. Mo hemia bambae i kamtru i no longtaem. Yes, ol problem we ol man oli stap fesem tede oli soemaot se yumi stap “long ol las dei” blong rabis wol ya. (2 Timoti 3:1-5) I no longtaem, God bambae i kontrolem wol ya fulwan mo finisim kruked fasin mo fasin safa. Blong mekem olsem, bambae hem i yusum wan gavman nomo long fulwol, hemia Kingdom blong God. (Daniel 2:44; Revelesen 11:15) Jisas i stap tokbaot gavman ya long heven, taem hem i tijim yumi blong prea se: “Yu mekem Kingdom blong yu i kam. Yu mekem wil blong yu i kamtru long wol ya.”—Matiu 6:9, 10.

 Ol tok blong Baebol i klia nomo long saed blong plan we God i gat blong ol man. Makem sam long ol problem we Kingdom blong God bambae i finisim:

•   No moa gat hanggri. “Wol bambae i givim plante kakae.”—Ol Sam 67:6.

•   No moa gat sik. “Bambae i no gat wan man we i laef long ples ya i talem se: ‘Mi mi sik.’”—Aesea 33:24, futnot.

•   No moa gat ded. God “bambae i ravemaot wota blong ae blong [ol man], mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.