1. Ki serten keksoz dimoun i per?

 MAZIN lo sa bann sityasyon ki serten Temwen Zeova in pas ladan. Nestor ek son madanm María, ti anvi servi dan en landrwa kot i annan bezwen pour plis proklanmater. * Me pour zot kapab fer sa, zot ti bezwen aprann pour viv avek mwens larzan. Zot ti per ki zot pa ti pou ere si zot ti fer sa. Ler Biniam ti vin en Temwen Zeova, i ti dan en landrwa kot dimoun i opoz nou travay predikasyon. I ti per ler i ti realize ki konman en serviter Zeova, i ti pou kapab ganny persekite. Sa ki ti fer li pli per i ki mannyer son fanmir ti pou reakte ler zot ti konnen ki i ti’n sanz son larelizyon. Ler dokter ti dir Valérie ki i annan en kanser ki danzere, i ti vwar li difisil pour ganny en dokter ki ti pou respekte son desizyon pour pa fer transfizyon disan. Valérie ti per ki i ti pou mor.

2. Akoz nou bezwen fer zefor pour kontrol nou lafreyer?

² En kantite parmi nou in eksperyans sa bann kalite lafreyer. Si nou pa aprann kontrol nou lafreyer, i tre probab ki nou pou fer bann move desizyon e sa i kapab menm gat nou lanmitye avek Zeova. Sanmenm sa ki Satan i anvi. Satan i osi esey servi sa lafreyer ki nou annan pour fer nou dezobei bann lalwa Zeova, enkli sa lord pour anons sa bon nouvel. (Rev. 12:17) Satan i kriyel, move e pwisan. Me ou kapab protez ou lekor kont li. Ki mannyer ou kapab fer sa?

3. Kwa ki pou ed nou sirmont nou lafreyer?

 ³ Ler nou asire ki Zeova i kontan nou e ki i dan nou kote, Satan pa pou fer nou per. (Ps. 118:6) Annou vwar en legzanp. Ekriven Psonm 118 ti fer fas avek bann problenm ki ti fatig li. I ti annan en kantite lennmi e serten ti bann dimoun enportan (verse 9, 10). Parfwa i ti anba en kantite presyon (verse 13). Zeova ti osi disiplin li severman (verse 18). Me kantmenm sa, sa psalmis ti sante e dir: “Mon pa pou per.” Kwa ki ti fer li santi li an sekirite koumsa? I ti konnen ki menm si Zeova ti’n disiplin li, son Papa ki dan lesyel ti kontan li en kantite. Sa psalmis ti asire ki nenport sityasyon ki i fer fas avek, son Bondye ki kontan li pou toultan pare pour ed li.​—Ps. 118:29.

4. Ki lafreyer nou kapab sirmonte si nou asire ki Zeova i kontan nou?

⁴ Nou bezwen asire ki Zeova i kontan nou. Sa pou ed nou sirmont trwa lafreyer ki bokou dimoun i annan. Sa i, (1) sa lafreyer ki nou pa pou kapab pran swen avek nou fanmir, (2) lafreyer zonm e (3) ler nou per lanmor. Sa bann frer ek ser ki’n ganny mansyonnen dan premye paragraf ti kapab sirmont zot lafreyer parski zot ti asire ki Zeova i kontan zot.

5. Kwa ki kapab fer en sef fanmir enkyet? (Vwar portre lo kouvertir.)

⁵ En sef fanmir Kretyen i pran o serye son responsabilite pour pran swen avek son fanmir. (1 Tim. 5:8) Si ou en sef fanmir, petet ou ti per ki pandan sa pandemi, ou ti pou perdi ou travay. I kapab ki ou ti enkyet ki ou pa ti pou kapab donn ou fanmir manze oubyen pey ou lón lakaz. I kapab ki ou ti osi per ki si ou perdi ou travay, ou pa ti pou kapab ganny en lot. Ouswa ou ti santi parey Nestor ek María, ki’n ganny mansyonnen pli boner. Petet ou ti krwar ki ou pa ti pou kapab viv lo en saler ki pli ba. Malerezman, Satan in fer en kantite dimoun ki santi dan sa fason aret servi Zeova.

6. Ki Satan i esey fer nou krwar?

⁶ Satan i esey fer nou krwar ki Zeova pa kontan nou e ki i pa pou ed nou pran swen avek nou fanmir. Sa i kapab fer nou krwar ki nou bezwen fer nenport kwa pour pa perdi nou travay. Nou menm kapab fer en keksoz ki pou gat nou lanmitye avek Zeova.

7. Ki Zezi ti asir nou?

⁷ Zezi i konn Zeova pli byen ki okenn dimoun. I ti dir: “Zot Papa i konn sa ki zot bezwen menm avan ki zot demann li.” (Mat. 6:8) Zezi i konnen ki Zeova i anvi donn nou sa ki nou bezwen. Konman Kretyen, nou form parti fanmir Zeova. Zeova i nou Sef fanmir alor nou kapab asire ki i pou swiv sa prensip ki li menm in fer met dan 1 Timote 5:8.

8. (a) Kwa ki pou ed nou sirmont sa lafreyer ki nou pa pou kapab pran swen avek nou fanmir? (Matye 6:31-33) (b) Ki mannyer nou kapab swiv legzanp sa koup dan portre ki pe anmenn manze pour en ser?

⁸ Ler nou asire ki Zeova i kontan nou ek nou fanmir, nou pou asire ki nou pou ganny bann keksoz ki nou bezwen. (Lir Matye 6:31-33.) Zeova i kontan nou, i zenere e i anvi donn nou sa ki nou bezwen. Ler Zeova ti kree later, i pa ti zis donn nou bann keksoz de baz ki nou bezwen pour viv. I ti osi donn nou bann keksoz pour fer nou zwaye. (Zen. 2:9)  Menm si parfwa nou annan zis sa ki nou bezwen e pa plis ki sa, i ti pou byen ki nou konsantre lo lefet ki nou annan sa ki nou bezwen. Zeova in toultan donn nou sa ki nou bezwen. (Mat. 6:11) Nou bezwen gard antet ki menm si nou fer bann sakrifis la konmela, sa ki Zeova in donn nou e sa ki i pou donn nou dan lavenir i bokou pli presye. Sanmenm ki Nestor ek María ti realize.​—Iza. 65:21, 22.

9. Ki nou kapab aprann avek leksperyans Nestor ek María?

⁹ Nestor ek María i reste Kolonbi e zot ti annan en lavi konfortab. Zot ti dir: “Nou ti anvi viv en lavi senp e fer plis dan predikasyon. Me nou ti per ki nou pa ti pou ere si nou ti viv lo mwens larzan.” Kwa ki ti ed zot sirmont zot lafreyer? Zot ti reflesir lo bann fason ki Zeova ti’n montre ki i kontan zot. Vi ki zot ti asire ki Zeova ti pou toultan pran swen avek zot, zot ti kit zot travay kot zot ti pe byen ganny peye, zot ti vann zot lakaz e zot ti al reste dan en rezyon kot i ti annan bezwen pour plis proklanmater. Ki mannyer zot santi konsernan zot desizyon? Nestor i dir: “Nou’n vwar ki sa ki Matye 6:33 i dir, i vre. Nou pa’n zanmen mank nanryen e aprezan nou pli ere.”

10. Akoz nou pa sirprann ki dimoun i per kanmarad?

¹⁰ Depi ki Adan ek Ev in rebel kont Zeova, bann imen in fer ditor kanmarad. (Ekle. 8:9) Par egzanp, serten dimoun i servi zot lotorite pour tret lezot dan en move fason. I annan lezot ki fer bann krim vyolan. Bann bouli kot lekol i ensilte e menas lezot manrmay e serten dimoun i menm tret zot fanmir dan en fason ki kriyel. Alor, nou pa sirprann ki dimoun i per kanmarad! Ki mannyer Satan i servi sa lafreyer?

11-12. Ki mannyer Satan i servi nou lafreyer pour zonm kont nou?

¹¹ Satan i esey fer nou sitan per dimoun ki nou aret anons sa bon nouvel oubyen nou aret fer lezot keksoz ki Zeova i demann nou pour fer. Satan i fer bann gouvernman enterdi sa travay predikasyon e persekit nou. (Lik 21:12; Rev. 2:10) En kantite dimoun dan sa lemonn i fann bann fo lenformasyon ek mansonz lo Temwen Zeova. Bann dimoun ki  krwar sa bann mansonz i kapab sikann nou oubyen atak nou. (Mat. 10:36) Sa bann taktik Satan pa sirprann nou parski i ti servi sa bann menm taktik dan premye syek.​—Akt 5:27, 28, 40.

¹² Satan i servi bann lezot keksoz pour fer nou per. Serten dimoun i per sa ki zot fanmir pou mazinen lo zot ler zot vin en Temwen Zeova. Parfwa zot per reaksyon zot fanmir plis ki ganny bate avek gouvernman. Zot kontan zot fanmir en kantite e zot anvi ki zot fanmir i aprann konn e kontan Zeova. Zot sagren ler zot tann zot fanmir koz dan en fason ki mank respe pour sa vre Bondye ek son bann serviter. Dan serten ka, bann manm fanmir ki oparavan ti opoz zot in vin dan laverite. Me ki nou pou fer si nou fanmir i rezet nou akoz nou krwayans?

13. Ki mannyer ler nou asire ki Zeova i kontan nou, sa i kapab ed nou si nou fanmir i rezet nou? (Psonm 27:10)

¹³ Sa bann zoli parol dan Psonm 27:10 i kapab rekonfort nou. (Lir.) Ler nou gard antet ki kantite Zeova i kontan nou, nou pa pou per menm si nou fanmir i rezet nou. Nou asire ki Zeova pou rekonpans nou si nou andire. Zeova pou donn nou tou sa ki nou bezwen pour viv, i pou ed nou reste kalm e zwaye e i pou ed nou reste pros avek li. Napa personn ki kapab fer sa pli byen ki Zeova. Sanmenm sa ki Biniam, ki’n ganny mansyonnen pli boner, ti realize.

14. Ki ou kapab aprann avek leksperyans Biniam?

¹⁴ Biniam ti vin en Temwen Zeova menm si i ti konnen ki gouvernman ti pe persekit bann Temwen Zeova. Biniam ti konnen ki Zeova i kontan li e sa ti ed li pour sirmont son lafreyer pour zonm. Annou vwar son leksperyans. Biniam i dir: “Sa persekisyon ti pli pir ki mon ti mazinen. Me mon ti pli per ki mon fanmir i opoz mwan, ki ganny persekite avek gouvernman. Mon papa pa ti en Temwen Zeova e mon ti per ki i ti pou dezapwente akoz mon’n vin en Temwen Zeova. Mon ti osi per ki mon fanmir pa ti pou annan respe pour mwan.” Me Biniam ti asire ki Zeova i toultan pran swen avek bann ki i kontan. Biniam i dir: “Mon ti reflesir lo lafason ki Zeova in ed bann frer ek ser pour fer fas avek bann problenm ekonomik, prezidis  e pour andire ler en lafoul i atak zot. Mon ti konnen ki si mon reste fidel avek Zeova, i pou beni mwan. Mon ti ganny arete plizyer fwa e menm ganny tortire. Ler sa ti arive, mon ti vwar pour mwan menm ki Zeova i toultan ed nou si nou reste fidel avek li.” Zeova ti vin en Papa pour Biniam e Son pep ti vin en vre fanmir pour li.

15. Akoz i normal pour nou per lanmor?

¹⁵ Labib i dir ki lanmor i en lennmi. (1 Kor. 15:25, 26) Nou kapab enkyet ler nou mazin lanmor sirtou si nou oubyen en dimoun ki nou kontan i vreman malad. Akoz nou per lanmor? Nou per parski Zeova in kree nou avek sa dezir pour viv pour touzour. (Ekle. 3:11) Me kantmenm sa, ler nou per lanmor sa i kapab protez nou lavi. Par egzanp, i ed nou fer bann bon desizyon konsernan nou ladyet, fer legzersis, al kot dokter, pran nou bann latizann ler i neseser e pour pa fer keksoz ki pou met nou lavi an danze.

16. Satan i konnen ki nou per lanmor, ki mannyer i servi sa lafreyer?

¹⁶ Satan i konnen ki nou kontan nou lavi. I dir ki nou pou sakrifye tou keksoz, menm nou lanmitye avek Zeova, pour nou pa mor. (Zob 2:4, 5) Me sa pa vre! Satan i “sa enn ki kapab koz lanmor” e i konnen ki nou per lanmor. Alor i esey servi sa lafreyer pour fer nou abandonn Zeova. (Ebr. 2:14, 15) Parfwa dimoun ki lo kote Satan i menase pour touy nou si nou pa dir ki nou nepli Temwen Zeova. Oubyen parfwa Satan i kapab vwar ki nou annan en maladi grav e i kapab servi sa sityasyon pour fer nou dezobei bann lalwa Zeova. Bann dokter oubyen manm fanmir ki pa servi Zeova i kapab met presyon lo nou pour aksepte en transfizyon disan ki en keksoz ki kont lalwa Bondye. Oubyen en dimoun i kapab esey fer nou aksepte en tretman ki al kont bann prensip Labib.

17. Dapre Romen 8:37-39, akoz nou pa bezwen per lanmor?

¹⁷ Menm si nou pa anvi mor, nou konnen ki si nou mor Zeova pa pou aret kontan nou. (Lir Romen 8:37-39.) Ler en zanmi Zeova i mor, Zeova i gard li dan son memwar, konmsi sa dimoun i ankor vivan. (Lik 20:37, 38) I vreman anvi resisit sa dimoun. (Zob 14:15) Zeova in pey ser pour nou kapab “ganny lavi eternel.” (Zan 3:16) Nou konnen ki i kontan nou en kantite e i pran swen avek nou. Alor olye abandonn li ler nou malad oubyen ler dimoun i menase pour touy nou, nou depan lo li pour nou kapab ganny rekonfor, lasazes ek lafors. Sanmenm sa ki Valérie ek son msye ti fer.​—Ps. 41:3.

18. Ki nou kapab aprann avek leksperyans Valérie?

¹⁸ Ler Valérie ti annan 35 an, dokter ti dir li ki i annan en kanser ki rar e danzere. Annou vwar ki mannyer lanmour ki Zeova in demontre anver li ti ed li pour sirmont son lafreyer. I dir: “Nou de mon msye, nou ti sirprann ler mon ti konnen ki mon annan kanser. Mon ti bezwen fer en gro loperasyon. Mon ti koz avek en kantite dokter me zot ti refize fer loperasyon san servi disan. Menm si mon ti per, mon pa ti oule fer transfizyon disan parski sa ti kont lalwa Bondye. Zeova in demontre lanmour pour mwan tou dilon mon lavi e aprezan mon ti annan sa loportinite pour montre ki mon kontan li.  Sak fwa mon ti ganny en move nouvel, mon ti pli determinen pour fer Zeova fyer olye les Satan ranport laviktwar. Pli tar, mon ti reisi fer loperasyon san fer transfizyon disan. Menm si mon ankor annan bann problenm lasante, Zeova in toultan donn nou sa ki nou bezwen. Par egzanp, sa wikenn avan mon ti konnen ki mon ti annan kanser, nou ti etidye en lartik Latour Veyer pandan renyon ki ti rekonfort nou en kantite. Sa lartik ti annan pour tit ‘Fer fas avek difikilte denozour avek kouraz.’ * Nou ti lir plizyer fwa. Ler mwan avek mon msye nou’n etidye bann lartik koumsa e nou’n kontinyen fer nou bann aktivite spirityel, sa in ed nou pour reste kalm e pour fer bann bon desizyon.”

19. Ki pou arive byento?

¹⁹ Avek led Zeova, bann Kretyen partou lo later in sirmont bann sityasyon difisil e zot in reisi opoz Dyab. (1 Pyer 5:8, 9) Ou osi ou kapab fer sa. Byento Zeova pou donn lord Zezi ek bann ki pou dirize ansanm avek li pour “elimin lemal ki Dyab in fer.” (1 Zan 3:8) Apre ki zot in fer sa, pep Bondye ki lo later “pa pou per nanryen e [zot] pou napa rezon pour per.” (Iza. 54:14; Mik. 4:4) Me ziska sa letan, nou bezwen fer zefor pour sirmont nou lafreyer.

20. Kwa ki pou ed nou sirmont nou lafreyer?

²⁰ Nou bezwen kontinyen annan konfyans ki Zeova i kontan e protez son bann serviter. Pour nou kapab fer sa, nou bezwen medit lo lafason ki Zeova in protez son bann serviter dan lepase e koz lo sa bann leksperyans. Nou kapab osi gard antet lafason ki Zeova in ed nou pour fer fas avek bann sityasyon difisil. Avek led Zeova, nou kapab sirmont nou lafreyer!​—Ps. 34:4.