DHƐƐˈˈ ˗NU ˈÖ WLÜÜNËN ˗NU ˗WA KPƆ
Biblö ꞊mɔɔn˗ ˗bha ˈö n ˗takun ˗kɔ ˗kë ꞊dhɛ? (ˈˈPian 1): Pë ˗së ˗nu mɛɛnˈˈ ü ˗bha Biblö ˈgü
«A Biblö ˗wopösü ˈgü ˗dan, ˈˈkɛɛ ˗a ˗bha ˗kë ꞊gblɛɛn ˗sü ˗yö n ˈgü ˗ga.»—Briana ˈö˗ ˗kwɛ ˈdhö 15.
˗Yö ü ˈgü ˈˈdhʋ̈ ˈpö ˗ee? ˈWɔn ˗gɔ ˈö yö ˗yö ꞊mɔɔn˗ ˗bha ˈö ü ˗takun.
ˈMën ˗kë ˈö Biblö ˗wopösü ˈdhö ˗së?
Biblö ˗wopösü ˗yö ü ˈˈɲan ˈˈyi ˗kan ˗ee? ꞊Ya kë ꞊dhɛ ˗yö ˈˈdhʋ̈, yi˗ ˈgüman ü ˗gɔ. ˗A ˈbha ˗ya kë kö ü Biblö ˗yö ꞊dhɛ ˈsëëdhɛ ˗be ˈkpii˗ ˈö˗ ˈˈpian ˗yö ˗ӡiö 1000 ˗ta, ˈö˗ ˈˈɲan ˈdhö ˈsɛɛn˗, ˈö pë ˈˈbin gbɛ˗ ˈyaa˗ ˈgü ˗a ˈdhö. ˈWaa ꞊mɔɔn˗ ˗bha ˗wa ˗zɔn tele ɛɛnˈˈ video ˗ga ˗sü ˈka.
ˈˈKɛɛ ü ˗zota ˈwɔnzuan ˈö yö ˗a ˈgü: ˈBha ˗kpan ꞊gbëë zii do ˈö pë ꞊bhlëësü ˗nu ˈdhö˗ ˈgü ˗a ˗bha, ˈmën ˈü ˗dho ˗a kë? Ü ˗dho ˗a ˈˈdhiʋ̈ ˈˈpʋ kö ˈpë ˈwo˗ ˈgü ˈü ˗kpan ˗an ˗bha.
Biblö ˗yö ꞊dhɛ ꞊gbëë suu bhë ˗a ˈdhö. ˗Dhioo ꞊bhlëësü ˗nu ˗wa ˈgü kö ˗wo ü ˗takun:
ˈÜ ˗da ˈwɔn ˗së ˗ӡian ˗ta.
Kö kaa ü ˗mɛn ˗nu ˈka ka ˈko ˗wo ˈgüman.
Kö ˈü ˈˈtɔŋdë ˗tiaandhö ˗nu ꞊slɔɔ.
Kö ˈü zuʋ̈dhiʋ̈tɛwɔn ˗nu bun ˗kɔ dɔ.
Mën ˗kë ˈö ˈsëëdhɛ ˗be zii ˈö bhë ˈö ꞊mɔɔn˗ ˗bha kö ˗yö ü ˗takun ꞊dɛɛ? ˗A ˈklɔɔ˗ ˗mü ꞊dhɛ ‹˗Wʋ ˈˈpɛpɛ ˈkö ˗bɛn zë ˗sü ˈka ˗Zlan ˗bha ˈsëëdhɛ ˈˈslʋ̈ʋ̈slʋ bha˗ ˈgü [...] yö ꞊në˗ ˗ya mɛ ˈˈbhɩɩ˗ ˗nu zuʋ̈ˈˈ ˈˈpiʋ̈ ˈyö ˈwo˗ ˗ya.› (2 Timote 3:16) ˗Ya ˗zɔn ꞊dhɛ ˗dhioo ˗nu ˈwo Biblö ˈgü, ˗wo ˗go mɛn ˈö˗ ˗bha ˈwɔndɔdhe ˈˈdhiʋ̈todhɛ ˈyaa ˈdhö ˗a ˈˈpiʋ̈.
A ˗dho Biblö ˗wo pö ˗kɔ ˗kë ꞊dhɛ?
˗Gleŋ 1: Biblö ˗be ˗todhʋ̈sü ˗wo pö. ˈBha˗ ˗kë ˈˈdhʋ̈ nɔɔn˗ ˗todhʋ̈sü ˈwo Biblö ˈgü, ü ˗dho ˗an ˗gɛn dɔ. Biblö ˗wo pö ˗kɔ ˈˈslö ˗nu ˗wo ꞊va. ˗Kwaa ˈwɔnzuan ꞊plɛ ˗ga:
Ü ꞊mɔɔn˗ ˗bha ˈü ˈsëëdhɛ ˗be 66 ˈwo Biblö ˈgü bhë ˗an ˗wo pö ˗naan ˈka, ˈü˗ züdɔ ˈWunzüdɔdhɛ ˗ta ˈü˗ ˈˈdhiʋ̈ to ˗Dhɛkpaɔ dhiaˈˈ ˈsëëdhɛ ˗ta.
Ü ꞊mɔɔn˗ ˗bha ˈü Biblö ˗wo pö ˗naan ˈˈdhiʋ̈ ˗së ˈka, kö ˈwɔn ˗nu ˈwo˗ ˈgü, ˗kɔ ˈö ˗an zü ˗yö dɔ ˗a ˗bha ˈö dho ˈö yö ˗a ˈka ˗a ˈˈdhiʋ̈todhɛ ˗bha, ˈü ˗an yö ˈko ꞊troo ˗së ˈka ˈü˗ ˗wo pö.
ˈˈSlö: ˈSëëdhɛ ˗be ˈnën Guide d’étude de la Parole de Dieu ˈˈpian 4 ˗A ˗yö ˗kɔ ˈö ˈwɔn ˗nu ˗kë ˗a ˈka Yesu ˗bha ˗tosɛta ˈgü ˗a ˗yö ˈko ꞊troo ˗së ˈka ˈö˗ ˗zɔn.
˗Gleŋ ꞊plɛ ˗bha ˗naan: ˈWɔn ˈˈgbɩɩ˗ ˈö ü ˗ta, ü ˗kɔ ˈˈyɛ ˗a ˈwɔnzuan do ˈö Biblö ˈgü ˗a ˗bha kö ˈü˗ ˗wo pö. ˗A ˈwɔnzuan ˈtɔ˗:
Ü˗ ˈˈpiʋ̈ kö ˈü ü ˈˈtɔŋdë ˗tiaandhö ˗nu ꞊slɔɔ ˗ee? ˗Bhö Ʒonatan waa Davi ˗an ˗bha ˗kwɛzlan ˗wo pö. (1 Samuel ˈˈɲan ˈˈgblʋ̈gblʋ̈ 18˗20) ˈBha ü bo, ˗bhö bɔ ˈsëëdhɛ « Comment se faire des amis fidèles ? » ˗ta kö ˈü ˗gleŋ ˗së ˗nu ˈsü ˗kwɛzlan bhë ˗a ˗bha.
Ü˗ ˈˈpiʋ̈ ko ˈü ˗gban ˈgüdandhe ˗nu ˗gɔ ˗ee? ˗Bhö Zozɛfö ˗bha ˗kwɛzlan ˗wo pö kö ˗kɔ ˈö ˗gban ˗a ˈka ˈgüdandhe ˗gɔ ˈü dɔ. (ˈWunzüdɔdhɛ ˈˈɲan ˈˈgblʋ̈gblʋ̈ 39). ˈBha ü bo ˗bhö bɔ ˈsëëdhɛ « Comment résister à la tentation ? Joseph — 1re partie » waa « Accusé à tort ! Joseph — 2e partie » ˗an ˗ta kö ˈü ˗gleŋ ˗së ˗nu ˈsü ˗kwɛzlan bhë ˗a ˗bha.
Ü˗ ˈˈpiʋ̈ kö ˗kɔ ˈö bhɛɛsü dho ü ˗takun ˗a ˈka ˈü˗ dɔ ˗ee? ˗Bhö Neemi ˗bha ˗kwɛzlan ˗wo pö. (Néhémie ˈˈɲan ˈˈgblʋ̈gblʋ̈ 2) ˈBha ü bo ˗bhö bɔ ˈsëëdhɛ « Dieu a répondu à sa prière » ˗ta kö ˈü ˗gleŋ ˗së ˗nu ˈsü ˗kwɛzlan bhë ˗a ˗bha.
ˈˈSlö: ˈBha pö ˈü Biblö ˗wo pö ˗bhö kë ˈdhɛ ˗zuöö ˈyaa˗ ˗bha ˗a ˈgü kö ˈü ü ˗de ˗wo ˈgüman.
˗Gleŋ ˗yaaga ˗bha ˗naan: Ü ˗kɔ ˈˈyɛ Biblö ˗bha ˗kwɛzlan do ɛɛnˈˈ Psaume do ˗bha kö ü˗ ˗wo pö, kö ˈü ü ˗zota ˗kɔ ˈü ˗dho ˗a ˗ya ꞊bhlëë ˈgü ˗a ˈka, ˗a ˈgü. ˈBha ü bo ˗a ˗wopösü ˈka, dhɛɛˈˈ ˗nu ˈwo yö ˗an ˈkpɔ ü ˗de ˗gɔ:
ˈMën ˗kë ˈö Zoova ˗yö ˗we ˗a ˗bha kö ˈwɔn ˈö yö ˗wa ˗ya Biblö ˈgü?
˗Mën ˈö˗ ˗zɔn n ˗dhɛ ˈö ˗gban Zoova waa˗ ˗bha ˈwɔn ˗nu kë ˗kɔ ˗bha?
˗Gleŋ ˈö go ˗a ˈgü, a ˗dho ˗a ˗ya ꞊bhlëë ˈgü ˗kɔ ˗kë ꞊dhɛ?
ˈˈSlö: ˈPë ˈü ˗dho ˗a kë ˗a ˗ya ü ˗zo ˈˈpiʋ̈! ˗Dhɛkpaɔyi ˈü˗ ˈˈpiʋ̈ ˈü ˗ya Biblö ˗wopösü ˗bha ˗a ˈka ˗a ˗ya, kö ˈü yökë Biblö ˗wo pö ˗kɔ ˈsëëdhɛ ˈö yi ˗bha ɛntɛnö ˈˈnimlɔn ˗ta bhë ˗a ˈka.