Oho. Jehovah Adasefo yɛ Christianfo, naaso yɛnnyɛ Protestantfo. Ebɛnadze ntsi a?

Wɔakyerɛkyerɛ Protestantsom mu dɛ ɔyɛ “ɔsom kuw bi a otsia Roman Catholic som.” Ɔwɔ mu, ɔyɛ nokwar dɛ Jehovah Adasefo nnye Roman Catholicfo gyedzi ahorow no nnyɛ adwen dze, naaso, ɔno nnkyerɛ dɛ yɛyɛ Protestantfo. Siantsir ahorow a odzidzi do yi ma yehu dɛm:

1. Protestantfo gyedzi ahorow pii nye dza Bible kyerɛkyerɛ ankasa no bɔ ebira. Dɛ nhwɛdo no, Bible no kyerɛkyerɛ dɛ “Onyame kortoo na ɔwɔ hɔ,” nna nnyɛ Baasakor. (1 Timothy 2:5; John 14:28) Ɔsan so kyerɛkyerɛ kofee dɛ Nyankopɔn dze ɔsɛɛ a onnyi ewiei bɔtwẽ emumuyɛfo asõ, na mbom nnyɛ hellgya.​—Ndwom 37:9; 2 Thessalonicafo 1:9.

2. Yɛnnsoɛr nntsia Catholic Asɔr anaa asɔr fofor biara, na yɛmmbɔ mbɔdzen dɛ yɛbɛsesã hɔn so. Dza ɔnye iyi bɔ ebira no, Nyankopɔn n’Ahenman no ho asɛmpa kɛkɛ na yɛkã kyerɛ afofor, na yɛaboa hɔn ma woeenya asɛmpa no mu gyedzi. (Matthew 24:14; 28:19, 20) Dza osi hɛn enyiwa do nye dɛ yɛbɛkyerɛkyerɛ akomapafo nokwar a ɔfa Nyankopɔn nye n’Asɛm Bible no ho, na nnyɛ dɛ yɛbɛsesã asɔr biara.​—Colossaefo 1:​9, 10; 2 Timothy 2:​24, 25.