Nnwom 37:1-40
Dawid dwom.
א [Aleph]
37 Mma wo bo mmfuw esiane nnebɔneyɛfo nti,Na mma w’ani mmmere amumɔyɛfo.+
2 Wobekisa ntɛm sɛ sare,+Na wobetwintwam sɛ wura momono.
ב [Beth]
3 Fa wo ho to Yehowa so na yɛ papa;+Tena asaase so na di nokware.+
4 Di ahurusi wɔ Yehowa mu,*Na ɔbɛma wo nea wo koma pɛ.
ג [Gimel]
5 Fa wo kwan hyɛ Yehowa nsa,+Na fa wo ho to no so, na obeso wo mu.+
6 Ɔbɛma wo trenee ada adi sɛ adekyee hann,Na w’atɛntrenee ada adi sɛ awia ketee.
ד [Daleth]
7 Yɛ komm hwɛ Yehowa;+Tɔ wo bo ase* twɛn no.
Sɛ obi bɔ pɔw bɔne na otumi yɛ ho adwuma a,Mma ɛnhaw wo.+
ה [He]
8 Mma abufuw nnhyɛ wo so, na mma abufuhyew kwan;+Mma nneɛma nnhaw wo na woankɔyɛ bɔne,*
9 Efisɛ wobeyi nnebɔneyɛfo hɔ,+Na wɔn a wɔtwɛn Yehowa no, wɔn na asaase no bɛyɛ wɔn dea.+
ו [Waw]
10 Aka kakraa bi na nnebɔneyɛfo nni hɔ bio;+Wobɛhwehwɛ wɔn tenabea,Nanso worenhu wɔn.+
11 Ahobrɛasefo na asaase no bɛyɛ wɔn dea,+Na wobegye wɔn ani wɔ asomdwoe bebree mu.+
ז [Zayin]
12 Ɔdebɔneyɛfo fa ɔtreneeni ho adwemmɔne,+Na ɔde abufuw twɛre ne se gu no so.
13 Nanso Yehowa bɛserew no,Efisɛ Onim sɛ n’awiei bɛba.+
ח [Heth]
14 Nnebɔneyɛfo twe wɔn sekan, na wokuntun wɔn agyan muSɛnea ɛbɛyɛ a wɔbɛma mmɔborɔwa ne ohiani ahwe ase,Na wɔakum wɔn a wɔn kwan teɛ.
15 Wɔn ankasa sekan na ɛbɛwɔ wɔn koma mu;+Wɔn agyan bebubu.
ט [Teth]
16 Nneɛma kakra a ɔtreneeni wɔ no,Eye sen adedodow a nnebɔneyɛfo pii wɔ,+
17 Efisɛ nnebɔneyɛfo nsam begow,Na atreneefo de, Yehowa bɛboa wɔn.
י [Yod]
18 Ɔhaw a wɔn a wɔn ho nni asɛm fa mu no, Yehowa nim,*Na wɔn agyapade bɛtena hɔ daa.+
19 Ahohia ba a, wɔn ani renwu,Na ɔkɔm bere mu nso, wɔbɛmee.
כ [Kaph]
20 Nnebɔneyɛfo de, wɔbɛyera,+Sɛnea wura frɔmfrɔm hyew no, saa ara na Yehowa atamfo ase bɛhyew;Wɔbɛyera te sɛ wusiw.
ל [Lamed]
21 Ɔdebɔneyɛfo fɛm ade a, ontua;Ɔtreneeni de, ne yam ye* na ɔkyɛ ade.+
22 Wɔn a Onyankopɔn hyira wɔn no, wɔn na asaase no bɛyɛ wɔn dea,Na wɔn a ɔdome wɔn no de, wɔbɛsɛe.+
מ [Mem]
23 Sɛ ɔbarima kwan sɔ Yehowa ani a,+Ɔkyerɛ no sɛnea obetutu n’anammɔn.*+
24 Sɛ ɔhwe ase mpo a, ɔrenka hɔ,+Efisɛ Yehowa beso ne nsa* ama no so.+
נ [Nun]
25 Ná meyɛ abofra, na afei mabɔ akwakoraa,Nanso minhuu sɛ Onyankopɔn apo ɔtreneeni+Anaasɛ n’asefo srɛsrɛ aduan.*+
26 Oyi ne yam de ade fɛm nkurɔfo daa,+Na nhyira da hɔ retwɛn ne mma.
ס [Samekh]
27 Fi bɔne ho na yɛ papa,+Na wobɛtena ase daa.
28 Efisɛ Yehowa dɔ atɛntrenee,Na ɔrennyaw n’anokwafo.+
ע [Ayin]
Ɔbɛhwɛ wɔn so daa;+Na nnebɔneyɛfo asefo de, wɔbɛsɛe.+
29 Atreneefo na asaase no bɛyɛ wɔn dea,+Na wɔbɛtena so daa.+
פ [Pe]
30 Ɔtreneeni de n’ano ka nsɛm a ɛma nkurɔfo hu nyansa,*Na ne tɛkrɛma ka nsɛm a ɛteɛ.+
31 Ne Nyankopɔn mmara wɔ ne koma mu;+Sɛ otutu n’anammɔn a, ɔrenhintiw.+
צ [Tsade]
32 Ɔdebɔneyɛfo ani sa ɔtreneeni;Ɔrehwehwɛ no akum no.
33 Nanso Yehowa rennyaw ɔtreneeni nhyɛ ne nsa,+Na sɛ ɔrebu atɛn a, ɔremmu ɔtreneeni fɔ.+
ק [Qoph]
34 Twɛn Yehowa, na fa ne kwan so;Ɔbɛma wo so na ɔde asaase no ama wo.
Sɛ woyi nnebɔneyɛfo hɔ a,+ wubehu.+
ר [Resh]
35 Mahu ɔdebɔneyɛfo a ne tirim yɛ sum;Ɔtrɛtrɛw yɛɛ frɔmm sɛ dua a anya baabi pa asi.+
36 Nanso mpofirim ara otwaam kɔe, na na onni hɔ bio;+Mehwehwɛɛ no ara nso manhu no.+
ש [Shin]
37 Hwɛ onipa a asɛm biara nni ne ho,*Na hwɛ nea ɔteɛ;+Saa onipa no awiei bɛyɛ asomdwoe.+
38 Mmaratofo de, wɔbɛsɛe wɔn nyinaa,Na anidaso biara nni hɔ mma nnebɔneyɛfo.+
ת [Taw]
39 Atreneefo nkwagye fi Yehowa;+Ɔno ne wɔn ahohia bere mu guankɔbea.+
40 Yehowa bɛboa wɔn na wagye wɔn.+
Obeyi wɔn afi nnebɔneyɛfo nsam, na wagye wɔn,Efisɛ wɔde no ayɛ wɔn guankɔbea.+
Ase Hɔ Nsɛm
^ Anaa “Ma w’ani nka Yehowa ho.”
^ Anaa “Nya abotare.”
^ Ebetumi nso akyerɛ, “Mma nneɛma nnhaw wo efisɛ nea ebewie ara ne bɔne.”
^ Nt., “Yehowa nim wɔn a wodi mu no nkwa nna.”
^ Anaa “ɔdom nkurɔfo.”
^ Anaa “Ɔma n’anammɔn tim.”
^ Anaa “Yehowa de ne nsa beso ne mu.”
^ Nt., “paanoo.”
^ Anaa “Nyansa na ɔtreneeni de n’ano besebese.”
^ Anaa “onipa a n’abrabɔ di mu.”
