Ena ika23 ni Epereli, 2023, e sevutaki ena dua na noda soqo e Sauca Korea, na ivola The Bible—The Book of Matthew ena vosa vagalu ni Jaina. Qo na imatai ni gauna me sevutaki kina e dua na ivola ena iVolatabu ena vosa qori. Era soqoni kina e voleka ni le 200 mai na rua na ivavakoso vosa vagalu ni Jaina, e Sauca Korea. Sa rawa ni download na ivola qo ena jw.org kei na porokaramu na JW Library Sign Language.

Ratou saga na timi ni vakadewa me ratou vakayagataka na vosa ni veisiga, me lekaleka qai matata. E kaya e dua na daunivakadewa: “Keitou le tolu ena timi, ia e rua rau galu. Keitou dau veivosakitaka gona vakalevu na ivakarau ni nodra vakasama na galu. E vakarawarawataka na neitou vakadewa ni kilai na nodrau rai.”

E kaya e dua tale na daunivakadewa: “Noqu qarava na itavi qo, e vukei au meu kila vinaka na ka e cakava o Jisu, na ka e sotava kei na veika e vakavulica ni bula e vuravura.”

Qo na ka e kaya e dua na tacida e galu, e tiko tale ga ena soqo: “Ni bera ni sevutaki na ivola vou qo, e vakadewataki e vica ga na tikinivolatabu ena vosa vagalu ni Jaina. E vaka ga keimami raica e vica na tikitiki ni dua na droini. Ia qo ni sa vakadewataki na ivola i Maciu, keimami sa qai raica na droini taucoko.”

E kaya e dua tale na dautukutuku e galu: “Na isoqosoqo i Jiova e vakadewataka na kakana vakayalo ina vosa vagalu, okati kina na ivola i Maciu ena vosa vagalu ni Jaina. Au kila gona ni o Jiova e lomani keimami vakalevu na galu qai vinakata me vukei keimami.”

Eda vakavinavinakataki Jiova ni vakarautaka na ivola vou qo, ena yaga vakalevu vei ira na tacida mera qaravi Jiova ‘vakayalo, me dina tale ga.’—Joni 4:24.