Vakacava se qai mate ga e dua nomu itokani se lewenivuvale? Ke dina qori, ena vukei iko na ulutaga qo mo vosota na nomu lolosi.

Ena ulutaga qo

•  Vakacava sa sivia tale noqu rarawa?

•  Sala mo vosota kina

•  Ka era kaya na nomu icaba

 E levu era dau rarawa vakasivia, qai taura na gauna me seavu kina.

 “Dua na ka noqu nanumi tutu e veisiga. Sa oti qo e rua na yabaki nona mate, ia au dau luluvu ena gauna kece au talanoataki koya kina.”—Olivia.

 “E tokoni au vakalevu o noqu bu ena noqu isausau, ia sa mate ena gauna au rawata kina. Gauna kece au rawata kina e dua noqu isausau, au dau luluvu niu vakasamataki koya.”—Alison.

 Levu na ka o na rairai vakila ena gauna o lolosi kina. Kena ivakaraitaki:

 “Na siga e mate kina o noqu momo, dua na ka noqu veilecayaki. Qori na imatai ni gauna me mate kina e dua au dau volekata. E vaka ga au laucoqa ena dua na sitima.”—Nadine.

 “Ni mate o noqu tutu, au a cudru sara ga. Baleta keitou dau tukuna vua me qarauna na nona bula, ia e sega ni cakava qori.”—Carlos.

 “Ni mate o tutu keirau a sega ni tu e kea kei taciqu. Au beitaki au ga niu sega ni vakamoce vinaka vua.”—Adriana.

 “Keitou dau veivolekati vakavuvale kei na dua na veiwatini, ia rau qai mate ena dua na vakacalaka e gaunisala. Tekivu mai na gauna qori, au dau lomaleqa ke biubiu mai vale e dua na wekaqu, au nanuma de na mate tale ga vakacalaka.”—Jared.

 “Ni mate o noqu bu ena tolu na yabaki sa oti, au veivutunitaka niu sega ni vakayagataka vua e levu noqu gauna.”—Julianna.

 Eda dau veilecayaki, cudru, beitaki keda, lomaleqa se rarawa ena gauna eda lolosi kina. Ke o vakila tiko qori, mo nuidei ni toso na gauna ena seavu. Ia ena gauna mada ga qo, o na vosota vakacava na rarawa?

 Veitalanoa kei na dua nomu itokani. E kaya na iVolatabu na itokani dina “e tacida ena gauna ni rarawa.” (Vosa Vakaibalebale 17:17) Ena rawa ni vukei iko na nomu itokani ke o talaucaka vua na lomamu.

 “E sega ni cala meda lolositaka nona mate e dua na wekada. Eso na gauna o nanuma ni o rawa ni vosota, ia qori e rawa ni kuria ga na nomu rarawa. E vinaka mo talaucaka na lomamu vua e dua nomu itokani.”—Yvette.

 Dau nanumi koya. E kaya na iVolatabu ni “tu na ka vinaka ena lomadra na tamata vinaka.” (Luke 6:45, Easy-to-Read Version, 1992) Rawa ni vola na veika vinaka drau dau marautaka vata tu.

 “Au nanuma meu vola na ka kece e vakavulici au kina o noqu itokani, au vuli tale ga ena nona ivakaraitaki. Qori e vukei au meu vosota.”—Jeffrey.

 Qarauna nomu bula. E kaya na iVolatabu e yaga na vakaukauayago. (1 Timoci 4:8) Mo dau kania na kakana bulabula, vakaukauayago qai moce vinaka.

 “Na rarawa vakasivia e rawa ni vakaleqa nomu vakasama. Ena vinakati gona mo bulabula, dau kana, qai moce vakavinaka.”—Maria.

 Vukei ira eso tale. E kaya na iVolatabu: “E marau vakalevu o koya e solia na ka, vakalailai o koya e taura na ka.”—Cakacaka 20:35.

 “Tovolea mo vukei ira eso tale, vakabibi o ira e mate na wekadra. O na kila kina nira rarawa tale tiko ga.”—Carlos.

 Talaucaka na lomamu ena masu. E vakatokai ena iVolatabu na Kalou o Jiova me “Daurogo masu.” (Same 65:2) E tukuna tale ga ni o Jiova “e vakabulai ira na ramusu na lomadra, e vauca na nodra mavoa.”—Same 147:3.

 “Kerei Jiova me tokoni iko qai vakayaloqaqataki iko. Eso na gauna ena rairai dredre mo vosota, ia ena tokoni iko tu ga o Jiova.”—Jeanette.

 Kua ni namaka vakasivia na ka. E duidui na sala eda lolosi kina. E kaya na iVolatabu ni o Jekope e “sega tiko ga ni vinakata me vakacegui” ena gauna e mate kina na luvena. (Vakatekivu 37:35) Kua gona ni kurabui ni o na rawa ni lolosi me dua na gauna balavu.

 “Sa 15 qo na yabaki nona takali o noqu bu. Ia levu na ka dau raica, au dau nanumi koya sara ga.”—Taylor.

 Vakasamataka ke ramusu e dua nomu sui. Ena mosimosi toka, ena taura tale ga na gauna me mavo. Ia e vakasalataki iko na vuniwai ena ka o rawa ni cakava mo vosota, qai bula vinaka tale.

 E tautauvata qori kei na rarawa o vakila ni mate e dua na wekamu lomani. Ena taura na gauna me seavu na lolosi. Mo dau yalovosovoso. Dikeva na vakatutu ena ulutaga qo, qai raica na kena ena yaga vei iko.