E kaya o Briana: “Au dau saga meu wili iVolatabu, ia sa rui balavu!”

 E dau va tale ga qori nomu rai? E rawa ni vukei iko na ulutaga qo!

•  Vuna me wiliki kina na iVolatabu

•  Sala mo wilika kina na iVolatabu

•  Ka era kaya nomu icaba

 Vakacava e dau vakavucesa na wili iVolatabu? Ke vaka kina, sega ni o iko ga o vakila tiko qori. O na rairai kaya ni vinaka cake na sara tivi kei na vidio mai na wili iVolatabu, ni udolu na tabana, e lailai na matanivola qai sega na itaba!

 Ia vakasamataka mada va qo: Ke o kunea e dua na katoniyau talei e makawa, sega ni vakabekataki o na via kila na ka e tiko e loma.

 E dua gona na katoniyau talei na iVolatabu. E tu kina e levu na vatu talei me vaka na vuku e rawa ni vukei iko mo

•   Vakatulewa vinaka

•   Veimaliwai vinaka kei rau nomu itubutubu

•   Kunea na itokani dina

•   Vosota na lomaocaoca

 E se yaga tiko ga vakacava nikua na ivola makawa qori? Baleta ni “vakavuna na Kalou na iVolatabu kece.” (2 Timoci 3:​16) E vakadeitaka qori ni yavutaki vinaka na ivakasala e tu kina.

 Dua na sala oya mo wilika taucoko na iVolatabu. O na kila kina na itukutuku kece e umani ena iVolatabu. E levu na sala o rawa ni wilika kina na iVolatabu. Dikeva e rua na kena ivakaraitaki:

•    O rawa ni wilika taucoko na 66 na ivola ena iVolatabu, mai na Vakatekivu ina Vakatakila.

•    O rawa ni wilika na ka e yaco veitaravi se na veitaravi ni gauna e yaco kina.

 Vakatutu: O na raica ena iKuri A7 ni Vakadewa ni Vuravura Vou na veitaravi ni ka e yaco ni se bula e vuravura o Jisu.

 Na ikarua ni sala mo wilika kina na iVolatabu oya mo digia e dua na italanoa e veidonui vinaka kei na ituvaki o sotava tiko. Kena ivakaraitaki:

•    O via kunei ira na itokani nuitaki? Wilika na kedrau italanoa o Tevita kei Jonacani. (1 Samuela, wase 18-20) Qai vakalewena “O na Kunea Vakacava na iTokani Dina” mo vulica kina na ka rau sotava o Tevita kei Jonacani.

•    O via kila na sala mo vorata kina na veitemaki? Wilika na italanoa ni nona temaki o Josefa. (Vakatekivu, wase 39) Qai vakalewena eso na lesoni me vaka “O na Vorata Vakacava na Veitemaki . . . Josefa​—Wase 1” kei na “Beitaki Vakailasu! Josefa​—Wase 2” mo vulica kina eso na lesoni yaga.

•    O via kila na sala ena vukei iko kina na masu? Wilika na ivakaraitaki kei Niemaia. (Niemaia, wase 2) Oti qai vakalewena “God Answered His Prayer” mo vulica kina eso nona ivakaraitaki.

 Vakatutu: Ni o wili iVolatabu, e vinaka me vakanomodi na vanua o wiliwili kina, me kua kina ni gole tani nomu vakasama.

 Na ikatolu ni sala oya mo digia e dua na italanoa ena iVolatabu se Same. Wilika, qai vakasamataka se cava o vulica kina. Ni oti nomu wiliwili, qai vakasamataka eso na taro va qo:

•    Na cava e biuta kina qo o Jiova ena iVolatabu?

•   Na cava e vakaraitaka qo me baleta na itovo i Jiova kei na sala e dau vakayacora kina na ka?

•    Au na muria vakacava na ka au vulica kina?

 Vakatutu: Vakayagataka na New World Translation study edition mo raica kina na vidio, mape, kei na so tale na ivukevuke me yaga kina nomu wili iVolatabu.