Vei Ira mai Efeso 5:1-33
5 O koya gona, moni vakatotomuria na Kalou+ ni oni luvena lomani,
2 moni veilomani tiko ga+ me vaka nona lomani keda na Karisito+ ni a soli koya ena vukuda me isoro boivinaka vua na Kalou.+
3 Me vaka ni oni dauveiqaravi ni Kalou,+ me kua mada ga ni cavuti ena kemuni maliwa+ na veiyacovi tawadodonu,* na ka dukadukali kece se kocokoco,
4 me kua tale ga na itovo vakamadua, na veivosaki e vakasisila, se na veiwali ca+—na ka kece era sega ni kilikili—moni vakavinavinaka ga vua na Kalou.+
5 Oni raica, oni kila vinaka tale ga ni o koya e dau veiyacovi tawadodonu*+ se o koya e dukadukali se o koya e kocokoco,+ e kena ibalebale qori ni qaravi matakau, ena sega ni rawata na Matanitu i Karisito kei na Kalou.+
6 Me kua sara ni dua e vakacalai kemuni ena vosa tawayaga, ni ka kece qori ena yaco kina na cudru ni Kalou vei ira na luve ni talaidredre.
7 Ni kua gona ni tomani ira,
8 ni oni a butobuto tu e liu, ia qo oni sa rarama+ ena nomuni duavata kei na Turaga.+ Ni bula tiko me vaka na luve ni rarama.
9 Na vua ni rarama e okati kina na ivalavala vinaka kece, na yalododonu, kei na dina.+
10 Vakadeitaka tiko ga na ka e vakadonuya+ na Turaga,
11 kua ni tokoni ira ena cakacaka tawayaga e salavata kei na butobuto,+ ia ni vunauci ira ga,
12 baleta ni veivakamaduataki mada ga ke tukuni na veika era cakava lo.
13 Na ka kece e vunauci e vakavotui ena rarama, ni rarama na ka kece e vakavotui.
14 E kaya kina o koya: “Mo yadra mai o iko na dau moce, tucake mai na mate,+ ena qai vakararamataki iko na Karisito.”+
15 O koya gona, ni qarauna matua na nomuni ilakolako, ni kua ni vakataki ira na lialia, ni vakataki ira ga na vuku,
16 ni vakayagataka vakavinaka na nomuni gauna,*+ nida sa bula tu ena veisiga ca.
17 O koya gona, ni kua ni yalodredre, ni saga moni kila tiko ga se cava na loma i Jiova.*+
18 Ni kua tale ga ni mateni ena waini,+ ni dau yaco kina na itovo velavela, ia moni vakasinaiti ga ena yalo tabu,
19 ni veivosakitaka na same, ni veivakacaucautaki+ vua na Kalou kei na sere vakayalo. Ni sere+ tale ga vei Jiova* mai vu ni lomamuni+
20 ena yaca ni noda Turaga o Jisu Karisito, ni vakavinavinakataka tiko ga+ na ka kece vua na Kalou na Tamada.+
21 Ni dau vakamalumalumu vakataki kemuni+ ena nomuni rerevaki Karisito.
22 Mera vakarorogo vei watidra na yalewa vakawati+ me vaka na nodra vakarorogo vua na Turaga,
23 ni ulu i watina o tagane,+ me vaka ni ulu ni ivavakoso na Karisito,+ o koya na ivakabula ni yago qo.
24 Me vaka ni vakarorogo vei Karisito na ivavakoso, mera vakarorogo tale ga na yalewa vei watidra ena ka kece.
25 Kemuni na tagane vakawati, ni lomani ira tiko ga na watimuni+ me vaka ga nona lomana na ivavakoso na Karisito qai solia kina nona bula,+
26 me rawa ni vakatabuya, me vakasavasavataka ni savata ena wai ni vosa ni Kalou,+
27 me taura kina na ivavakoso ena kena totoka kece, e sega ni takava e dua na duka se sanuki se dua na ka va qori,+ ia e dodonu me savasava, me kua ni vakamelei.+
28 E dodonu gona vei ira na tagane mera lomani watidra me vaka ga nodra lomana na yagodra. Na tagane e lomani watina e lomani koya,
29 e sega ni dua na tagane e cata na yagona,* ia ena vakania qai karona me vaka ga nona karona na ivavakoso na Karisito,
30 nida tiki ni yagona.+
31 “Oya na vuna ena biuti tamana kina kei tinana o tagane me kabiti watina me rau na lewe dua ga.”+
32 Na ka vuni tabu+ qo e bibi. Au tukuni Karisito tiko qo kei na ivavakoso.+
33 Ia o kemuni na tagane moni lomana tale ga na dui watimuni+ me vaka ga nomuni lomani kemuni, ia na yalewa me dokai watina vakalevu.+
iVakamacala e ra
^ Kirisi, por·neiʹa. Raica na iVakamacala ni Vosa.
^ Raica na iVakamacala ni Vosa.
^ Kir., “volia kece na gauna lokuci.”
^ Kir., “lewe.”
