Vola o Joni 16:1-33
16 “Au tukuna vei kemudou na ka kece qo mo dou kua kina ni tarabe.
2 Era na vakatalai kemudou mai na valenilotu.+ Ena yaco na gauna era na nanuma na vakamatei kemudou+ nira qarava kina na Kalou.
3 Era na cakava qo nira sega ni kilai Tamaqu, era sega tale ga ni kilai au.+
4 Ia au tukuna vei kemudou na ka kece qo ni qai yaco mai na kena aua, dou na vakasamataka niu sa tukuna oti vei kemudou.+
“Au a sega ni tukuna e liu vei kemudou na ka kece qo niu se tiko vata kei kemudou.
5 Ia qo au sa lako vei koya e talai au mai,+ e sega ga ni dua vei kemudou e tarogi au, ‘O lako i vei?’
6 Ia niu sa tukuna vei kemudou na ka kece qo, sa qai rarawa vakalevu na lomamudou.+
7 Au tukuna tiko vei kemudou na ka dina, e yaga vei kemudou meu lako. Baleta keu sega ni lako, ena sega ni lako mai vei kemudou na dauveivuke.+ Ia keu lako, au na qai talai koya mai vei kemudou.
8 Ni sa yaco mai o koya ena vakatakila i vuravura na ivakadinadina matata me baleta na ivalavala ca, na yalododonu, kei na veilewai:
9 Taumada me baleta na ivalavala ca,+ nira sega ni vakaraitaka nodra vakabauti au,+
10 tarava me baleta na yalododonu, niu lako tiko vei Tamaqu, dou na sega ni qai raici au tale,
11 kena iotioti me baleta na veilewai, ena nona sa lewai na turaga ni vuravura qo.+
12 “Se vo e levu na ka meu tukuna vei kemudou, ia dou na sega ni taura rawa qo.
13 Ia ni lako mai o koya qori, na yalo ni ka dina,+ ena qai dusimaka vei kemudou na ka dina kece, ni na sega ni tukuni koya ga, ia ena tukuna na ka e rogoca, ena tukuna tale ga vei kemudou na ka ena vakarau yaco.+
14 Ena vakalagilagi au o koya,+ ni na soli vua na ka e noqu ena qai vakatakila yani vei kemudou.+
15 Na ka kece e tu vei Tamaqu e noqu.+ Ya na vuna au tukuna kina ni na soli vua na ka e noqu, ena qai vakatakila o koya vei kemudou.
16 Vakalailai ga qo dou sa na sega ni raici au,+ ia vakalailai tale dou na raici au.”
17 Eratou mani kaya eso na nona tisaipeli: “Cava na ibalebale ni nona kaya vei kedatou, ‘Vakalailai ga qo dou sa na sega ni raici au, e qai kaya tale, vakalailai ga qo dou na qai raici au,’ kei na nona kaya, ‘niu lako vei Tamaqu’?”
18 Eratou mani tukuna kina: “Na cava mada na ibalebale ni nona kaya, ‘vakalailai ga qo’? Tou sega sara ga ni kila na ka e tukuna tiko.”
19 E kila o Jisu ni ratou via tarogi koya, mani kaya vei ratou: “Dou veivosakitaka tiko na noqu kaya: ‘Vakalailai ga qo dou na sega ni raici au, kei na noqu kaya, vakalailai tale dou na raici au’?
20 Au tukuna vakadodonu sara vei kemudou, dou na tagi dou na osi, ia ena marau o vuravura, dou na rarawa, ia ena vuki na nomudou rarawa me marau.+
21 E rarawa na yalewa ena gauna e vakasucu tiko kina, ni sa yaco mai nona gauna, ia ni sa sucu oti na gone, ena sega ni nanuma tale na nona rarawa ni sa marautaka na nona vakasucuma i vuravura e dua na gonetagane.
22 O kemudou tale ga dou na rarawa ena gauna qo, ia au na raici kemudou tale, ena qai marau na yalomudou,+ e sega ni dua ena kauta tani na nomudou marau.
23 Ena siga ya, dou na sega ni tarogi au tale ena dua na ka. Au tukuna vakadodonu sara vei kemudou, na ka ga dou kerea vei Tamaqu,+ ena solia vei kemudou ena yacaqu.+
24 Me yacova mai qo, se bera ni bau dua na ka dou kerea ena yacaqu. Dou kerea ena qai soli vei kemudou, ena taucoko kina na nomudou marau.
25 “Na ka kece qo au sa tukuna vei kemudou ena vosa vakatautauvata. Ena yaco mai na gauna au na sega tale ni qai vosa vei kemudou ena vosa vakatautauvata. Au sa na tukuna vakadodonu vei kemudou na veika e baleti Tamaqu.
26 Ena siga ya, dou na kerekere ena yacaqu, ena sega ni vinakati ena gauna kece meu kerekere vei Tamaqu ena vukumudou.
27 Ni lomani kemudou o Tamaqu ena vuku ni nomudou lomani au+ kei na nomudou vakabauta niu matataka na Kalou.+
28 Au lako mai vuravura meu matataki Tamaqu. Qo au sa biuti vuravura meu lesu vei Tamaqu.”+
29 Eratou mani kaya nona tisaipeli: “Raica! Qo oni sa qai vosa mai vakadodonu, oni sega tale ni vosa vakatautauvata.
30 Keitou sa qai kila ni oni kila na ka kece qai sega tale ni ganita me dua e tarogi kemuni. Na ka qo keitou vakabauta kina ni oni lako mai vua na Kalou.”
31 E sauma vei ratou o Jisu: “Vakacava, dou sa qai vakabauta qo?
32 Raica! Sa lako mai na gauna, sa yaco dina mai, dou na dui se kina ina nomudou vale, dou na qai biuti au duadua tu.+ Ia au sega ni tiko duadua, ni tiko vata kei au o Tamaqu.+
33 Au sa tukuna rawa vei kemudou na ka kece qo mo dou vakacegu kina ena vukuqu.+ Dou na vakararawataki e vuravura, ia dou yaloqaqa! Au sa vakamalumalumutaki vuravura.”+
