Vola o Joni 5:1-47
5 Oti ya e qai caka mai Jerusalemi e dua na nodra soqo+ na Jiu, mani lako cake kina o Jisu.
2 E tiko ena Matamata ni Sipi+ mai Jerusalemi e dua na tobu, e yacana vei ira na Iperiu o Peceseita, e lima na kena varada.
3 Era davo tu ena vanua qo e levu na tauvimate, na mataboko, na lokiloki, kei ira e mate na veitikiniyagodra.
4 *——
5 E tiko e kea e dua na tagane sa 38 na yabaki nona tauvimate voli.
6 Ni raici koya o Jisu ni davo toka, e kila sara ni sa tauvimate dede tu, e tarogi koya: “O via bula?”+
7 E tukuna na tamata tauvimate: “Turaga, e sega ni dua me keveti au ina tobu ena gauna e yavalati kina na wai, niu se lako tiko, e liu tale vei au e dua.”
8 E kaya vua o Jisu: “Tucake, taura nomu idavodavo, mo lako.”+
9 A bula vakasauri na tamata ya, e taura nona idavodavo, mai taubale yani.
E Siga ni Vakacecegu na siga ya.
10 Era mani kaya na Jiu vua na tagane sa vakabulai: “E Siga ni Vakacecegu nikua, e tabu mo kauta tu va qori nomu idavodavo.”+
11 E kaya vei ira: “O koya ga e vakabulai au e kaya, ‘Taura nomu idavodavo mo lako.’”
12 Era tarogi koya: “O cei e kaya vei iko, ‘Taura nomu idavodavo mo lako’?”
13 Ia e sega ni kila se o cei e vakabulai koya, ni sa curu maliwai ira na ilala levu era tu e kea o Jisu.
14 Oti ya sa qai kunei koya o Jisu ena valenisoro, e kaya vua: “Raica, o sa bula. Kua tale ni qai valavala ca de yacovi iko e dua na ka torosobu.”
15 E lako na tagane ya qai tukuna vei ira na Jiu ni a vakabulai koya o Jisu.
16 Era mani tusaqati Jisu na Jiu ni a cakava qo ena Siga ni Vakacecegu.
17 Ia e qai kaya vei ira o Jisu: “E cakacaka tiko ga o Tamaqu me yacova mai qo, au cakacaka tale tiko ga o yau.”+
18 Qo na vuna sa qai kaukaua ga kina nodra via vakamatei koya na Jiu, ni beca na Siga ni Vakacecegu, e kaya tale ga ni Tamana na Kalou,+ e vakatauvatani koya kina kei na Kalou.+
19 E mani sauma vei ira o Jisu: “Au tukuna vakadodonu sara vei kemuni, e sega ni dua na ka e cakava ga vakataki koya na Luvena, na ka ga e raica ni cakava o Tamana.+ Na ka ga e cakava o Tamana e cakava tale ga o Luvena.
20 E lomani Luvena o Tamana,+ e vakaraitaka vua na ka kece e dau cakava, ena qai vakaraitaka vua na cakacaka e uasivi ira qo moni kurabui kina.+
21 Me vaka ga nona vakaturi ira na mate o Tamana qai vakabulai ira,+ o Luvena tale ga e vakabulai ira ga e vinakata.+
22 Ni sega ni lewa e dua o Tamana, sa solia ga vei Luvena me vakatulewa,+
23 mera rokovi Luvena kece me vaka ga nodra rokovi Tamana. O koya e sega ni rokovi Luvena e sega ni rokovi Tamana e talai koya mai.+
24 Au tukuna vakadodonu sara vei kemuni, o koya e rogoca noqu vosa qai vakabauti koya e talai au mai ena bula tawamudu,+ ena sega ni lewai, ia ena lakosivita na mate me bula.+
25 “Au tukuna vakadodonu sara vei kemuni, sa roro mai na gauna, sa kena gauna sara ga qo, mera rogoca kina na mate na domo ni Luve ni Kalou, o ira ga na rogoca era na bula.
26 E tiko vei Tamana na kaukaua me veivakabulai,+ e sa solia tale ga vei Luvena na kaukaua qo me veivakabulai.+
27 E solia vua na lewa me vakatulewa,+ ni Luve ni tamata o koya.+
28 Ni kua ni kurabui ena ka qo, ni sa voleka mai na gauna mera rogoca kina na domona o ira kece na tu ena ibulubulu nanumi*+
29 mera tucake mai. O ira na cakava na ka vinaka era na vakaturi mera bula, kei ira na cakava na ka ca era na vakaturi mera lewai.+
30 Au sega ni cakava rawa e dua na ka vakataki au ga. Au vakatulewa ena ka ga au rogoca, e dodonu tale ga noqu vakatulewa,+ niu sega ni muria na lomaqu, na loma i koya ga e talai au mai.+
31 “Keu mai tukuni au tiko ga, e sega ni dina noqu itukutuku.+
32 E tiko e dua tale e vakadinadinataki au, au kila tale ga ni dina nona itukutuku me baleti au.+
33 Oni a tala eso na tagane vei Joni, e vakadinadinataka tale ga o koya na ka dina.+
34 Au sega ni nuitaka na itukutuku ni tamata, ia au tukuna na ka kece qo moni vakabulai kina.
35 Na tagane ya e vaka na cina e waqa qai ramase tu, oni via marautaka vakalekaleka ga na nona rarama.+
36 Na kequ itukutuku e levu cake vei Joni. Na cakacaka sara ga e lesi au kina o Tamaqu meu vakacavara au sa cakava tiko, au vakadinadinataka tale ga ni talai au mai o Tamaqu.+
37 Na Tamaqu e talai au mai e tukuni au tale ga.+ Oni se sega ni rogoca na domona se raici koya ena dua na gauna.+
38 E sega ni tiko e lomamuni na nona vosa, ni oni sega ni vakabauti koya e tala mai.
39 “Oni nanuma ni nomuni vakasaqaqara ena iVolatabu+ oni na rawata kina na bula tawamudu, ia na ka kece qori* e tukuni au.+
40 Oni qai sega ni via lako mai vei au+ moni bula kina.
41 Au sega ni ciqoma nodra veivakalagilagi na tamata,
42 ia au kila vinaka ni oni sega ni lomana na Kalou.
43 Au lako mai ena yaca i Tamaqu, ia oni sega ni vakabauti au, ke lako mai e dua tale ena yacana ga, oni na vakabauti koya.
44 Oni na vakabauta vakacava ni oni dokai kemuni tiko ga vakataki kemuni, oni sega ni qara na lagilagi e solia na Kalou duabau?+
45 Ni kua ni nanuma niu na beitaki kemuni vei Tamaqu, e dua ga e beitaki kemuni, o Mosese,+ o koya oni vakanuinui kina.
46 Ke oni vakabauti Mosese dina oni na vakabauti au tale ga, ni a vola o koya na ka e baleti au.+
47 Ia ke oni sega ni vakabauta na ka e vola, oni na qai vakabauta vakacava na noqu vosa?”