VAKACAVA o kurabuitaka na taro ena waqa ni mekesini qo? Eso era nanuma ni sega ni rawa ni cakava qori na Kalou, ia e levu nikua era sega ni vakadeitaka, se ra nanuma ni dau veivakalolomataki na Kalou. Na cava na vuna?

O ira na sotava na leqa tubukoso era lomatarotarotaka: “Na cava e vakalaiva kina na Kalou me yaco na veika qo? E dau veivakaduiduitaki qai dau veivakalolomataki?”

Eso tale era taroga qori nira wilika na iVolatabu. Nira wilika na italanoa me baleti Noa kei na Waluvu, era veinanuyaka: ‘Na cava me vakamatei ira kina na tamata ena gauna ya e dua na Kalou yalololoma? E dau veivakalolomataki beka?’

O dau taroga tale ga na taro va qori ena so na gauna? Se dua e tarogi iko, o qai sega ni kila na kena isau? Dikeva mada qo e dua na taro e rawa ni vukei iko.

Baleta nida rawa ni vakaduiduitaka na ka vinaka mai na ka ca. Eda duidui sara mai vei ira na manumanu. E buli keda na Dauveibuli meda “[i]tovo vata kei koya.” (Vakatekivu 1:27) Na cava e kena ibalebale? E buli keda meda rawa ni vakatotomuria na nona itovo, ivakatagedegede savasava, meda rawa tale ga ni vakaduiduitaka na vinaka kei na ca. Vakasamataka mada qo: Ke buli keda na Kalou meda vakaduiduitaka na vinaka kei na ca da qai cata na veivakalolomataki, e vakaraitaka qori ni cata tale ga na Kalou?

E vakadeitaka vei keda na Kalou ena iVolatabu ni cata sara ga na ivalavala qori, e kaya: “Sa cecere cake . . . na noqui valavala ki na nomudoui valavala, kei na noqu vakanananu ki na nomudou vakanananu.” (Aisea 55:9) Ke da tukuna ni dau veivakalolomataki na Kalou, eda sa vakacala tiko na tikinivolatabu qori, e vaka ga eda tukuna ni noda ivalavala e cecere cake vua. E ka vakayalomatua meda vaqaqa mada na kena dina ni bera nida tukuna eso na itukutuku va qori. De vinaka meda kua ni taroga na vuna e veivakalolomataki kina na Kalou, ia meda taroga ga na vuna e cakava kina eso na ka eda nanuma ni dau veivakalolomataki. Meda kila qori, e vinaka meda dikeva mada na ibalebale ni “veivakalolomataki.”

Nida vakatoka e dua me dau veivakalolomataki, eda vakalewa tiko na nona inaki. O koya e dau veivakalolomataki ena marau ni raica nira rarawa eso tale, se sega ni kauaitaka na veika dredre era sotava. Koya gona, ke dua na tama e marau ni vakararawataki luvena ena gauna e vakadodonutaki koya kina, sa na okati me dua na tama dau veivakalolomataki. Ia na tama vinaka ena vakadodonutaki luvena ni via vakavulici koya se taqomaki koya. E dau kena ivakarau meda vakalewa na nodra inaki eso tale ke da sega ni kila na vuna era cakava kina eso na ka.

Meda raica mada e rua vuna era nanuma kina eso ni dau veivakalolomataki na Kalou. Kena imatai, na leqa tubukoso eda raica tu nikua, kena ikarua na itukutuku ni nona vakataulewa na Kalou e volai ena iVolatabu. Vakacava e dau veivakalolomataki dina na Kalou?