Au sucu ena taoni lailai o Texcoco. Ena gauna qori se qereqere qai kuvu na gaunisala. E levu gona mai na veikoro voleka era dau usana ena asa na nodra ivoli nira gole i taoni. Keitou vuvale dravudravua, keitou le ciwa na veitacini, au kena ikavitu. E dau ripea ivava o Tamaqu me qaravi keitou kina vakavuvale. Ia a takali niu se qai yabaki vitu. Mani cakacaka sara vakaukaua o Na me vakarautaka na ka me keitou bula kina.

E dau vakatagitaka o noqu tutu na vaiolini, qai iliuliu ni mataivakatagi ni sere makawa ni lotu. E voleka ni keitou kece vakavuvale keitou kila na vakayagataki ni iyaya ni ivakatagi. E lewe ni matasere e valenilotu o tinaqu, o momo e dau lagasere ena opera, e dau taba piano tale ga. Keitou lotu Katolika kaukaua qai noqu itavi meu dau vukea na bete ena gauna ni Misa, au vinakata tale ga meu dua na daukaulotu ni lotu Katolika. Ia au dau taleitaka na iyaloyalo ni karate. Na levu ga ni noqu sarava na iyaloyalo qori, sa qai voravora ga na noqu itovo.

Au gole ena siti o Puebla meu lai vuli ena dua na koronivuli ni lotu, e via vaka na koronivuli ni bete. E noqu isausau meu bete ni Katolika. Ena iotioti ni yabaki ni noqu vuli, au sotava e dua na ituvaki e vakavuna meu sega ni taleitaka na lotu Katolika. A vinakata e dua na sisita gone me keirau veiyacovi. A sega ni rawai au, ia na ka e cakava qori e uqeti au meu via vakawati. Au raica tale ga ni dau veivakaisini na nodra ivakarau ni bula eso na bete. Au mani vakatulewataka meu biuta na vuli bete.

 Au lai vuli ivakatagi ena National Conservatory of Music ena siti o Mexico. Niu sa vakoroi, au mani vakawati qai va na luvequ. Au qarava noqu vuvale ena noqu dau lagasere ena gauna ni Misa.

A sega tu ga ni vinaka mai na imatai ni gauna na neirau bula vakawati. Keirau dau veivala kei watiqu ni keirau dau veivuvutaki. E dau tekivu ga ena veiba, lai tini sara ena veituki. Keirau mani vakatulewataka me keirau veibiu ni oti e 13 na yabaki neirau vakawati, tini sara ena veisere.

Ni bera ni keirau veibiu au sotavi ira na iVakadinadina i Jiova. A sikovi au mai e rua na iVakadinadina, keitou mani veitalanoataka na iVolatabu. Au nanuma niu kila e levu na ka me baleta na lotu, au mani via vakacala na ka erau tukuna. Au tarogi rau ena so na taro dredre niu nanuma ni rau na sega ni sauma rawa. Au kurabuitaka ni rau sauma vinaka na noqu taro mai na iVolatabu. Au sa qai kila ni lailai wale na ka au kila. Ia e dau cati ira na iVakadinadina o watiqu, au osooso tale ga vakalevu, mani cegu tu kina na nodrau dau sikovi au mai.

Ni oti e lima na yabaki, au sotavi ira tale na iVakadinadina i Jiova, ia qo keirau sa tiko vata kei na dua tale na marama o Elvira. E sega ni dau saqati ira na iVakadinadina, qori e vakarawarawataka na noqu vulica wasoma na iVolatabu. Ia e taura toka na gauna meu veisautaka noqu itovo makawa.

Au nanuma keu via qaravi Jiova mai vu ni lomaqu, ena vinakati meu vakayacora e levu na veisau. Taumada, meu na cegu mai na noqu dau lagasere ena Misa, kena ibalebale qori meu na vaqara cakacaka. (Vakatakila 18:4) Ena vinakati tale ga me keirau vakamau kei Elvira.

Dua na ka dredre duadua meu veisautaka, oya meu dau lewa vinaka na noqu cudru. E vukei au vakalevu e rua na tikinivolatabu: Na Same 11:​5, e vakaraitaka ni cata o Jiova na ivalavala kaukaua, kei na 1 Pita 3:​7, e vakavulici au ni dodonu meu dokai watiqu keu vinakata me rogoca o Jiova na noqu masu. Niu dau vakasamataka vakatitobu na tikinivolatabu qori kei na noqu dau masuta na veivuke i Jiova, au sa qai lewa vinaka na noqu cudru.

Au vakila ena gauna qo ni keitou marau vakavuvale. Au saga meu vakavinakataka na noqu dau veimaliwai kei rau na luvequ tagane vua na imatai ni watiqu, me dei tale ga ena vakabauta na noqu vuvale vou.

Niu se gone, au dau vinakata tu meu dua na bete, meu vukei ira tale ga na tamata. Au raica ni sa qai vakainaki qo na noqu bula. Au qasenivuli ni ivakatagi meu qarava kina na noqu vuvale. Au vakavinavinakataka na nona dauvosovoso o Jiova qai solia vei au na gauna meu veisautaka na noqu bula meu dua kina na tamata vinaka!