Au sucu e Paddington, dua na yasayasa e tawani vakalevu e Lodoni, Igiladi. Keitou tiko ga vakaveitinani, o yau, tinaqu, kei na tolu na tuakaqu. E daugunu o Ta, levu gona na gauna e dau yali tu mai vale.

A vakavulici au o nana niu se gone meu masu ena veibogi. A dua tu noqu iVolatabu, ia e tiko ga kina na Same. Au mani bulia eso na qaqanisere mai na Same meu rawa ni lagata. Au a wilika ena dua na ivola ni sega ni dua na ka meda vakanamata kina ena gauna se bera mai. Au sega ni moce ena levu na bogi niu vakasamataka tu qori. Au dau veinanuyaka, ‘Qo beka ga na bula?’ ‘Na cava na inaki ni noqu bula?’ Au sega ni via mate!

Au dau via kila e vakacava tu mada na vakatevoro. Au mani saga meu veitaratara kei ira na mate, keimami lako ena ibulubulu kei ira noqu icaba e koronivuli, keimami sarava vata na iyaloyalo rerevaki. E dau lasa na ka keimami cakava qori, ia e vakarerevaki tale ga.

A tekivu noqu daube niu se qai yabaki tini. Au bobula ena tavako, toso na gauna au sa kana mariwana. Au tekivu gunu alakaolo niu yabaki 11. Au sega ni taleitaka na kena igunugunu, ia au vinakata ga meu mateni. Au dau lako ena pati qai curuma na valenidanisi niu dau taleitaka na ivakatagi kei na danisi. Au dau dro mai vale ena bogi qai lesu tale ni bera ni kacabote na rarama. Levu na gauna au sega ni lai vuli ena siga tarava ena levu ni noqu wawale. Ia keu rawa ni lai vuli, au dau lai gunu alakaolo tale e koronivuli.

A sega ni vinaka noqu ka ni vuli ena noqu iotioti ni yabaki e koronivuli. E cudru qai rarawa o Na ni sega ni kila na levu ni ka au dau cakava. Keirau veivala, au mani dro. Au lai toka vakalailai kei noqu itau o Tony, e dau voravora, beca na lawa, volitaki wainimate gaga tale ga. A vakabuketetaki au o Tony, dua kina na luvequ tagane niu se qai yabaki 16.

A soli vei au e dua na rumu ena nodra bure na tina kei na gone era sega ni vakatamani. Qori na vanua au sotavi ira kina ena imatai ni gauna na iVakadinadina i Jiova. Rau dau sikovi ira tiko yani eso na tina e rua na marama iVakadinadina i Jiova. Dua na siga au lai vakarorogo tu ena nodra veivosaki niu via vakacala na ka erau tukuna. Ia erau sauma vakamatata, vakayalovinaka tale ga mai na iVolatabu na noqu taro kece. Au taleitaka na nodrau yalovinaka kei na nodrau yalomalua, au mani kerea me rau vakavulici au ena iVolatabu.

Au vulica ena iVolatabu e dua na ka e veisautaka sara ga na noqu bula. Au dau rerevaka na mate niu se gone, ia qo au sa kila na ivakavuvuli i Jisu me baleta na veivakaturi! (Joni 5:28, 29) Au vulica tale ga ni kauaitaki au na Kalou. (1 Pita 5:7) E tarai au na Jeremaia 29:11, e kaya: “‘Niu kila vinaka na ka au nanuma tiko me baleti kemuni,’ e kaya o Jiova, ‘na nanuma moni tikovakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai.’” Qori e vakadeitaka vei au niu rawa ni bula tawamudu ena Parataisi.—Same 37:29.

Era lomani au dina na iVakadinadina i Jiova. Ena imatai ni gauna au tiko kina ena dua nodra soqo ni lotu, era matadredredre qai veikauaitaki. (Joni 13:34, 35) E duidui sara qori vei ira na lotu tale eso. Era sega ni vakalewai au, era kauaitaki au ga, karoni au ra qai solia nodra gauna mera vukei au. Au sa mai lewena e dua na vuvale era dau veilomani.

E uqeti au na veika au vulica meu veisautaka na noqu bula me salavata kei na ivakatagedegede savasava ni Kalou. Au biuta na vakatavako, au veisautaka tale ga na ivakatagi au dau rogoca. Au sa sega ni lako ena pati se valenidanisi niu sega ni via sikalutu tale ena mateni. Au sa veitokani ga kei ira era na vukei au ena ivakarau ni bula vou au sa digia.—Vosa Vakaibalebale 13:20.

A vuli iVolatabu tale ga o Tony kei ira na iVakadinadina i Jiova, qai vakadeitaka ni dina na ka e vulica. E mani veisautaka na nona ivakarau ni bula. Sa sega ni vakailala kei ira nona itokani makawa, sa muria na lawa, sa sega tale ni kana mariwana. Keirau liaca ni na marau o Jiova ke keirau muduka na neirau ivakarau ni bula dukadukali, keirau ivakaraitaki vinaka tale ga vua na neirau cauravou. Keirau mani vakamau ena 1982.

Au dau wilika ena Vale ni Vakatawa kei na Yadra! * na kedra italanoa o ira era veisautaka nodra bula. Qori e uqeti au meu cakava na veiveisau e gadrevi ena noqu bula, meu kua ni soro, meu sasaga tiko ga. Au dau masuti Jiova tale ga me vukei au. Keirau papitaiso kei Tony me keirau iVakadinadina i Jiova ena Julai, 1982.

Keu sega ni kilai Jiova, de dua au sa mate makawa. Keirau vakila kei Tony nona veivuke o Jiova ena ituvaki dredre keirau sotava. Ni keirau nuitaki Jiova, keirau vakila nona veikaroni kei na nona veitokoni.—Same 55:22.

Au marau ni rau sa mai kilai Jiova na luvei keirau. E vakavu marau tale ga niu raica ni ratou sa tuberi tiko na makubui keirau ena veika me baleta na Kalou.

Au sa sega tale ni nuiqawaqawataka na veisiga se bera mai se na mate. Keirau ogaoga vakalevu kei Tony ena neirau sikova na ivavakoso ni iVakadinadina i Jiova e veimacawa me keirau vakayaloqaqataki ira. Keirau tomani ira tale ga ena nodra vakavulici eso tale mera vakabauti Jisu mera rawata kina na bula tawamudu.