DEFTERE Alla nden no holli sifaaji Alla moƴƴuɗi buy ko wallata en anndugol mo. E piide misal, Deftere Alla nden no yewti en fii sifaaji Alla nay ɓuruɗi hittude : bawgal makko ngal, peewal makko ngal , faamu makko ngun e giggol makko ngol. Ndaaren kala e majji.

Yahuwah daalanno annabi Ibraahiima : « Ko min woni Alla Jom Bawgal on » (Fuɗɗooɗe nden 17:1, VPFJ). Wa bawgal makko ngal alaa, ngal alaa kattudi e ngal ɗuytotaako. Alla ko bawgal mun ngal tagiri piiji ɗin fow.

Alla huutortaa bawgal makko ngal no woniri woo. O huutoray ngal no haaniri non soono woo e hoore ko laaɓi. Saa’i o huutori bawgal makko ngal woo, ko e nder peewal, faamu e giggol.

Yahuwah no huutorde bawgal makko ngal no moƴƴiri fii wallugol jiyaaɓe makko gomɗinɓe ɓen. « Ko fii Yahuwah no laƴƴude gite e hoore leydi ndin fow fii hollugol doole makko ɗen fii ɓee ɓe ɓernde mun timmani mo » (2 Fillande taarika 16:9). Ɗun wonataa sabu ɓadagol Jom Bawgal on, Alla kippuɗo fii men on ?

« Yahuwah no yiɗi peewal » (Zabuura 37:28). Ko ko moƴƴi tun e ko haani o waɗata wano no o siforii non.

Alla no aɲi tooɲe. E piide misal, Daaluyee makko on holli himo toŋi ngeenaari. O daali : « Wota a jaɓu ngeenaari, ko fii ngeenaari wuminɗinay yi’ooɓe ɓen, ɓoyla konguɗi feewuɓe ɓen » (Eggudu ndun 23:8, VPFJ). O yiɗaa yimɓe kurkooɓe woɓɓe goo e o wallay tampuɓe wano « keynguujo maa aliyatiimaajo » (Eggudu ndun 22:21, VPFJ). Alla ɓurnaa hay gooto. « Fow no fota yeeso Alla. E nder leƴƴi ɗin fow, kala huluɗo mo, jokki peewal o jaɓanay ontigi » (Kuuɗe sahaabaaɓe ɓen 10:34, 35).

Peewal Yahuwah ngal ko ɲiiɓungal. O sattaa feere haa e o ɗaataa haa kadi. O yagginay bonɓe ɓe tuubaali ɓen kono o yurminay tuubuɓe ɓen. « Yahuwah ko yurmeteeɗo e jom moƴƴere, o yawataa monaade e himo heewi giggol e sella-finndeyaagal. O luttataa e ɗaɓɓugol ella tun, maa o lutta e monaade haa poomaa. O jogoraaki en beru junuubaaji men ɗin, maa o yoɓita en beru ellaaji men ɗin » (Zabuura 103:8-10). Alla annditay kadi kuuɗe moƴƴe jiyaaɓe makko ɓen e o barkina ɓe. Ɗun waɗataa en hooloɗen Alla wonduɗo e peewal on ?

Ko Yahuwah woni iwdi kala faamu. « Ko haa honto ngalu Alla ngun e faamu makko ngun e gandal makko ngal luggi ! » (Roomu 11:33.) Wa faamu makko ngun alaa e ngu alaa kattudi.

 Faamu Alla ngun no yi’oo ko laaɓi poy e ko o tagi kon. Annabaajo goo wi’uno : « Golle maa ɗen no ɗuuɗi, yaa an Yahuwah ! A tagirii fow faamu » (Zabuura 104:24).

Deftere Alla nden kadi no holli faamu Alla ngun. Annabi Daawuuda, laaminooɗo Isra’iila winndi : « Sariya Yahuwah on no timmi, o artiray doole. Annditannde Yahuwah nden no holnii, waɗay mo anndaa hay huunde mokobaa » (Zabuura 19:7). Annditee : hiɗon waawi nafitorde faamu Alla ngu alaa kattudi ngun ! On waɗay ɗun ?

Ko Yahuwah ɓuraa anndireede kon ko giggol makko ngol. Deftere Alla nden wi’i : « Alla ko giggol » (1 Yuuhanna 4:8). Ko giggol woni fii kala ko o waɗata.

Alla no holli en giggol makko ngol e sifaaji buy. Himo okki en piiji moƴƴuɗi. « E hoore o accaali seeditorgol moƴƴere nde o waɗata nden, ɗun ko yeɗugol on ndiyan saaƴoojan iwrude ka kammu e saa’iiji moƴƴooji fii demal, e timminangol on neemaaji e hebbingol ɓerɗe  mon ɗen welo-welo » (Kuuɗe sahaabaaɓe ɓen 14:17). Ko non tigi woniri, « kala dokkal moƴƴal e kala dokkal timmungal ko ka dow iwrani en, e immorde e Baabaajo ndayguuji ɗin » (Yaaquuba 1:17). Deftere Alla nden ko dokkal hittungal ngal Alla waɗini en, ɓayri hinde yewti en goonga on fii makko. Hinde janni en sariyaaji makko ɗin e tugaale makko ɗen e hoore giggol. Annabi Iisaa ko torotonoo Alla o wi’uno : « Ko daaluyee maa on woni goonga on » (Yuuhanna 17:17).

Alla no walla en kadi fii satteendeeji men ɗin. « Fawu donngal maa ngal e hoore Yahuwah, ɗun o wallete. O jaɓataa feewuɗo on yana muk » (Zabuura 55:22). Himo yaafoo junuubaaji men ɗin. « Ko fii an, yaa Yahuwah, hiɗa moƴƴi e hiɗa hebilii yaafagol ; hiɗa heewi giggol e sella-finndeyaagal fii ɓee jantotooɓe ma fow » (Zabuura 86:5). O okkay en hay ngurndan poomayankejan. « O fitta kala gongol ka gite maɓɓe, hara hande kadi mayde waɗitataa, yoometaake, fesetaake, muuseendi waɗitataa » (Feɲɲinannde 21:4). Ko honno holirten hiɗen yiɗi Alla ? En yiɗiray mo no o yiɗiri en non ?

Alla no faalaa yo en anndu mo moƴƴa. Daaluyee makko on wi’i : « Ɓadee Alla, ɗun o ɓadoto on » (Yaaquuba 4:8). Alla nodduno jiyaaɗo makko on annabi Ibraahiima « giɗo Alla » (Yaaquuba 2:23). Alla no faalaa yo en wonu njaatigiiɓe makko enen kadi.

Ko no ɓeydirten janngugol fii Alla non, ɓurteten mo ɓadaade e weltaade. « Neɗɗo malaaɗo » on « weltaare makko nden ko e nder sariya Yahuwah on woni, e o janngay sariya makko on e hito hawrungo jemma e ɲalorma » (Zabuura 1:1, 2). Ko ɗun waɗi, ko yo en jokku janngugol Deftere Alla nden. Miijitoɗen fii no Alla sifori e golle makko ɗen. Huutoren ko jannguɗen kon fii hollugol hiɗen yiɗi Alla. « Ko woni yiɗugol Alla : ko ɗoftagol yamirooje makko ɗen. Yamirooje makko ɗen-le hinaa sattuɗe » (1 Yuuhanna 5:3). Toroɗen wano annabi Daawuuda tororii Alla non, o wi’i : « Waɗu mi annda laawi maa ɗin, yaa an Yahuwah ; jannaa lan fii boli maa ɗin. Waɗu no mi wuurira goonga maa on » (Zabuura 25:4, 5). En annday Alla « woɗɗaaki hay gooto e men » (Kuuɗe sahaabaaɓe ɓen 17:27).