Te osusuɔ tɛŋŋ? Ani Nyɔŋmɔ kpɛlɛɔ tawuu nɔ? Kɛ́ nakai lɛ, namɔ sɛɛ efiɔ yɛ tai ni awuɔ ŋmɛnɛ lɛ mli? Sanebimɔi nɛɛ ahetoo ni obaaná lɛ baaye abua bo ni opɛi susumɔ ni ohiɛ yɛ tawuu he lɛ mli. Akɛ nɔkwɛmɔnɔ lɛ, kɛ́ oná ole akɛ Nyɔŋmɔ kpɛlɛɔ tawuu nɔ, ni efiɔ kuu ni bo hu ofiɔ sɛɛ lɛ nɔŋŋ sɛɛ lɛ, ekã shi faŋŋ akɛ, obaaná miishiɛ waa, ni obaaná nɔmimaa hu akɛ mɛi ni ofiɔ amɛsɛɛ lɛ baaye kunim. Shi kɛ́ oná ole akɛ Nyɔŋmɔ fiɔ afã kroko lɛ sɛɛ lɛ, te obaanu he ohã tɛŋŋ? Eyɛ faŋŋ akɛ obaasusu oshidaamɔ yɛ sane lɛ he lɛ he ekoŋŋ.

Shi nɔ ko yɛ ni he miihia kwraa fe no. Le ni ooole Nyɔŋmɔ susumɔ yɛ tawuu he lɛ baanyɛ aná jwɛŋmɔ ni ohiɛ yɛ Nyɔŋmɔ he lɛ nɔ hewalɛ. Kɛ́ ofata mɛi akpekpei abɔ ni tai ni adesai wuɔ lɛ eye amɛ awui lɛ ahe lɛ, no lɛ ehe miihia ni ole sanebimɔ nɛɛ hetoo, Ani Nyɔŋmɔ ji mɔ ko ni ŋmɛɔ tawuu gbɛ, ni fiɔ awuiyeli ni jɛɔ mli kɛbaa lɛ sɛɛ, ni nɔ ni baajɛ mli kɛba lɛ kɔɔɔ ehe eko, taakɛ mɛi komɛi susuɔ lɛ?

Ekolɛ kɛ́ ona ole akɛ hetoo ni Biblia lɛ kɛhãa lɛ yɛ srɔto kwraa yɛ susumɔ ni mɛi hiɛ lɛ he lɛ, onaa baakpɛ ohe. Kɛfata he lɛ, susumɔ ni Nyɔŋmɔ hiɛ yɛ ta he kɛjɛ blema lɛ tsakeko. Hã wɔkwɛ nɔ ni Biblia lɛ kɛɔ yɛ susumɔ ni Nyɔŋmɔ hiɛ yɛ ta he yɛ blema, kɛ agbɛnɛ yɛ klɛŋklɛŋ afii 100 lɛ mli be ni Yesu yɔɔ shikpɔŋ lɛ nɔ lɛ. No baaye abua wɔ ni wɔna bɔ ni Nyɔŋmɔ naa tawuu ehãa ŋmɛnɛ, kɛ agbɛnɛ hu kɛ́ abaaya nɔ awu ta wɔsɛɛ.