«¡JUʼUNIRA tü wuusükat, nieechi makataka chira chinokai!». Shia saapaka Alexandra tia wanaa sümaa joyotuin shia suluʼu tü wuusü kaluʼukat shia. Aʼatapajüsü shia süpüla sülatajatüin suluʼumüin wanee mma chaa Sudamérica. Shiasaʼa süshakataka sünain anaʼlawaa kasain alatüin, shiʼraka wanee jimaʼai chino sünain aküjaa nümüin wanee pulusiia kasain alatüin nümüin. Isaataʼain müsü nüchiki aashajawaa alijunaiki. Sutuma suutkajaain Alexandra namaa na aküjüliikana pütchi nüchiki Jeʼwaa aashajaakana chino, sükaaliinjain chia jimaʼaikai, nücheʼepujanasü shia.

Naashin chi jimaʼai chinokai, kakaraloukseshi nia süpüla kepiaa suluʼu tia mmakat, akatsaʼa suʼluwajünüin nuulia sümaʼaleʼeya tü nünneetsekat. Nnojotsü nunoujain chi pulusiiakai tü nümakat chi jimaʼaikai otta nüliʼrajüin neʼe shiʼyataain Alexandra sünain alatiraa wayuu makaralouksesat suluʼumüin tia mmakat. Nunoujain mapa chi pulusiiakai nünüiki chinokai, achekajünapejeʼe nümüin saaʼu makaralouksein nia. Saʼanapitka nia Alexandra 20 dólar. Naapashaatain analuʼutka chi jimaʼaikai sümüin Alexandra saaʼu tü saaʼinrakat nüpüleerua, «tawalaajeerü pümüin otta kooʼomüinjeerü shia tatuma», müshi sümüin. Nnojotsü saʼatapajüin Alexandra süsülajünüinjatüin sümüin wanee kasa saaʼu sükaaliinjain chia jimaʼaikai jee talatüsü shia süka anain tü saaʼinrakat. Saapüin Alexandra waneeirua karaloukta suluʼujeejatü tü Wiwüliakat nümüin chi jimaʼaikai otta sümüshi nia süpüla nikirajaain sünain tü Wiwüliakat namaa na aküjüliikana pütchi nüchiki Jeʼwaa.

Anashaatasü wamüin aapa süchiki tü naaʼinrakat na wayuu akaaliinjakana na waneeinnua mayaapejeʼe nnojoluin neʼraajüin naya. Wainma wayuu aaʼinraka tü saaʼinrakat Alexandra, jaʼitainna nanoujain jee manoujain naya. ¿Jama piakai? ¿Paaʼinrüinje tü saaʼinrakat Alexandra? Anasü maʼin jülüjale paaʼin tia, müshi Jesuu: «Anakuaippaʼireʼeya chi wayuu aapakai nuulia chi aapünakai amüin» (Aluwataaushikana 20:35). Nekirajaa achiiruat tia na cientiificokana süka sütüjaanüin aaʼu anain nukuwaʼipa wanee wayuu nüsülajüire. Wekirajaa sünain tia.

Atüjaana aaʼulu talatüin naaʼin chi wayuu asülajüikai. Naashin chi aluwataaushikai Pablo, talatüsü naaʼin «chi Maleiwakai nümaa chi wayuu asülajakai süka naaʼin». Nüküjüin tia namüin na anoujashii asülajakana wainma kasa süpüla nakaaliinjain na nawalayuu eʼrakana müliaa (2 Corinto 8:4; 9:7). Nnojotsü nüküjüin Pablo asülajüliin naya sutuma talatüin naaʼin, talatüshii naya süka nasülajüliin naashin.

Sutuma shikirajaanüin achiirua tia, atüjaana aaʼulu tü alatakat suluʼu nikiisholoin chi wayuu asülajüikai, jamüshijaʼa nia, «talatüsü naaʼin, kamaneeshi nia, nnojotsü wainmajüin naaʼin saaʼu wanee kasa naaʼinrajatkat, shiasaʼa sutuma tia, anasü naaʼin». Naashin waneeinnua wayuu ekirajaakana süchiirua tiaya, «talataleeshia chi wayuu asülajakai nneerü sümüin wayuu nuulia chi akataajakai nünneetse nünain nümüiwaʼa».

 ¿Eeirü jülüjain paaʼin isain püchiki paapüin wainma kasa süka nnojoluin kasain pümaʼana? Eeshii süpüla talatüin wayakana wapüshuaʼa maʼaka naaʼin chi wayuu asülajakai süka naaʼin. Wasülajüle wanee kasa süka waaʼin, nnojotsü choʼujaain wainmainjatüin shia. Eesü wanee aküjüt pütchi nüchiki Jeʼwaa asülajaka nneerü namüin na ashajakana rewiisütakat tüü otta aluwataasü shia wanee karaloukta namüin makat mayaa: «Kakaliairü taya aapüin neʼe palitchon nneerü suluʼu tü Piichi Outkajaaleekat [...]. Wainmaleesia tü naapakat Jeʼwaa tamüin. [...] Taapüin analuʼut saaʼu jaapaain tü tasülainkat, anasü taaʼin sutuma tia».

Nnojoipejeʼe niain neʼe asülajüliin chi aapakai nneerü, wainma sukuwaʼipa tia.

Saashin tü Wiwüliakat, anamiale wanee wayuu eʼreechi kasa anasü, mojulaale nia mojeerü nukuwaʼipa (Proverbios 11:17). Na wayuu anamiakana, asülajülii naya, akatatshii kaʼi süpüla nakaaliinjain na waneeinnua jaʼitainna mapüsain naya otta aainjashii waneeirua kasa napüleerua na waneeinnua. Sutuma naaʼinrüin tia, wainma kasa anasü neʼrakat maʼaka saaʼin nnojoluin ayuulin maʼin naya.

Sutuma shikirajaanüin achiirua nakuwaʼipa na wayuu asülajüliikana, atüjaana aaʼu nnojoluin ayuulin maʼin jee nnojoluin mojuin maʼin naaʼin na akaaliinjakana na waneeinnua. Anasü nümüin wayuu naaʼinrüle tia, jaʼitaichi ayuulin maʼin nia, jaʼitaichi kananin esclerosis múltiple jee shiale VIH. Akaʼaya neʼe na wayuu kiʼrakana sünain asaa awarianta, eesü süpüla nnojoluin suchuntaain naaʼin asaa jee nnojoluin mojuin naaʼin müleka nakaaliinjale wayuu.

¿Jamüsüche maka nakuwaʼipa? Saashin wayuu, nnojotsü mojuin naaʼin wanee wayuu müleka nümüliajüire, anamiale nia jee nüsülajüire. Chi wayuu asülajüikai, nnojotsü shapaain naaʼin jee nnojotsü kakuain maʼin tü naaʼinkat. Akaʼaya chi wayuu ouktakai aʼwayuuse, nnojotsü kakaliain nünain tü mojaakalü aaʼin müleka nükaaliinjale wayuu.

Shiimainshaata maʼin anain wakuwaʼipa wasülajüliire.

Anuu nünüiki Jesuu namüin na nikirajüinkana: «Anashii müleka jüsülajüle sümüin wayuu eekai cheʼojaain kasa sümüin. Je tü cheʼojaakat jümüin, asülajüneerü nütüma chi Maleiwakai sünain wainmashaateerüin shia. Akaajaa müleka matüjüinre asülajaa jia sümüin wayuu, meeria jukuaippa nütüma Maleiwa» (Lucas 6:38). Wasülajüliire, aapüneerü analuʼutka wamüin saaʼu tia otta eesü süpüla süshatüin wayuu wakuwaʼipa. Paaʼinwajiraasü jee aleewasü wayuu sünainjee asülajaa.

Naashin na ekirajaakana süchiirua sukuwaʼipa wayuu, ashatünüsü nukuwaʼipa chi eekai asülajülin. Jamüshijaʼa naashajeʼerüle neʼe wanee wayuu süchiki tü asülajaakat, asülajüishi nia sünainjee tia. Anuujeseʼe nanüiki waneeinnua wayuu ekirajaakana süchiirua tia: «Eesü süpüla süshatüin wakuwaʼipa wainma wayuu, jaʼitakajeʼe neʼe na nnojoliikana weʼraajüin». Nüsülajüire wanee wayuu, eesü süpüla nashatüin nukuwaʼipa na wayuu kepiakana pejepünaa nünain. ¿Aashin anashaatain kepiaa naʼaka wayuu makana  akuwaʼipa? Wainmale na wayuu asülajüliikana, anashaateerü wakuwaʼipa wayakana wapüshuaʼa.

Wanee kasa anashaatasü weʼraka sutuma wakaaliinjain wayuu, meematüsü aka saaʼin tü alatakat chaa Florida (Estados Unidos). Chajana oʼunüin wainma aküjülii pütchi nüchiki Jeʼwaa sünain akaaliinjaa na nawalayuu müliakana sutuma wanee juʼrakan alataka chapünaa. Sümaʼinruʼu naʼatapajüin tü kasairua choʼujaakat namüin süpüla nakumajüin tü piichiirua amojujaakat, neʼrüin mojuin süpaatiase nipia wanee wayuu kepiakai naʼütpaʼa na nawalayuukana jee nakumajaka shia. Mapa süchikijee tia, aluwataashi karaloukta chia wayuukai namüin na aküjüliikana pütchi chaa eere tü shikiisükat maʼin. Müsü nünüiki: «Taapeerü analuʼutka waneepia jümüin. Nnojotsü eein wayuu eekai teʼraajüin kamaneeka maʼin maʼaka jaaʼin jiakana». Sutuma talatüin naaʼin chia wayuukai, aluwataashi nia nneerü süpüla «tü aʼyatawaa anashaatasü naaʼinrakat» na aküjüliikana pütchi nüchiki Jeʼwaa.

Naashin waneeinnua cientiifico, «akaaliinjalii napüshuaʼa na wayuukana, joʼuujiraashii naya sünain müin nakuwaʼipa». Naashin nayakana, «müsia neʼe nakuwaʼipa na tepichicheinkana, ooʼulakajüshii naya asülajaa manülüiwaʼaya naya». Makaʼa wakuwaʼipa, shia süka nukumajüin waya Maleiwa sünain müin waya maʼaka naaʼin (Génesis 1:27).

Wanee nukuwaʼipa Jeʼwaa, chi Wamaleiwasekai anaka maʼin shia nüsülajülin. Nia aapakaʼaya wamüin tü kataakalü oʼuu otta naapüin wamüin süpüshuaʼa tü kasa talatakat atuma waaʼin (Aluwataaushikana 14:17; 17:26-28). Sükajee tü Wiwüliakat, weʼraajeechi maʼin chi Washi chakai iipünaa otta watüjaajeerü aaʼu tü kasa anasü naaʼinrajatkat süpüleerua wayuu soʼu palit kaʼi. Süküjüin tü Wiwüliakat nukumajüin Maleiwa sukuwaʼipa süpüla talatüinjanain waya süpüla kaʼikat süpüshuaʼa * (1 Juan 4:9, 10). Nia Maleiwa asülajüikai maʼin otta nukumajüin waya sünain müin aka naaʼin. Müsüjeseʼe weʼrüin kasa anasü wasülajüle jee anasü wakuwaʼipa noʼuluʼu Maleiwa sünainjee tia (Hebreokana 13:16).

¿Jamüsü sukuwaʼipa Alexandra mapa? Müsü nünüiki wanee wayuu suluʼujachikai tü wuusükat sümüin Alexandra: «Müiria nnojoluin awalaajünüin pümüin tü pünneetsekat». Niasaʼa chi jimaʼaikai chiino, niyaamajüin wanee naʼaleewainyuu kepiakana eere süntajatüin tü wuusükat jee nuwalaajaka tü 20 dólar nujuyaalakat suulia Alexandra. Akaʼaya nia, oʼttüshi sünain ekirajawaa sünain tü Wiwüliakat. Apünüin kashi süchikijee tia, antiraasü Alexandra nümaa chi jimaʼaikai süchikuaʼa sünain wanee outkajawaa miyoʼu naainjaka na aküjüliikana pütchi nüchiki Jeʼwaa chaa Perú. Niasaʼa chi jimaʼaikai, nuunejaain Alexandra otta na sümaajanakana sünain ekawaa suluʼu tü oikkaalee eküülü nükorolokot.

Shiimainshaata maʼin talatüin waaʼin, wasülajüle kasa sümüin wayuu jee wakaaliinjale naya. Anaʼleepejeʼe wakaaliinjale naya süpüla neʼraajüinjachin Jeʼwaa, chi Maleiwakai, chi shikiishikai maʼin asülajaa (Santiago 1:17). ¿Jama piakai? ¿Eʼrüichi pia kasa anasü saaʼu püsülajülin?