Anuu nünüiki Maleiwa nümüin Adán, chi palajachikai wayuu: «Anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia» (Génesis 2:16, 17). Pansaasü nünüiki Maleiwa nümüin Adán, katüinjatia noʼu suluʼu tü apainkat Edén müleka noonoole sümaa nünüiki Jeʼwaa.

Eetaayaai noonooin nümaa Maleiwa süpüla katüinjatüin noʼu waneepia, niyoutajaa amaalü Adán nünüiki Maleiwa, niküinjeseʼe süchon tü wunuʼu apülajünakat nuulia wanaa sümaa shikirüin nia Eva (Génesis 3:1-6). Müshiijeseʼe weʼrüin wamüliala maaʼulu saaliijee tü naaʼinralakat Adán. Anuu nünüiki Pablo süchiki tia: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). ¿Kasa wayu tü naainjalakat Adán? ¿Jamüshi outaka nia saaliijee tia?

Kaainjalashi Adán nuulia Maleiwa süka nnojoluin noonooin sümaa tü nuluwataakalü anain nia (1 Juan 3:4). Nüküjatüjülia Jeʼwaa nümüin Adán outajachin nia moonooinre nia nümaa. Noonooleje Adán sümaa nünüiki Jeʼwaa, nnojoishije kaainjalain jee outuin nia. Akaʼaya neʼe na nüchonniikana, nnojoishiije outuin naya. Nnojoishii nukumajüin Maleiwa  na wayuukana süpüla outajanain naya, nukumajüin naya süpüla katüinjatüin noʼu süpüla kaʼikat süpüshuaʼa.

Outusü wayuu süpüshuaʼa saaliijee naainjala Adán saashin tü Wiwüliakat. ¿Shiimainche katüin soʼu tü naaʼinkat wanee wayuu outapa nia? «Aa, shiimain», eeshii eeka namüin. Shiimainreje tia, alawaaja mmata tü nümakat Maleiwa nümüin Adán outajachin nia saaliijee naainjala. Nnojotsüje jaralüin süsalain saainjala nutuma Maleiwa müleka ayatüle katüin soʼu tü naaʼinkat wanee wayuu süchikijee tü outaakat. Matüjainsai aküjaa alawaa Maleiwa saashin tü Wiwüliakat (Hebreokana 6:18). Nia Satanaa aküjaka naʼalain wanaa sümaa nümüin sümüin Eva: «Nnojoleena jia ouktüin» (Génesis 3:4).

Alawaaleje matüjain outaa tü saaʼinkat wayuu, ¿kasaka alatüin wamüin outapa waya?

Anuu sünüiki tü Wiwüliakat süchiki tü naaʼinrakat Maleiwa: «Naapaakalaka Jehová, chi Maleiwakai, wane pootshi süpüla nütüküinjachin chi wayuukai süka. Je süpüla niʼrüinjatüin kataa oʼu, nujuʼulakalaka joo nia niʼiruʼupünaa süpüla süsanalaainjatüin naaʼin. Katüitpakalaka joo noʼu chi wayuukai sütüma tia». Tü pütchikat «süsanalaainjatüin naaʼin» makat, sünainjeejatü wanee pütchi Hebreo néfesch * münüsü. «Katakai oʼu» maluʼulu tia (Génesis 2:7).

Pansaasü sünüiki tü Wiwüliakat süchiki nnojoluin sukumajünüin wayuu süpüla katüinjatüin soʼu tü saaʼinkat süchikijee outuin shia. Makalaka nnojoleerüin süküjain pümüin tü Wiwüliakat matüjain outaa tü saaʼinkat wayuu.

Alawaa saashin tü Wiwüliakat tü ekirajünakalü anain süchiki katüin soʼu tü naaʼinkat wanee wayuu outapa nia, ¿jamaka wainmaka iküleesia ekirajaka wanee kasa naata suulia tia? Süpüla watüjaain saaʼu tia, wekirajaa sünain tü ekirajünapuʼukalü anain chaa Egipto sümaiwa.

Alatüirü suulia 2.500 juya süchikijee joʼuuin wanee wayuu griego kanüliakai Heródoto. Naashin niakai, naya na egipcio anoujakana palajana «matüjain outaa tü saaʼinkat wayuu». Akaʼaya na chajanakana Babilonia nanouja anainrü tia. Jamüsüjaʼa wanaa sümaa nuluwataain Alejandro Magno saaʼu Oriente Medio soʼu juyakat 332 süpülapünaa wakalia, nekirajüin wayuu na griegokana süpüla nanoujain sünain matüjain outaa tü saaʼinkat wayuu. Tia, wattakuatsü ekirajünüin suluʼupünaa tü mma naluwataakalü aaʼu na griegokana.

Nakalioʼu na nikirajüinkana Jesuu, na eseniokana otta na fariseokana nekirajüin anain katüin soʼu naaʼin wanee wayuu outapa nia. Anuu sünüiki The Jewish Encyclopedia: «Nanouja anainrü na judíokana katüin soʼu tü naaʼinkat wanee wayuu outapa nia süka naapaain sümaa tü nanoujakalü anain na griegokana otta süka naapaain sümaa tü nikirajakalü anain Platón». Naashin wanee judío kanüliakai Josefo, nnojotsü shikirajalain tü Wiwüliakat katüin soʼu tü saaʼinkat wayuu, naya kekirajalaka tia na griegokana. Nayujala neʼe nekiiruʼujee tia makat otta nakuense neʼe shia naashin Josefo.

Süka wattakualüin ekirajünüin tü nakuwaʼipakat na griegokana, ashatünüsü tü alawaa nanoujakalü anain, nashatüin shiaʼaya na anoujayaashiikana nünain Jesuu. Naashin Jona Lendering, nikiraja anainrü Platón anapuʼuin tü saaʼinkat wayuu paala suluʼu wanee mma naata jee mojuka nakuwaʼipa maaʼulu saaʼu mmakat. Sutuma tia, apalirajaasü tü nikirajakalü anain Platón sümaa tü nanoujakalü anain na anoujashiikana. Müsüjeseʼe wainmain iküleesia ekirajaka matüjain outaa tü saaʼinkat wayuu. Shiakalaka sunoujain anain wayuu mapa tia.

Nakalioʼu na nikirajüinkana Jesuu, müshi Pablo: «Aashajaashi chi Naaʼinkai Maleiwa paala sümaiwa naka na nünüikimaajanakana Maleiwa sünain aküjaa sümüin wayuu süchiki tü alateetkat soʼuweena tü kaʼi alüʼütkat süpüla sajaʼttüinjatüin tü kasakat süpüshua. Naküjain süchiki wane wayuuirua ayouktüinjatkat tü sünoulakat süpüla jüüjüüinjatüin sümüin wane alawaa ekirajünakat sütüma yolujaa» (1 Timoteo 4:1). Pansaasü maʼin tia pütchikat. Shiimainya shikirajalain yolujaa tü ekirajünakalü anain süchiki matüjain outaa tü saaʼinkat wayuu. Nnojotsü shikirajalain tü Wiwüliakat, shikirajala tü iküleesiakalüirua otta nekirajala na filosofokana.

Anapejeʼe waaʼin sutuma tü nümakat Jesuu: «Jiyaawateerü aaʼu tü shiimainkat süpüla jujuittüinjanain sütüma suulia achepchiaa», müshi nia (Juan 8:32). Süka wayaawatüin saaʼu tü shiimain shikirajakalü anain tü Wiwüliakat, nnojoishii waya süchepchiain tü alawaa ekirajünakalü anain suluʼu wainma iküleesia, tü niyoutakat Maleiwa. Jee nnojotsü wanoujain anain tü süpülajakat wayuu seema tü outusükalüirua (paashajeʼera « ¿Jalashii na outushiikana?»).

Nnojoishii nukumajüin waya Maleiwa süpüla katüinjatüin neʼe woʼu 70 jee 80 juya otta süpüla woʼunuin jalamüin yaa süchikijee outuin waya. Tü keeʼireekat naaʼin Maleiwa shia katüinjatüin noʼu na wayuukana süpüla kaʼikat süpüshuaʼa yaa Mmapaʼa. Nikeraajeerü Maleiwa tü keeʼireekat naaʼin wapüleerua süka alin maʼin waya nüpüla (Malaquías 3:6). Anuu wanee pütchi nüshajaka David nutuma Maleiwa: «Na lotokana akuwaʼipa, nayeena kepiaka saaʼu tü mmakat süpüla kaʼika süpüshuaʼa» (Salmos 37:29, TNM).