Weʼraajeechi Maleiwa wekirajaale nachiki na nünüikimaajanakana
Sümaiwa paala, nüküjapuʼuin Maleiwa namüin na wayuukana süchiki tü naaʼinrajatkat nakajee na nünüikimaajanakana. ¿Kasa watüjaka nüchiki Maleiwa wekirajaale sünain tü pütchi nümakat namüin na nünüikimaajanakana? Wekirajaa sünain tü watüjakat nanainjee apünüinshii nünüikimaajana Maleiwa waneepiakana nümaa.
ABRAHAM
Nnojotsü koʼuin nukuwaʼipa Maleiwa otta aneesü sukuwaʼipa wayuu nutuma.
Anuu tü pütchi nüpansaajakat Maleiwa nümüin Abraham: «Paaʼujee piakai, süchunteerü tamüin wayuu sainküin mmakat süpüla anakuaippalüinjatüin shia tatüma maa aka anakuaippalin pia tatüma» (Génesis 12:3).
¿Kasa shikirajaka anain waya? Aishaanashii waya nüpüla Maleiwa otta naapeein kasa anasü namüin na tooloyuukana, na jieyuukana otta na tepichi oonookana sümaa nünüiki.
MOISÉS
Amüliajüi wayuu Maleiwa otta naapüin kasa anasü namüin na achajaakana sukuwaʼipa süpüla neʼraajüin nia.
Naaʼinrüin Moisés wainma kasa pülasü nutuma chi Maleiwa Pülashikai maʼin. Anuupejeʼe tü nuchuntakat nümüin Maleiwa: «Pikiraja taya sünain tü puluwataakalü anain süpüla teʼraajüin pukuwaʼipa otta süpüla ayatüinjatüin anain takuwaʼipa poʼuluʼu» (Éxodo 33:13). Anasü maʼin nümüin Maleiwa tü nuchuntakat Moisés. Naapaka nümüin kekiiwaa otta atüjawaa süpüla niyaawatüin saaʼu anashaatain maʼin nukuwaʼipa Maleiwa. Jamüshijaʼa Moisés, niyaawata aaʼu amüliajülin otta anamiain maʼin Maleiwa (Éxodo 34:6, 7).
¿Kasa shikirajaka anain waya? Aneesü nakuwaʼipa nutuma Maleiwa na tooloyuukana, na jieyuukana otta na tepichi eʼraajeekana maʼin nia. Nüküjain suluʼu tü Wiwüliakat tü waaʼinrajatkat süpüla waʼwaajüin nia, süpüla talatüinjachin nia wamaa otta tü waaʼinrajatkat süpüla naapüinjatüin kasa anasü wamüin.
JESUU
Niiyajüin Jesuu na ayuuishiikana süka sümülialaain naaʼin naalin.
Eeshii süpüla talatüin waya süpüla kaʼikat süpüshuaʼa wekirajaale nüchiki Jesuu, süchiki tü naaʼinrakat otta tü nümakat.
Aküjünüsü suluʼu tü Wiwüliakat wainma kasa süchiki tü naaʼinrapuʼukat Jesuu otta süchiki tü nikirajakalü anain. Naaʼinrüin Jesuu wainma kasa pülasü nutuma chi Maleiwakai. Niiyajüin na moʼusaliikana, na macheʼesaliikana otta na masaʼasaliikana. Jaʼitakajaʼa na outushiikana nüsoʼiraain naaʼin. Sükajee tü naaʼinrakat Jesuu, atüjaana aaʼu tü naaʼinrajatkat Maleiwa mapeena napüleerua na wayuukana. Nüküjain Jesuu tü waaʼinrajatkat waneʼewai wakua süpüla weʼrüinjatüin tü naapüinjatkat Maleiwa wamüin: «Kateerü noʼu waneepia chi wayuu eekai niʼraajüin pia, chi waneeshikai sünain Maleiwain otta chi wayuu eekai niʼraajüin Jesukürisüto, chi püjünalakai» (Juan 17:3, TNM).
Amüliajüi maʼin Jesuu, aipürai otta kamaneeshi nia. Anasü namüin na jieyuukana, na tooloyuukana, na jimaʼaliikana, na majayünnüükana otta na laülaainnakana aapajaa nünüiki Jesuu. Anuu tü nümakat Jesuu: «Anakaja joonoole sümaa tanüiki, [...] mapüleejeerü jümüin aluwataanaa tatüma [...]. Müleka jüüjüüle jia tamüin, taapeerü jümüin tü eemerawaakat süka anamiain maʼi taya» (Mateo 11:29, 30). Mayaainjeʼe mojutuin na jieyuukana natuma na wayuu eejanakana nükalioʼu Jesuu, kapülasü naaʼin na jieyuukana nutuma otta kamaneeshi maʼin nia namüin.
¿Kasa shikirajaka anain waya? Aishaatasü wayuu nüpüla Jesuu, niʼitaain wapüleerua tü wakuwaʼipainjatkat namaa na waneinnua.
NNOJOISHI NIAIN MALEIWA JESUU
Süküjain tü Wiwüliakat waneeshiain neʼe chi Maleiwakai otta Jesuu nia wanee nünüikimaajachi (1 Corinto 8:6). Lotusü nünüiki Jesuu wanaa sümaa nüküjain laülaain chi Maleiwakai nuulia otta nuluwataanüin mmapaʼamüin nutuma Maleiwa (Juan 11:41, 42; 14:28). *
^ püt. 17 Pütüjeere sooʼomüin nüchiki Jesukürisüto, paashajeʼera tü poyeetokot Pütchi anasü nutuma Maleiwa, ekirajaaya 4, suluʼusü shia www.mr1310.com.
Eesüjaʼa kamalainjeerüle pümüin aashajeʼeraa tüü
SUSOUTAKA EʼIPAJEE TÜ BIBLIAKAT
¿Niache Jesús chi Maleiwa pülashikai maʼin?
¿Jarai chi laülaakai saaʼu kasa süpüshuaʼa naashin Jesús?
