Chi wayuu makai akuwaʼipa, niyaawata aaʼu tü anasükat süpüla naaʼinrüinjatüin shia jee tü mojusükat süpüla niyoutuinjatüin shia. Ayatüsia naaʼinrüin tia jaʼitaichi jamawalain nia. Pansaasü suluʼu nikii jee suluʼu naaʼin naaʼinrüinjatüin tü anasükat jee niyoutuinjatüin tü mojusükat jaʼitaichi nümüiwaʼain nia.

Watta saalii kasa mojusü naapawaika otta neʼrawaika na tepichikana natuma na koleejiajiraakana namaa, suluʼupünaa peliikula, telewisoot otta muusika. Matüjaajuuitpa aaʼu kasain wayu tü anakat otta tü mojukat. Shiasaʼa sünainjee tia, eesü süpüla anashiin namüin na tepichikana aaʼinraa kasa mojusü.

Alatüsü maʼin tia namüin na jimaʼaliikana jee na majayünnüükana. Saashin tü karaloʼutakat Beyond the Big Talk (Después de «la charla padre e hijo»), eeinjatü naaʼin na jimaʼaliikana jee na majayünnüükana süka «süpüleeruaneerüin naaʼin natuma na koleejiashiikana namaa, sükajee tü eeʼiyatünawaikat suluʼu telewisoot otta Internet süpüla keeʼireeinjatüin naaʼin neʼnnaajünüin maʼin. Acheküsü naaʼinrüin tü kasa anasü ekirajünakalü anain naya otta nayoutuin tü mojusükat jaʼitairü nnojoluin naaʼinrüin tia na nakonpainyeetsekana». Ekirajüneeshii na tepichikana sünain tia joʼuuiwaʼaya naya.

Pikiraja naya sünain tü anakat süpüla naaʼinrüin jee tü nayoutajatkat

TÜ SÜMAKAT TÜ WIWÜLIAKAT: «Chi eekai laülaain naaʼin sünain anoujaa, süka eeinjaʼa neʼe naaʼin waneepia sünain tü anasükat süpüla naaʼinrüinjatüin shia je sünain tü mojusükat süpüla niyouktüinjatüin shia» (Hebreokana 5:14).

• Püküja namüin anale jee mojule wanee kasa. Pikiraja naya sükajee tü kasa saaʼinrawaikat wayuu, püküja namüin jamüin anaka jee mojuka shia. Anasü maʼwaire pünüiki namüin: «Nnojotsü lotuin nukuwaʼipa chi wayuu aaʼinrakai tüü. Nia lotoko akuwaʼipa chi aaʼinrakai tü makalü yaa», «nnojoishi wayuuin anashi chi aaʼinrakai tia namüin na wayuu aikana apüla nia. Nia anaka chi aaʼinrakai tü makalü yaa», «mojutsat wayuu nümüin chi eekai naaʼinrüin tü makalü yaa. Niainjaʼa kojutuin amüin wayuu chi makai akuwaʼipa». Nayaawateerü aaʼu na püchonniikana mapa jamüinjatüin nakuwaʼipa sümüin wayuu süpüla naaʼinrüinjatüin tü anasükat.

• Püküja namüin jamüin kojutuinjatka namüin tü pikirajakalü anain naya. Eeshii süpüla püsakirüin naya sünain tüü: «¿Jamüsü shiaka anain lotule nukuwaʼipa wanee wayuu?», «¿Jamüsü sumojujaaka nukuwaʼipa wanee wayuu namaa naʼaleewainyuu nüküjale alawaa?» jee «¿Jamüsü mojuka aʼluwajaa?». Püsakirüle püchonnii sünain kasa eekai müin aka saaʼin tia, atüjeena ayaawataa saaʼu tü anasükat jee ayoutaa tü mojusükat.

• Püküja namüin jamüin anaka naaʼinrüle tü anasükat jee nayoutule tü mojusükat. Eesü süpüla müin pünüiki namüin: «Lotule sukuwaʼipa tü kasa paaʼinrakat, sunoujeerü wayuu pünüiki» jee «kamaneere pia, kamalainjeerü sümüin wayuu aleewaa pümaa».

 Piʼyataa maʼin süchiirua wanaawainjatüin saaʼin püpüshi sünain aaʼinraa tü anasükat jee ayoutaa tü mojusükat

TÜ SÜMAKAT TÜ WIWÜLIAKAT: «Jiiʼiyata süka jukuwaʼipa shiimain lotuin tü jaaʼinrakat» (2 Corinto 13:5, TNM).

• Wanaawainjatü saaʼin puʼwayuuse, püchonnii otta piakai sünain aaʼinraa tü anasükat jee ayoutaa tü mojusükat, eekalaka süpüla müin pünüiki mayaa:

  • «Matüjainsalii waya aküjaa alawaa».

  • «Matüjainsalii waya woottoo jee aʼyaataa wayuu».

  • «Nnojotsü airuʼuluin wanüiki».

Sükajee tia, nayaawateerü aaʼu na püchonniikana wanaawain jaaʼin sünain aaʼinraa tü anasükat otta ayoutaa tü mojusükat. Nayaawateerü aaʼu nnojoluinjatüin naaʼinrüin tia süka münajalain namüin.

• Paashajaa namaa püchonnii süchiki tü alatawaikat sümüin wayuu süpüla pikirajüin naya sünain tü jaaʼinrüinjatkat jiakana sülatüle tia jümüin. Eesü süpüla puʼwanaajireʼerüin jukuwaʼipa jiakana sümaa nakuwaʼipa na koleejiajiraakana namaa na jüchonniikana otta tü eeʼiyatünakat suluʼupünaa telewisoot otta Internet. Püsakira naya sünain tüü: «¿Kasaje paaʼinraka sülatüle tia pümüin?» jee «¿Kasaje waaʼinraka wayakana?».

Pükaalinja naya süpüla ayatüin naaʼinrüin kasa anasü jee nayoutuin tü mojusükat

TÜ SÜMAKAT TÜ WIWÜLIAKAT: «Müleka jütüjaale saaʼu tü jaaʼinrakat sünain anasüin nuʼupala Maleiwa» (1 Pedro 3:16).

• Ana pünüiki namüin naaʼinrüle kasa anasü. Naaʼinrüle püchon tü pikirajakalü anain nia, ana pünüiki nümüin saaʼu tia otta püküja nümüin jamüin anaka tia naaʼinrakat. Eesü süpüla müin pünüiki: «Anasü maʼin tü paaʼinrakat, lotusü maʼin sukuwaʼipa. Talatüshi maʼin taya pümaa saaʼujee tia». Nüküjale pümüin püchon süchiki wanee naainjala, «anasü süka püküjain tia tamüin», meeshi pia nümüin süpülapünaa püchiaain nia.

• Püchiaa naya naaʼinrüle kasa mojusü. Pikiraja püchonnii süpüla natüjain asoutaa namüiwaʼa saaʼu wanee kasa naaʼinraka. Aküjüneesü namüin na tepichikana jaralüin tü kasa mojusü naaʼinrakat otta jamüin nnojotka pansaain tia sümaa tü ekirajünakalü anain naya nepialuʼu. Eeshii wayuu nnojoliika aaʼinreein tia suulia mojuin naaʼin nachonnii natuma, choʼujaapejeʼe naashajaain namaa süchiki tia naaʼinrakat süpüla natüjain na tepichikana ayaawataa saaʼu tü anasükat jee tü mojusükat.