1, 2. (1) ¿Kasa waaʼinrüinjatka naashin Jeʼwaa? (2) ¿Jarat tü pütchi wasouktüinjatkat eʼipajee sünain ekirajaayakat tüü?

WAYAKANA aʼyataaliikana nümüin Jeʼwaa, wuleinjatü wakuwaʼipa maʼaka naaʼin na Israeliitakana. Nüshajala Pedro tia suluʼujee tü karalouktakat Levítico ( paashajeʼera 1 Pedro 1:​14-​16, TNM). Naashin Jeʼwaa, wuleinjatü nakuwaʼipa sünain süpüshuaʼa tü kasa naaʼinrakat na wayuu yaainjanakana kepiain mmapaʼa jee na chainjanakana chaa iipünaa (Juan 10:16).

² Suluʼu ekirajaayakat tüü, wekirajaainjatü anain süpüshi tü kasa anashaatasü eekat suluʼu Levítico. Müinjatü sukuwaʼipa tia süpüla watüjaain saaʼu tü anakat nümüin Jeʼwaa jee süpüla weʼitaain shia suluʼu wakuwaʼipa. Jee wasoukteerü eʼipajee pütchikalüirua tüü: ¿Jamüshii woonooinjanaka waneepia sümaa nünüiki Jeʼwaa? ¿Jamüshi kojutüinjachikaʼa watuma Jeʼwaa saaʼu niain Aluwataain saaʼu tü kasakat süpüshuaʼa? ¿Kasa watüjaka sünainjee noʼutapuʼuin saaʼin mürüʼlü na israeliitakana süpüla naapüin shia nümüin Jeʼwaa?

3, 4. (1) ¿Jamüshii woonooinjanaka waneepia sümaa tü nünüikikat Jeʼwaa? (2) ¿Jamüsü nnojotka anain pasalaaweere waya jee üttüle waaʼin?

³ Süpüla talatüinjatüin naaʼin Jeʼwaa wamaa, acheküshii woonooinjanain waneepia sümaa nünüiki. Nnojotsü mojutüyaainjatüin shia wamüin. Mayaapejeʼe nnojoluinjatüin waaʼinrüin tü Pütchi naapakat  Jeʼwaa nümüin Moisés, sükaaliinjüin waya süpüla watüjaain saaʼu tü kasa anakat nümüin Jeʼwaa jee tü kasa mojukat nümüin. Jamüsüjaʼa nünüiki Jeʼwaa namüin na israeliitakana müsü mayaa: «Nnojoishi pasalaainjachin pia otta nnojotsü üttüinjatüin paaʼin nooʼomüin nachonnii na kasayuukana pünain. Shia anaka aluʼu aire püpüla tü wayuukalüirua maʼaka aijiraain pia püpülajiraa. Tayakai, taya Jeʼwaakai anülia» (Lev. 19:18, TNM).

⁴ Nnojotsü anain nümüin Jeʼwaa müleka keeʼireere waaʼin pasalaawaa jee üttüin waaʼin sooʼomüin wayuu (Roma 12:19). Mojuteechi wamüin Jeʼwaa müleka nnojoliire woonooin sümaa tia nümüitpakat wamüin. Nieechi neʼe talataka watuma Satanaa. Nnojotsü üttüinjatüin waaʼin nooʼomüin wanee wayuu aainjakai kasa mojusü wamüin. Saashin tü Wiwüliakat, müshii waya maʼaka saaʼin iita atüküüshi, kaluʼukat korolo kojutüsü (2 Cor. 4:1, 7, TNM). Tia korolo kojutüsükat, shia tü aküjaakat pütchi. Makalaka nnojoluin anain üttüle waaʼin sooʼomüin wayuu sümaa waküjataalain nünüiki Maleiwa.

5. ¿Kasa watüjaka sünainjee tü naainjakat Aarón wanaa sümaa ouktüin na nüchonniikana? (Piirakaa sümüin tü ayaakuaa suluʼukat süpana 17.)

⁵ Aküjünüsü suluʼu Levítico 10:1-11 tü kasa alatakat nümüin Aarón sümaa nüpüshi. Nuluwataain Jeʼwaa wanee siki chuwatashaatasü iipünaajee, jotokaʼa Nadab nümaa Abihú sutuma tia sikikat. Nüchonnii Aarón naya makana, nüküjüinjeseʼe Jeʼwaa namüin na kasayuukana nanain nnojoluinjatüin mojuin naaʼin naaliin naya müliashiikana. ¡Eeyaai müin mapüleekai saaʼin tia namüin naya wayuukana! Müleka aleewajiraale waya nümaa wanee wayuu ojuʼitinnakai naʼakajee na anoujüshiikana, nnojotsü anain tia nümüin Jeʼwaa; jaʼitakajeʼe neʼe wapüshire nia jee waʼaleewainre nia ( paashajeʼera 1 Corinto 5:11).

6, 7. (1) ¿Kasa jülüjüinjatka waaʼin palajana wounejaanüle sünain eʼrajaa nukua wanee wayuu kasaalüinjachikai suluʼu wanee iküleesia? (Paashajeʼera tü münakat sünain tü nootakat.) (2) ¿Jamüinjatü wanüiki nümüin wanee wapüshi nnojoluinjanale woʼunüin sünain tü nuunejaakalü anain waya?

⁶ Eesüjaʼa süpüla nnojoleerüin sülatüin wamüin tü alatakat nümüin Aarón jee namüin na wayuu kasayuukana nünain. Akatsaʼa eein süpüla wounejaanüin nutuma wanee wayuu kasakai wanain kasaalüinjachikai suluʼu wanee iküleesia. ¿Oʼuneenache waya sünain tia? «Nnojotsü anain puʼunüle suluʼumüin tia iküleesiakat», nnojotsü müin tü Wiwüliakat. Eepajaʼa waneeirua pütchi suluʼu tü Wiwüliakat akaaliinjeenaka waya süpüla wayaawatüin saaʼu anale jee mojule shia. *

⁷ Eesüjaʼa süpüla ponuin naaʼin na kasayuukana wanain sutuma nnojoluin woʼunüin sünain tia. Eesüjaʼa müle nakuwaʼipa süka nnojoluin natüjaain saaʼu niain Jeʼwaa woonooinjachikai amaa jee wuleinjatüin wakuwaʼipa noʼuluʼu (1 Ped. 4:​3, 4). Waküjapa nümüin chi kasaalüinjachikai nnojoluinjanain woʼunüin sünain tia, acheküsü kemeʼeriainjatüin wanüiki nümüin suulia airuʼulajüin neʼe shia nümüin. Anasü joo müleka waküjüle nümüin tia kojuya kaʼi süpülapünaa kasaalüin nia. Eesü süpüla müin wanüiki nümüin mayaa: «Anashijaʼa süka peenajaain taya sünain tia makat, iseetpajaʼa tachiki oʼunaa sünain tia, jama tayouktaleere wanee kasa aainjüneetka chayaa. Eeshijaʼa süpüla piʼrüin japülii tatuma. Piʼrüinchejeʼe talateerüin maʼin paaʼin suʼunnaa tia kaʼikat, ‹shiainjaʼa anaka aluʼu müleka lotoleere tanüiki nümüin›, tamakaʼa neʼe». Müle wanüiki nümüin, oonoojeena waya nümaa Jeʼwaa sünain süpüshuaʼa tü waaʼinrakat.

8. ¿Kasa ashajünaka suluʼu Levítico nüchiki Jeʼwaa?

⁸ Nia neʼe Jeʼwaa nümüiwaʼa aküjüinjachikai wamüin kasainjatüin waaʼinrüin. Süka jamüin, niain Aluwataain saaʼu kasakat süpüshuaʼa. Alatüsü suulia apünüintua shikii süküjünüin tia suluʼu tü karalouktakat Levítico. Nütüjaa aaʼu Moisés tia, müshijeseʼe noonooin sümaa tia nünüikikat Jeʼwaa (Lev. 8:​4, 5). Akaʼaya neʼe wayakana, oonooinjana waya sümaa nünüiki Jeʼwaa, chi Aluwataakai waaʼu. Süpüla waaʼinrüin tia, sükaaliinjeena waya tü nupueulosekat. Oonooinjanapajaʼa waya nümaa Jeʼwaa wamüiwaʼapa waya maʼaka naainjüin shia Jesuu. Jamüshijaʼa Jesuu, ooʼulaküna aaʼinchi nia wanaa sümaa nümüiwaʼajachin nia, mayaapejeʼe sülatüin tia, ayatshia oonooin sümaa nünüiki Jeʼwaa (Luc. 4:​1-​13). Shiimainrejeʼe kojutüin wamüin  Jeʼwaa, ayateenaʼaya waya oonooin nümaa. Jee nnojoleena waya aaʼinrüin kasa mojusü sutuma mmoluin waya (Prov. 29:25).

9. ¿Jamüshii maaliinka waya süpüla wayuu?

⁹ Nüküjatüjülia Jesuu sümaa müliainjanain waya atumawaa, anuu nünüiki süchiki tia: «Ataʼünneena jia sütüma wayuu süpüla müliainjatüin maʼi jaaʼin sütüma sümaa suʼutireerüin jaaʼin. Je saaliijee junoujain tanain, maalinjeena jia süpüla wayuu sainküin mmakat süpüshua» (Mat. 24:9). Ayatshiʼiya waya aküjüin pütchi nüchiki Jeʼwaa mayaapejeʼe müliain waya sutuma wayuu. Jee ayatüsü wulein wakuwaʼipa noʼuluʼu Jeʼwaa. Wayuu keisalashii waya sünain süpüshuaʼa tü kasa waaʼinrakat. ¿Jamakaʼa maaliinka waya süpüla wayuu sümaa anain wakuwaʼipa? (Roma 13:​1-7.) Shia süka niain woonooin amaa Jeʼwaa saaʼu niain Aluwataain waaʼu. Ayateena waya oonooin nümaa Jeʼwaa süka niainjachin waʼwaajüin nümüiwaʼa (Mat. 4:​10).

10. ¿Kasa alataka nümüin wanee wawalapuʼushi sünain anoujaa nnojoikai oonooin nümaa Jeʼwaa?

¹⁰ Nnojoishii waya wanaawain namaa na manoujüinsaliikana. Makalaka nnojoluin waya sünainpünaain atkawaa jee poliitika ( paashajeʼera Juan 15:18-​21 otta Isaías 2:4 *). Eeshii wawalayuu nnojoliipünaaka oonooin nümaa Jeʼwaa. Akanasaʼa nayaawajaain mapa suulia naainjala jee noonooka nachikuaʼa nümaa Jeʼwaa (Sal. 51:17). Eepajaʼa wawalayuu oonookana waneepia nümaa Jeʼwaa. Jamüsüjaʼa soʼu tü Segunda Guerra Mundial münakat, apüreesajünüshii 160 wawalayuu sutuma pulusiia süka nnojoluin surulaaleein naya. Nnojotsü alatüin nouyase suulia 45 juya. Shiasejeʼe suluʼu tü kaatsetkat, aküjünüsü namüin surulaalüinjanain naya. Eeshii wawalayuu ayouktajaakana sümaa tia, eepajaʼa mekietsalii «surulaaleena waya», makana. Surulaatshiijeseʼe naya atumawaa. Piama juya süchikijee tia, aluwataanüshii waneeinnua surulaat süpüla noʼutüinjatüin naaʼin noʼutku na wawalayuu püreesakana, eejachi wanee wawalapuʼushi naʼaka naya surulaatkana. ¡Tüntakajasaʼa maʼin naaʼin chi wawalapuʼukai saaliin niʼrüin wanee nuwalacheʼechon naʼaka na nuʼutüinjanakana aaʼin! Akalajasaʼa süwüinjaain tia aainjünajatiaakat paala.

11, 12. ¿Kasa watüjaaka aaʼu sutuma tü Pütchi naapakat Jeʼwaa nümüin Moisés?

¹¹ Suluʼu tü Pütchi naapakat Jeʼwaa nümüin Moisés, aküjünüsü sünain noʼutüinjanain saaʼin mürüt na israeliitakana süpüla naapüinjatüin shia nümüin Jeʼwaa (Lev. 9:​1-4, 15-​21). Mamojulainjatü tü kasa naapüinjatkat nümüin Jeʼwaa süka shiyaawasein naapajiraainjachin nikii Jesuu suluʼu mamojulainjachin nia. Nüküjüin Jeʼwaa jamüinjatüin sukuwaʼipa tia natuma. Jamüsüjaʼa wanee wayuu süchikijee jemeyuluin shia, saaʼinrajatü tüü: «Kettaapa wanee wayuu suulia tü kaʼi apülajünakat suulia saaʼujee jemeyuluin shia nümaa wanee joʼuu toolo jee shiale wanee jietchon, acheküsü shiʼikajaainjachin nümüin chi sacerdootekai wanee anneetchon toolo waneeichika juya süpüla naʼajünüinjachin nümüin Maleiwa otta wanee wawaachi jee niale wanee toomasü joʼuu süpüla nülaʼajaainjatüin Maleiwa saainjala. Shiʼikajaainjatü tia soʼuluʼumüin tü aʼwaajüleekat Maleiwa» (Lev. 12:​6, TNM). Watüjaaitpa aaʼu sutuma tü Pütchi naapakat Jeʼwaa nümüin Moisés sünain aipüralin wayuu Maleiwa jee niyaawatüin saaʼu sukuwaʼipa. Jamüsüjaʼa müleka nnojorüle nneerü sümaʼana tia wayuukot süpüla shiyaʼlajüinjachin wanee anneerü, eesü süpüla saapüin piamashii wawaachi jee shiale saapüin piamashii toomasü joʼuu (Lev. 12:8). Ayatsia alin nüpüla Jeʼwaa tia wayuukot jee kojutüsü nümüin tü saapajalakat maʼaka kojutüin nümüin tü naapakat na wayuu asülajakana anneerü. ¿Kasa shikirajaka anain waya sukuwaʼipa tia wayuukot?

¹² Wayakana anoujüshiikana, wachajaainjatü sukuwaʼipa naashin Pablo süpüla waʼwaajüinjachin Jeʼwaa (Heb. 13:​15, TNM). Waʼwaajeechi nia müleka waküjüle pütchi süchiki tü nünüliakat jee tü nukuwaʼipakat. Talatüsü naaʼin Jeʼwaa watuma müleka waküjüle pütchi süka süpüshuaʼa waaʼin. Eeshii wawalayuu nnojoliikana süpüla naküjüin  pütchi sainküin piichi süka laülaayuuin naya jee ayuulin naya. Aküjapajaʼa naya pütchi suluʼu teleepono, eeshii nashajüle karaloukta jee aküjüshii pütchi namüin na awaraijaakana naaʼu. Naʼwaajüin Jeʼwaa sükajee tia naaʼinrakat (Roma 12:1; 2 Tim. 2:​15).

13. ¿Jamüsü waapüinjatka tü karalouktachon waʼyataainmaajatkat nümüin Maleiwa?

¹³ Waʼwaajüin Jeʼwaa süka alin nia wapüla, nnojotsü shiain süka münajalain wamüin (Mat. 22:​37, 38). ¿Jamüsü waapüinjatka kashiwai tü karalouktachon waʼyataainmaajatkat nümüin Jeʼwaa? Shia süka alin nia wapüla jee woonooin nümaa (2 Ped. 1:​7, TNM). Nnojoishii neʼe waya aküjüinjanain pütchi shiiʼiree wainmainjatüin tü oora washajüinjatkat suluʼu tia karalouktakat. Jamüshijaʼa eere wanee wawala ayuuikai jee laülaaichikai, nüküjüle neʼe pütchi soʼu 15 minuuto suluʼu wanee kashi eesü süpüla nüshajüin shia sünain tia karalouktakat. Talatüsü naaʼin Jeʼwaa sutuma tia süka nütüjaain saaʼu naaʼinrüin chi wawalakai tia süka alin nia nüpüla jee kojutüin nümüin nüküjülin pütchi. Jaʼitaichi mojuin wanee israeliita, ayatüshia asülajüin nia nümüin Jeʼwaa. Akaʼaya na wawalayuu ayuuikana jee na laülaayuukana eesü süpüla naapüin tü karaloukta sümaajatkat naʼyataain nümüin Maleiwa jaʼitairü jeʼrain minuuto naainjaka. Müleka waapüle tia karalouktachonkot, atüjaaneerü aaʼu jalain choʼujaain süküjünüinjatüin pütchi nüchiki Maleiwa. Müsüjeseʼe anain waapüle tia karalouktachonkot kashiwai.

14. ¿Jamüsü wasakireʼerüinjatka waaʼin?

¹⁴ Süka wekirajaainnapain sünain tü karalouktakat Levítico, watüjaaitpa aaʼu kasapülajatüin nüshajirüin shia Jeʼwaa suluʼu tü Wiwüliakat (2 Tim. 3:​16, TNM). Sutuma tü wekirajaaitpakalü anain, keeʼireesü waaʼin wuleinjatüin wakuwaʼipa noʼuluʼu Jeʼwaa otta waʼyataainjanain nümüin süka süpüshuaʼa waaʼin. Wekirajaa anainrü sünain ekirajaayakat tüü, anain müleka wekirajaale sünain tü kasa kapüleekat suluʼu tü Wiwüliakat ( paashajeʼera Proverbios 2:​1-5 *). Keeʼireesü waaʼin aneein naaʼin Jeʼwaa sümaa tü waʼyataainkat nümüin. Müsüjeseʼe wasakireʼerüinjatüin waaʼin sünain tüü: «¿Kojutüsüche tamüin ekirajawaa sünain tü Wiwüliakat? ¿Nnojotsüche kooʼomüin tanoula nünain Maleiwa sutuma tanajüin telewisoot, tashaittüin video juego, tashaittajaain woola?». Müle tia, jülüjeesü waaʼin tü nümakat Pablo namüin na Hebreokana.

15, 16. ¿Jamüsü nümaleekaʼaya Pablo namüin na hebreokana tü kasa nnojotkat anain natuma?

¹⁵ Nüküjaleʼeinya Pablo namüin na hebreokana tü kasa nnojotkat anain natuma ( paashajeʼera Hebreokana 5:​7, 11-14, TNM). Naashin Pablo, nnojotsü nayaawatüin aaʼu na hebreokana tü pütchi kapüleekat suluʼu tü Wiwüliakat. ¿Jamüsü nümaleekaʼaya Pablo tia namüin? Shia süka alin naya nüpüla maʼaka alin naya nüpüla Jeʼwaa. Shapaasü naaʼin süka nnojoluin müin kooʼomüinyaakai saaʼin tü natüjakat sünainjee tü Wiwüliakat. Süpüla laülaainjatüin naaʼin naya wawalayuukana sünain tü anoujaakat, acheküshii nekirajaainjanain sünain tü pütchi kapüleekat suluʼu tü Wiwüliakat.

¹⁶ Isasü nachiki na hebreokana ekirajaa wayuu sünain tü sümakat tü Wiwüliakat, choʼujaayüttaʼaya  neʼe namüin nekirajünüinjanain sünain tü Wiwüliakat. ¿Jamüshiisaʼa makaʼa naya? Shia süka nnojoluin nekirajaain sünain tü pütchi kapüleekat suluʼu tü Wiwüliakat. ¿Jama wayakana? ¿Wachajaainche sukuwaʼipa süpüla watüjaleeinyain sünain tü sümakat tü Wiwüliakat? ¿Oʼuraajüshiiche waya weinshi nümüin Jeʼwaa? ¿Ekirajaashiiche waya weinshi sünain tü pütchi kapüleekat suluʼu Wiwüliakat? Kapüleere wamüin ayaawataa saaʼu wanee pütchi suluʼuka tü Wiwüliakat, ¿shiache sutuma wekirajaain neʼe sünain tü pütchi mapüleekat? Tü waʼyataainkat nümüin Maleiwa, nnojotsü shiain neʼe waküjüinjanain pütchi, wekirajüinjatü tü wayuukalüirua sünain tü Wiwüliakat süpüla nekirajüliinjanain maʼaka waaʼin wayakana (Mat. 28:​19, 20).

17, 18. (1) ¿Jamüshii wekirajaainjanaka sünain tü pütchi kapüleekat suluʼu tü Wiwüliakat? (2) ¿Anasüche saaʼin pümüin wasüle yootshi süpülapünaa woʼunüin sünain tü outkajawaakat?

¹⁷ Eeshii nnojoliire wekirajaweein sünain tü Wiwüliakat. Nnojotpejeʼe nüpüleeruaain waaʼin Jeʼwaa süpüla wekirajaainjanain sünain. Choʼujaasü wekirajaainjanain sünain tü pütchi kapüleekat suluʼu tü Wiwüliakat süpüla wuleinjatüin wakuwaʼipa. Waaʼinrüinjatü tia, jaʼitainna jekenain waya sünain ekirajawaa sünain tü Wiwüliakat jee kakaliainnale waya.

¹⁸ Süpüla wuleinjatüin wakuwaʼipa noʼuluʼu Jeʼwaa, acheküshii wekirajaainjanain sünain tü pütchi kapüleekat suluʼu tü Wiwüliakat jee waaʼinrüin tü nuchuntakat Jeʼwaa wamüin. Jamüshijaʼa Nadab nümaa Abihú, nnojoishii oonooin nümaa Jeʼwaa süka naaʼinrüin wanee kasa nnojotka nuluwataain anain naya. Eeshiijaʼa süpüla puluwatüin naya suʼunnaa tia naaʼinrakat (Lev. 10:​1, 2). Jülüja waaʼin nünüiki Jeʼwaa nümüin Aarón süchikijee ouktüin naya nüchonniikana ( paashajeʼera Levítico 10:​8-​11). ¿Anasüche wasüle yootshi süpülapünaa woʼunüin sünain tü outkajawaakat? Wayakana aʼyataakana nümüin Jeʼwaa, nnojotsü waaʼinrüinjatüin tü sümakat tü Pütchi aapünakat nümüin Moisés (Roma 10:4). Suluʼu waneeirua mma, eeshii wawalayuu asakana yootshi suʼunnaa nekaain. Naaʼinrüin tia süpülapünaa noʼunüin sünain tü outkajawaakat. Nnojotpejeʼe alanaʼaleein natuma tü nasüinkat. Akaʼaya suʼunnaa tü Pascuakat, eʼitaanapuʼusü pienchisü iita kaluʼukat wiino, nasapuʼuin shia na ekaashiikana soʼu tia. «Anakaja müleka jüsüle jüpüshua waneʼewai jukua süpüshi tü asüüshikat», müsü nünüiki Jesuu namüin na nikirajüinkana. Nüküjüin tia namüin suʼunnaa nukumajüin sukuwaʼipa tü Outkajawaakat eere Sotuin Waaʼin Ouktüin nia saaʼu waainjala. Tia wiinokot shiyaawaseyaasü tü nüsha amülainjatkat (Mat. 26:27). Saashin tü Wiwüliakat, tü nnojotkat anain nümüin Jeʼwaa shia nipeʼrüle wanee wayuu sutuma sülanaʼaleein nüsüin (1 Cor. 6:​10; 1 Tim. 3:8). Eepejeʼe wawalayuu nnojoliikana asüin süpülapünaa naaʼinrüin wanee aʼyatawaa nümüin Jeʼwaa. Süpüla wuleinjatüin wakuwaʼipa noʼuluʼu Jeʼwaa sünain süpüshuaʼa tü kasa waaʼinrakat, acheküsü wayaawatüin saaʼu kasain anain jee kasain mojuin nümüin. Süka jamüin, nnojoluin wanaawain sukuwaʼipa wayuu suluʼu waneeirua mma.

19. (1) ¿Kasa saapaka wamüin tü nupueulosekat Jeʼwaa süpüla watüjüin maʼin sünainjee wekirajaain sümaa wapüshi jee wamüiwaʼa? (2) ¿Kasa waaʼinrajatka süpüla wuleinjatüin wakuwaʼipa noʼuluʼu Jeʼwaa?

¹⁹ Watta saalin kasa anashaatasü suluʼu tü Wiwüliakat, watüjaajeerü aaʼu kasain wayuu shia müleka wekirajaale sünain. Süpüla watüjüinjanain maʼin sünainjee wekirajaain soʼu tü Ai Waʼwaajakalü oʼu Maleiwa sümaa Wapüshi jee shiale wekirajaain wamüiwaʼa, wainma tü kasa saapakat wamüin tü nupueulosekat Jeʼwaa. Anasü müleka wekirajaale sünain tü saapakat wamüin tü nupueulosekat Jeʼwaa. Ekirajaweeshii waya sooʼomüin süchiki nukuwaʼipa Jeʼwaa jee müsia süchiki tü kasa naaʼinrajatkat. Waaʼinrüle tia, arütkaajeena waya nünainmüin (Sant. 4:8). Wachunta kaaliinwaa nümüin Jeʼwaa maʼaka naaʼin chi salmistakai wanaa sümaa nümüin: «Pükaaliinja taya süpüla tayaawatüinjatüin saaʼu süpüshuaʼa tü puluwataakalü anain» (Sal. 119:​18, TNM). Anakajaʼa woonoole waneepia nümaa Jeʼwaa jee waküja süchiki tü pütchi anasükat (1 Ped. 1:​15, TNM; Roma 15:​16, TNM). Süka mojuin maʼin tü mmapaʼakat maaʼulu yaa, anakajaʼa wulere wakuwaʼipa sünain süpüshuaʼa tü kasa waaʼinrakat. Otta müsia waʼyataa nümüin Jeʼwaa chi Aluwataakai waaʼu.