Nnojotsü naapüin Maleiwa nanüiki napüshuaʼa na wayuukana. Wekirajaa sünain piamasü kasa nnojotka naapüin aaʼujee Maleiwa.

1. Suchuntunule wanee kasa nnojotka wanaapünaain sümaa tü nüchekakat Maleiwa

 Nnojotsü naapüin Maleiwa sünüiki wayuu achuntaka wanee kasa nnojotka wanaapünaain sümaa tü nümakat wamüin suluʼu tü Bibliakat (1 Juan 5:14, 15). Saashin tü Bibliakat, mojusü kachiiruale naaʼin wanee wayuu washirüü otta nüshaittüle saaʼu nneerü (1 Corinto 6:9, 10). Nnojotsü naapüin Maleiwa nanüiki na achuntakana shiiʼiree nakanajüin lotería. «Wainmeerü nneerü takanajeetka nutuma Maleiwa», nnojotsü süpüla müinjatüin sünüiki wayuu. ¡Anataʼaleeshijaʼa Maleiwa niyoutaka sünüiki wayuu eekai suchuntuin wanee kasa eekai mojuin! (Santiago 4:3).

2. Macheʼere wayuu süchiirua aaʼinraa tü kasa mojukat noʼuluʼu Maleiwa

 Nnojotsü naapüin Maleiwa nanüiki na wayuu macheʼekana süchiirua aaʼinraa kasa mojusü. Müsü nünüiki namüin na macheʼekana süchiirua aaʼinraa kasa mojusü: «Jaʼitainna achuntuin maʼin jia tamüin, nnojoleerü taapüin jünüiki sükajee juʼutuliin saaʼin wayuu» (Isaías 1:15). Jamüshiijaʼa nayaawajaale suulia naainjala otta nachuntule nümüin Maleiwa süpüla motuinjatüin naaʼin naainjala, naapüinje Maleiwa nanüiki (Isaías 1:18).