Dodinnanu de dohia dọ, to Amelika jọja aflanmẹ 80 to kanweko ji wẹ nọ hodẹ̀, amọ́ mado-awe poun sọha yewu he nọ hodẹ̀ lẹ tọn wẹ nọ wàmọ egbesọegbesọ. Matin ayihaawe, mẹdelẹ to yé mẹ nọ kanse dọ: ‘Be dẹ̀hiho nọ gọalọnamẹ nado vò sọn ayiha mẹ poun wẹ ya, kavi e sọ nọ wà humọ?’

•  Etẹwẹ dẹ̀hiho yin?

•  Be Jiwheyẹwhe nọ sè ya?

•  Etẹ go wẹ n’gán hodẹ̀ gando?

•  Nuhe ogbẹ́ towe lẹ nọ dọ

 Dẹ̀hiho yin hodọdopọ nujọnu tọn de hẹ Didatọ nulẹpo tọn. Yí nukun homẹ tọn do pọ́n nuhe enẹ zẹẹmẹdo! Jehovah yiaga hugan gbẹtọvi lẹ to aliho lẹpo mẹ, etomọṣo, “ewọ ma dẹn do dopodopo mítọn.” (Owalọ lẹ 17:27) Na nugbo tọn, Biblu bẹ oylọ-basinamẹ he fọnjlodotenamẹ ehe hẹn dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.”—Jakọbu 4:8.

 Nawẹ a gán dọnsẹpọ Jiwheyẹwhe gbọn?

•   Aliho dopo wẹ dẹ̀hiho—ehe gblamẹ a sọgan dọhona Jiwheyẹwhe gbọn.

•   Aliho devo wẹ Biblu pinplọn—ehe gblamẹ Jiwheyẹwhe sọgan dọhona we gbọn.

 Hodọdopọ adà awenọ ehe—yèdọ dẹ̀hiho po Biblu pinplọn po—na gọalọna we nado wleawuna haṣinṣan he lodo de hẹ Jiwheyẹwhe.

 “Hodidọ na Jehovah—enẹ wẹ hodọdopọ hẹ Gigogán lọ—yin dopo to lẹblanulọkẹyi daho hugan he gbẹtọvi sọgan tindo lẹ mẹ.”—Jeremy.

 “Numọtolanmẹ sisosiso ṣie lẹ didọna Jehovah to odẹ̀ mẹ zọ́n bọ n’nọ mọdọ n’dọnsẹpọ ẹ.”—Miranda.

 Eyin a tlẹ tindo yise to Jiwheyẹwhe mẹ—podọ eyin a tlẹ nọ hodẹ̀ hlan ẹn—e sọgan vẹawu nado kẹalọyi dọ ewọ nọ sè nugbonugbo. Etomọṣo, Biblu ylọ Jehovah dọ “Sisètọ odẹ̀ tọn.” (Salmu lẹ 65:2) Biblu tlẹ sọ basi oylọna we nado ‘to magbọjẹ towe lẹpo bẹ dlan ewọ ji.’ Etẹwutu? ‘Na e to towe hòpọn wutu.’—1 Pita 5:7.

 Lẹnnupọndo ehe ji: Be a nọ yí whenu zan nado dọhona họntọn vivẹ́ towe lẹ whẹwhẹ ya? A gán wà nudopolọ hẹ Jiwheyẹwhe. Nọ lẹhlan ewọ whẹwhẹ to odẹ̀ mẹ, podọ nọ yí yinkọ etọn Jehovah zan dile a to mọwà. (Salmu lẹ 86:5-7; 88:9) Na nugbo tọn, Biblu na tuli we nado “nọ hodẹ̀ to whepoponu.”—1 Tẹsalonikanu lẹ 5:17.

 “Dẹ̀hiho yin hodọdopọ de to yẹn po Otọ́ olọn mẹ tọn ṣie po ṣẹnṣẹn, ehe whenu n’nọ dọ nuhe to ahun ji na mi lẹpo na ẹn te.”—Moises.

 “N’nọ dọhona Jehovah gando nuhe nọ duahunmẹna mi sisosiso lẹ go, kẹdẹdile n’na ko dọna onọ̀ ṣie kavi họntọn vivẹ́ taun de do.”—Karen.

 Biblu dọmọ: “To nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe.”—Filipinu lẹ 4:6.

 Be ehe dohia dọ a vò nado hodẹ̀ gando nuhahun towe lẹ go wẹ ya? Gbau! Na nugbo tọn, Biblu dọmọ: “Ze agbàn pinpẹn towe dlan Jehovah ji, ewọ nasọ penukundo gowe.”—Salmu lẹ 55:22.

 Etomọṣo, to whenue a to dẹ̀ho hlan Jiwheyẹwhe, a dona nọ dọho gando nudevo lẹ go kakati ni yin nuhahun towe lẹ kẹdẹ. Jọja yọnnu de he nọ yin Chantelle dọ dọ, “Họntọnjiji ṣie hẹ Jehovah na pò pẹẹde nido pé eyin alọgọ poun ján n’nọ biọ sọn e dè. N’lẹndọ pẹdido wẹ dona nọ jẹnukọn, nuhe go n’na dopẹ́ gando lẹ wẹ dona nọ sù hugan.”

 Lẹnnupọndo ehe ji: Etẹlẹ go wẹ a nọ dopẹ́ gando to gbẹzan towe mẹ? Be a gán lẹnnupọndo onú atọ̀n delẹ ji he go a na dopẹna Jehovah gando to egbé ya?

 “Etlẹ yin onú tata de, taidi vounvoun whanpẹnọ de biblẹ pọ́n, sọgan whàn mí nado dopẹna Jehovah.”—Anita.

 “Nọ lẹnayihamẹpọn do nudida he nọ fọnjlodotena we kavi do wefọ Biblu tọn he nọ whàn we de ji, enẹgodo nọ dopẹna Jehovah gandego.”—Brian.