bible mein batayi gayi aurton se hum kya seekh sakte hain?

chalayen

bible ka javab

bible mein aisi kai aurton ke baare mein likha hai jinse hamein zindagi ke liye achhi seekh milti hai. (romiyon 15:4; 2 timuthiyus 3:16, 17) is lekh mein unmein se kuch aurton ke baare mein bataya gaya hai. inmein se zyadatar aurton se hum achhi baatein seekh sakte hain. aur kuch aurton se hamein sabak milta hai ki hamein kya nahin karna chahiye.—1 kurinthiyon 10:11; ibraniyon 6:12.

abeegail

abeegail kaun thi? abeegail naabal naam ke ek aadmi ki patni thi. naabal bahot ameer tha aur bada hi kathor insan tha. magar abeegail ek namra aurat thi aur badi akalmand thi. woh bahot khoobsoorat thi aur usmein kai achhe gun the isliye woh andar se bhi khoobsoorat thi.—1 shamooel 25:3.

usne kya kiya? abeegail ne apne parivar ko ek badi museebat se bachane ke liye akalmandi se kaam liya. woh apne pati naabal ke saath jis ilake mein rehti thi vahin par daavid chhipne ke liye aaya tha. daavid aage chalkar israel desh ka raja bannevala tha. woh ek bhagode ki tarah us ilake mein bhatak raha tha. usi dauran daavid aur uske aadmiyon ne naabal ki bhedon ko luteron se bachaya tha. magar ek din jab daavid ne naabal se khaana maangne ke liye uske paas kuch aadmi bheje, to naabal ne unki beizzati ki aur keh diya ki woh khaana nahin dega. tab daavid ko itna gussa aaya ki usne soch liya ki woh naabal aur uske gharane ke sabhi aadmiyon ko maar daalega. isliye woh un sabko maar daalne ke liye apne aadmiyon ke saath nikal pada.—1 shamooel 25:10-12, 22.

jab abeegail ko pata chala ki naabal ne kya kiya, to usne apne pati ko aur poore gharane ko bachane ke liye turant kadam uthaya. usne apne sevkon ke haath daavid aur uske aadmiyon ke liye bahot saara khaana bheja. aur unke peechhe-peechhe woh khud bhi gayi taaki woh daavid se binti kare ki woh naabal aur uske gharane par daya kare aur unhein chhod de. (1 shamooel 25:14-19, 24-31) abeegail ne daavid se milne par use ek achhi salah bhi di. jab daavid ne dekha ki abeegail ne uske liye aur uske aadmiyon ke liye kitna kuch bheja hai, woh kitni namra hai aur usne kitni achhi salah di hai, to woh samajh gaya ki yah sab parmeshvar ki taraf se hai. woh jaan gaya ki parmeshvar ne abeegail ko bhejkar use paap karne se bachaya hai. (1 shamooel 25:32, 33) is ghatna ke kuch samay baad naabal ki maut ho gayi. fir daavid ne abeegail ko apni patni bana liya.—1 shamooel 25:37-41.

abeegail se hum kya seekhte hain? abeegail bahot ameer thi aur bahot sundar thi, fir bhi woh ghamandi nahin thi. haalaanki galti uski nahin thi, fir bhi usne maafi maangi. naabal ki vajah se aisi museebat khadi ho gayi thi jiska saamna karna aasan nahin tha. aise mein koi bhi tanav mein aa sakta hai. magar abeegail ne shaant man se sabkuch sambhala. usne hoshiyari aur himmat se kaam liya.

▸ abeegail ke baare mein zyada jaanne ke liye yah lekh padhiye: “usne samajh-boojh se kaam liya.”

izebel

izebel kaun thi? woh israel ke raja ahab ki patni thi. woh israeli nahin thi aur yahova ki upasna nahin karti thi. woh kanaan desh ke devta baal ki pooja karti thi.

usne kya kiya? raani izebel sab par raub jamati thi. woh bereham aur khoonkhar thi. usne baal ki upasna ko aur usmein honevale anaitik kaamon ko badhava diya. saath hi usne logon ko sachche parmeshvar yahova ki upasna karne se rokne ki koshish ki.—1 raja 18:4, 13; 19:1-3.

izebel jo chahti use karne ke liye woh jhooth bolti thi aur logon ko marva deti thi. (1 raja 21:8-16) aakhir mein woh ek buri maut mari aur use dafnaya bhi nahin gaya. parmeshvar ne pehle hi bataya tha ki uske saath aisa hoga.—1 raja 21:23; 2 raja 9:10, 32-37.

izebel se hamein kya sabak milta hai? izebel ek buri aurat thi aur usse hamein sabak lena chahiye. woh badchalan thi aur woh jo chahe use paane ke liye kisi bhi had tak gir sakti thi. woh itni badnam thi ki aisi har aurat ko izebel kaha jaane laga jo uski tarah besharm aur badchalan hoti aur bedhadak hokar jo chahe woh karti.

ester

ester kaun thi? woh ek yahoodi thi aur use faarsi raja ahash-verosh ne apni raani banaya tha.

usne kya kiya? usne apne yahoodi logon ko mitne se bachane ke liye kadam uthaya. raja ahash-verosh ke darbar ke sabse khaas mantri haaman ne ek aadesh jaari karvaya tha ki falan din faarsi saamrajya mein rehnevale sabhi yahoodiyon ko maar daala jaaye. (ester 3:13-15; 4:1, 5) jab ester ko yah baat pata chali, to usne apne bhaai mordakai ki madad se raja ahash-verosh ko bata diya ki dusht haaman ne yahoodiyon ko maar daalne ke liye ek chaal chali hai. ester ne ahash-verosh ko yah baat batane ke liye apni jaan khatre mein daal di. (ester 4:10-16; 7:1-10) tab ahash-verosh ne ester aur mordakai se ek aur aadesh jaari karvaya ki yahoodi apni jaan bachane ke liye kadam uthayen. fir yahoodiyon ne apne dushmanon ko poori tarah hara diya.—ester 8:5-11; 9:16, 17.

ester se hum kya seekhte hain? raani ester bahot namra thi aur usne himmat se kaam liya. usne ghamand nahin kiya ki woh bahot sundar hai aur ek raani hai. (bhajan 31:24; filippiyon 2:3) iske bajay, usne mordakai se salah aur madad maangi. usne apne pati se soch-samajhkar aur aadar se baat ki. par usne himmat karke woh baat keh di jo woh kehna chahti thi. jab sabhi yahoodiyon ki jaan khatre mein thi, tab usne himmat se bataya ki woh bhi ek yahoodi hai.

▸ ester ke baare mein zyada jaanne ke liye ye lekh padhiye: “usne apne logon ko bachane ke liye kadam uthaya” aur “usne himmat aur buddhi se kaam liya.”

dabora

dabora kaun thi? woh ek bhavishyavaktin thi. israel ka parmeshvar yahova use apni marzee ke baare mein batata tha aur woh ye baatein logon ko batati thi. parmeshvar ne use logon ke maamle suljhane ki zimmedari bhi di thi.—nyayiyon 4:4, 5.

usne kya kiya? dabora ne himmat se parmeshvar ke logon ka saath diya. parmeshvar ki aagya maankar dabora ne baarak se kaha ki woh israel ki sena lekar kanani logon se yuddh kare, kyonki kanani log israeliyon par zulm karte the. (nyayiyon 4:6, 7) jab baarak ne dabora se kaha ki woh bhi uske saath chale to usne darkar naa nahin keh diya balki woh uske saath gayi.—nyayiyon 4:8, 9.

parmeshvar ne israeliyon ko bahot badi jeet dilayi. is jeet ki khushi mein dabora aur baarak ne ek gaana gaaya. gaane ke kuch bol dabora ne rache the. is gaane mein usne yaael aur doosri aurton ka zikra kiya jinhonne kananiyon ko harane mein saath diya tha.—nyayiyon, adhyay 5.

dabora se hum kya seekhte hain? dabora ne apni jaan ki parvah nahin ki aur himmat se kaam liya. usne doosron ki bhi himmat bandhayi ki woh vahi karein jo yahova ki nazar mein sahi hai. aur jab logon ne aisa kiya to usne dil kholkar unki taareef ki.

▸ dabora ke baare mein zyada jaanne ke liye ye lekh padhiye: ‘israel mein maa bankar mainne unhein sambhala.’

daleela

daleela kaun thi? daleela hi woh aurat thi jisse israel ke nyayi shimshon ko pyar ho gaya tha.—nyayiyon 16:4, 5.

usne kya kiya? usne shimshon ko dhokha diya. yahova shimshon ke zariye israeliyon ko palishtiyon se chhudata tha. palishti shimshon ko pakad nahin paa rahe the, kyonki parmeshvar ne shimshon ko aisi taakat di thi jo aam taur par insanon mein nahin hoti. isliye palishtiyon ke bade aadmiyon ne daleela se kaha ki agar woh shimshon ko unke haath pakadva degi to woh use paisa deinge. aur daleela maan gayi.—nyayiyon 13:5.

palishtiyon ne daleela se kaha ki woh pata lagaye ki shimshon ke paas itni taakat kahaan se aayi. daleela paison ke laalach mein aa gayi aur yah jaanne ke liye shimshon ke peechhe pad gayi. usne shimshon se pata laga hi liya ki uske paas itni taakat kahaan se aayi. (nyayiyon 16:15-17) fir usne jaakar yah baat palishtiyon ko bata di. tab palishtiyon ne aakar shimshon ko pakad liya aur use kaid mein daal diya.—nyayiyon 16:18-21.

daleela se hamein kya sabak milta hai? daleela bahot matlabee thi. usne paison ke laalach mein aakar parmeshvar ke sevak shimshon ko dhokha diya.

mariyam (maartha aur laazar ki behen)

mariyam kaun thi? woh maartha aur laazar ki behen thi. ye teenon yeeshu ke achhe dost the.

usne kya kiya? mariyam ko vishvas tha ki yeeshu parmeshvar ka beta hai aur uske dil mein yeeshu ke liye gehra aadar tha. usne kaha ki agar yeeshu hota, to uske bhaai laazar ki maut nahin hoti. jab yeeshu ne laazar ko zinda kiya, tab mariyam bhi vahaan thi. ek baar jab mariyam ghar ke kaam mein haath batane ke bajay yeeshu ki baatein sun rahi thi, to uski behen maartha ko yah theek nahin laga. lekin yeeshu ne mariyam ki taareef ki, kyonki mariyam ne doosri baaton se zyada parmeshvar ki baaton ko ahmiyat di.—luka 10:38-42.

ek baar mariyam ne yeeshu ki khaatirdari mein bahot saara paisa kharch kiya. woh ek ‘khushboodar tel ki botal laayi jo bahot mehanga tha’ aur usne poori botal yeeshu ke sir aur pairon par undel di. (matti 26:6, 7) tab kuch logon ne kaha ki mariyam ne bekar mein paise barbad kar diye. magar yeeshu ne kaha ki mariyam ne sahi kiya hai. usne yah bhi kaha, “saari duniya mein jahaan kahin [parmeshvar ke raaj ki] khushkhabri ka prachar kiya jaayega, vahaan is aurat ki yaad mein iske kaam ki charcha ki jaayegi.”—matti 24:14; 26:8-13.

mariyam se hum kya seekhte hain? uska vishvas bahot mazboot tha. usne parmeshvar ki upasna ko ahmiyat di, na ki un baaton ko jo itni zaroori nahin hain. usne yeeshu ka samman karne ke liye bahot saara paisa kharch kiya.

mariyam (yeeshu ki maa)

mariyam kaun thi? woh ek javan yahoodi ladki thi. shaadi se pehle woh parmeshvar ke chamatkar se garbhvati hui aur usne parmeshvar ke bete yeeshu ko janm diya.

usne kya kiya? usne namrata se parmeshvar ki baat maani. ek swargdoot ne use bataya ki woh garbhvati hogi aur maseeha ko janm degi. tab tak mariyam ki shaadi nahin hui thi aur yoosuf se sagai ho chuki thi. (luka 1:26-33) fir bhi usne kaha ki jaisa parmeshvar chahta hai vaisa ho. yeeshu ke paida hone ke baad mariyam aur yoosuf ke aur bhi bete-betiyaan huin. bible mein unke chaar beton aur do betiyon ka zikra milta hai. isse pata chalta hai ki mariyam saari zindagi kunvari nahin thi. (matti 13:55, 56) haalaanki use yeeshu ko janm dene ki anokhi aasheesh mili thi, fir bhi usne kabhi logon se khaas samman paane ki koshish nahin ki. aur logon ne bhi use aisa samman nahin diya. jab yeeshu dharti par tha aur jab baad mein maseehi mandli bani, tab bhi mariyam ne sabmein khaas dikhne ki koshish nahin ki.

mariyam se hum kya seekhte hain? mariyam hamesha parmeshvar ki baat maanti thi. isliye jab parmeshvar ne use yeeshu ki maa banne ki badi zimmedari di, to usne haan kaha. woh shastra mein likhi baatein bahot achhe se jaanti thi. luka 1:46-55 mein mariyam ke kahe kuch shabd likhe huye hain. un aayton mein usne kam-se-kam 20 baar shastra mein likhi baatein kahin.

▸ mariyam ke baare mein zyada jaanne ke liye yah lekh padhiye: “hum mariyam se kya seekhte hain?”

mariyam magdaleeni

mariyam magdaleeni kaun thi? woh yeeshu ki ek shishya thi. usne hamesha yeeshu ka saath diya.

usne kya kiya? mariyam magdaleeni un aurton mein se ek thi jo yeeshu aur uske chelon ke saath door-door safar karte the. usne yeeshu aur uske chelon ki khaane-pehanne ki zarooratein poori karne ke liye khoob saara paisa kharch kiya. (luka 8:1-3) yeeshu ne dharti par jitne samay seva ki, utne samay mariyam ne yeeshu ka saath diya. jab yeeshu ko maar daala gaya, tab bhi woh paas mein thi. yeeshu apni maut ke baad jab zinda hua, to kuch logon ko sabse pehle yeeshu ko dekhne ka mauka mila tha. unmein mariyam magdaleeni bhi ek thi.—yuhanna 20:11-18.

mariyam magdaleeni se hum kya seekhte hain? usne yeeshu ke liye dil kholkar paisa kharch kiya taaki yeeshu achhe se seva kar sake. usne hamesha yeeshu ka saath diya.

maartha

maartha kaun thi? woh laazar aur mariyam ki behen thi. woh teenon yarooshalem ke paas baitniyah gaanv mein rehte the.

usne kya kiya? maartha, uski behen mariyam aur uska bhaai laazar yeeshu ke achhe dost the. yeeshu un teenon se bahot pyar karta tha. (yuhanna 11:5) maartha mehmanon ka achha khyal rakhti thi. ek baar jab yeeshu unke ghar aaya, to maartha yeeshu ke khaane ke liye bahot saari cheezen banane mein lag gayi. lekin mariyam yeeshu ke paas baithkar uski baatein sunne lagi. maartha ne yeeshu se shikayat ki ki mariyam uski madad nahin kar rahi hai. tab yeeshu ne maartha ko pyar se samjhaya ki mariyam jo kar rahi hai woh sahi hai.—luka 10:38-42.

jab laazar beemar ho gaya, to maartha aur uski behen ne yeeshu ko bulane ke liye kisi ko bheja. unhein poora vishvas tha ki yeeshu laazar ko theek kar sakta hai. (yuhanna 11:3, 21) jab laazar ki maut ho gayi, to maartha ko vishvas tha ki bhavishya mein ek din uska bhaai zaroor zinda hoga. use yah bhi vishvas tha ki yeeshu ke paas usi vakt laazar ko zinda karne ki taakat hai.—yuhanna 11:20-27.

maartha se hum kya seekhte hain? woh mehmanon ki achhi dekhbhal karti thi. ek baar jab yeeshu ne use samjhaya ki woh jo soch rahi hai woh galat hai, to usne apni galti maani. woh apne dil ki baat khulkar batati thi aur woh jo vishvas karti thi woh bhi khulkar batati thi.

▸ maartha ke baare mein zyada jaanne ke liye yah lekh padhiye: “mujhe yakeen hai.”

miryam

miryam kaun thi? woh moosa aur haaroon ki behen thi. miryam woh pehli aurat hai jise bible mein bhavishyavaktin kaha gaya hai.

usne kya kiya? ek bhavishyavaktin hone ki vajah se woh parmeshvar ka sandesh logon ko batati thi. israeli uski bahot izzat karte the. laal saagar mein misra ki sena ke naash ke baad jab israeli aadmi jeet ki khushi mein geet gaane lage, to miryam ne bhi unke saath gaaya.—nirgaman 15:1, 20, 21.

kuch samay baad miryam aur haaroon ne moosa ke baare mein bura-bhala kaha. shaayad unmein ghamand aa gaya tha aur woh jalan se bhar gaye the. unhonne moosa ke khilaf jo bhi baatein kin, woh ‘sab yahova sun raha tha.’ (ginti 12:1-9) usne miryam aur haaroon ko kade shabdon mein fatkara. fir yahova ne miryam ko kodh se peedit kar diya, kyonki shaayad miryam ne hi pehle moosa ke baare mein galat baatein ki thi. moosa ne yahova se binti kee ki woh miryam ko theek kar de. tab parmeshvar ne use theek kar diya. kodh ki vajah se miryam ko saat din tak israeliyon ki chhaavni se door alag rehna pada. fir iske baad use chhaavni mein aane diya gaya.—ginti 12:10-15.

jab parmeshvar ne miryam ko saza di, to usne apni galti maan li. yah hum isliye keh sakte hain kyonki sadiyon baad parmeshvar ne miryam ke baare mein ek achhi baat kahi. usne israeliyon ko yaad dilaya ki miryam ko ek anokhi zimmedari mili thi. yahova ne kaha, ‘mainne moosa, haaroon aur miryam ko tumhare aage-aage bheja.’—mika 6:4.

miryam se hamein kya sabak milta hai? miryam ki kahani se hum seekhte hain ki jab parmeshvar ke log aapas mein baatein karte hain ya ek-doosre ke baare mein baat karte hain, to parmeshvar dhyan se sunta hai. hamein yah sabak bhi milta hai ki hamein ghamand nahin karna chahiye aur kisi se jalna nahin chahiye, varna hum doosron ka naam kharab kar sakte hain.

yaael

yaael kaun thi? woh heber naam ke ek aadmi ki patni thi. heber israeli nahin tha. yaael ne parmeshvar ke logon ki madad karne ke liye himmat se kaam liya.

usne kya kiya? jab kanani logon ka senapati seesra israeliyon se yuddh haar gaya aur chhipne ke liye yaael ke tamboo ke paas aaya, to yaael ne fauran samajhdari se kaam liya. usne seesra ko apne tamboo mein aakar aaram karne diya. jab woh so raha tha, to yaael ne use maar daala.—nyayiyon 4:17-21.

yaael ne jo kiya usse dabora ki bhavishyavani poori hui ki “yahova ek aurat ke haathon seesra ko marvayega.” (nyayiyon 4:9) yaael ki taareef mein kaha gaya ki woh “sab aurton mein dhanya hai.”—nyayiyon 5:24.

yaael se hum kya seekhte hain? yaael ne khud aage badhkar kadam uthaya aur himmat se kaam liya. uski kahani se pata chalta hai ki yahova apni bhavishyavani kisi bhi tarah poori karva sakta hai.

raahab

raahab kaun thi? woh ek veshya thi jo kanani logon ke shahar yareeho mein rehti thi. baad mein woh jhoothi upasna chhodkar yahova ki upasna karne lagi.

usne kya kiya? usne un do israeli jaasooson ko chhipa diya jo kanaan desh ki jaasoosi karne aaye the. usne jaasooson ki madad isliye ki kyonki usne suna tha ki yahova ne kaise israeliyon ko misra se chhudaya tha aur baad mein kaise emori logon se bachaya tha.

raahab ne jaasooson ki madad karne ke baad unse binti kee ki jab woh yareeho ka naash karne aayenge, to woh use aur uske parivar ko chhod dein. jaasoos maan gaye, magar unhonne raahel ke saamne kuch shartein rakhin. raahel kisi ko na bataye ki woh jaasoosi karne aaye the, jab israeli yareeho par hamla karne aayenge, to raahab aur uska parivar ghar ke andar hi rahein aur raahab apne ghar ki khidki se ek laal rassi baahar latkaye taaki israeli us ghar ko pehchan sakein. raahab ne jaasooson ki har baat maani, isliye woh aur uska parivar yareeho ke naash se bach gaye.

baad mein raahel ne ek israeli aadmi se shaadi ki. woh raja daavid aur yeeshu maseeh ki purkhin bani.—yahoshoo 2:1-24; 6:25; matti 1:5, 6, 16.

raahab se hum kya seekhte hain? bible mein raahab ko vishvas ki ek behtareen misal bataya gaya hai. (ibraniyon 11:30, 31; yakub 2:25) uski kahani se pata chalta hai ki jo log galat raasta chhod dete hain, unhein yahova maaf karta hai aur kisi ke saath bhedbhav nahin karta. ek insan chahe kisi bhi desh ya bhasha ka ho, agar woh yahova par bharosa rakhe to yahova use aasheesh deta hai.

▸ raahab ke baare mein zyada jaanne ke liye yah lekh padhiye: “woh apne kaamon ki vajah se nek maani gayi.”

raahel

raahel kaun thi? raahel laaban ki beti aur yakub ki patni thi. yakub apni donon patniyon mein raahel se zyada pyar karta tha.

usne kya kiya? yakub se uske do bete huye. ye donon bete israel ke 12 gotron mein se do gotron ke mukhiya bane. raahel yakub se pehli baar tab mili jab woh apne pita ki bhedein chara rahi thi. (utpatti 29:9, 10) woh apni badi behen lia se zyada ‘khoobsoorat thi aur uska rang-roop dekhte hi banta tha.’—utpatti 29:17.

yakub ko raahel se pyar ho gaya tha aur woh raahel se shaadi karne ke liye saat saal kaam karne ko raazee ho gaya. (utpatti 29:18) lekin laaban ne yakub ko dhokha diya aur uski shaadi apni badi beti lia se kara di. baad mein laaban ne raahel se bhi uski shaadi karvayi.—utpatti 29:25-27.

yakub raahel aur uske donon beton ko lia aur uske bachchon se zyada pyar karta tha. (utpatti 37:3; 44:20, 27-29) isliye raahel aur lia ke beech hamesha takrar hoti thi.—utpatti 29:30; 30:1, 15.

raahel se hum kya seekhte hain? raahel ke parivar mein hamesha koi-na-koi pareshani rehti thi. fir bhi usne ummeed nahin chhodi ki parmeshvar uski prarthna zaroor sunega. (utpatti 30:22-24) uski kahani se pata chalta hai ki jo ek-se-zyada shaadiyaan karte hain, unke parivar mein shaanti nahin rehti. parmeshvar ne aadam aur havva ke samay jo kaha tha use maanna hi akalmandi hai ki ek aadmi ki ek hi patni honi chahiye.—matti 19:4-6.

▸ raahel ke baare mein zyada jaanne ke liye yah lekh padhiye: “dukhi behenein jinse israel ka poora gharana nikla.”
▸ parmeshvar ne bahot pehle apne logon ko ek-se-zyada shaadiyaan kyon karne di, yah jaanne ke liye yah lekh padhiye: “kya parmeshvar ek-se-zyada shaadiyaan karne ki ijazat deta hai?”

ribka

ribka kaun thi? ribka ishak ki patni thi. unke do judvaan bete the esav aur yakub.

usne kya kiya? ribka ne hamesha vahi kiya jo parmeshvar ne usse chaha tha. jab aisa karna mushkil tha, tab bhi usne kiya. jab woh ek kuyen se paani bhar rahi thi, to ek aadmi ne usse peene ke liye thoda paani maanga. usne fauran us aadmi ko paani diya aur uske unton ko bhi paani pilaya. (utpatti 24:15-20) woh aadmi abraham ka ek sevak tha. woh ishak ke liye ladki dhoondhne kaafi door se aaya tha. (utpatti 24:2-4) us aadmi ne parmeshvar se madad ke liye prarthna bhi ki thi. jab usne dekha ki ribka kitni mehantee hai aur usne us aadmi ke saath kitna achha vyavhar kiya, to woh samajh gaya ki parmeshvar ne uski prarthna ka javab de diya hai. parmeshvar ne ek tarah se bata diya ki ribka ishak ke liye sahi rahegi.—utpatti 24:10-14, 21, 27.

jab ribka ko pata chala ki abraham ka sevak use ishak ke liye le jaana chahta hai, to woh maan gayi. woh us aadmi ke saath ishak ke paas chali gayi aur uski patni ban gayi. (utpatti 24:57-59) ribka ke do judvaan ladke huye. yahova ne ribka ko bataya ki uska bada beta esav chhote bete yakub ki seva karega. (utpatti 25:23) jab ishak pehlauthe ki aasheesh esav ko denevala tha, to ribka ne woh aasheesh yakub ko dilvane ke liye saare intazam kiye. woh jaanti thi ki parmeshvar ki yahi marzee hai ki aasheesh yakub ko mile.—utpatti 27:1-17.

ribka se hum kya seekhte hain? ribka apni had mein rehti thi aur bahot mehantee thi. woh mehmanon ke saath achha vyavhar karti thi. inhin gunon ki vajah se usne ek patni aur maa ki zimmedari achhe se nibhayi aur parmeshvar ki upasna sahi tarah se kar paayi.

▸ ribka ke baare mein zyada jaanne ke liye yah lekh padhiye: “haan, main jaaungi.”

root

root kaun thi? root ek moabee aurat thi. usne yahova ki upasna karne ke liye apne devi-devtaon aur apne desh ko chhod diya aur israel aa gayi.

usne kya kiya? woh apni saas naaomi se bahot pyar karti thi aur usne naaomi ke liye bahot tyag kiya. bahot pehle jab ek baar israel desh mein khaane-peene ki cheezen nahin mil rahi thi, to naaomi apne pati aur donon beton ke saath moab chali gayi thi. vahaan uske beton ne root aur orpa naam ki moabee aurton se shaadi kar li. lekin kuch samay baad naaomi ka pati aur uske donon bete mar gaye. naaomi, root aur orpa, teenon vidhva ho gayin.

fir naaomi ne faisla kiya ki woh israel desh laut jaayegi, kyonki ab vahaan khaane-peene ki cheezen mil rahi thi. root aur orpa bhi uske saath jaana chahti thi. magar naaomi ne unse kaha ki woh uske saath na aayen aur apne rishtedaron ke yahaan laut jaayen. tab orpa laut gayi. (root 1:1-6, 15) lekin root ne naaomi ka saath nahin chhoda. woh apni saas se bahot pyar karti thi aur uske parmeshvar yahova ki upasna karna chahti thi.—root 1:16, 17; 2:11.

root apni saas naaomi ke saath uske nagar betlehem chali gayi. vahaan kuch hi samay ke andar root ne achha naam kamaya, kyonki woh kaafi mehantee thi aur apni saas ki achhi dekhbhal karti thi. boaz naam ke ek zamindar ko root ka swabhav bahot achha laga aur usne root aur naaomi ke liye khoob saara anaj diya. (root 2:5-7, 20) baad mein boaz ne root se shaadi ki aur root raja daavid aur yeeshu maseeh ki purkhin bani.—matti 1:5, 6, 16.

root se hum kya seekhte hain? root naaomi aur yahova se itna pyar karti thi ki usne apna desh aur apne rishtedaron ko chhod diya. woh bahot mehantee thi aur use yahova se bahot lagav tha. usne mushkilon mein bhi naaomi ka saath nahin chhoda.

▸ root ke baare mein zyada jaanne ke liye ye lekh padhiye: “jahaan tu jaayegi, vahaan main bhi jaaungi” aur “ek nek aurat.”

lia

lia kaun thi? lia kulpita yakub ki pehli patni thi. uski chhoti behen raahel yakub ki doosri patni thi.—utpatti 29:20-29.

usne kya kiya? lia se yakub ke chhe: bete huye. (root 4:11) yakub asal mein raahel se shaadi karna chahta tha, lia se nahin. lia aur raahel ke pita laaban ne yakub ko dhokha diya aur uski shaadi lia se karva di. jab yakub ne laaban se poochha ki usne aisa kyon kiya, to laaban ne kaha ki unke yahaan dastoor hai ki chhoti se pehle badi beti ki shaadi karani hoti hai. ek hafte baad yakub ne raahel se bhi shaadi ki.—utpatti 29:26-28.

yakub lia se zyada raahel se pyar karta tha. (utpatti 29:30) isliye lia raahel se jalti thi aur koshish karti thi ki yakub raahel se zyada usse pyar kare. jab yahova ne dekha ki lia par kya beet rahi hai, to usne lia ko saat aur bachche paida karne ki aasheesh di. uske ek beti aur chhe: bete huye.—utpatti 29:31.

lia se hum kya seekhte hain? lia ke parivar mein bahot-si pareshaniyaan thi. fir bhi usne parmeshvar par bharosa rakha aur prarthna karke usse madad maangi. (utpatti 29:32-35; 30:20) lia ki kahani se saaf pata chalta hai ki ek-se-zyada shaadi karne se ghar mein shaanti nahin rahegi. parmeshvar ne kuch samay ke liye apne sevkon ko ek-se-zyada shaadi karne ki ijazat di thi, magar shuroo se uska niyam tha ki ek aadmi ki ek hi patni ho.—matti 19:4-6.

▸ lia ke baare mein zyada jaanne ke liye yah lekh padhiye: “dukhi behenein jinse israel ka poora gharana nikla.”
▸ parmeshvar ne bahot pehle apne logon ko ek-se-zyada shaadiyaan kyon karne di, yah jaanne ke liye yah lekh padhiye: “kya parmeshvar ek-se-zyada shaadiyaan karne ki ijazat deta hai?”

loot ki patni

loot ki patni kaun thi? bible mein uska naam nahin likha hai. magar yah likha hai ki uski do betiyaan thi. uska parivar sadom shahar mein rehta tha aur vahaan unka ek ghar tha.—utpatti 19:1, 15.

usne kya kiya? usne parmeshvar ki baat nahin maani. parmeshvar ne kaha tha ki woh sadom aur aas-paas ke shahron ka naash kar dega, kyonki vahaan ke log bahot gande kaam karte the. magar loot ek nek insan tha. yahova usse aur uske parivar se pyar karta tha. isliye yahova ne unhein sadom ke naash se bachane ke liye unke paas do swargdooton ko bheja.—utpatti 18:20; 19:1, 12, 13.

swargdooton ne loot aur uske parivar se kaha ki woh sadom aur aas-paas ka ilaka chhodkar kahin door bhaag jaayen aur peechhe mudkar na dekhein, nahin to mar jaayenge. (utpatti 19:17) magar loot ki patni “mudkar dekhne lagi isliye woh namak ka khambha ban gayi.”—utpatti 19:26

loot ki patni se hamein kya sabak milta hai? uski kahani se hum seekhte hain ki agar hum dhan-daulat se bahot pyar karein aur parmeshvar ki baat na maanein, to hamare saath bahot bura hoga. yeeshu ne bhi kaha tha ki hamein loot ki patni se sabak lena chahiye. usne kaha “loot ki patni ko yaad rakho.”—luka 17:32.

shoolemmin ladki

shoolemmin ladki kaun thi? woh kisi dehat mein rehnevali ek khoobsoorat ladki thi. bible ki shreshtgeet naam ki kitab mein usi ki kahani likhi hai. lekin yah nahin likha hai ki us ladki ka naam kya tha.

usne kya kiya? shoolemmin ladki ek charvahe se pyar karti thi aur woh uski vafadar rahi. (shreshtgeet 2:16) jab raja sulaiman ne dekha ki woh ladki bahot khoobsoorat hai, to usne use paane ki bahot koshish ki. (shreshtgeet 7:6) kuch logon ne shoolemmin ladki se bahot kaha ki woh bhi sulaiman se pyar kare. magar ladki ne inkar kar diya, iske baavjood ki sulaiman bahot ameer tha. woh us gareeb charvahe se hi pyar karti thi aur uski vafadar rahi.—shreshtgeet 3:5; 7:10; 8:6.

shoolemmin ladki se hum kya seekhte hain? woh bahot sundar thi aur sab log uski taareef karte the, fir bhi usne ghamand nahin kiya. woh logon ki baaton mein nahin aayi aur usne daulat paane aur mashhoor hone ka mauka thukra diya, kyonki woh apne charvahe ki vafadar rehna chahti thi. usne khud ko kaaboo mein rakha aur apne charitra par daag nahin lagne diya.

saara

saara kaun thi? saara abraham ki patni aur ishak ki maa thi.

usne kya kiya? saara oor naam ke ek falte-foolte shahar mein rehti thi. vahaan use kisi cheez ki kami nahin thi. parmeshvar ne uske pati abraham se kaha tha ki woh oor chhodkar kanaan desh chale jaayen. parmeshvar ne vaada kiya ki woh unhein aasheesh dega aur unki santan se ek bada raashtra banayega. (utpatti 12:1-5) tab saara ne apne pati ke saath oor shahar chhod diya, kyonki use pakka vishvas tha ki parmeshvar apna vaada zaroor poora karega. us samay saara ki umra 60 se zyada thi. oor chhodne ke baad saara aur abraham jagah-jagah tambuon mein rehne lage.

jagah-jagah tambuon mein rehne ki vajah se saara ko kai khatron ka saamna karna pada tha. fir bhi woh apne pati ka saath deti rahi, taaki uska pati vahi kare jo parmeshvar ne kaha hai. (utpatti 12:10, 15) kai saal tak saara ka koi bachcha nahin hua, isliye woh bahot dukhi rehti thi. lekin parmeshvar ne bahot pehle vaada kiya tha ki abraham ki santan ko woh aasheesh dega. (utpatti 12:7; 13:15; 15:18; 16:1, 2, 15) fir kuch samay baad parmeshvar ne vaada kiya ki saara se abraham ka ek bachcha hoga. parmeshvar ne jaisa kaha tha vaisa hi hua. haalaanki saara ki bachche paida karne ki umra beet gayi thi, fir bhi usne ek bachche ko janm diya. us vakt woh 90 saal ki thi aur abraham 100 saal ka tha. (utpatti 17:17; 21:2-5) unhonne apne bachche ka naam ishak rakha.

saara se hum kya seekhte hain? saara se hum seekhte hain ki hum parmeshvar par bharosa rakh sakte hain ki woh apna har vaada poora karega. yahaan tak ki woh vaade bhi poora karega jo hamein naamumkin lag sakte hain. (ibraniyon 11:11) saara se hum yah bhi seekhte hain ki ek patni ko kyon apne pati ka aadar karna chahiye.—1 patras 3:5, 6.

▸ saara ke baare mein zyada jaanne ke liye ye lekh padhiye: ‘tu itni khoobsoorat hai’ aur “parmeshvar ne use ‘raaj-gharane ki aurat’ kaha.”

hanna

hanna kaun thi? woh elkana ki patni aur shamooel ki maa thi. shamooel israel desh ka ek jaana-maana bhavishyavakta bana.—1 shamooel 1:1, 2, 4-7.

hanna ne kya kiya? hanna ki shaadi ke kai saal tak uska koi bachcha nahin hua. uske pati elkana ki ek aur patni thi, paninna. paninna ke kai bachche the. woh hanna ko taane maarti thi. hanna bahot dukhi rehti thi, isliye usne parmeshvar se man ki shaanti ke liye prarthna ki. usne apna dukh parmeshvar ko bataya aur usse mannat maani ki agar uska ek beta hua, to woh use pavitra dere mein seva karne ke liye de degi jahaan israeli parmeshvar ki upasna karte the.—1 shamooel 1:11.

parmeshvar ne hanna ki prarthna sun li aur use ek beta diya. hanna ne apna vaada nibhaya aur jab shamooel chhota bachcha tha tabhi woh use pavitra dere mein seva karne ke liye le gayi. (1 shamooel 1:27, 28) hanna har saal bin aasteen ka ek chhota-saa baaga banakar shamooel ke liye le jaati thi. baad mein parmeshvar ki aasheesh se hanna ke paanch aur bachche huye. teen bete aur do betiyaan.—1 shamooel 2:18-21.

hanna se hum kya seekhte hain? hanna ne prarthna karke apne dil ka saara haal yahova ko bataya. isliye woh apna dukh seh paayi. baad mein usne parmeshvar ko dhanyavad dene ke liye ek prarthna ki jo 1 shamooel 2:1-10 mein likhi hui hai. hanna ki us prarthna se hum jaan sakte hain ki use parmeshvar par kitna vishvas tha.

▸ hanna ke baare mein zyada jaanne ke liye yah lekh padhiye: “usne dil kholkar parmeshvar se prarthna ki.”
▸ parmeshvar ne bahot pehle apne logon ko ek-se-zyada shaadiyaan kyon karne di, yah jaanne ke liye yah lekh padhiye: “kya parmeshvar ek-se-zyada shaadiyaan karne ki ijazat deta hai?”

havva

havva kaun thi? woh duniya ki sabse pehli aurat thi. agar aurton ki baat ki jaaye, to bible mein sabse pehle havva ka zikra aata hai.

usne kya kiya? usne parmeshvar ki aagya tod di. havva aur uske pati aadam ko paripoorna banaya gaya tha. unhein apne faisle khud karne ki aazadi di gayi thi aur parmeshvar ke jaise gun dikhane ke kaabil banaya gaya tha. jaise pyar aur buddhi. (utpatti 1:27) parmeshvar ne aadam ko saaf-saaf bataya tha ki agar woh falan ped ka fal khaayenge, to mar jaayenge. havva yah baat jaanti thi. magar shaitan ne use behka diya ki fal khaane se woh nahin maregi balki aur bhi khush rahegi. isliye usne woh fal khaa liya aur apne pati ko bhi khilaya.—utpatti 3:1-6; 1 timuthiyus 2:14.

havva se hamein kya sabak milta hai? parmeshvar ne use saaf shabdon mein ek aagya di thi, magar usne woh aagya tod di aur jise paane ka use hak nahin tha uske liye woh lalchane lagi. havva se hamein sabak milta hai ki agar hum apne andar buri ichhaon ko badhne deinge, to hum khatre mein pad sakte hain.—utpatti 3:6; 1 yuhanna 2:16.