“Indi Na Ako Kaagwanta!”
May isa ka balay nga daw ginpabay-an na. Sa sulod sang mga tinuig, madamo na nga bagyo ang nag-agi sa sini kag madali na lang ini maguba.
AMO man sini ang nagakatabo sa madamo nga pag-asawahay subong. Nagabatyag ka bala nga ang inyo pag-asawahay daw maguba man? Kon sa bagay, ang tanan nga mag-asawa may mga problema gid. Ang matuod, ang Biblia maathag nga nagsiling nga ang mga mag-asawa may “adlaw-adlaw nga palaligban.”—1 Corinto 7:28, Maayong Balita nga Biblia.
Ang isa ka grupo sang mga researcher nag-ugyon sa sini. Suno sa ila, ang pag-asawahay amo “ang pinakamakatalagam nga hilikuton nga normal na nga ginahimo sang kalabanan subong. Ang relasyon nga puno sing kalipay kag saad sa umpisa mahimo mangin daku nga kapaslawan kag amo ang pinakamasakit nga maagihan sang isa ka tawo.”
Kamusta ang inyo pag-asawahay? Nagakatabo man bala sa inyo ang mga masunod?
Pirme nagabaisay
Nagahabuyanay sing masakit nga mga tinaga
Pagluib
Kaugot sa isa kag isa
Kon ang inyo pag-asawahay daw maguba na gid, ano ang inyo himuon? Pagbulagay bala ang solusyon?
