ANG Indonesia ginahuman sang 17,000 ka isla. Kilala ang mga tawo diri nga mainabyanon, mapinasensiahon, matinahuron, kag maabiabihon.

Ang kinaandan nga pagkaon sa Indonesia nagalakip sang kan-on, makahang nga mga sud-an, kag prutas. Sa pila ka lugar, tradisyon sang mga pamilya nga maglumpiga sa salog kag magkinamot kon nagakaon. Suno sa ila, mas manamit kuno ang pagkaon kon amo sini ang paagi.

Mahiligon ang mga Indonesian sa art, saot, kag musika. Ang anklong amo ang ila kinaandan nga instrumento; ginahuman ini sang nagaidas nga kawayan sa isa ka balayan. Ginaplastar ang mga kawayan para makapagua sang isa ka nota ukon chord kon uyugon ini. Para makatokar, kinahanglan magbuligay ang pila ka tawo paagi sa pag-uyog sang iya anklong sa husto nga tayming.

Antes sang ika-15 nga siglo C.E., ang Indonesia naimpluwensiahan sang Hinduismo kag dayon sang Budhismo. Sang ika-16 nga siglo, nasamuan sang Islam ang kultura sang Indonesia. Sini man nga siglo nag-abot ang mga taga-Europa para mangita sang mga panakot kag dala nila ang mga relihion sang Cristiandad.

 Ang mga Saksi ni Jehova, nga kilala sa ila hilikuton nga pagtudlo sa Biblia sa bilog nga kalibutan, nangin aktibo sa Indonesia sugod pa sang 1931. Subong, mga 22,000 na sila sa Indonesia kag nagatinguha gid sila nga mawalihan ang mga apa. Sining karon lang, sobra sa 500 ang nagtambong sa espesyal nga miting sa sign-language nga ginhiwat sang mga Saksi ni Jehova para selebrahon ang kamatayon ni Jesucristo.