1. Ano ang pinakaimportante nga sahi sang gugma, kag ngaa? (Tan-awa ang piktyur sa umpisa sini nga artikulo.)

ANG gugma nga nabase sa husto nga prinsipio (a·gaʹpe) isa ka regalo ni Jehova. Sia ang ginhalinan sini. (1 Juan 4:7) Amo ini ang pinakaimportante nga sahi sang gugma. Nalakip sa sini nga gugma ang pagpakita sang pagpalangga. Pero, indi lang ini balatyagon. Mapakita ini paagi sa paghimo sang mga buhat nga para sa kaayuhan sang iban. Suno sa isa ka reperensia, ang a·gaʹpe “mapamatud-an lang paagi sa mga buhat” kay ginapalig-on kita sini nga maghimo sing maayo para sa iban. Kon nagapakita kita ukon ginapakitaan kita sini nga sahi sang gugma, may katuyuan ang aton kabuhi kag mangin malipayon kita.

2, 3. Paano ginpakita ni Jehova ang iya gugma sa mga tawo?

² Ginhigugma na ni Jehova ang mga tawo bisan antes pa niya gintuga sanday Adan kag Eva. Ginhimo niya ang duta para mangin puluy-an sang mga tawo asta san-o, kag kompleto ini sang aton mga kinahanglanon para mabuhi. Ginhimo man niya ang duta sa paagi nga mangin malipayon gid kita. Ginhimo ini ni Jehova para sa aton kaayuhan, indi para sa iya. Ginpakita pa gid niya ang iya gugma sa iya mga anak sa duta paagi sa paghatag sa ila sang  paglaum nga mabuhi sing wala sing katapusan sa Paraiso nga ginhimo niya para sa ila.

³ Sang magrebelde sanday Adan kag Eva, ginpakita ni Jehova ang iya pinakadaku nga ekspresyon sang gugma. Sigurado si Jehova nga higugmaon sia sang pila ka kaliwat nanday Adan kag Eva, gani nag-aman sia sing gawad. (Gen. 3:15; 1 Juan 4:10) Ang matuod, sang nagpromisa si Jehova sang isa ka Manluluwas sa palaabuton, daw pareho lang nga nahalad na ang gawad. Dayon, pagligad sang mga 4,000 ka tuig, daku ang ginsakripisyo ni Jehova sang ginhalad niya ang iya bugtong nga Anak para sa katawhan. (Juan 3:16) Nagapasalamat gid kita sa gugma ni Jehova!

4. Ano ang pamatuod nga puede magpakita sang gugma ang indi himpit nga mga tawo?

⁴ Mapakita man naton ang gugma bangod gintuga kita sang Dios suno sa iya larawan. Ang aton napanubli nga sala nagapabudlay sa aton nga magpakita sang gugma, pero indi buot silingon nga indi na naton ini mapakita. Ginpakita ni Abel ang iya gugma sa Dios paagi sa paghalad sang pinakamaayo. (Gen. 4:3, 4) Ginpakita ni Noe ang iya gugma sa iya isigkatawo paagi sa pagbantala sang mensahe sang Dios sa malawig nga tinuig bisan pa wala namati ang mga tawo. (2 Ped. 2:5) Kag ginpakita ni Abraham nga mas importante ang iya gugma sa Dios sangsa iya balatyagon sang ginsugo sia nga ihalad ang iya anak nga si Isaac. (Sant. 2:21) Pareho sining matutom nga mga tawo, gusto man naton ipakita ang gugma, bisan pa may mga kabudlayan.

5. Paano naton mapakita ang matuod nga gugma?

⁵ Ginapaathag sang Biblia nga ang matuod nga gugma ginapakita, “indi paagi sa hambal ukon sa dila, kundi paagi sa sinsero nga binuhatan.” (1 Juan 3:18) Buot bala silingon nga indi puede ipakita ang gugma paagi sa hambal? Puede. (1 Tes. 4:18) Ginapahangop sini nga dapat naton ipakita ang gugma indi lang sa hambal, ilabi na kon may kinahanglan kita himuon sa isa ka sitwasyon. Halimbawa, kon nagakinahanglan ang aton masigka-Cristiano, indi bastante ang pagsiling lang sa iya nga kuntani mangin maayo ang iya kahimtangan. (Sant. 2:15, 16) Sing kaanggid, bangod ginahigugma naton si Jehova kag ang aton isigkatawo, wala lang kita nagapangamuyo nga “magpadala sia sang mga mangangani” kundi nagabantala man kita sa aton bug-os nga masarangan.—Mat. 9:38.

6, 7. (a) Ano ang “gugma nga indi salimpapaw”? (b) Ano ang pila ka halimbawa sang indi matuod nga gugma?

⁶ Si apostol Juan nagsulat nga dapat maghigugma kita “paagi sa sinsero nga binuhatan.” Gani, ang aton gugma dapat “indi salimpapaw.” (Roma 12:9; 2 Cor. 6:6) Buot silingon nga indi naton mapakita ang matuod nga gugma kon pakunokuno lang ini, kay daw pareho lang nga nagasuksok kita sang maskara. Mahimo maghunahuna kita, ‘May gugma gid man bala nga salimpapaw?’ Wala. Indi na ini matawag nga gugma kay indi ini matuod kag wala ini sing pulos.

⁷ Binagbinaga ang pila ka halimbawa sang indi matuod nga gugma. Sa hardin sang Eden, sang gin-istorya ni Satanas si Eva, daw para sa kaayuhan ni Eva ang iya ginsiling, pero indi ini matuod kay ang iya ginhimo para lang sa iya kaayuhan. (Gen. 3:4, 5) Sang panahon ni David, ang ginhimo ni Ahitofel nagpamatuod nga indi sia matuod nga abyan sang hari. Nagtraidor si Ahitofel para sa iya kaugalingon nga kaayuhan. (2 Sam. 15:31) Amo man subong, ang mga apostata kag iban pa nga gusto magbahinbahin ang kongregasyon nagagamit sang “maayo nga paghambal kag pagdayawdayaw” para ipakita nga daw nagaulikid man sila, pero ang matuod, para lang ini sa ila kaayuhan.—Roma 16:17, 18.

8. Ano ang dapat naton ipamangkot sa aton kaugalingon?

⁸ Makahuluya gid ang indi matuod nga gugma bangod kabaliskaran ini sang diosnon nga kinaiya nga gugma nga handa magsakripisyo. Mahimo malimbungan ang tawo, pero  si Jehova indi. Ang matuod, nagsiling si Jesus nga ang pareho sa mga salimpapaw silutan “sing mabug-at gid.” (Mat. 24:51) Siempre, bilang mga alagad ni Jehova, indi naton gusto mangin salimpapaw. Pero, maayo nga pamangkuton naton ang aton kaugalingon, ‘Matuod bala pirme ang akon ginapakita nga gugma, ukon basi para lang ini sa akon kaayuhan kag pakitakita lang ini?’ Binagbinagon naton ang siam ka paagi nga mapakita naton ang gugma nga “indi salimpapaw.”

9. Ano ang himuon naton kon matuod ang aton gugma?

⁹ Mangin malipayon sa pag-alagad bisan indi ini matalupangdan. Bangod sang aton gugma sa mga kauturan, dapat handa kita magbulig sa ila “sa tago,” ukon indi na kinahanglan mahibaluan sang iban. (Basaha ang Mateo 6:1-4.) Napaslawan sa sini sanday Ananias kag Safira. Gusto nila nga dayawon sila sa ila pag-amot, gani nagbinutig sila kon pila ang ila gin-amot. Bangod sang ila pagkasalimpapaw, ginsilutan sila. (Binu. 5:1-10) Pero kon matuod nga ginahigugma gid naton ang aton mga kauturan, malipay kita sa pag-alagad sa ila kag wala naton ginahandum nga ipahibalo ini sa iban. Makatuon kita sa mga utod nga nagabulig sa Nagadumala nga Hubon sa paghanda sang espirituwal nga pagkaon. Indi nila luyag nga dayawon sila, kag wala nila ginapahibalo kon ano ang espesipiko nila nga ginahimo.

10. Paano kita makapanguna sa pagpadungog sa iban?

¹⁰ Manguna sa pagpadungog sa iban. (Basaha ang Roma 12:10.) Ginpakita ni Jesus kon paano padunggan ang iban paagi sa paghimo sang pinakakubos nga buluhaton. (Juan 13:3-5, 12-15) Para mailog si Jesus, dapat panikasugan gid naton nga mapalambo ang pagkamapainubuson kay kinahanglan ini para mapadunggan naton ang iban. Sang umpisa, wala mahangpan sing bug-os sang mga apostoles ang ginhimo ni Jesus. Sang ulihi na lang nila ini nahangpan sang nabaton nila ang balaan nga espiritu. (Juan 13:7) Mapadunggan naton ang iban paagi sa indi pagpakataas sang aton kaugalingon bangod sang aton naeskwelahan, manggad, ukon mga pribilehiyo sa pag-alagad kay Jehova. (Roma 12:3) Kag sa baylo nga mahisa sa mga nakabaton sing pagdayaw, dapat kita magkalipay upod sa ila bisan pa pamatyag naton dapat man kita dayawon.

11. Ngaa dapat sinsero ang aton komendasyon?

¹¹ Maghatag sing sinsero nga komendasyon. Dapat kita mangita sing kahigayunan nga komendahan ang iban bangod “makapabakod” ini. (Efe. 4:29) Pero, dapat sinsero kita. Kay kon indi, mahimo nga ginadayawdayaw lang naton sila ukon ginalikawan lang naton ang aton responsibilidad nga maglaygay. (Hulu. 29:5) Salimpapaw kita kon komendahan naton ang isa pero libakon man naton sia pagkatapos. Indi salimpapaw si apostol Pablo kag maayo sia nga halimbawa sang pagpakita sing matuod nga gugma sa iban. Halimbawa, sinsero nga ginkomendahan niya ang mga Cristiano sa Corinto parte sa ila maayo nga ginhimo. (1 Cor. 11:2) Pero sang indi maayo ang ila ginhimo, mainayuhon kag maathag nga ginsiling niya sa ila kon ngaa dapat sila laygayan.—1 Cor. 11:20-22.

12. Paano naton mapakita ang matuod nga gugma kon nagaabiabi kita sa iban?

¹² Mangin maabiabihon. Ginsugo kita ni Jehova nga mangin maalwan sa aton mga kauturan. (Basaha ang 1 Juan 3:17.) Pero, dapat husto ang aton motibo, kag indi para sa aton kaayuhan. Pamangkuton naton ang aton kaugalingon: ‘Ang ginaabiabi ko lang bala amo ang akon suod nga mga abyan, ang mga prominente sa kongregasyon, ukon ang mga makabalos sa akon? Ukon nagapangita bala ako sing paagi nga mabuligan ang mga kauturan nga indi ko masyado kilala ukon wala sing ibalos sa akon?’ (Luc. 14:12-14) Ano abi kon kinahanglan buligan ang aton utod bangod sang iya indi maayo nga desisyon? Ukon ano abi kon wala kita ginpasalamatan sang aton utod  nga gin-agda naton sa aton balay? Sa sini nga mga sitwasyon, dapat naton iaplikar ini nga laygay: “Mangin maabiabihon kamo sa isa kag isa nga wala nagakumod.” (1 Ped. 4:9) Kon sundon naton ini, mabatyagan naton ang kalipay nga resulta sang paghatag nga may husto nga motibo.—Binu. 20:35.

13. (a) Ngaa kinahanglan ang pagkamapinasensiahon kon nagabulig sa mga maluya? (b) Paano naton buligan ang mga maluya?

¹³ Buligi ang mga maluya. Ang sugo sang Biblia nga “sakdaga ang mga maluya, kag mangin mapinasensiahon sa tanan” mahimo magtilaw kon bala matuod gid ang aton gugma. (1 Tes. 5:14) Madamo nga mga maluya sang una ang nangin malig-on ang pagtuo sang ulihi, pero ang iban nagakinahanglan sang aton pagkamapinasensiahon kag padayon nga bulig. Mahimo naton sila palig-unon paagi sa pagpaambit sa ila sang mga teksto sa Kasulatan, paghagad sa ila nga updan kita sa ministeryo, ukon paghatag sa ila sang tion nga pamatian sila. Dugang pa, imbes nga kabigon ang isa ka utod nga “mabakod” ukon “maluya,” dapat naton dumdumon nga tanan kita may maayo nga mga kinaiya kag may mga kaluyahon man. Bisan si apostol Pablo nag-aku nga may mga kaluyahon man sia. (2 Cor. 12:9, 10) Gani, tanan kita nagakinahanglan sang bulig sang aton mga kauturan.

14. Ano ang dapat naton himuon para may paghidait kita sa aton mga kauturan?

¹⁴ Magpakighidait. Ginahimo naton ang tanan para may paghidait kita sa aton mga kauturan, bisan pa pamatyag naton wala nila kita nahangpan ukon indi husto ang ginhimo sa aton. (Basaha ang Roma 12:17, 18.) Kon mangayo kita sing pasaylo, madula sini ang kalain sang buot. Pero, dapat sinsero kita. Halimbawa, sa baylo nga magsiling, “Pasensiaha lang ’ko, pero wala na ’ko sing mahimo kon amo ’na ang ginabatyag mo,” mas maayo nga akuon naton ang aton sala paagi sa pagsiling, “Pasensia gid nga naglain ang imo buot sa akon ginhambal.” Importante ang paghidait ilabi na sa mga mag-asawa. Dapat likawan sang bana kag asawa nga magpakitakita nga nagahigugmaanay sila kon may iban nga tawo, pero kon silahanon na lang, wala sila nagabugnuhanay, nagahambal sila sang masakit nga mga tinaga, ukon nagasakitanay pa gani sa pisikal.

15. Paano naton mapakita nga matuod ang aton pagpatawad?

¹⁵ Magpatawad sing kinabubut-on. Kon may nakasaklaw sa aton, nagapatawad kita kag wala kita nagahinakit. Paagi sa ‘pagbatas sa isa kag isa sa gugma, pagpakighidait sa isa kag isa, kag pagtinguha nga tipigan ang paghiusa nga nabaton naton paagi sa balaan nga espiritu,’ mapatawad naton sing kinabubut-on bisan ang mga wala nakahibalo nga nasaklaw gali nila kita. (Efe. 4:2, 3) Para mangin matuod ang aton pagpatawad, dapat naton kontrolon ang aton hunahuna para indi naton ‘pag-isipon ang kahalitan.’ (1 Cor. 13:4, 5) Kon maghinakit kita, mahimo maguba ang aton kaangtanan sa aton mga kauturan kag kay Jehova. (Mat. 6:14, 15) Mapakita man naton nga sinsero ang aton pagpatawad kon ipangamuyo naton ang mga nakasala sa aton.—Luc. 6:27, 28.

16. Paano naton dapat tamdon ang aton mga pribilehiyo sa pag-alagad kay Jehova?

 ¹⁶ Isakripisyo ang kaugalingon nga kaayuhan. Kon makabaton kita sang mga pribilehiyo sa pag-alagad kay Jehova, dapat naton ini tamdon nga kahigayunan para mapakita nga matuod ang aton gugma paagi sa ‘indi paghunahuna sang aton kaugalingon nga kaayuhan, kundi sang kaayuhan sang iban.’ (1 Cor. 10:24) Halimbawa, sa mga asembleya kag kombension, una nga nagasulod ang mga atendant sa tilipunan. Sa baylo nga gamiton ang ila asaynment para makareserba sing pinakamaayo nga puesto para sa ila kag sa ila pamilya, madamo nga atendant ang nagapili sang indi masyado maayo nga puesto sa seksion sang tilipunan nga gin-asayn sa ila. Paagi sa pagsakripisyo sang ila personal nga kaayuhan, ginapakita nila ang matuod nga gugma. Paano mo mailog ang ila maayo nga halimbawa?

17. Kon ang isa ka Cristiano nakahimo sing serioso nga sala, ano ang himuon niya kon may matuod sia nga gugma?

¹⁷ Itu-ad ang tago nga mga sala kag untati ang paghimo sini. Ang pila ka Cristiano nagtago sang ila nahimo nga serioso nga sala para indi sila mahuy-an ukon para indi masaklaw ang iban. (Hulu. 28:13) Pero indi ini pagpakita sang gugma, kay ginahalitan sini ang nakasala kag ang iban. Ginaupangan sini ang espiritu sang Dios kag mahimo maguba ang paghidait sa kongregasyon. (Efe. 4:30) Kon ang isa ka Cristiano nakahimo sing serioso nga sala, ang matuod nga gugma magapalig-on sa iya nga magpakighambal sa mga gulang para mabuligan sia.—Sant. 5:14, 15.

18. Daw ano ka importante ang matuod nga gugma?

¹⁸ Ang gugma amo ang pinakaimportante sa tanan nga kinaiya. (1 Cor. 13:13) Paagi sini, makilala kita nga mga sumulunod ni Jesus kag ginailog naton si Jehova, ang ginhalinan sang gugma. (Efe. 5:1, 2) “Kon wala ako sing gugma, wala ako sing pulos,” sulat ni Pablo. (1 Cor. 13:2) Kabay pa nga padayon naton nga ipakita ang aton gugma “indi [lang] paagi sa hambal . . . kundi paagi sa sinsero nga binuhatan.”