1-3. (a) Ano ang kahimtangan sang katawhan ni Jehova sang nagpanagna si Zacarias? (b) Ngaa ginpangabay ni Jehova ang iya katawhan nga ‘magbalik sa iya’?

ISA ka nagalupad nga linukot, isa ka babayi sa sulod sang sulukban nga may takop, kag duha ka babayi nga nagalupad sa hangin nga may mga pakpak nga daw mga pakpak sang dugwak. Ini nga mga palanan-awon makita sa libro ni Zacarias. (Zac. 5:1, 7-9) Ngaa ginpakita ni Jehova ining makatilingala nga mga palanan-awon sa iya manalagna? Ano ang kahimtangan sang mga Israelinhon sadto nga tion? Paano kita nadalahig sa sini nga mga palanan-awon?

² Sang 537 B.C.E., nagkalipay ang katawhan nga nadedikar kay Jehova. Pagkatapos sang 70 ka tuig nga malawig nga pagkabihag, ginhilway sila sa Babilonia. Gusto na gid nila magbalik sa Jerusalem para patindugon liwat ang templo kag simbahon si Jehova didto. Sang 536 B.C.E., ginpasad ang pundasyon sang templo. Sadto nga tion, ang katawhan ‘nagasininggit sing mabaskog, kag mabatian ini bisan sa malayo.’ (Esd. 3:10-13) Pero naggrabe pa gid ang mga pagpamatok sa ila ginahimo. Nagluya ang buot sang mga tawo bangod  sang madamo nga problema kag kabudlayan, gani ginbiyaan nila ang pagpatindog sang templo kag nagkonsentrar sila sa pag-atipan sa ila mga balay kag uma. Pagligad sang 16 ka tuig, wala gihapon matapos ang templo ni Jehova. Ang katawhan sang Dios kinahanglan pahanumdumon nga dapat sila magbalik kay Jehova kag untatan nila ang pag-una sang mga butang nga para lang sa ila kaayuhan. Gusto ni Jehova nga magbalik sila sa iya, nga alagaron nila sia liwat sing bug-os tagipusuon kag may kaisog.

³ Para mabuligan ang iya katawhan nga madumduman kon ngaa ginhilway sila sa Babilonia, ginpadala sang Dios ang iya manalagna nga si Zacarias sang 520 B.C.E. Ang ngalan mismo ni Zacarias nagakahulugan sing “Gindumdom ni Jehova.” Bisan pa nalipatan nila ang pagluwas ni Jehova sa ila, gindumdom gihapon sang Dios ang iya katawhan. (Basaha ang Zacarias 1:3, 4.) Mahigugmaon nga ginpasalig niya sila nga buligan niya sila nga ipasag-uli ang matuod nga pagsimba, pero malig-on man niya sila nga ginpaandaman nga indi niya pagbatunon ang pagsimba nga indi bug-os tagipusuon. Binagbinagon naton kon paano sila ginpalig-on ni Jehova paagi sa ikan-om kag ikapito nga palanan-awon ni Zacarias. Ano ang matun-an naton sa sini?

4. Ano ang nakita ni Zacarias sa iya ikan-om nga palanan-awon, kag ngaa ang atubang gid kag likod sang linukot ang ginsulatan? (Tan-awa ang una nga piktyur sa umpisa sini nga artikulo.)

⁴ Ang kapitulo 5 sang Zacarias nagasugod paagi sa makatilingala nga palanan-awon. (Basaha ang Zacarias 5:1, 2.) Nakita ni Zacarias nga nagalupad ang isa ka linukot nga mga siam ka metro ang kalabaon kag mga apat ka metro kag tunga ang kasangkaron! Nahumlad ini kag may nakasulat nga mensahe sang paghukom sa atubang kag sa likod sini. (Zac. 5:3) Sa masami, ang atubang lang sang linukot ang ginasulatan, gani ini nga linukot nagaunod sing importante gid nga mensahe.

5, 6. Ano ang pagtamod ni Jehova sa pagpangawat?

⁵ Basaha ang Zacarias 5:3, 4. Matuod, ang tanan nga tawo manabat kay Jehova, pero ilabi na gid ang iya katawhan nga ginatawag sa iya ngalan. Nahibaluan sang mga nagahigugma sa Dios nga ang pagpangawat ‘nagapakahuya sa ngalan sang ila Dios.’ (Hulu. 30:8, 9) Ang iban mahimo maghunahuna nga indi sala ang pagpangawat basta may maayo nga rason. Pero bisan daw maayo man ang rason sang nagapangawat, ginapakita niya nga mas importante sa iya ang iya makagod nga handum kag mas ginapabaloran niya ang materyal nga mga butang sangsa Dios. Ginapakadiutay niya ang kasuguan sang Dios, kag indi importante sa iya si Jehova kag ang Iya ngalan.

⁶ Natalupangdan mo bala sa Zacarias 5:3, 4 nga “magasulod [ang pagpakamalaut] sa balay sang kawatan . . . kag magapabilin ini sa iya balay kag gub-on sini ang iya balay”? Ang paghukom ni Jehova indi mapunggan sang mga baral kag kandado. Masulod sini ang bisan ano nga lugar nga ginapanaguan para ibuyagyag ang sala sang katawhan ni Jehova. Mahimo taguon sang nagpangawat ang iya ginhimo sa mga awtoridad, sa iya amo, sa mga gulang, ukon sa iya mga ginikanan, pero indi niya ini matago sa Dios. Pat-uron sang Dios nga mabuyagyag ang tanan nga ginhimo nga pagpangawat. (Heb. 4:13) Makalilipay magpakig-upod sa mga tawo nga nagapanikasog gid nga mangin bunayag “sa tanan nga butang”!—Heb. 13:18.

7. Ano ang ginatudlo sa aton sang palanan-awon parte sa nagalupad nga linukot?

⁷ Ang tanan nga sahi sang pagpangawat ginakangil-aran ni Jehova. Isa ka kadungganan para sa aton nga sundon ang mataas nga talaksan ni Jehova kag magkabuhi sa paagi nga wala nagapakahuya sa iya ngalan. Kon himuon naton ini, indi kita madalahig sa paghukom ni Jehova batok sa mga tawo nga hungod nga nagalapas sang iya kasuguan.

8-10. (a) Ano ang panumpa? (b) Ano ang ginpanumpa ni Hari Sedequias nga wala niya gintuman?

⁸ Masunod nga ginpaandaman sang nagalupad nga linukot ang mga ‘nagapanumpa sing butig sa ngalan sang Dios.’ (Zac. 5:4) Ang panumpa isa ka pagpahayag para pamatud-an nga ang isa ka butang matuod, ukon solemne nga panaad nga ang isa ka persona magahimo ukon indi maghimo sang isa ka butang.

⁹ Isa gid ka serioso nga butang ang magpanumpa sa ngalan ni Jehova. Makita naton ini sa natabo kay Sedequias nga amo ang katapusan nga hari nga naggahom sa Jerusalem. Nagpanumpa sia sa ngalan ni Jehova nga magapasakop sia sa hari sang Babilonia. Pero, wala niya ini gintuman. Bangod sini, ginhukman sia ni Jehova, nga nagasiling: “Subong nga buhi ako, . . . mapatay [si Sedequias] sa Babilonia, sa lugar sang hari nga nagpapungko sa iya sa trono, ang hari nga ang panumpa gintamay niya kag ang katipan ginlapas niya.”—Ezeq. 17:16.

¹⁰ Nagpanumpa si Hari Sedequias sa ngalan ni Jehova, gani ginpaabot ni Jehova nga tumanon ini ni Sedequias. (2 Cron. 36:13) Wala gintuman ni Sedequias ang iya ginpanumpa kag nagpangayo sia sing bulig sa Egipto para mahilway sia sa Babilonia. Pero, wala sia mabuligan sang Egipto.—Ezeq. 17:11-15, 17, 18.

11, 12. (a) Ano ang pinakaimportante nga panaad nga mahimo naton? (b) Ano dapat ang epekto sang aton dedikasyon sa aton adlaw-adlaw nga pagkabuhi?

¹¹ Ginapamatian man ni Jehova ang aton mga ginapromisa. Importante sa iya ang aton mga panaad, kag dapat naton ini tumanon para kahamut-an niya kita. (Sal. 76:11) Ang pinakaimportante nga promisa nga ginhimo naton amo ang aton pagdedikar kay Jehova. Ang dedikasyon amo ang solemne nga panaad nga alagaron si Jehova sing bug-os.

¹² Paano naton mapakita nga ginatuman naton ang aton dedikasyon sa Dios? Kon makaatubang kita sang mga pagtilaw, daku man ukon gamay, dapat makita sa aton desisyon nga ginapabaloran naton ang aton  panaad nga dayawon si Jehova “adlaw-adlaw.” (Sal. 61:8) Halimbawa, kon ang aton katrabaho ukon kaeskwela nagapakiat sa aton, ginasikway bala naton ini para ipakita nga ‘nalipay kita sa mga dalanon ni Jehova’? (Hulu. 23:26) Kon kita lang ang Saksi sa aton pamilya, nagapangayo bala kita sang bulig kay Jehova para mapakita naton pirme ang Cristianong personalidad bisan pa wala ini ginapakita sang iban? Adlaw-adlaw bala kita nga nagapangamuyo sa aton Amay sa langit para pasalamatan sia nga nangin bahin kita sang iya katawhan kag ginapalangga niya kita? Ginahatagan bala naton sang tion ang pagbasa sang Biblia adlaw-adlaw? Sang nagdedikar kita sa Dios, daw pareho lang nga nagpromisa kita nga himuon naton ang mga ini. Dapat naton ini tumanon. Kon bug-os ang aton pag-alagad kay Jehova, ginapakita naton nga ginahigugma naton sia kag matuod gid ang aton dedikasyon sa iya. Nagaalagad kita indi bangod nagasunod lang kita sa sugo, sa baylo, nagaalagad kita bangod amo ini mismo ang aton kabuhi. Makabenepisyo kita kon tumanon naton ang aton promisa. Ang aton katutom magahatag sa aton sing dalayawon nga palaabuton.—Deut. 10:12, 13.

13. Ano ang matun-an naton sa ikan-om nga palanan-awon ni Zacarias?

¹³ Ang ikan-om nga palanan-awon ni Zacarias nagbulig sa aton nga makita nga ang mga nagahigugma kay Jehova indi dapat magpangawat kag dapat nila tumanon ang ila panaad. Natun-an man naton nga wala ginbiyaan ni Jehova ang mga Israelinhon bisan pa sang madamo nila nga sala. Nahangpan niya ang ila mabudlay nga kahimtangan bangod ginapalibutan sila sang ila mga kaaway. Ginpakita niya nga ginatuman niya ang iya mga promisa, kag buligan niya kita nga tumanon man ang aton mga promisa. Ang isa ka paagi nga ginabuligan niya kita amo ang paghatag sa aton sing paglaum nga malapit na niya dulaon ang tanan nga kalautan sa bilog nga kalibutan. Ining matahom nga paglaum amo ang ginapadaku sang masunod nga palanan-awon ni Zacarias.

14, 15. (a) Ano ang nakita ni Zacarias sa iya ikapito nga palanan-awon? (Tan-awa ang ikaduha nga piktyur sa umpisa sini nga artikulo.) (b) Sa ano nagarepresentar ang babayi sa sulod sang efa nga sulukban, kag ngaa gintakpan ini?

¹⁴ Pagkatapos makita ni Zacarias ang nagalupad nga linukot, ginsilingan sia sang anghel nga ‘tan-awon kon ano ang nagapadulong.’ Ano ang nakita niya sa iya ikapito nga palanan-awon? Nakita niya ang isa ka sulukban nga ginatawag “efa.” (Basaha ang Zacarias 5:5-8.) Ang sulukban may “tipulon nga tingga nga takop.” Sang ginkuha ang takop, nakita ni Zacarias ang “isa ka babayi nga nagapungko sa sulod.” Ginpaathag sang anghel nga ang babayi sa sulukban amo ang “Kalautan.” Imadyina ang kahadlok ni Zacarias sang makita niya nga gusto maggua sang babayi! Pero maabtik nga ginduso sang anghel ang babayi pabalik sa sulukban kag ginbutang niya liwat ang mabug-at nga takop. Ano ang buot silingon sini?

¹⁵ Ginapakita sini nga indi pagtugutan ni Jehova ang bisan ano nga kalautan sa iya katawhan. Siguraduhon niya nga indi ini makaimpluwensia kag madula ini gilayon. (1 Cor. 5:13) Makita naton ini sa ginhimo sang anghel nga maabtik nga pagbutang liwat sang tingga nga takop sa sulukban.

16. (a) Ano ang nakita ni Zacarias nga natabo sa efa nga sulukban? (Tan-awa ang ikatlo nga piktyur sa umpisa sini nga artikulo.) (b) Diin dalhon sang mga babayi nga may mga pakpak ang efa nga sulukban?

¹⁶ Ang masunod nga nakita ni Zacarias amo ang duha ka babayi nga may puersado nga mga pakpak nga daw mga pakpak sang dugwak. (Basaha ang Zacarias 5:9-11.) Ini nga mga babayi tuhay gid sa babayi sa sulukban! Ginsabnit sini nga mga babayi ang sulukban nga nagaunod sang “Kalautan.” Diin nila ini dalhon? “Sa duta sang Sinar,” ukon Babilonia. Ngaa sa Babilonia?

17, 18. (a) Ngaa ang Sinar “nagakaigo nga lugar” para sa “Kalautan”? (b) Ano ang dapat naton himuon sa kalautan?

 ¹⁷ Para sa mga Israelinhon sang panahon ni Zacarias, ang Sinar nagakaigo gid nga lugar para sa “Kalautan.” Nahibaluan nila nga ang Babilonia puno sang imoral nga mga buhat kag ang mga tawo didto nagasimba sa butig nga mga dios. Si Zacarias kag ang iban pa nga Judiyo nga nakaistar didto dapat magpakigbato adlaw-adlaw para indi sila maimpluwensiahan sining pagano nga pungsod. Pat-od gid nga nalugpayan sila sa sini nga palanan-awon kay ginapasalig sini nga siguraduhon ni Jehova nga magapabilin nga matinlo ang putli nga pagsimba!

¹⁸ Pero, ini nga palanan-awon nagpahanumdom man sa mga Judiyo sang ila responsibilidad nga dapat putli pirme ang ila pagsimba. Wala ginatugutan ang kalautan sa katawhan ni Jehova kag indi ini dapat pagtugutan nga makasulod. Sang nangin bahin kita sang matinlo nga organisasyon sang Dios, nabatyagan naton ang iya gugma kag pag-amlig. Ang kada isa sa aton may responsibilidad nga huptan ini nga “balay” nga matinlo. Ang bisan ano nga kalautan wala ginatugutan sa aton espirituwal nga paraiso.

19. Ano ang ginatudlo sa aton sang makatilingala nga mga palanan-awon ni Zacarias?

¹⁹ Ang ikan-om kag ikapito nga mga palanan-awon ni Zacarias serioso nga paandam para sa mga nagahimo sing malain, kag pahanumdom ini nga wala ginatugutan ni Jehova ang kalautan. Para naman sa matutom niya nga mga sumilimba, dapat kangil-aran gid nila ang kalautan. Ini nga mga palanan-awon nagapasalig man sa aton sang gugma sang aton Amay sa langit. Kon ginapanikasugan gid naton nga mangin sahi sang tawo nga takus sa kahamuot kag pag-amlig sang Dios, indi kita pagpakamalauton nga nagaresulta sa kamatayon. Sa baylo, malipay si Jehova nga pakamaayuhon kita. Bisan pa mabudlay ang magpabilin nga matinlo sa sining kalibutan nga puno sang kalautan, makasalig kita nga masarangan naton ini sa bulig ni Jehova! Pero, paano naton masigurado nga magapadayon ang matuod nga pagsimba sa sining kalibutan nga puno sang kalautan? Ngaa makasalig kita nga amligan ni Jehova ang iya organisasyon samtang nagahilapit ang dakung kapipit-an? Binagbinagon naton ini nga mga pamangkot sa masunod nga artikulo.